Read Makassar Version – KITTA' MATANGKASA LUKAS 20 Bible Online

LUKAS 20 - Makassar Version – KITTA' MATANGKASA bible

LUKAS 20

¹Ri se'reang allo, sitabangi angngajara' Isa, siagang Napabattui Kabara' Baji' battua ri Allata'ala, mae ri tau niaka lalang ri Balla'Na Batara. Battu tommi imang-imang kapalaya, guru-guru agamaya, kammayatompa pamimping-pamimpinna tu Yahudia.

²Nakanamo ke'nanga ri Isa, “Pau sai bedeng mae ri kambe, inai assareKo pangngellai anggaukang ngasengi anne? Inai assareKo anjo koasa kammaya?”

³Appialimi Isa Nakana, “Ero' tongA' akkuta'nang. Pauang sabeKa',

⁴inai assarei koasa Yohanes a'je'ne' tau? Allata'ala yareka rupataua?”

⁵Jari sipa'bicarami ke'nanga massing para ia angkana, “Punna nikana, ‘Pangngellai battu ri Allata'ala,’ nakana sallang, ‘Punna kamma angngapa natena nutappa' ri ia?’

⁶Mingka punna nikana, ‘Pangngellai battu ri rupataua,’ ma'nassa lanasambilaki' taua batu, lanri tappa' ngasengi ke'nanga angkanaya na'bi anjo Yohanes.”

⁷Jari appialimi ke'nanga angkana, “Tanaassengai ikambe.”

⁸Jari Nakanamo Isa ri ke'nanga, “Punna kamma, tena todong nalaKupau mae ri kau angkanaya inai assareA' pangngellai anggaukang ngasengi sikammaya anne.”

⁹ Nacaritami Isa mae ri taua anne pangngebarang angkanaya, “Nia' sitau allamungi anggoro' kokonna. Napappitesangangi anjo kokonna mae ri siapa are pajama koko. Nampa a'lampa mange ri pa'rasangang maraeng, nammantang sallo anjoreng.

¹⁰Ri wattunna narapi'mo wattunna lanialle rapponna anjo anggoroka, nasuromi palayanna anjo patanna koko mange ri anjo pajamaya ampalaki tesanna anjo kokonna. Mingka niba'jimi anjo palayanga ri anjo pajamaya. Le'baki niba'ji, nisuromi ammotere' anjo palayanga, natanisarea apa-apa.

¹¹Jari nasuromi pole palayanna maraenga anjo patanna koko. Mingka niba'ji tommi siagang nihinami anjo palayanga ri anjo pajamaya. Le'baki niba'ji, nisuromi ammotere' anjo palayanga, natanisarea apa-apa.

¹²Jari nasuromi pole palayanna makatallua anjo patanna koko. Mingka niba'ji tommi pole anjo palayanga ri anjo pajamaya, nampa nipela' assulu' ri pantaranganna anjo kokoa.

¹³Kala'busanna nakanamo anjo patanna koko, ‘Apa mami musti kugaukang? Bajikangang ana' kalengku kukamaseanga kusuro. Tantu lanapakala'biriki ke'nanga punna ana' kalengku kusuro!’

¹⁴Mingka ri wattunna nicini' anjo ana'na patanna koko ri anjo pajamaya, massing nakanamo ke'nanga para ia, ‘Iaminne warisi'na. Umba nanibunoi, sollanna akkulle nialleang warisi'na.’

¹⁵Jari nare'resammi ke'nanga assulu' anjo ana'na patanna koko, nampa nabuno.” Le'baki Nacarita Isa anjo pangngebaranga, Nakanamo, “Jari punna ammotere' anjo patanna koko, apa lanagaukang ri anjo siapa area pajama koko?

¹⁶Tantu labattui nanabuno ngaseng anjo pajamaya, nampa napappitesangang anjo kokonna mae ri pajama maraenga.” Nalangngere'na akkana kamma Isa, nakanamo ke'nanga ri Isa, “Tapporo tena sikali nakamma!”

¹⁷ Naciniki ngasemmi Isa ke'nanga. Nampa Nakana, “Punna kamma, apa battuanna anne nipaua lalang ri Kittaka, angkanaya, ‘Batu tenaya napakei tukang bangunanga, a'jarimi batu lomoro' se're.’

¹⁸Sikamma tau tu'guruka ri anjo batua laancuruki; na inai-nai natuju anjo batua lanilissaraki sa'genna a'jari au.”

¹⁹Naassengi guru-guru agamaya siagang imang-imang kapalaya angkanaya kalenna ke'nanga Napitujui Isa anjo pangngebaranga. Jari ero'mi ke'nanga anjakkalaki Isa anjo wattua. Mingka mallaki ke'nanga ri anjo tau jaia.

²⁰Jari a'boyami ke'nanga kasampatang baji'. Nia'mo se're tau nagaji ke'nanga sollanna assara-sarai a'jari tau lambusu' pa'mai', nampa nasuro anjo taua mange akkuta'nang siagang ampa'boyangi kasalang Isa. Napa'boyangi kasalang Isa, sollanna akkulle ke'nanga a'jamma' mae ri kakoasanna guburnurka, nanijakkala' Isa.

