Read Makassar Version – KITTA' MATANGKASA LUKAS 22 Bible Online

LUKAS 22 - Makassar Version – KITTA' MATANGKASA bible

LUKAS 22

¹ Anjo wattua a'reppese'mi allo Passua'-suarranna Roti Tenaya Nammake Pa'gambang, iamintu niarenga allo Paska.

²Na anjo wattua a'boyami akkala' imang-imang kapalaya siagang guru-guru agamaya, antekamma nakkulle nabuno Isa. Mingka eroki nabuno cokko-cokko, lanri mallaki ke'nanga ri tau jaia.

³Antama'mi Billisika ri kalenna Yudas Iskariot, iamintu kalase'renna anjo sampuloa anrua ana' gurunNa Isa.

⁴Jari a'lampami Yudas mange sipa'bicara siagang imang-imang kapalaya kammayatompa sikamma kapala pangawalaka ri Balla'Na Batara. Nabicarami ke'nanga angkanaya antekamma batena Yudas ampassareangi Isa mae ri ke'nanga.

⁵Teaimi sipato' rannuna ke'nanga, siagang nijanjimi lanisare doe' Yudas ri ke'nanga.

⁶Ammiomi Yudas. Appakkaramulami a'boya wattu baji' untu' ampassareangi Isa mae ri ke'nanga, mingka tanaassengai tau jaia.

⁷Narapi'mi allonna nisamballe gimbala' lanikanrea ri allo Paskaya, lalang ri Passua'-suarrang Roti Tenaya Nammake Pa'gambang.

⁸Jari Nakanamo Isa ri Petrus siagang Yohanes, “A'lampa mako ampasadiai kanre Paska lanikanrea.”

⁹Akkuta'nammi ke'nanga angkana, “Kemae Kikellai lanipasadia?”

¹⁰Appialimi Isa Nakana, “Punna antamakko ri kotaya, nia' sitau bura'ne lanuagang assibuntulu', sitabanga angngerang je'ne' lalang bongki. Pinawammi mange ri balla' lanapantamakkia.

¹¹Nampa nupauang patanna anjo ballaka angkana: Nakana Gurua, ‘Kemae tampa' eroka Kupake angnganre Paska siagang ana'-ana' gurungKu?’

¹²Lanapicinikiangko sallang anjo patanna balla', se're kamara' lompo irate ri lotenga, sukkuka pakkakasa'na. Pasadia ngasemmi niparalluanga anjoreng.”

¹³A'lampami Petrus siagang Yohanes, nanagappa tojemmo anjo tampaka, sicoco' sikali sangkamma le'baka Napau Isa. Napasadiami ke'nanga anjo kanre Paskaya.

¹⁴Ri wattunna narapi'mo wattunna lanikanre anjo kanre Paskaya, ammempomi Isa siagang ana'-ana' gurunNa ri mejang parjamuanga.

¹⁵Nampa Nakana ri ana'-ana' gurunNa, “Ero' duduA' angnganre kanre Paska siagang ikau ngaseng ri tenanapa Kupisa'ringi passessaya!

¹⁶Nasaba', patappa'mi angkanaya: Tenamo nalaKukanre pole anne kanre Paskaya sa'genna nipa'nyata battuanna ri Lino Beruna Allata'ala.”

¹⁷Le'baki anjo Naangka'mi Isa piala anggoroka, nampa appala' sukkuru' ri Allata'ala. Nampa Nakana, “Allemi anne, nanubage-bage;

¹⁸nasaba' parallui nuasseng angkanaya: appakkaramula ri kamma-kammaya anne, tenamo nalaKuinung pole anne anggoroka, sa'genna Napa'nyata tojeng-tojemmo koasaNa Allata'ala.”

¹⁹Le'baki anjo angngallemi roti Isa. Na le'ba'na appala' sukkuru', Napue-puemi anjo rotia siagang limanNa, nampa Napassareang mae ri ke'nanga, na Nakana, “Iaminne batangkalengKu [nipassareanga untu' ikau ngaseng. Gaukammi anne kammaya, untu' a'jari pangngu'rangi mae ri Nakke.”

²⁰ Kamma tomminjo, ri le'ba'na nakanre ke'nanga anjo rotia, Napassareammi anjo piala anggoroka mae ri ana'-ana' gurunNa, na Nakana, “Anne pialaya iami a'jari pammatei parjanjiang beruNa Allata'ala, nipa'jari assaya siagang cerakKu, iamintu cera' nipasolonga untu' ikau ngaseng.”]

²¹ “Mingka ciniki! Anjo tau eroka ambalukangA' niaki anrinni siagang iNakke!

²²Lamate memangi Ana' Ma'rupataua situru' le'baka Napattantu Allata'ala; mingka cilakami anjo tau ambalukangai KalengKu!”

²³Jari appakkaramulami assikuta'-kuta'nang ke'nanga, ero' naasseng angkanaya inaimi kalase'renna ke'nanga langgaukangi anjo panggaukang kammaya.

