Read Makassar Version – KITTA' MATANGKASA LUKAS 24 Bible Online

LUKAS 24 - Makassar Version – KITTA' MATANGKASA bible

LUKAS 24

¹Ri wattunna allo Minggu, ri bari'basa' dudua, a'lampami anjo bai'-bainea mange ri jeraka angngerangi anjo bunga-bunga le'baka napasadia ke'nanga.

²Battui ke'nanga ri jeraka, nacini'mi ke'nanga le'ba' ta'gulung anjo batu pattongko'na jeraka.

³Antama'mi na naparessa ke'nanga anjo jeraka, mingka tenami nacini' maya'Na Isa.

⁴Lalang ammentenna ke'nanga anjoreng siagang lalang lannasa'na ke'nanga annawa-nawai anjo passalaka, ti'ring nia'mo rua tau ammakeang sannaka kebo'na, battu ammenteng ri ampi'na ke'nanga.

⁵Sanna'mi malla'na ke'nanga, siagang su'ju'mi ke'nanga naung ri buttaya. Mingka nakanamo anjo tau ruaya, “Angngapa nu'boya tau attallasa' ri alla'na tau matea?

⁶ Tenami anrinni, nasaba' attallasa' poleammi! U'rangi apa le'baka Napau ri kau ngaseng, ri wattunna nia' ija ri Galilea,

⁷angkanaya, ‘Musti nipassareangi Ana' Ma'rupataua mae ri tu dorakaya, nampa nisalli', mingka lattallasa' poleangi ri makatalluna alloa.’ ”

⁸Nau'rangimi anjo bai'-bainea apa le'baka Napau Isa.

⁹Ammotere'na ke'nanga battu ri anjo jeraka, nacaritami anjo apa kajarianga mae ri sampuloa asse're ana' gurunNa Isa siagang sikamma tau amminawanga ri Isa.

¹⁰Iaminne areng-arenna anjo bai'-bainea ampabattuai anjo apa kajarianga mae ri ana' gurunNa Isa: Maria Magdalena, Yohana, na Maria amma'naya Yakobus, kammayatompa sikamma bai'-baine maraengang naaganga ke'nanga.

¹¹Mingka nakana anjo ana'-ana' gurunNa, apa takamma-kammaji anjo nacaritaya ke'nanga. Tena natappa' ke'nanga ri caritana anjo bai'-bainea.

¹²Mingka ammentemmi Petrus nalari mange ri jeraka. A'dundumi attoa' antama' ri jeraka, nanacini' kaeng pa'roko'na mami Isa lalang. Lannasa' sikalimi Petrus. Ammotere'mi, najai sikalimo napakkuta'nangang lalang ri nyawana, ri passala'na anjo apa kajarianga.

¹³Ia todong anjo alloa, nia' rua ana' gurunNa Isa sitabang a'jappa mange ri se'rea desa, niarenga desa Emaus. Anjo desaya kira-kira nia' sampulo asse're kilometere' bellana battu ri Yerusalem.

¹⁴Lalang a'jappana ke'nanga, nabicara tommi sikamma anjo apa le'baka kajariang.

¹⁵Na lalang nabicarana ke'nanga anjo passalaka, battumi KalenNa Isa anrurungangi ke'nanga a'jappa.

¹⁶Nacini'ji ke'nanga Isa, mingka kamma nia' apa are anrompai ke'nanga, sa'genna tanarupaya ke'nanga Isa.

¹⁷Nakanamo Isa ri ke'nanga, “Apa kutadeng nubicara sipa'rua ri tangngana anne aganga sumpadeng?” Ammantammi ke'nanga, na si'na tanja'na nicini'.

¹⁸Angkanami kalase'renna ke'nanga, iamintu niarenga Kleopas, “Kale-kalentaji bawang tau beru battu ri Yerusalem? Takiassengai anjo apa beru kajarianga anjoreng?”

¹⁹Akkuta'nammi Isa Nakana, “Kajariang apa?” Appialimi ke'nanga angkana, “Anjo apa kajarianga ri KalenNa Isa, battua ri Nazaret. Ia na'bi. Teai sipato' lompona koasaNa, baji' ri kana-kananNa, kammayatompa ri panggaukanNa — baji' ri dallekanNa Allata'ala, kammayatompa ri dallekanna sikamma rupataua.

²⁰Nipassareammi ri imang-imang kapalaya siagang pamimping-pamimpinta sollanna nihukkung mate, na nisalli' ri ke'nanga sa'genna mate!

²¹Na sikontutojenna niminasai angkanaya Iami lallappassangi bansa Israelka. Na anne alloa makatallungallonami le'ba'na kajariang anjo passalaka.

²²Nampa nia'mo siapa are bai'-baine battu angngerang kabara', sannaka appata'bangkana. Bari'basa' duduiji namange ke'nanga ri jera'Na Isa.

²³Mingka tenami nacini' maya'Na. Jari ammotere'mi ke'nanga ampaui angkanaya, nia' rua malaeka' nacini' ke'nanga, siagang nipauangi ke'nanga ri anjo malaekaka angkanaya attallasa' poleammi Isa.

²⁴Na nia'mo siapa are ri kambe a'lampa mange ri jeraka, na ma'nassanamo angkanaya kammatojengi anjo napaua bai'-bainea; mingka tenami nacini' ke'nanga Isa.”

²⁵Nakanamo Isa ri ke'nanga, “Dongo' ngaseng memang tongko! Sallo sikali nampa akkulle nupatappa' sikamma apa le'baka napau na'bi-na'bia!

²⁶Sai musti Nakasiaki rolong Karaeng Mappasalamaka anjo passessaya, nampa anrapi' ri kala'biranNa?”

