Read Makassar Version – KITTA' MATANGKASA LUKAS 16 Bible Online

LUKAS 16 - Makassar Version – KITTA' MATANGKASA bible

LUKAS 16

¹Nakana Isa ri ana'-ana' gurunNa, “Nia' se're tau kalumanynyang. Na nia' sitau pagawena nasarea ammolika doe' siagang angngurusukai pa'barang-baranganna. Nia'mo tau ampabattuangi angkanaya nipa'laboangi doe'na ri anjo pagawe ambolikai doe'na.

²Jari nasuro kio'mi anjo pagawena ammolika doe' na nakana, ‘Apa kutadeng nugaukangangi barang-barangku? Kamma-kamma anne kukellaiko ampakasingarianga' baji'-baji' antekamma lampa-lampana batenu angngurusuki pa'barang-barangangku. Tenamo kukellaiko amboliki doekku.’

³Jari appikkiri'mi anjo pagawena ammolika doe' nakana, ‘Lanapasulukka' anjama karaengku. Jari apami parallu kugaukang kamma-kamma anne? Erokka' ammingkung anjama tana, natakukullea; lamangea' appala'-pala', nakusiri'-siri'.

⁴Mingka nia' akkala', ri tenanapa nipasulukka', musti a'boya memamma' passari'battangang jai-jai, eroka sallang ampariballakka' punna nipasulukka'!’

⁵Jari nakio' ngasemmi sikamma tau kainranganga ri karaenna. Ri wattunna nia'mo battu sikamma tau kainranganga nakanamo ri makase'rea, ‘Siapa jaina inrannu ri karaengku?’

⁶Appialimi anjo taua nakana, ‘Sibilangngang botolo' minynya'-minynya' zaitun.’ Nakanamo anjo pagawea, ‘Allei anne sura' pangnginrangannu. Ammempoko nampa nusambei linta' a'jari limampulo.’

⁷Nampa nakana mae ri tau makaruaya, ‘Na ikau siapa jaina inrannu?’ Appialimi anjo taua nakana, ‘Sisa'bu karung gandung.’ Nakanamo anjo pagawena ammolika doe', ‘Allei anne sura' pangnginrangannu. Sambei a'jari sagantuju bilangngang.’

⁸Jari nipujimi ri karaenna anjo pagawe ammolika doe' tenaya nalambusu' ri jama-jamanna, lanri cara'de'na a'boya akkala'. Nasaba' cara'dekangangi tau ammantanga lalang lino angngurusuki urusanna kala tau ammantanga lalang ri singaraka.”

⁹Le'baki anjo, a'bicarami pole Isa Nakana, “Pilangngeri anne! Pa'matu-matui pa'barang-barangannu ri anne linoa a'boya passari'battangang, sollanna punna tenamo anggaranna pa'barang-baranganga ri anne linoa, lanitarima mako ammantang ri pammantangang mannannunganga.

¹⁰Inai-nai akkulle nipatappa' ri passala' apa ca'di-ca'dia iami akkulle tongi nipatappa' ri passala' apa-apa lompoanganga. Mingka inai-nai takkullea nipatappa' ri passala' apa ca'di-ca'dia, takkullea tongi nipatappa' ri passala' apa-apa lompoanganga.

¹¹Jari punna takkulleako nipatappa' ri passala' pa'barang-barangang lalanga ri linoa, inai laero' ampatappakko ri passala' pa'barang-barangang surugaya?

¹²Siagang punna ma'nassamo angkanaya takkulleako nipatappa' ri passala' pa'barang-baranganna parannu tau, inaimi laero' assareangko pa'barang-barangang kalennu todong?

¹³ Tenanniakka se're tau akkulle anjama mae ri ruaya pinggawa; nasaba' nia' lala'bi nakamaseangngang na maraengannaya, yareka la'bi jarrekangngangi pa'mai'na ri se'reanga na maraengannaya. Na nia' tanakamaseang. Kamma ngaseng tommako anjo. Takkulleako anjama-jama untu' Allata'ala nuanjama-jama todong untu' pa'barang-baranganga.”

¹⁴Nalangngere' ngasengi tu Farisia sikamma Napaua Isa. Nikakkalimi Isa ri ke'nanga, lanri nangaina ke'nanga doeka.

¹⁵Mingka Nakanamo Isa ri ke'nanga, “Ikau ngaseng mintu bajika ngaseng nicini' ri dallekanna tau maraenga, mingka Naassengi Allata'ala bonena atinnu. Nasaba' apa nacini' tinggia rupataua iami Nacini' tuna Allata'ala.

