Read Makassar Version – KITTA' MATANGKASA LUKAS 21 Bible Online

LUKAS 21 - Makassar Version – KITTA' MATANGKASA bible

LUKAS 21

¹Ri Balla'Na Batara, Naciniki Isa tu kalumanynyanga appantama' doe' passidakka ri pammoneang passidakkaya.

²Na nia' todong nacini' sitau janda sannaka kasi-asina, appantama' rua doe' ece-ece tambaga.

³Nakanamo Isa, “Pilangngeri: iaminne jandaya kaminang jai napantama' ri sikamma tau appantamaka doe' passidakka.

⁴Nasaba' sikamma tau maraenga, la'bi-la'bi doe'naji napantama'. Mingka anne jandaya, manna nasanna' kasi-asina, mingka napassareammi sikamma apa niaka ri ia, iamintu sikamma apa naparalluanga ri katallasanna.”

⁵Nia' siapa are tau ambicarai antekamma ga'gana Balla'Na Batara. Nasaba' nibelo-beloi batu-batu sannaka ga'gana siagang barang-barang nipassidakkanga ri Allata'ala. Nakanamo Isa ri ke'nanga,

⁶“Nia' sallang nanarapi' wattunna nalanirumbang ngaseng anjo apa nucinika; anne batu niaka anrinni manna sibatu talania'ija tassusung ri pammantanganna!”

⁷Jari akkuta'nammi ke'nanga ri Isa angkana, “O, Bapa' Guru, ringngapanna nalakajariang anjo Kipaua? Siagang apa pammateina angkanaya narapi'mi wattunna lakajariang anjo passalaka?”

⁸Nakanamo Isa, “Tutu laloko, gassingka nitipuko. Nasaba' lajai tau battu ampakei arengKu, angkana, ‘Inakke minne!’ Siagang nakana, ‘Narapi'mi wattunna.’ Mingka teako turuki ke'nanga.

⁹Tea tongko mallakki punna allangngerekko kabara' pa'bundukang siagang passisala-salang. Ia ngaseng minjo musti kajariang rolong. Mingka tenapa nakkulle nikana narapi'mi wattu allo kiamaka.”

¹⁰Nampa Nasambungi bicaranNa Isa Nakana, “La'bunduki se'rea bansa siagang bansa maraenga, yareka se'rea pa'rasangang lanabunduki pa'rasangang maraenga.

¹¹Lata'ge'gosoki buttaya ri kere-keremae. Lanaallei cipuru' siagang lanatabai garring sikamma rupataua. Nia' lakajariang apa-apa sannaka appakamalla'na rate ri langika.

¹²Mingka ri tenana ngasempa nakajariang anjo sikammaya, lanijakkalakko siagang lanisessako rolong. Laniadeliko ri balla' sambayanga siagang lanipantamakko ri tarungkua. Siagang lanire'resangko mange ri dallekanna karak-karaenga siagang tu koasa-koasaya, passabakkang amminawangko ri Nakke.

¹³Mingka iaminjo la'jari kasampatang ri kau ambirittakangi Kabara' Bajika, battua ri Allata'ala.

¹⁴ Pakajarreki pa'mai'nu, sollanna tena nularanggasela angkanaya apa lanupau angngalleangi kalennu.

¹⁵INakke lassareko kacara'dekang siagang kana-kana lanupaua. Sa'genna manna sitau ri musu-musunnu takkulle ambeta kanako yareka ampassalai apa-apa nupaua.

¹⁶Lanisassaliko ri anrong-manggenu, yareka ri sari'battannu, yareka ri bija-bijannu, siagang ri agang-agannu. Nia' siapa are jaina tau ri kau lanibuno ri ke'nanga.

¹⁷Lanikabirisiko ri tau jaia passabakkang amminawangko ri Nakke.

¹⁸Mingka manna silawara' uu'nu tena todong nalatappela'.

¹⁹Punna sa'barakko siagang attahangko, lanipasalamakko.”

