Read Makassar Version – KITTA' MATANGKASA LUKAS 23 Bible Online

LUKAS 23 - Makassar Version – KITTA' MATANGKASA bible

LUKAS 23

¹Ammenteng ngasemmi taua ri sidanga, nampa naerang Isa mange ri dallekanna Pilatus.

²Anjoreng ri dallekanna Pilatus, nitudumi Isa ri ke'nanga. Nakana ke'nanga, “Anne taua nirapikangi Napasala oloangi ra'yaka. Naajara' salai taua sollanna tena naero' taua a'bayara' sima ri Karaenga, lanri Nakanana KalenNa Iami Almasi, Karaenga.”

³Jari akkuta'nammi Pilatus ri Isa Nakana, “Kammatojengi, angkanaya karaennaKo tu Yahudia?” Appialimi Isa Nakana, “Kammaminjo kanannu.”

⁴Nakanamo Pilatus ri imang-imang kapalaya siagang anjo tau jaia, “Tena sikali kugappa manna se're kasalanna anne taua lampassiratangi nihukkung.”

⁵Mingka pila' nakanamo ke'nanga, “Battu ri pangngajara'Na, naNaajara' sala taua ri sikontu Yudea; appakkaramulai ri Galilea Naajara' sala taua, na kamma-kamma anne anrapi'mi mae anrinni pangngajara' salaNa.”

⁶Nalangngere'na Pilatus kananna ke'nanga, akkuta'nammi ri ke'nanga nakana, “Apaka anne taua tau battui ri Galilea?”

⁷Le'ba'na nipauang ri ke'nanga angkanaya tau battui ri Galilea anjo Isa, iamintu daera kakoasanna Herodes, nikirimmi Isa ri Pilatus mae ri Herodes. Anjo wattua nia' tongi Herodes ri Yerusalem.

⁸Nacini'na Isa nierang battu, sanna' sikalimi rannuna nyawana Herodes. Nasaba' sallomi nalangngere'na kabara'Na Isa, naero' dudui anciniki. Eroki nacini' Nagaukang Isa gau' appakalannasaka.

⁹Jari jaimi pakkuta'nang napakkuta'nangang mae ri Isa. Mingka tena sikali Naero' Isa appiali.

¹⁰Battu tommi andallekang imang-imang kapalaya siagang guru-guru agamaya, antudua tojengi Isa.

¹¹Nipare' karek-karenammi siagang nihina-hinami Isa ri Herodes siagang surudadua. Nampa nipipakei pakeang kalompoang, nanikiring ammotere' mae ri Pilatus.

¹²Anjo alloa assibajikimi ammotere' Herodes siagang Pilatus. Pirangalloang assimusui ke'nanga.

¹³Napa'rappungammi Pilatus imang-imang kapalaya, pamimping-pamimpinga, siagang ra'yaka.

¹⁴Nampa nakana ri ke'nanga, “Nuerangi anne taua mae ri nakke, nanukana Napasala oloangi tau jaia. Na kamma-kamma anne kuparessami ri dallekannu ngaseng, mingka tena sikali manna se're kasalanna kugappa, sangkamma nutuduangi.

¹⁵Kamma todong minjo panggappana Herodes; tena todong kasalanna nagappa. Iaminjo saba'na nakiringi anne Isa ammotere' mae ri nakke. Manna sirupa tena sikali apa sala nagaukang anne taua, ampassiratangi nihukkung mate.

¹⁶Jari lakusuro cambo' mami anne taua nampa kulappassang.” [

¹⁷Punna narapi' allo Passua'-suarranna Paskaya, musti nia' sitau tu nitarungku nalappassang Pilatus, situru' pappala'na ra'yaka.]

¹⁸A'rappungang ngasemmi tau jaia anjoreng, siagang ammarrang-marrammi ke'nanga angkana, “Bunoi! Lappassammi Barabas untu' ikambe!” (

¹⁹Anjo Barabas, nanitarungku kapassabakkang pammunoang siagang passabakkang apparicui ri kotaya.)

