Read Makassar Version – KITTA' MATANGKASA LUKAS 19 Bible Online

LUKAS 19 - Makassar Version – KITTA' MATANGKASA bible

LUKAS 19

¹Ri wattunna battu Isa mange ri Yerikho, a'jappa tulusu'mi Nalaloi anjo kotaya.

²Anjoreng ri kotaya nia' sitau kapala pasingara' sima, sannaka kalumanynyanna, niarenga Zakheus.

³Na anne lapung Zakheus, ero' dudui naasseng siagang nacini' angkana inai anjo Isa. Mingka lanri jai duduna tau, siagang bodona pakkaleanna, takkulleami nacini' Isa.

⁴Jari larimi a'lampa riolo ampilumbai anjo tau jaia. Nampa angngambi' nai' ri se'reang poko' kayu, sollanna akkulle nacini' Isa lanumaloa sinampe' anjoreng.

⁵Ri wattunna anrapi' Isa mange anjoreng ri tujunna poko' kayua, accongami nai'. Nampa Nakana, “O Zakheus, naungko mae linta'! Nasaba' musti mangeA' ri balla'nu anne alloa.”

⁶Akkaro-karomi Zakheus naung, namange anruppai Isa, siagang sanna'mi rannuna nyawana.

⁷Nalarro ngasemmo taua anciniki anjo passalaka. Nakanamo ke'nanga, “Pui'! A'lampai a'manaikang ri balla'na tau kodi sipaka!”

⁸Ri wattunna battumo ri balla'na Zakheus, ammentemmi nampa nakana ri Isa, “O Batara, lakupassidakkangi tawaruanna pa'barang-barangangku mae ri tu kasi-asia; namanna inai punna le'baki kutipu, lakubayaraki ammotere' sa'genna a'lappi appaka!”

⁹Nakanamo Isa, “Anne alloa ikau siagang sikamma bone balla'nu, nipasalama' mako ri Allata'ala siagang nisare mako katallassang beru, nasaba' sossoranna tongko Abraham.

¹⁰ Nasaba' battui Ana' Ma'rupataua untu' amboyai siagang ampasalamaki tau sala oloanga.”

¹¹ Lalang nipilangngerina ri taua a'bicara, Nacaritami Isa se're pangngebarang. Nasaba' ri wattunna a'reppese'mo ri Yerusalem nakapangi taua angkanaya tasalloami nalammarenta Allata'ala salaku Karaeng ri linoa.

¹²Nakanamo Isa, “Nia' se're tu nipakala'biri' a'lampa ri se'reang pa'rasangang bella, ero' niangka' a'jari karaeng anjoreng nampa ammotere' poleang.

¹³Ri tenanapa na'lampa, nakio'mi sampuloa palayanna, nampa massing nasare ke'nanga tasse're-se'renna doe' bulaeng. Nakana ri ke'nanga, ‘Pakei anne doeka a'danggang lalang lampaku.’

¹⁴Mingka sanna' nikabirisinna ri tuma'buttana anjo pa'rasanganga. Jari ri wattunna a'lampamo anjo tu nipakala'birika, nia'mo nasuro ke'nanga mange ampaui angkanaya teami ke'nanga angkaraengangi anjo karaenga.

¹⁵Mingka niangka'mi anjo tu nipakala'birika a'jari karaeng, nampa ammotere' ri pa'rasanganna. Nasuro kio'mi linta' andallekang anjo palayang-palayanna, ero' naasseng angkanaya siapa jaina passawallang massing nagappa ke'nanga.

¹⁶Battumi palayang makase'rea andallekang na nakana, ‘O karaeng, anjo se'rea doe' bulaeng kipassareanga ri nakke, kupa'jari lappi sampulomi.’

¹⁷Nakanamo anjo karaenga, ‘Baji'mi! Palayang bajikko! Nasaba' akkulleko nipatappa' ri passala' apa-apa ca'dia, lakupa'jari mako tau koasa ammarenta sampulo kota.’

¹⁸Le'baki anjo battu tommi palayang makaruaya na nakana, ‘O, karaeng, anjo se'rea doe' bulaeng kipassareanga ri nakke, kupa'jari lappi limami.’

¹⁹Nakanamo anjo karaenga ri anjo palayanga, ‘Lakupa'jariko tau koasa ammarenta lima kota.’

²⁰Le'baki anjo battu tommi palayang maraenga pole, na nakana, ‘O, karaeng, anne doetta; kuboliki lalang ri passapungku.

²¹Mallaka' ri katte lanri sekkekki'. Kiallei apa-apa tenaya naikatte pata, kiallei wassele'na tampa' tenaya naikatte pata tampa'!’

²²Nakanamo anjo karaenga ri anjo taua, ‘Ikau palayang ja'dalakko! Lanri kana-kanannu tonji nalakuhukkungko. Nuassengi angkanaya inakke tau sekkekka': kuallei apa-apa tenaya nainakke pata, siagang kuallei wassele'na tampa' tenaya nainakke pata tampa'.

²³Punna kamma, apa saba'na natena nupantamaki doekku ri kantoro' banga sollanna akkulle kualle ammotere' anjo doekku siagang bungana punna ammoterekka'?’

²⁴Le'baki anjo, nakanamo anjo karaenga ri sikamma tau niaka anjoreng ammenteng, ‘Allei anjo doe' bulaeng niaka ri ia nampa nupassareang mae ri anjo palayang niaka sampulo doe' bulaenna.’

