Read Makassar Version – KITTA' MATANGKASA LUKAS 17 Bible Online

LUKAS 17 - Makassar Version – KITTA' MATANGKASA bible

LUKAS 17

¹Nakana Isa mae ri ana'-ana' gurunNa, “Mattantu lania' apa-apa a'jaria passabakkang na'gau' dosa taua. Mingka cilakami tau a'jaria passabakkang!

²Bajikangangi punna nigentungi batu kallonna nampa nipela' antama' ri tamparanga anjo tau kammaya, kala la'jaria passabakkang na'gau' dosa kalase'renna sikamma anne tau ca'dia.

³ Jari tutu laloko! Punna doraka sari'battannu, pakaingaki. Punna nasassala'mo kalenna, pammopporangi.

⁴Punna pintujui doraka ri kau lalanna siallo, natuli battu appala' popporo' ri kau nakana, ‘Pammopporanga',’ pammopporangi.”

⁵Nakana ana'-ana' gurunNa Batara Isa, “O Batara, Kipakajarreki tappa'na ikambe.”

⁶Appialimi Batara Isa Nakana, “Punna nia' tappa'nu manna sillompoja lisere'na sawi-sawia, akkulleko angkana ri anjo poko' kayua, ‘Ta'bi'bukko na nuattimbo ri tamparanga,’ mattantu lanapilangngeri kanannu anjo poko' kayua.”

⁷“Ebara'na nia' palayannu nusuro appa'jeko, yareka nusuro akkalawaki gimbala'. Punna ammotere' anjo palayanga battu ri tanaya, maka lanukana ri ia, ‘Maeko linta' angnganre’?

⁸Mattantu tena! Mingka lanukana, ‘Pasadianga' kanreku. Ammakeko care-care tangkasa' nunampa ammempo antayanga' sa'gengku le'ba' angnganre siagang angnginung; le'bappa' angnganre siagang angnginung nunampa akkulle angnganre.’

⁹Sai tenaja naparallu nipuji anjo palayanga lanri le'ba'namo nagaukang apa napassuroanga karaenna?

¹⁰Ikau kamma ngaseng tongko anjo. Punna le'ba'mo nugaukang sikamma nipassuroanga ri kau, angkana mako bawang, ‘Inakke poro palayang biasaja'; inakke poro a'matu-matukuji bawang ri jama-jamangku.’ ”

¹¹Lalang a'jappaNa Isa mange ri Yerusalem, anjorengi ri pa'baeng-baenna daera Samaria siagang Galilea angngolo.

¹²Ri wattunna antama' ri se'reang kampong, nia'mo sampulo tau garring sala battu mae ri Ia. Battu bellami ke'nanga ammenteng

¹³na'gora angkana, “O, Isa! O, Batara! Kikamaseangi anne ikambe!”

¹⁴ Ri wattunna Nacini' Isa ke'nanga, Nakanamo ri ke'nanga, “A'lampamako mae ri imang-imanga, nampa nupala' nanaparessa ke'nanga batangkalennu.” A'lampami anjo sampuloa tau garring sala mae ri imang-imanga. Na lalang a'jappana ke'nanga mange anjoreng, ti'ring ammari ngasemmi garring sala appakamalla'-malla'na ke'nanga.

¹⁵Ri wattunna naasseng kalenna angkana baji'mi, nia'mo kalase'renna ke'nanga ammotere' a'rannu-rannu mammuji ri Allata'ala.

¹⁶Nampa mange ri dallekanNa Isa, anynyomba appala' sukkuru' ri Isa. Anjo taua tau battu ri pa'rasangang Samaria.

¹⁷Nakanamo Isa, “Sai nia' sampulo tau a'jari baji'? Kemaei anjo tau salapanga?

¹⁸Angngapa naiaji bawang anne tau battu pantarang pa'rasanganga ammotere' appala' sukkuru' ri Allata'ala?”

¹⁹Nampa Nakana Isa ri anjo taua, “Ambangungko nai' siagang ammotere' mako. A'jari baji' mako lanri tappa'nu mae ri Nakke.”

²⁰Nia' siapa are tu Farisi akkuta'nang ri Isa angkana, ringngapanna Nalabattu Allata'ala ammarenta. Appialimi Isa Nakana, “Punna Napakkaramulai PamarentahanNa Allata'ala, tena Napakaramulai siagang pammatei akkullea nacini' mata,

²¹sa'genna akkulle taua angkana, ‘Umba naniciniki, iaminne!’ yareka, ‘Niaki anjoreng!’ Nasaba' sikontutojenna appakkaramulami ammarenta Allata'ala ri tangnga-tangnganu ngaseng.”

²²Le'baki anjo Nakanamo Isa ri ana'-ana' gurunNa, “Lanarapiki sallang wattunna nanuero' anciniki se'rea allo ri allo kabattuanNa Ana' Ma'rupataua, mingka takkulleako anciniki.

²³Lanakana sallang taua ri kau, ‘Ciniki, anjoreng!’ yareka nakana, ‘Ciniki, anrinni!’ Mingka teako assuluki mange amboyai.

²⁴Antekamma batena tassioro' kilaka irate ri langika naccaya battu ri cappa' se'rea mange ri cappa' maraenganga, kammatommi anjo sallang lampa-lampana Ana' Ma'rupataua punna narapi'mo allonNa.

²⁵Mingka uru-uruna musti jai sessa Nakasia' siagang tanitarimayai ri taua ri anne jammanga.

²⁶ Mingka ri allo nipa'nyatana Ana' Ma'rupataua sallang, lakammai lampa-lampana ri wattu jammanna Na'bi Nuh.

²⁷ Langnganre angnginungi, siagang lasibunting-buntingi taua; iaminjo tuli nagaukang ke'nanga, sa'genna antama' Na'bi Nuh ri biseanga. Nabattumo a'ba lompoa, namate tallang ngasemmo ke'nanga.

²⁸ Kamma tomminjo ri wattu jammanna Lot. Angnganre angnginungi, a'danggangi, a'lamung-lamungi, siagang massing ambangungi taua balla'.

²⁹Mingka ri wattunna assulu' Lot battu ri kota Sodom, anjo alloa battumi pepeka siagang turummi bara-bara pepeka battu rate ri langika angngancuru' ngasengi ke'nanga.

³⁰Kammaminjo sallang lampa-lampana ri allo nipa'nyatana Ana' Ma'rupataua.

³¹ Anjo alloa, tau niaka irate ri pattongko'na ballaka teami naungi angngallei barang-baranna niaka lalang ri balla'na. Kammayatompa tau niaka ri kokoa teami ammotereki mange ri balla'na.

³² U'rangi apa le'baka kajariang ri bainenna Lot!

³³ Inai-nai ero' ampasalamaki katallassanna, iami latappela' katallassanna. Mingka inai-nai tappela' katallassanna, iami lanipasalama' katallassanna.

³⁴Patappa'mi angkanaya: anjo bangngia punna nia' rua tau attinro ri se'rea katinroang, lanierangi a'lampa sitau, nalaniboli' sitau.

³⁵Na punna nia' rua baine a'dengka ase, lanierangi a'lampa sitau, nalaniboli' sitau. [

³⁶Punna nia' rua tau anjama ri se'rea koko, lanierangi a'lampa sitau, nalaniboli' sitau.]”

³⁷Akkuta'nammi ana'-ana' gurunNa Isa angkana, “Kemae lakajariang anjo kammaya, Batara?” Appialimi Isa Nakana, “Kemae-kemae nia' maya', anjoremmi lania' jangang-jangang pakanre maya'.”