Read Makassar Version – KITTA' MATANGKASA LUKAS 2 Bible Online

LUKAS 2 - Makassar Version – KITTA' MATANGKASA bible

LUKAS 2

¹Anjo wattua Karaeng Agustus ammarenta ri pa'rasangang Roma. Sitabangi nisuro bilang ngaseng sikontu tuma'buttaya niaka lalang parentana.

²Sitabang tongi Kirenius a'jari guburnur Roma ri pa'rasangang Siria, nabungasa' nibilang tuma'buttaya.

³Jari massing ammotere' ngasemmi taua ri kamponna, assuro bilangi kalenna.

⁴A'lampa tommi Yusuf ambokoi Nazaret ri Galilea. Mangemi ri Betlehem ri Yudea, kampong kalassukanna Karaeng Daud; nasaba' anjo Yusuf sossoranna tongi Karaeng Daud.

⁵A'lampa tongi siagang Maria, assuro bilangi kalenna. Battuna mange ri Betlehem, tenamo nanggappa ke'nanga balla' pa'bangngiang, napakamma jaina tau battu mange anjoreng. Lanri kammana, mange mami ke'nanga ri se'reang bara sapi a'bangngi. Na anjo wattua tianammi Maria, siagang narapi'mi wattunna lammana'. Nalassu'mo anjo ana' bungasa'na, sitau ana' bura'ne. Nakalimbukimi care-care anjo anaka, nampa napatinro lalang ri tampa' pangnganreang olo'-oloka.

⁶

⁷

⁸Anjo bangngia nia' siapa are pakalawaki sitabang anjagai sapinna ri paranga ri anjo daeraya. Anjo wattua lantammi bangngia.

⁹Ti'ring nia' mami battu malaeka'Na Batara ampappicinikangi kalenna ri ke'nanga; tassioro'mi caya kala'biranNa Batara mae ri ke'nanga. Na teaimi sipato' malla'na ke'nanga.

¹⁰Mingka nakanamo anjo malaekaka, “Teako mallakki! Nasaba' kabara' baji' anne battu kupabattuangko; kabara' sannaka lanakarannuanna sikontu rupataua.

¹¹Anne kamma, ri kota kalassukanna Daud, lassu'mi Karaeng Mappasalama'nu iamintu Almasi.

¹²Na iaminne pammateina ri kau: Nia' lanubuntulu' se're ana' lolo nikalimbuki care-care, siagang nipatinro lalang ri pangnganreang olo'-oloka.”

¹³Ti'ring jaimi pole malaeka' maraengang battu anrurungangi anjo malaekaka sumpaeng, na mammuji-muji ri Allata'ala, angkana,

¹⁴“Nipujimi Allata'ala ri langi' kaminang tinggia! Nasalewangang rupataua ri tompo'na linoa mappakate'nea ri atinNa Bataraya!”

¹⁵A'bokoi lampana sikamma anjo malaekaka ammotere' nai' ri suruga, massing nakanamo anjo pakalawakia, “Umba ki'lampa mange ri Betlehem anciniki anjo kajariang Napabattua Batara mae ri katte.”

¹⁶A'lampa memammi ke'nanga. Na nabuntulu'mo ke'nanga Maria siagang Yusuf, kammayatompa anjo anaka, nipatinro ri pangnganreang olo'-oloka.

¹⁷Ri wattu nacini'namo pakalawakia anjo anaka, nacaritami ke'nanga anjo apa napaua sikamma malaekaka ri passala'na anjo anaka.

¹⁸Na lannasa' ngasemmo tau allangngerekai caritana anjo pakalawakia.

¹⁹Mingka napariatimi siagang nanawa-nawami Maria sikamma anjo passalaka.

²⁰Ammotere'mi ke'nanga mange ri paranga, mammuji-muji siagang napakala'biri'mi ke'nanga Allata'ala, lanri yangasenna anjo kajariang le'baka nalangngere' siagang nacini' ke'nanga, tena le'ba' sisalana siagang anjo apa le'baka napau malaekaka mae ri ke'nanga.

²¹ Narapiki sagantuju allo umuru'na, nisunna'mi anjo anaka. Nampa nisare areng ri ke'nanga Isa. Iaminjo areng le'baka napassareang malaekaka, ri wattu tenanapa na nitianangangi ri amma'Na.

²² Narapi'mi wattunna Yusuf siagang Maria anggaukangi ada' matangkasaka, situru' atorang agama battua ri Musa. Jari naerammi ke'nanga anjo anaka mange ri Yerusalem, mange nipassareang ri Batara.

²³ Nasaba' nia' tattulisi' lalang ri Hukkung Napassareanga Batara angkanaya, “Sikontu ana' bura'ne bungasaka musti nipassareangi mae ri Batara.”

²⁴Ero' tommi ke'nanga mange assare koro'bang, iamintu sipasang jangang-jangang bukkuru', yareka ruang kayu jangang-jangang bodobangkeng rungkaya, situru' apa le'baka nipattantu lalang ri Hukkung Napassareanga Batara.

²⁵Anjo wattua nia' ri Yerusalem sitau niareng Simeon. Ia tau baji', na malla' ri Allata'ala. Na tayang-tayammi wattunna nabattu Allata'ala ampasalamaki umma' Israel. Antama'mi RohNa Allata'ala ri kalenna.