²⁷Le'baki anjo nipakasingariammi ri Isa ke'nanga, sikamma apa le'baka tattulisi' lalang ri Kittaka, ansero kanayai KalenNa. Napakasingara'mi appakkaramula battu ri kitta'-kitta'na Musa sa'genna kitta'na na'bi-na'bia.

²⁸Lalang a'jappana ke'nanga, a'reppese'mi ke'nanga mange ri desa natujua ke'nanga. Kammami angkanaya la'jappa tulusuki Isa,

²⁹mingka nitahammi ri ke'nanga. Nakana ke'nanga ri Ia, “Ammantang maKi' ri balla'na ikambe, nasaba' la'birimmi bangngi siagang appakkaramula tommi sassang.” Jari antama'mi Isa ri balla'na ke'nanga nammantang a'bangngi.

³⁰Ri wattunna ammempo sipangnganreang ke'nanga, angngallemi roti Isa. Appala' sukkuru'mi ri Allata'ala, naNapue-pue anjo rotia, nampa Napassareang mae ri ke'nanga.

³¹Nampami naasseng ke'nanga angkanaya Isa padeng anjo. Mingka ti'ring lanynya'mi Isa ri paccini'na ke'nanga.

³²Nakanamo massing para ia ke'nanga, “Sai sanna' memanji lompona nyawata, ri wattunna a'bicara siagang ikatte, siagang ri wattunna Napakasingara' bonena Kittaka ri katte ri tangngana aganga?”

³³Ammentemmi linta' ke'nanga, nampa ammotere' mange ri Yerusalem. Narapikammi anjoreng sitabang a'rappungang ana'-ana' gurunNa Isa anjo sampuloa asse're, siagang maraengannaya.

³⁴Nakanamo ke'nanga, “Ma'nassa attallasa' poleammi Batara! Le'ba'mi Napappicinikang KalenNa ri Simon!”

³⁵Accarita tommi anjo ruaya ana' gurunNa Isa, iamintu beru battua. Nacaritami ke'nanga apa le'baka kajariang ri ke'nanga ri tangngana aganga, kammayatompa antekamma batena nakkulle narupa ke'nanga Batara, ri wattunna Napue-pue rotia.

³⁶Ri wattu a'bicarana ija ke'nanga, ti'ring nia'mi KalenNa Isa ammenteng ri tangnga-tangngana ke'nanga. Nakana Isa ri ke'nanga, “Salama' ngasengko!”

³⁷Ta'bangka ngasemmi siagang sanna' ngasemmi malla'na ke'nanga, lanri nakana ke'nanga Setang anjo nacinika.

³⁸Mingka Nakanamo Isa, “Angngapa numalla' ngaseng? Angngapa nabata-bata lalang nyawanu?

³⁹Cini'mi limangKu siagang bangkengKu. Tappa' mako angkanaya iNakkeji anne! Jamami siagang cinikimi, nasaba' setanga tena batangkalenna siagang buku-bukunna, sangkamma niaka nucini' ri Nakke.”

⁴⁰Akkana kammana Isa, Napappicinikammi limanNa siagang bangkenNa ri ke'nanga.

⁴¹Na lalang tenanapa nakkulle tappa' ke'nanga, lanri rannu duduna siagang lannasa' duduna ke'nanga, akkuta'nammi Isa ri ke'nanga angkana, “Nia' kanre anrinni?”

⁴²Nisaremi ri ke'nanga sikere' juku' sanggara'.

⁴³Naallemi Isa anjo jujuka, nampa Nakanre ri dallekanna ke'nanga.

⁴⁴Le'baki anjo Nakanamo ri ke'nanga, “Iaminne sikamma passala' le'baka Kupau ri kau ngaseng, ri wattungKu nia'ija assiagang ikau ngaseng. Iamintu angkanaya: sikamma niaka tattulisi' lalang Kitta'-kitta' Musa, Na'bi-na'bia, siagang Pammujia, iamintu ansero kanayai KalengKu, musti kajariang ngasengi.”

⁴⁵Le'baki anjo Nasungkeammi Isa pikkiranna ke'nanga, sollanna akkulle napahang battuanna Kittaka.

⁴⁶Nampa Nakana Isa ri ke'nanga, “Nia' tattulisi' lalang ri Kittaka angkanaya musti attallasa' poleangi Karaeng Mappasalamaka battu ri kamateanga, ri makatalluna alloa.

⁴⁷Kammayatompa, lalang arenNa anjo Karaeng Mappasalamaka, musti nibirittakangi mae ri sikontu bansaya angkanaya musti tobaki sikontu rupataua, kammayatompa Napammopporangi Allata'ala dosa-dosaya. Na anjo birittaya, musti nipabattui appakkaramula battu ri Yerusalem.

⁴⁸Ikau ngasemmi a'jari sa'bi ri sikammaya anjo passalaka.

⁴⁹ Na KalengKu lassuroi battu mae ri kau ngaseng apa le'baka Napa'janjiang Manggea. Mingka musti attayangko rolong anrinni ri kotaya, sa'genna battu koasaNa Allata'ala anrurungang ngasengko.”

⁵⁰ Le'baki anjo, nirurungammi ke'nanga ri Isa assulu' ri pantaranganna kotaya, sa'genna mange ri Betania bellana. Battui mange anjoreng, Naangka'mi limanNa Isa, nampa Nabarakkaki ke'nanga.

⁵¹Lalang Nabarakkakina ke'nanga, ta'angka'mi Isa nai' ri suruga, nampa tassa'la' battu ri ke'nanga.

⁵²Su'ju'mi ke'nanga anynyomba ri Ia. Le'baki anjo ammotere'mi ke'nanga mange ri Yerusalem, sanna' ngaseng rannuna nyawana,

⁵³na tuli mammuji-muji mae ri Allata'ala lalang ri Balla'Na Batara.