Read Makassar Version – KITTA' MATANGKASA LUKAS 15 Bible Online

LUKAS 15 - Makassar Version – KITTA' MATANGKASA bible

LUKAS 15

¹ Ri se'reang allo, jai pasingara' sima siagang tau nicini' kodi sipaka ri tau jaia, battu ampilangngeri Isa angngajara'.

²A'moro-moromi tu Farisia siagang guru-guru agamaya. Nakanamo ke'nanga, “Pui', anne taua natarimai siagang naagangi sipangnganreang tau kodi sipaka!”

³Lanri kammana anjo Nacaritami Isa ri ke'nanga anne pangngebaranga, Nakana,

⁴“Ebara' angkana nia' kalase'rennu ammallaki sibilangngang kayunna gimbala', nampa tappela' sikayu — maka apa lanagaukang? Mattantu lanabokoi anjo gimbala'na salapampuloa assalapang kayunna ri paranga, nampa a'lampa amboyai anjo gimbala' tappelaka, sa'genna nagappa.

⁵Na punna nabuntulu' poleang anjo gimbala' tappelaka, mattantu lanasompoi anjo gimbalaka napakamma sanna' rannuna,

⁶nampa naerang ammotere'. Nampa nakio' ngaseng agang-aganna siagang sambori'na ngaseng, na nakana, ‘Umba nakiassua'-suara', nasaba' kugappami ammotere' gimbalakku tappelaka!’

⁷Jari kammatommi anjo ri suruga; punna nia' se're tau toba' lania' karannuang lompoangang, kala salapampulo assalapang tau bajikamo, tenayamo naparallu toba'.”

⁸“Yareka, ebara' angkana nia' sitau baine ammallaki sampulo doe' pera', natappela' se're — maka apa lanagaukang? Mattantu lapparinrai lampu nampa nabarrasa' balla'na siagang naboya sa'genna nagappa anjo doeka.

⁹Na ri wattunna nabuntulu'mo ammotere' anjo doeka, nakio'mi agang-aganna siagang sambori'na ngaseng, nampa nakana, ‘Sanna' rannuna nyawaku kakugappami ammotere' doekku tappelaka. Umba nakiassua'-suara'!’

¹⁰Kamma tomminjo rannuna malaeka'Na Allata'ala, punna nia' se're tau ja'dala' a'jari toba' battu ri dosa-dosana. Patappa'mi anne!”

¹¹Nakanamo pole Isa, “Nia' sitau mangge, rua ana'na bura'ne.

¹²Nakanamo ana'na bungkoa ri Ia, ‘O, Bapa', sareamma' nakke tawaku kamma-kamma anne battu ri pa'barang-baranganta.’ Jari nabagemi pa'barang-baranganna anjo taua mae ri anjo ruaya ana'na.

¹³Siapa are allo ribokoanganna, nabalukammi tawana anjo ana' bungkoa, nampa a'lampa mange ri se'reang pa'rasangang bella. Anjoreng ri pa'rasanganga napa'laboammi anjo doe'na nampa assannang-sannang.

¹⁴Na ri wattunna la'busu'mo doe'na, sitabang naalle tommi cipuru' lompo anjo pa'rasanganga. Sa'genna appakkaramulami a'jari susa tallasa'na anjo anaka.

¹⁵Jari a'lampami anjama ri se'reang tau anjoreng ri pa'rasanganga. Nisuromi mange akkalawaki bawi ri tampa'na anjo tau napanjamaya.

¹⁶Sanna' dudumi cipuru'na, sa'genna ero'mi nakanre anjo kanre bawia. Mingka manna nakamma, tena sikali tau ero' ansarei kanre.

¹⁷Kale'bakkanna nasassala'mi kalenna, na nakana lalang nyawana, ‘Tau anjama-jamaya ri manggeku kala'biangi ri kanre, nampa inakke anrinni lamate naallea' cipuru'!

¹⁸Erokka' a'lampa, ammotere' mae ri manggeku, nampa kukana ri ia: O, Bapa', dorakama' mae ri Allata'ala siagang mae ri katte.

¹⁹Tenamo nakusiratang nibilang ana' ri katte. Kipare' mama' tau anjama-jamata.’

²⁰Le'baki akkana kamma lalang ri nyawana, ammotere'mi anjo anaka mae ri manggena. Bella iji battu ri balla'na nicini'mi ri manggena. Larimi battu manggena ambuntuli nampa naraka' siagang nabau, napakamma sanna' rannuna nyawana.

²¹Nakanamo anjo anaka, ‘O Bapa', dorakama' mae ri Allata'ala siagang mae ri katte. Tenamo kusiratang nikana anatta.’

²²Mingka nakio'mi manggena sikamma palayanna na nakana, ‘Lintakko! Angngalleko pakeang kaminang ga'gaya, nanupipakeangi. Pipakei cincing karemenna, siagang pipakei sapatuna.

²³Punna le'ba' angngalle mako sapi rungka siagang co'moka nampa nupolong. Langnganre-nganreki' siagang la'rannu-rannuki'.

²⁴Nasaba' le'ba'mi mate anne anakku, mingka kamma-kamma anne attallasa' poleammi.’ Jari appakkaramulami ke'nanga assua'-suara'.

²⁵Anjo wattua, sitabangi nia' ri kokoa ana' bungasaka. Ri wattunna ammotere' nanrapi' ri rampi' ballaka, nalangngere'mi sa'ra sulinga siagang tau a'dansaya.

²⁶Nakio'mi kalase'renna palayanna nampa nakuta'nang nakana, ‘Apa anne nagaukang taua ri balla'?’

²⁷Appialimi anjo palayanga nakana, ‘Niaki ammotere' anditta. Le'ba'mi assurommolong sapi rungka co'mo' manggeta, lanri nagappami ammotere' ana'na siagang salama'!’

²⁸Teaimi sipato' larrona anjo ana' bungasaka. Na taerokamo antama' ri ballaka. Jari assulu'mi manggena anynyonyoki nakio' antama' ri balla'.

²⁹Mingka nakanamo anjo anaka, ‘Attaung-taummi salloku akkareso ampanjamangki'. Tena le'bakai takugaukang apa kipassuroanga ri nakke. Na apa le'ba' kipassareang mae ri nakke? Manna sikayu bembe tale'baka' kisare lakupake assua'-suara' siagang agang-agangku!

³⁰Anjo anatta le'ba'mi napa'la'bu'-la'busu' barang-baranta siagang bai'-baine a'gau' salaya. Mingka sikalinna ammotere', ba'lalo kipammolongangi sapi rungka siagang co'moka!’

³¹Appialimi manggena nakana, ‘O, ana', ikau tuli nia'nu anrinni siagang inakke. Sikontu barang-barangku a'jari barang-barannu ngaseng tommi.

³²Mingka siratangki' assua'-suara' siagang a'rannu-rannu, lanri le'ba'mi mate anjo andi'nu, mingka kamma-kamma anne attallasa' poleangi; le'baki tappela', mingka kamma-kamma anne nibuntulu' poleammi.’ ”