²⁰Lanri eroki Pilatus allappassangi Isa, a'bicarami pole mae ri anjo tau jaia.

²¹Mingka ammarrang-marrammi pole ke'nanga angkana, “Allei Salli'! Allei Salli'!”

²²Akkio'mi pole Pilatus makapintallunna mae ri ke'nanga angkana, “Mingka apa kasalanna? Tena sikali manna sirupa kasalanna kugappa ampassiratangi nihukkung mate! Lakucambo'mi bawang nampa kulappassang.”

²³Mingka pila' ammarrang lompo tojemmi ke'nanga, angkana musti nisalliki Isa. Na kala'busanna niturukiammi ero'na ke'nanga.

²⁴Jari natappukimi Pilatus angkanaya nihukkung matei Isa, situru' ero'na ngaseng anjo tau jaia.

²⁵Nanilappassammo anjo tau napalaka ke'nanga, iamintu tau nitarungkua passabakkang apparicua ri kotaya siagang passabakkang pammunoang. Nampa nipassareang Isa mae ri ke'nanga sollanna appanggaukang ke'nanga mae ri Ia situru' ero'na ke'nanga.

²⁶Nierammi Isa ri ke'nanga. Ri tangngana aganga, sibuntulu'mi ke'nanga siagang sitau bura'ne, niarenga Simon. Anne Simon tau battu ri Kirene, sitabangi ero' antama' ri kotaya. Nijakkala'mi Simon ri ke'nanga, nampa nipassa ampisangi anjo kayu sallika ri bokoNa Isa.

²⁷Jai tau amminawang a'jappa ri bokoNa Isa — nia' todong siapa are bai'-baine. Angngarru'mi anjo bai'-bainea angkarruki Isa.

²⁸Mingka assailemi Isa mae ri ke'nanga, nampa Nakana, “E, tu bai'-bainena Yerusalem! Teako Nakke nukarruki. Mingka kalennumo siagang ana'-ana'numo nukarruki.

²⁹Nasaba' lanarapiki sallang wattunna nalanakana taua, ‘Teai sipato' upa'na tau tenaya ana'na, iamintu tau tenaya nale'ba' ammana' siagang tenaya nale'ba' appasusu ana' lolo!’

³⁰ Iaminjo wattua nalanakana taua ri bulu'-buluka, ‘Tujuma'!’ Siagang lanakana mae ri bonto-bontoa, ‘Tambungima'!’

³¹Nasaba' punna kamma anne panggaukanna taua ri kayu attallasaka, la'biangampa pole lanagaukanga ke'nanga mae ri kayu kalotorokamo!”

³²Nia' pole rua tau maraeng — iamintu tau ja'dala' — naerang todong ke'nanga ero' nihukkung mate siagang Isa.

³³Ri wattunna battu ke'nanga mange ri tampa' niarenga “Tangkora',” nisalli'mi Isa siagang anjo ruaya tau ja'dala' — sitau ri kanang na sitau ri kairinna Isa.

³⁴ Appala' doammi Isa Nakana, “O Bapa', pammopporangi anne ke'nanga; nasaba' tanaassengai angkanaya apa anne nagaukanga ke'nanga.” Nalotereimi ke'nanga pakeanNa Isa ero' nabage-bage.

³⁵ Ammenteng ngasemmi tau jaia anjoreng ancini'-ciniki Isa. Na nicau-caumi Isa ri pamimping-pamimpinna tu Yahudia angkana, “Le'baki Napasalama' tau maraenga; coba sabeki Napasalama' KalenNa kamma-kamma anne, punna ma'nassa Karaeng Mappasalama' tojengi, nipilea ri Allata'ala!”

³⁶ Sikamma surudadua amminawang turu' tommi ancau-caui Isa. Battumi ke'nanga assarei Isa anggoro' kacci;

³⁷nampa nakana ke'nanga, “Punna karaennaKo tu Yahudia, pasalama'mi KalenNu!”