²⁰“Punna nucini' sallang nitammulili kota Yerusalem ri surudadu, lanuassemmi angkanaya tasalloami nalaruntung anjo kotaya.

²¹Anjo wattua, tau niaka ri pa'rasangang Yudea musti lari nai' ri buluka. Tau niaka lalang ri kotaya musti nabokoi kotaya, siagang tau niaka ri pantaranganna kotaya tea' laloi antamakki ri kotaya.

²² Nasaba' iaminjo allo-allo nikanaya, ‘Allo-allo Kabattuanna Hukkunganga,’ sollanna a'rupamo apa le'baka tattulisi' lalang ri Kittaka.

²³Anjo allo-alloa teai sipato' appakamalla'na mae ri bai'-baine tiananga siagang bai'-baine appasusua ana' lolo! Lanatabai kasusaang lompo anne pa'rasanganga, siagang laNahukkungi Batara anne bansaya.

²⁴Nia' lanibuno siagang pa'dang, siagang nia' todong lanierang mange nipela' ri pa'rasangang maraenga. Siagang lanionjo'-onjokangi anne kota Yerusalem ri tu kapereka, tenaya namalla' ri Allata'ala, sa'genna la'busu'mo wattu le'baka Napattantu Batara mae ri ke'nanga.”

²⁵ “Lania' sallang pammatei irate ri alloa, ri bulanga, siagang ri bintoeng-bintoenga. Lamallaki siagang lalingui bansa-bansaya ri lino, andallekangi anging lompona siagang bombanna tamparanga.

²⁶Teai sipato' malla'na rupataua andallekangi sikamma apa lakajarianga ri sikontu anne linoa, lanri la'jari tasilolongammi siagang laricu ngasemmi napakamma malla' sikontu tau anna'galaka koasa ri sila'banna linoa.

²⁷ Iaminjo wattua Nalabattu Ana' Ma'rupataua lalang ri rammanga siagang kakoasang na kala'birang malompoNa.

²⁸Punna kajariang ngasemmo anjo passalaka sallang, ambangung mako nai', siagang angka'mi ulunnu, nasaba' sinampe' mami nanulanipasalama'.”

²⁹Nampa Nacarita Isa mae ri ke'nanga anne pangngebaranga Nakana, “Cini' sai anjo poko' araya siagang poko'-poko' maraenga.

³⁰Punna appakkaramulamo kacinikang cu'la'na, nuassemmi angkanaya la'birimmi battu wattu timoroka.

³¹Kamma tomminjo, punna nucini'mo kajariang sikamma anjo passalaka, lanuassemmi angkanaya tasalloami nalappakkaramula ammarenta Allata'ala salaku Karaeng.

³²Assemmi angkanaya, tamate ngasengapi tau attallasaka ri kamma-kammaya anne, nalakajariang ngaseng anjo passalaka.

³³Lalanynya' ngasengi langika siagang linoa, mingka kana-kanangKu tuli lania'na satunggu-tungguna.”

³⁴“Jagai kalennu, gassingka sangnging assua'-suaraka, angnginung inungang terasa', yareka sangnging passala' katallassannu bawang nunawa-nawa, sa'genna tena nusadia natanusanna-sannaya nabattumo anjo wattua.

³⁵Nasaba' lasanrapangi sikko' nitannanga mae ri sikontu rupataua ri lino, kabattuanna anjo alloa.

³⁶A'jaga-jagako, siagang tuli appala' doangko sollanna numajarre' andallekangi sikamma anjo apa lakajarianga, siagang nukkulle andallekang ri Ana' Ma'rupataua.”

³⁷ Anjoreng ri Balla'Na Batara angngajara' Isa punna allo. Na punna bangngi a'lampai mange ammantang ri Bonto Zaitun.

³⁸Bari'basa'-bari'basaki battu ngaseng taua ri Balla'Na Batara ero' ampilangngeri Isa angngajara'.