¹⁶ Sikamma atorang battua ri Musa siagang pangngajaranna na'bi-na'bia tuli nipakei sa'genna battu Yohanes Paje'ne'. Pakkaramula anjo wattua tuli nibirittakammi Kabara' Baji' ri passala' antekamma bateNa ammarenta Allata'ala. Siagang napassami kalenna taua a'boya oloang ero' antama' a'jari umma'Na Allata'ala.

¹⁷ Mingka la'bi lomoangangi lanynya' langika siagang linoa kala lanipattaenai se'rea hurupu'na Atorang battua ri Allata'ala.

¹⁸ Inai-nai antallaki bainenna, nampa a'bunting siagang baine maraeng, iami a'gau' salimara'. Siagang inai-nai bura'ne ambuntingi anjo baine le'baka nitalla', a'gau' salimara' tommi.”

¹⁹“Nia' se're tau kalumanynyang. Sangnging care-care ka'jala' ballinna napake, siagang sangnging te'nena katallassang allo-allona.

²⁰Na ri dallekang pakke'bu' balla'na nia' se're tau kasi-asi dudu niarenga Lazarus. Rassi ngaseng kalenna puru-puru.

²¹Manna kongkonga battu tommi allepaki puru-puruna. Naero' dudumo nasa'ring angnganre, manna sesa-sesa kanre tu'gurukamo battu ri mejang pangnganreanna anjo tau kalumanynyanga.

²²Tena nasallo, matemi anjo tau kasi-asia. Nierammi ri malaekaka mange ri tampa' kaminang la'birika, iamintu ri sa'rinna Abraham ri suruga. Tena nasallo pole, mate tommi anjo tau kalumanynyanga nanitarawang.

²³Sanna'mi sessana nasa'ring ammantang ri lino pammantanganna tau matea. Na ri wattunna accini' battu rawa nai' nacini'mi battu bella Abraham siagang Lazarus ammempo ri sa'rinna Abraham.

²⁴A'gorami anjo tau kalumanynyanga angkioki Abraham nakana, ‘O, Pa' Abraham! Kikamaseang laloa'. Kisuro sai Lazarus ambasai karemenna antama' ri je'neka nampa naung mae ambassai lilaku. Teai sipato' sessana kusa'ring ammantang lalang ri anne pepeka!’

²⁵Mingka appialimi Abraham nakana, ‘U'rangi ana' angkanaya: lalang sikontu tallasa'nu le'ba'mi kau nugappa siagang nukasia' sikontu apa-apa bajika; mingka Lazarus sangnging apa-apa kodia bawang le'ba' nagappa. Kamma-kamma anne nakasia' tommi Lazarus te'nea anrinni, na ikau nukasia' tommi sessaya.

²⁶Nampa kamma-kamma anne nasimbang maki' se're kali'bong sannaka lantanna, sollanna takkullea tau niaka anrinni a'limbang mange antureng, kammayatompa tau niaka antureng takkulleai a'limbang mae anrinni!’

²⁷Nakanamo anjo tau kalumanynyanga, ‘Punna padeng kamma bapa', kupala' dudui ri katte sollanna kisuro Lazarus mange ri balla'na manggeku.

²⁸Nasaba' nia' lima sari'battangku anjoreng. Kisuro sai Lazarus ampakaingaki ke'nanga, sollanna tena lalo natu'guru' todong ke'nanga antama' ri tampa' passessaya anne.’

²⁹Appialimi Abraham nakana, ‘Nia'mo ri ke'nanga kitta'-kitta'na Na'bi Musa siagang kitta'-kitta'na na'bi-na'bi maraenganga! Boli'mi kamma nanaturuki ke'nanga sikamma apa tattulisika lalang ri anjo kitta'-kittaka!’

³⁰Mingka appialimi anjo tau kalumanynyanga nakana, ‘Tagannakapi anjo Bapa' Abraham. Mingka punna nia' tau mate attallasa' poleang, na mange ampakaingaki ke'nanga, latoba'mi ke'nanga ri massing dosa-dosana.’

³¹Mingka nakanamo Abraham, ‘Punna tena najampangi apa-apa napassuroanga Na'bi Musa siagang na'bi-na'bi maraenga, mattantu tena todong nalatappa' ke'nanga, manna pole nia' tau mate attallasa' poleang mange ampakaingaki ke'nanga!’ ”