²⁵Mingka nakanamo ke'nanga, ‘O, karaeng, anjo palayanga nia'mo ri ia sampulo doe' bulaeng.’

²⁶ Appialimi anjo karaenga nakana, ‘U'rangi angkanaya: inai-nai nia'mo apa-apanna, iami lanisare pole la'bi jai. Mingka inai-nai tena apa-apanna lanialleangi ba'lalo apa-apa niaka ri ia.

²⁷Na kamma-kamma anne erang ngasemmi mae sikamma tau ammusua', iamintu tau tenaya naero' akkaraeng ri nakke. Buno ngasengi ke'nanga ri dallekangku!’ ”

²⁸Le'ba'na Napau Isa sikammaya anjo passalaka, a'jappa riolomi ri dallekanna ke'nanga, ero' a'lampa mange ri Yerusalem.

²⁹Ri wattunna battu ke'nanga ri rampi'na Betfage siagang Betania, iamintu ri Bonto Zaitun, Nasuromi ana' gurunNa rua tau a'jappa riolo.

³⁰Nakana Isa ri ke'nanga, “A'lampamako mange ri anjo kampong niaka ri dallekannu. Na punna battuko mange anjoreng, nia' lanucini' sikayu keledai rungka tappaukang. Tena le'bakapi nibae anjo keledai rungkaya. La'gasimi passikko'na anjo keledaia, nampa nuerang mae anrinni.

³¹Punna nia' tau akkuta'nang ri kau angkanaya, ‘Angngapa nanula'gasi antu keledaia?’ pauangi angkana, ‘Naparalluangi Batara.’ ”

³²A'lampami anjo ruaya ana' gurunNa Isa. Nagappa tojemmi sangkamma le'baka Napau Isa.

³³Lalang nala'gasinna ke'nanga passikko'na anjo keledaia, nakanamo patanna anjo keledaia ri ke'nanga, “Angngapa nanula'gasi passikko'na antu keledaia?”

³⁴Appialimi ke'nanga angkana, “Naparalluangi Batara.”

³⁵Nampa naerang ke'nanga anjo keledai rungkaya mange ri Isa. Nalapakkimi ke'nanga juba dongko'na anjo keledaia, nampa nabantu Isa nai' a'dongko'.

³⁶Lalang numalona Isa andongkoki anjo keledaia, napalapara'mi jubana taua ri agang laNaoloa Isa.

³⁷Ri wattunna a'reppese'mo ri Yerusalem, ri agang anynyoloroka ri Bonto Zaitun, appakkaramula ngasemmi sikamma ana' gurunNa akkiok-kio' mammuji-muji ri Allata'ala. Siagang appala' sukkuru'mi ke'nanga ri Allata'ala, lanri le'ba'na ngasemmo nacini' ke'nanga sikamma gau'-gau' appakalannasa' le'baka Nagaukang Isa.

³⁸ Akkiok-kio'mi ke'nanga angkana, “Nibarakkakimi Karaeng battua lalang arenNa Batara! Salewangangi ri suruga, nanipuji Allata'ala!”

³⁹Nia' todong siapa are tu Farisi ri alla'na anjo tau jaia. Nakanamo anjo tu Farisia ri Isa, “O, Pa' Guru, Kisuro sai anjo ana'-ana' gurunTa a'mereki'.”

⁴⁰Appialimi Isa Nakana, “Patappaki angkanaya: punna a'mereki ke'nanga, la'gora-gorai anne batu-batua.”

⁴¹Ri wattunna pila' a'reppese' Isa ri Yerusalem, naNacini'mo anjo kotaya, angngarru'mi.

⁴²Lalang angngarru'Na Nakana, “O kodong, baji'na mamo ka'de' nuassemmo anne alloa apa lakkullea angngerang passiamakkang! Mingka kamma-kamma anne takkulleai nucini'.

⁴³Nia' sallang se're wattu nabattu musunnu ampangngalakkiko ri tammulilinu; lanakurungko ke'nanga, siagang lanabundukiko battu ri sikontu oloang niaka ri tammulilinu.

⁴⁴Lanaancurukko siagang sikontu bonenu; na tenanniakka manna sibatu batu tela lanakellai ammantang tassusung ri tampa'na, lanri tenana nanujampangi ri wattunna battu Allata'ala untu' ampasalamakko!”

⁴⁵Antama'mi Isa ri Balla'Na Batara, siagang Nabongkami sikamma padanggang niaka anjoreng.

⁴⁶ Nakana ri ke'nanga, “Nia' tattulisi' lalang ri Kittaka angkanaya: Nakana Allata'ala ‘Lanipareki BallakKu a'jari Balla' Sambayang.’ Mingka ikau ngaseng, nupa'jari balla' paella'!”

⁴⁷ Allo-allona angngajara' Isa lalang ri Balla'Na Batara. Mingka ero'mi nibuno ri imang-imang kapalaya, siagang guru-guru agamaya, kammayatompa ri pamimping-pamimpinna tu Yahudia.

⁴⁸Mingka lanri tuli jaina tau ampilangngeri kana-kananNa, siagang lanri nangaina ngaseng tau jaia ampilangngeri anjo kana-kana Napabattua Isa, tenamo nakkulle ke'nanga anggappa oloang anggaukangi pattujunna.