²⁴ A'gea'-gea'mi ana'-ana' gurunNa Isa, passabakkang inai ri ke'nanga lanipa'jari kaminang nipakala'biri' sallang.

²⁵ Nakanamo Isa ri ke'nanga, “Sikamma karaenna bansa kapereka najallakkangi ra'ya'na, na sikamma tukoasana nigallaraki ‘Pajaga Ra'ya'’.

²⁶ Mingka ikau ngaseng, takkulleako kamma anjo. Passangalinna, inai-nai ero' kaminang nipakala'biri' ri kau musti napa'jari kalenna kaminang tuna. Siagang inai-nai la'jari pamimping, musti a'jari sangkammai palayang.

²⁷ Kereanga la'bi la'biri'?: tau ammempoa angnganre ri mejanga, yareka tau a'jari palayanga mae ri anjo tau angnganrea? Tantu anjo tau ammempoa angnganre. Mingka nia'Ma' ri tangnga-tangnganu a'jari palayang.

²⁸Nuagang ngasemMa' ilalang sikontu kasusaangKu.

²⁹Sangkamma nasareMa' pangngellai ManggeKu ammarenta, sangkamma tommi anjo, laKusare tongko pangngellai kammaya.

³⁰ Lanri kammana, akkulle tommako amminawang a'rannu-rannu siagang iNakke ri wattungKu a'jari Karaeng. Siagang lammempo ngaseng tommako irate ri sampuloa anrua empoang kala'birang, untu' ammarenta ri sampuloa anrua bansa Israel.”

³¹Nakanamo Isa mae ri Simon, “O Simon, o Simon, pilangngeri sai! Nikellaimi Billisika anso'ri ngasengko. Sangkamma punna nipasisa'la' asea siagang awanna, kamma tomminjo lanipasisa'laki bajika siagang kodia.

³²Mingka le'ba' mako Kupappala' doangang Simon, sollanna jarre' tappa'nu. Na punna ammotere' mako pole mae ri Nakke, musti nupakajarreki tappa'na sikamma sari'battannu.”

³³Appialimi Petrus nakana, “O, Batara, sadiama' antama' ri tarungkua siagang assikamateang siagang iKatte!”

³⁴Mingka Nakanamo Isa, “Tappa' mako Petrus, angkanaya tenapa nattingkoko janganga, nanupintallummo ansassaliA'.”

³⁵ Le'baki anjo Nakanamo Isa ri ke'nanga, “Pirangalloang, ri wattunnu Kusuro a'lampa, tena Kukellaiko angngerang pammoneang doe', kocikang yareka sapatu. Apaka kakurangangko anjo wattua?” Appialimi ke'nanga angkana, “Tena!”

³⁶Nakanamo pole Isa, “Mingka kamma-kamma anne, inai-nai nia' pammoneang doe'na, yareka kocikanna, musti naerangi; siagang inai-nai tena pa'danna, musti nabalukangi jubana, nammalli pa'dang.

³⁷ Nasaba' patappaki anne nipaua lalang ri Kittaka angkanaya, ‘Lanibilangi tau ja'dala'.’ Iaminne musti lakajariang ri KalengKu. Nasaba' apa tattulisika lalang ri Kittaka passala' ri Nakke, iaminne kajariang ri kamma-kammaya anne.”

³⁸Nakanamo ana'-ana' gurunNa Isa, “O Batara, Kiciniki, anrinni nia' rua pa'dang.” Appialimi Isa Nakana, “Sikamma monjo.”

³⁹Le'baki anjo Nabokoimi Isa anjo kotaya, nampa sangkamma biasa, a'lampami siagang ana'-ana' gurunNa mange ri Bonto Zaitun.

⁴⁰Ri wattunna battu mange anjoreng, Nakanamo mae ri ana'-ana' gurunNa, “Appala' doang ngasengko, sollanna tena nugaukangi dosaya punna nukasiaki paccobaya.”

⁴¹Nampa a'lampa Kale-kalenNa kira-kira nia' sipasambila batu bellana battu ri ke'nanga.

⁴²Battui mange anjoreng, akkulantu'mi nampa appala' doang Nakana, “O Bapa', punna akkulleja, Kipakabellai anne passessa musti Kukasiaka. Mingka teaKi' naerokKu anjari, passangalinna erotTamo bawang anjari.” [

⁴³Sanna'mi sessana pa'mai'Na Isa. Ammatti'-matti'mi songo'Na naung ri buttaya, sangkamma cera'. Jari pila' attojeng-tojemmi appala' doang. Nampa nia'mo sitau malaeka' battu ampakajarreki.]

⁴⁴

⁴⁵Le'baki appala' doang, ammotere'mi Isa mae ri ana'-ana' gurunNa. Narapikammi ana'-ana' gurunNa attinro ngaseng napakamma sanna' ngaseng mangnganna.

⁴⁶Nakanamo ri ke'nanga, “Angngapa nuttinro ngaseng? Ambangung ngaseng mako nai' appala' doang, sollanna tena natabako paccoba.”