³⁸Irateang ri anjo kayu salli'Na Isa, nia' tattulisi' angkanaya: “Iaminne Karaenna tu Yahudia.”

³⁹Nihinami Isa ri kalase'renna anjo tau ja'dala' naaganga nisalli', angkana, “Sai Karaeng MappasalamakKo? Pasalama'mi KalenNu siagang ikambe anne!”

⁴⁰Mingka nipauammi ri anjo tu ja'dala' se'reanga angkana, “Tena numalla' ri Allata'ala? Ikau nihukkung mate tongko sangkamma Ia.

⁴¹Mingka ikatte siratang memang tongki' nihukkung situru' panggaukanta. Mingka Ia tena sikali salaNa!”

⁴²Nampa nakana mae ri Isa, “Isa, U'rangi tonga' sallang punna battuKo a'jari Karaeng!”

⁴³Nakanamo Isa ri ia, “Tappa' mako, angkanaya anne alloa lassiagang maki' antama' ri Firdaus.”

⁴⁴Kira-kira tette' sampulo anrua ri tangngana alloa, tena naccaya alloa, sa'genna a'jari sanna'mi sassanna sikontu pa'rasanganga, sa'genna tette' tallu ri karuenga.

⁴⁵ Sinre'mi ta'bage rua gordeng niaka lalang ri Balla'Na Batara.

⁴⁶ Nampa ammarrang lompomi Isa Nakana, “Bapa'! Ri lalang limanTai Kupassareang KalengKu!” Le'baki akkana kamma, tappu'mi nyawaNa.

⁴⁷Ri wattunna nacini' perwira pasukanga anjo apa kajarianga, ammujimi ri Allata'ala. Nakana, “Kontu tojengi, anne taua ma'nassa tena nasala!”

⁴⁸Sikamma tau jai battua accini'-cini', nacini' ngasemmi anjo apa kajarianga. Massing nasassala' ngasemmi kalenna ke'nanga ri wattunna ammotere'.

⁴⁹ Na sikamma siassenna Isa, kammayami bai'-baine amminawanga ri Ia battu ri Galilea, battu bella mami anciniki sikamma anjo apa kajarianga.

⁵⁰Nia' tau niareng Yusuf, tu battu ri kota Arimatea ri pa'rasangang Yudea. Anne taua, tau baji' siagang nikangalikangi ri tau jaia. Sallo tommi natayang wattunna lammarenta Allata'ala, salaku Karaeng. Anggotana tongi Pangadelang Agamaya. Mingka tena nasitujui anjo apa le'baka natappuki siagang nagaukanga pangadelanga ri Isa.

⁵¹

⁵²Anne Yusuf, a'lampai mae ri Pilatus ampalaki maya'Na Isa.

⁵³Le'baki napala', mangemi ampanaungi maya'Na Isa battu ri kayu sallika. Nampa naroko' kaeng lenang anjo mayaka. Le'baki anjo, mangemi napantama' anjo mayaka ri jera' le'baka napare'. Anjo jeraka, pajerakkang batu, tenayapa nale'ba' nipake.

⁵⁴Anjo alloa, allo Juma'; jari a'birimmi appakkaramula allo Pammari-marianga tu Yahudia.

⁵⁵Ri wattunna a'lampa Yusuf angngerangi maya'Na Isa mange ri jeraka, amminawang tongi bai'-baine amminawanga ri Isa battu ri Galilea. Jari naciniki ke'nanga pammantanganna anjo jeraka. Nacini' tongi ke'nanga antekamma batena nipadongko' maya'na Isa lalang ri jeraka.

⁵⁶ Le'baki nitarawang Isa, ammotere'mi ke'nanga appasadia bunga-bunga siagang minynya'-minynya' bau', ero' napake amminynya'-minynyaki maya'Na Isa. Ri wattunna allo Pammari-mariang, ammari-marimi ke'nanga massing ri jama-jamanna, sollanna naturuki ke'nanga apa napassuroanga agamaya.