Read Makassar Version – KITTA' MATANGKASA LUKAS 14 Bible Online

LUKAS 14 - Makassar Version – KITTA' MATANGKASA bible

LUKAS 14

¹Ri se'reang allo Pammari-mariang, a'lampai Isa angnganre ri balla'na se'reang tu Farisi. BattuNa Isa mange anjoreng, nicini'-ciniki tojemmi ri taua.

²Nia'mo se're tau garring akkambang battanna, kammayatompa akkambang-kambang bangkenna na limanna battu mae ri Isa.

³Akkuta'nammi Isa ri guru-guru agamaya siagang tu Farisi niaka anjoreng Nakana, “Manuru' atorang agamata, maka akkullejaki' amballei tau garringa ri allo Pammari-marianga?”

⁴Tenamo nakkana-kana anjo guru-guru agamaya siagang tu Farisia. Jari Nakio'mi Isa anjo taua, nampa Naballei. Le'baki anjo, Nasuromi anjo taua a'lampa.

⁵ Nampa Nakana Isa ri taua ngaseng, “Ebara'na nia' sitau ana'nu yareka sikayu sapinu tu'guru' antama' ri bungunga ri allo Pammari-marianga, maka tena nukkaro-karo ambesoki nai' anjo ana'nu yareka anjo sapinu, anjo memang alloa?”

⁶Mingka tenamo sitau akkulle appiali ri Isa ri anjo passalaka.

⁷Nacini'mi Isa nia' siapa are toana ammilei pammempoang bajika. Jari Nasaremi ke'nanga anne pangngajaranga, Nakana,

⁸ “Punna niundangko mange ri passua'-suarrang pa'buntinganga, teako mangei ammempo ri kaderana tunipakala'birika. Gassingka nia' tau mala'birangnganga niundang todong.

⁹Na punna battu anjo taua tarpassa lanasuro mako patanna pa'gaukang a'lette' ammempo nakana, ‘Kipammopporang mama' naki'lette' ammempo, nasaba' anne kaderaya le'ba'mi nipasadiang anjo toana beru battua.’ Jari tarpassa lasiri'-siri' mako, nampa a'lettekko mange ri pammempoang ri boko dudua.

¹⁰Lanri kammana, punna niundangko, pileimi pammempoang riboko dudua. Sollanna battu patanna balla' angkana ri kau nakana, ‘Maeki', ri dallekangki' ri pammempoang bajika ammempo.’ Jari nipakala'biri' mako ri dallekanna sikontu toana maraenga.

¹¹ Nasaba' inai-nai ampakalompoi kalenna, iami lanipakatuna, mingka inai-nai ampakatunai kalenna, iami lanipakalompo.”

¹²Nampa Nakana Isa ri patanna balla', “Punna angngundangko tau battu angnganre allo yareka angnganre bangngi, teako naagannu yareka sari'battannu akkalumanynyanga, yareka bijannu, yareka sambori'nu akkalumanynyanga nuundang. Gassingka lanaundang tongko, sa'genna nutarimami pa'balasa'na undangannu.

¹³Jari punna langnganre-nganreko, undammi tu kasi-asia, tu sala-salanga, tu pesoka, siagang tu butaya.

¹⁴Lanibarakkaki mako, nasaba' takkulleai nabalasa' ke'nanga kabajikannu. Mingka laNabalasaki Allata'ala anjo kabajikannu ri wattunna napabangung poleang tau bajika battu ri kamateanga.”

¹⁵Ri wattunna nalangngere' tau naaganga sipangnganreang akkana kamma Isa, nia'mo kalase'renna ke'nanga angkana, “Upa' sikali tau sipangnganreanga Allata'ala punna battu sallang salaku Karaeng!”

¹⁶Mingka Nakanamo Isa ri anjo taua, “Nia' se're wattu, nania' se're tau appare' passua'-suarrang lompo, na jai tau naundang.

¹⁷Ri wattunna lanipakkaramulamo passua'-suarranga, nasuromi palayanna anjo karaenga mange ri sikontu tau naundanga nakana, ‘Mae ngaseng maki', kale'ba' ngasemmi nipasadia!’