²⁶Na le'ba'mi nipauang ri Allata'ala angkanaya talamateapi punna tenapa naciniki Karaeng Mappasalamaka, le'baka Napa'janjiang Batara.

²⁷Niulumi Simeon ri RohNa Allata'ala antama' ri Balla'Na Batara. Anjo wattua nierangi anjo Isa, ana' loloa, ri Yusuf siagang Maria antama' untu' anggaukangi pa'gaukang nipassuroanga lalang atorang agamaya.

²⁸Naallemi Simeon anjo anaka, na nakalawing, nampa ammuji-muji ri Allata'ala, nakana,

²⁹“Anne kamma, o Batara, Kirupaimi janjinTa. Boli'mi kamma ammoterang atanTa siagang sannang.

³⁰Nasaba' le'ba'mi nacini' mata kalengku Pappasalama' battua ri Katte.

³¹Pappasalama' Kipasadia untu' sikontu bansaya:

³² Sanrapang singara', ansingaria oloanna bansa-bansa maraenga, untu' labattu mae ri Katte; singara' angngeranga kala'birang mae ri ummatTa Israel.”

³³Lannasa'mi manggena siagang amma'na anjo anaka allangngereki anjo apa-apa napaua Simeon ri passala'na anjo anaka.

³⁴Nabarakkakimi Simeon ke'nanga; siagang nakana ri Maria, “Le'ba'mi nipile ri Allata'ala anne anaka untu' anghukkungi siagang untu' appasalama' jai tu Israel. La'jari pannanrai battu ri Allata'ala, lanibaliangi ri tau jaia,

³⁵na lanri kammana nakaassengammo bone atinna ke'nanga. Lasi'na sikali nusa'ring, sanrapang nito'doka atinnu ri pa'dang sannaka cidu'na.”

³⁶Nia' todong sitau na'bi baine sannakamo toana. Niarengi Hana, ana'na Fanuel, battu ri suku Asyer. Nampami tuju taung le'ba'na a'bunting,

³⁷na'jari jandamo Hana. Kamma-kamma anne sagantujupulomi angngapa' taung umuru'na. Tena le'bakai nabokoi Balla'Na Batara. Allo bangngi mange ri Balla'Na Batara appala' doang ri Allata'ala siagang appuasa.

³⁸Sitabangi battu todong ri Balla'Na Batara anjo wattua. Ammuji-mujimi ri Allata'ala, siagang nabicarami ri passala'na anjo Anaka mae ri sikamma tau attayanga kabattuanNa Allata'ala ampasalamaki bonena Yerusalem.

³⁹ Le'ba'namo nagaukang ngaseng Yusuf siagang Maria sikamma Hukkung Napassuroanga Batara, ammotere'mi ke'nanga mange ri pa'rasangang Galilea, ri Nazaret.

⁴⁰Pila' lompomi siagang pila' gassimmi anjo anaka. Sanna' cara'de'na siagang sanna' annabana, na sanna' nikarimangnginna ri Allata'ala.

⁴¹ Taung-taungi mange tau toaNa Isa ri Yerusalem untu' ampakalompoi allo Lompo Paskaya.

⁴²Ri wattunna sampulo anrua taung umuru'Na Isa, a'lampami pole ke'nanga mange ri passua'-suarranga ri Yerusalem kamma biasa.

⁴³Le'ba'na passua'-suarranga, ammotere'mi ke'nanga. Mingka ammantanginji Isa anjo Anaka ri Yerusalem, natanaassenga manggeNa siagang amma'Na.

⁴⁴Nakana ke'nanga nia'ji Isa ri alla'na tau jaia amminawang. A'jappana ke'nanga siallo bujuru' nampa naboya Isa ri passiassenganna siagang ri bija-bijanna.

⁴⁵Mingka tenai nabuntulu' anjo Anaka. Jari ammotere'mi ke'nanga mange ri Yerusalem amboyai.

⁴⁶Makatallungallonapi naboya ke'nanga nampa nabuntulu' lalang ri Balla'Na Batara. Niaki lalang ammempo ampilangngeri guru-guru agamaya siagang akkuta'nang ri anjo guru-guru agamaya.

⁴⁷Sikontu tau allangngerekai lannasa' ngasemmi lanri sanna' cara'de'Na a'bicara.

⁴⁸Manna tau toaNa lannasa' tommi allangngereki. Nakanamo amma'Na ri Ia, “Na', angngapa Nuppanggaukang kammanne ri kambe? Sanna' lussa'na nyawaku siagang manggeNu amboyaKo mange-mange!”

⁴⁹Appialimi Isa Nakana, “Angngapa nakiboyA'? Takiassengai angkanaya musti niakKa' lalang ri Balla'Na ManggeKu?”

⁵⁰Mingka tanapahangai ke'nanga battuanna anjo pappialinNa Isa.

⁵¹Le'baki anjo, ammotere'mi ke'nanga siagang Isa mange ri Nazaret. Amminawang turu'mi Isa ri ke'nanga. Napariatimi amma'Na sikamma anjo passalaka.

⁵² Pila' lompomi Isa siagang pila' cara'de'mi, na ningai ri Allata'ala siagang ri taua.