⁴⁷Lalang a'bicarana ija Isa, nia'mo sijaiang tau battu. Anjo tau jaia Yudas ampimpingi, iamintu kalase'renna ana'-ana' gurunNa Isa. Battumi Yudas ambaui Isa.

⁴⁸Mingka Nakanamo Isa ri ia, “O Yudas, iaminne nubauku nupake ambalukangi Ana' Ma'rupataua?”

⁴⁹Nacini'na ana'-ana' gurunNa Isa anjo kajarianga, nakanamo ke'nanga, “O Batara, antekamma! Nite'ba'mi pa'dang ke'nanga?”

⁵⁰Nampa nia'mo kalase'renna ke'nanga ante'baki pa'dang anjo atanna imang lompoa niaka battu, sa'genna kaccili' tolinna ri kananga.

⁵¹Mingka Nakanamo Isa, “Sikamma monjo!” Nampa Najama tolinna anjo taua, siagang Naballei na'jari baji' ammotere'.

⁵²Le'baki anjo Nakanamo ri imang-imang kapalaya siagang perwira-perwira pangawala'na Balla'Na Batara, kammayatompa ri pamimping-pamimpinna tu Yahudi battua ero' anjakkalaki, “Apa nucini' tau ja'dalakKa', sa'gennu battu ngaseng angngerang pa'dang siagang palu-palu ero' anjakkalakKa'?

⁵³ Allo-alloKu nia' siagang ikau ngaseng lalang ri Balla'Na Batara, natena nujakkalaKa'. Mingka iaminne wattunnu lappanggaukang ngaseng. Iaminne wattunna tau koasaya ri sassanga lappanggaukang.”

⁵⁴Nijakkala'mi Isa ri ke'nanga nampa nierang mange ri balla'na imang lompoa. Amminawang bokomi Petrus battu bella.

⁵⁵Ri tangnga-tangngana paranglakkenga niparinrami pepeka. Mange tommi anjoreng Petrus; ammempomi siagang tau jaia ri ampi'na anjo pepeka.

⁵⁶Nia'mo sitau baine palayang anciniki Petrus ammempo ri birinna anjo pepeka; nijanjammi Petrus ri anjo baine palayanga. Nampa nakana anjo baine palayanga, “Anne taua siagang tongi Isa sumpaeng!”

⁵⁷Mingka assassala'mi Petrus. Nakana, “Tena sikali nakuassengi anjo taua!”

⁵⁸Tena nasallo, nia'mo pole tau maraeng anciniki Petrus, siagang nakana, “Ikau pole, kalase'rennako ke'nanga!” Mingka appialimi Petrus nakana, “Tena, teai inakke!”

⁵⁹Kira-kira sijang ribokoanganna, nia'mo pole tau maraengang anjo'joki tojengi nakana, “Memang! Ana' gurunNa Isa anne taua, nasaba' tu battu tongi ri Galilea!”

⁶⁰Mingka appialimi Petrus nakana, “Apa nukana? Tena nakupahangi antu nupakkanaya!” Anjo wattua, sitabanna a'bicara ija Petrus, attingkokomi janganga.

⁶¹Assailemi Isa mae ri Petrus. Nau'rangimi Petrus apa le'baka Napau Isa ri ia angkanaya, “Ri tenanapa nattingkoko janganga, pintallumMa' nusassali.”

⁶²Jari assulukammi Petrus, nangngarru'-arru' tassunge'nge'.

⁶³Nipare' karek-karenammi siagang niba'jimi Isa ri sikamma tau anjagaiyai.

⁶⁴Nitongkokangi matanNa, nampa nikuta'nang, angkana, “Coba sai tappu, inai amba'jiKo?”

⁶⁵Jai pole kana-kana maraeng napau ke'nanga anghina-hinai Isa.

⁶⁶Ri bari'basa'na, a'rappungammi pamimping-pamimpinna tu Yahudia, imang-imang kapalaya, siagang guru-guru agamaya, nampa naerang Isa mange ri dallekanna Pangadelang Agamaya.

⁶⁷Nakanamo ke'nanga ri Ia, “Pau sai bedeng, maka iKaumi Karaeng Mappasalamaka?” Appialimi Isa Nakana, “Manna Kupauangko tena ngaseng tonja nulatappa'.

⁶⁸Siagang manna akkuta'nangA' ri kau ngaseng tena ngaseng tonja nulappiali.

⁶⁹Mingka appakkaramula ri kamma-kammaya anne lammempomi Ana' Ma'rupataua ri sa'ri kananNa[4] Allata'ala Kaminang Koasaya.”

⁷⁰Nakana ngasemmo ke'nanga, “Jari punna kamma Ana'NaKo Allata'ala?” Appialimi Isa Nakana, “Kammaminjo kanannu ngaseng.”

⁷¹Jari nakanamo ke'nanga, “Tenamo naparallu sa'bi! Nilangngere'mi KalenNa ampaui!”