²¹Jari a'lampami anjo tau le'baka nigaji, mange akkuta'nang ri Isa nakana, “O Pa' Guru! Naassengi ikambe angkanaya annaba ngasengi sikamma anjo Kipaua siagang Kipangngajarranga. Naasseng tongi ikambe angkanaya Kipangngajarrangi silambusu'na apa Nakaerokanga Allata'ala mae ri rupataua, lanri tena naKipasimmara'-maraengi taua.

²²Jari Kipau sabeki ri kambe, angkanaya, maka akkullei taua a'bayara' sima mae ri karaenga yareka tena, situru' atoranna agamata?”

²³Mingka Naassengi Isa akkala' salana ke'nanga. Lanri kammana, Nakanamo ri ke'nanga,

²⁴“PicinikiangA' bedeng se're doe' pera'. Inai pata areng siagang inai pata gambara' anne niaka lalang ri doeka?” Appialimi ke'nanga angkana: “Karaenga.”

²⁵Nakanamo Isa ri ke'nanga, “Punna kamma, sareangi Karaenga apa napatanga Karaenga, siagang sareangi Allata'ala apa Napatanga Allata'ala.”

²⁶Ma'nassa tena sikalimo nakkulle ke'nanga ampanggappangi kasalang Isa ri dallekanna tau jaia. A'mereki mami takkajannang ke'nanga allangngereki anjo pappialinNa Isa.

²⁷ Nia' siapa are golongang tu Saduki battu mae ri Isa. (Anne golonganna ke'nanga, tena natappa' angkanaya lattallasa' poleangi tau matea.) Akkuta'nangi ke'nanga ri Isa angkana,

²⁸ “O Bapa' Guru, le'baki natulisi' Musa anne hukkung angkanaya: Punna nia' sitau bura'ne mate, natena ana'na musti nibuntingi anjo le'ba' bainenna ri sari'battanna anjo bura'ne matea, sollanna nia' sossoranna anjo bura'ne matea.

²⁹Le'baki nia' tuju bura'ne assari'battang. A'buntimmi anjo kaminang toaya, mingka tenapa ana'na namatemo.

³⁰Nampa nibuntingi anjo le'ba' bainenna ri sari'battang makaruana mingka mate tommi natena ana'na.

³¹Kamma ngaseng tomminjo kajarianna ri sari'battanna makatallua sa'genna makatujua. A'bunting ngaseng tommi ke'nanga siagang anjo bainea, natena ngasempa ana'na ke'nanga namate ngasemmo ke'nanga.

³²Na kala'busanna mate tommi anjo bainea.

³³Ri allo attallasa'na ammotere' tau matea, inai pata baine anjo bainea? Nasaba' le'ba' ngasemmi anjo bura'ne tujua massari'battang a'bunting siagang anjo bainea.”

³⁴Appialimi Isa Nakana, “A'bunting ngasengi tau attallasaka ri kamma-kammaya anne.

³⁵Mingka tau siratanga nipattallasa' poleang battu ri kamateanga, siagang lattallasaka sallang ri jammang labattua, tenamo nala'bunting.

³⁶Lasangkammami malaeka' siagang talamateami ke'nanga. La'jarimi ana'-ana'Na Allata'ala ke'nanga, nasaba' nipattallasa' poleammi ke'nanga battu ri kamateanga.

³⁷ Kalenna Musa ampakasingaraki ma'nassana angkanaya lanipattallasa' poleangi tau matea. Lalang ri tulisanna ri passala'na anjo rompo' a'rinraya, nagallaraki Batara salaku ‘Allata'alana Abraham, Allata'alana Ishak, siagang Allata'alana Yakub.’

³⁸Jari, anjo Allata'ala, teai Allata'alana tau matea! Passangalinna Iami Allata'alana tau attallasaka! Nasaba' untu' Allata'ala nattallasa' ngaseng rupataua.”

³⁹Nia'mo siapa are guru-guru agama angkana, “Baji' sikali pappialinTa Bapa' Guru.”

⁴⁰Lanri kammana, tenamo nabarani pole ke'nanga akkuta'nang apa-apa ri Isa.

⁴¹Akkuta'nangi Isa ri ke'nanga Nakana, “Antekamma nakkulle nikana angkanaya anjo Karaeng Mappasalamaka sossoranna Daud?

⁴² Na kalenna Daud angkana lalang ri Kitta' Pammuji angkanaya, ‘Nakana Batara ri Bataraku: AmmempoKo ri sa'ri kanangKu,[3]

⁴³sa'genna Kusuro sikamma musunNu akkulantu' ri Kau.’

⁴⁴Jari punna Daud angkana ‘Batara’, ri anjo Karaeng Mappasalamaka, antekamma nakkulle nikana sossoranna Daud?”

⁴⁵Lalang appilangngerina ngaseng taua ri bicaranNa Isa, Nakanamo Isa ri ana'-ana' gurunNa,

⁴⁶ “Tutuko ri guru-guru agamaya. Nangai ke'nanga a'jappaya ammake juba la'bu, siagang nangai ke'nanga punna nipakala'biri' ri pasa'-pasaraka. Nangai ke'nanga ammempo ri pammempoang mala'birika lalang ri balla' sambayanga siagang ri passua'-suarranga.

⁴⁷Nangai ke'nanga antipui siagang angngalle passai balla'na janda-jandaya. Kammayatompa nangai ke'nanga alla'bu-la'bui sambayanna, sollanna akkulle nacokko kaja'dallanna ke'nanga! Iaminjo nateai sipato' battala'na hukkunganna ke'nanga sallang!”