¹⁸Mingka massing appala' popporo' ngasemmi ke'nanga: Nia' angkana ri anjo palayanga nakana, ‘Pammopporanga', kaberu le'baka' ammali tampa' nakuparallu a'lampa mange amparessai.’

¹⁹Nia' tommo angkana, ‘Pammopporanga', kaberu le'baka ammalli limangngayoka sapi, nakuero' mange ancobai.’

²⁰Na maraengannaya nakana, ‘Beru le'baka' a'bunting, jari takkullea' mange anjoreng.’

²¹Jari ammotere'mi anjo palayanga ampauangi karaenna angkanaya takkulleai ke'nanga battu. Sanna'mi larrona anjo karaenga. Nampa nakanamo ri palayanna, ‘A'lampako linta' mange ri agang-agang lompoa siagang ri agang-agang sepe'-sepeka ri kotaya. Kioki siagang erangi mae anrinni tau kasi-asia, tau sala-salanga, tau butaya, siagang tau pesoka.’

²²Jari a'lampami anjo palayanga. Nale'ba'na nagaukang napassuroanga karaenna, nakanamo anjo palayanga ri anjo karaenga, ‘Le'ba'mi kukio' ngaseng anjo tau kipassuroanga karaeng, mingka jai iji pammempoang tena taunna.’

²³Jari nakanamo anjo karaenga, ‘A'lampamako assulu' ri pantaranganna kotaya, mangeko kioki tau niaka ri agang-agang lompoa, siagang ri sepe'-sepeka; suro ngasemmi ke'nanga battu, sollanna rassi ballakku.

²⁴U'rangi angkanaya, tena sikali manna sitau anjo tau le'baka niundang akkulle angkasiaki kanre niaka ri anne passua'-suarrangku!’ ”

²⁵Jai tau amminawang a'jappa siagang Isa. Assailemi Isa nampa Nakana ri ke'nanga,

²⁶ “Punna nia' tau battu mae ri Nakke, mingka la'bi nakamaseangi amma'na, manggena, bainenna, ana'-ana'na, sari'battanna ngaseng, yareka batangkalenna ba'lalo, takkulleai a'jari ana' gurungKu.

²⁷ Inai-nai taeroka ampisangi salli'na namminawang ri Nakke, takkulleai a'jari ana' gurungKu.

²⁸Punna nia' kalase'rennu ero' ambangung balla' tinggi, tantu ammempoi rolong anrekengi siapa ongkoso' naparalluanga. Jari akkullei naasseng angkanaya maka ganna'ji doe'na yareka tena, sa'genna akkulle napa'le'ba' anjo balla' lanabangunga.

²⁹Nasaba' punna le'ba'mo napakkaramulai napare' pundasina, mingka takkulleai napa'le'ba', anjo bangunanga, tena tanikakkalinna ri tau jaia ancinikai anjo jama-jamanga.

³⁰Tena tanakanana tau jaia, ‘Idende', erottongi ambangung anjo taua, natakkullea napa'le'ba'!’

³¹Punna nia' se're karaeng ero' a'lampa a'bundu' siagang karaeng maraenganga, na nia' sampulo sa'bu surudaduna, tantu ammempoi rolong anjo karaenga ampikkiriki, angkanaya maka lakassa'ji anjo surudaduna langngewai anjo musu lanadallekanga niaka ruampulo sa'bu surudaduna.

³²Punna naassengi angkanaya takassakai surudaduna, tantu nia' memammo nasuro mange ri musunna appala' dame ri bellana ija anjo musunna.”

³³Kala'busanna Nakanamo Isa, “Ikau kamma ngaseng tommako anjo. Tenanniakka manna sitau lakkulle a'jari ana' gurungKu, punna taerokako ambokoi ngasengi apa-apa niaka ri kau.”

³⁴“Anjo ce'laya bajiki; mingka punna a'jari la'bamo, maka lakkulleiji nipa'jari ce'la poleang?

³⁵Mattantu tenamo matu-matunna. Takkulleami nipa'matu-matu ri kokoa yareka lanipare' panynyoppongi lamung-lamung. Jari lanipela'mami. Punna nia' tolinnu, appilangngeri mako!”