Read Makassar Version – KITTA' MATANGKASA LUKAS 4 Bible Online

LUKAS 4 - Makassar Version – KITTA' MATANGKASA bible

LUKAS 4

¹Antama'mi RohNa Allata'ala ri KalenNa Isa ri wattunna assulu' battu ri Binanga Yordan. Nampa nipimping ri RohNa Allata'ala a'lampa mange ri parang lompoa.

²Ammantammi anjoreng patampulo allo sallona, niso'ri ri Billisika. Patampulo alloi tamangnganrea apa-apa. Sa'genna cipuru'mi Nakasia'.

³Nakana Billisika ri Ia, “Sai ana'NaKo Allata'ala? Jari suromi anjo batua na'jari roti.”

⁴ Appialimi Isa Nakana, “Nia' tattulisi' lalang ri Kittaka angkanaya, ‘Teai battu ri rotiaji bawang nattallasa' rupataua.’ ”

⁵Nierammi Isa ri Billisika mange ri tampa' tinggi dudua. Na nipicinikiang memang silalonna sikontu kakaraenganna linoa.

⁶Nakanamo Billisika ri Isa, “Sikontu anjo kakoasang siagang kakalumanynyangang Nucinika lakupassareangi mae ri Kau. Nasaba' yangasenna anjo le'ba'mi nipassareang mae ri nakke. Jari akkullei kupassareang mae ri tau kungaia kusareang.

⁷Punna su'jukKo anynyomba ri nakke lakupassareang ngasengi anjo mae ri Kau.”

⁸ Appialimi Isa Nakana, “Nia' tattulisi' lalang ri Kittaka angkanaya, ‘Parallui nusomba Karaeng Allata'alanu, siagang Iaji bawang siratang nupakala'biri'!’ ”

⁹Nampa nierang Isa ri Billisika mange ri Yerusalem, na niboli' irate ri tompo' kaminang tinggina Balla'Na Batara. Nampa nakana Billisika ri Ia, “Sai Ana'NaKo Allata'ala? Punna Ana'NaKo Allata'ala, a'lumpa' mako bedeng naung.

¹⁰ Nasaba' nia' tattulisi' lalang ri Kittaka angkanaya, ‘LaNasuroi Allata'ala malaeka'-malaeka'Na anjagai bajikKo.’

¹¹ Siagang pole, ‘Lanaruppaiko lalang limanna malaeka'-malaekaka, sollanna manna bangkenNu tena todong nalata'rumpa' ri batua.’ ”

¹² Appialimi Isa Nakana, “Nia' tattulisi' lalang ri Kittaka angkanaya, ‘Teako coba-cobai Batara, Allata'alanu.’ ”

¹³Le'ba'na niso'ri Isa a'rupa-rupa paccoba ri Billisika, a'lampami Billisika ambokoi Isa, nampa attayang pole wattu baji'.

¹⁴Le'baki anjo ammotere'mi Isa mange ri Galilea. Na nikoasai ri RohNa Allata'ala. Tassiara'mi kabara'Na ri sikontu anjo daeraya.

¹⁵Angngajara'mi lalang ri sikamma balla' sambayanga. Na nipuji-pujimo ri tau jaia.

¹⁶A'lampa tommi Isa mange ri Nazaret, kampong le'baka Napammantangi sa'genna lompo. Kamma kabiasanNa, a'lampami mange ri balla' sambayanga ri wattunna allo Pammari-marianga. Ammentemmi ero' ammaca Kitta'.

¹⁷Na nisaremo kitta' Na'bi Yesaya. Nasungkemi anjo kitta' ta'gulunga, nampa Nagappa siagang Nabaca anne aya' angkanaya,

¹⁸ “Niaki RohNa Batara ri KalengKu, Nasaba' le'ba'Ma' Nalanti' untu' ambirittakangi Kabara' Bajika mae ri tu kasi-asia. NasuroA' battu untu' ampa'la'bangi biritta kalappassanna tu nitarungkua siagang lamaccini'na tu butaya; untu' allappassangi tu nijallakkanga

¹⁹ambirittakangi wattu kabattuanNa Batara ampasalamaki umma'Na.”

²⁰Le'baki Nabaca, Nagulung poleammi Isa anjo kittaka, naNapoterang, nampa mange ammempo.[2] Nicinikimi Isa ri sikamma tau hadereka lalang ri balla' sambayanga.

²¹Na appakkaramulamo Isa a'bicara ri ke'nanga angkana, “Anne alloa, ri nulangngere'na Kubaca, a'rupami anjo apa napaua sikamma ayaka sumpaeng.”

²²Sanna' ngaseng baji'na kana-kana Napasuluka. Sa'genna lannasa'mo taua allangngereki, na nipakkontutojeng ri ke'nanga. Nakanamo ke'nanga, “Sai ana'na Yusuf anne Taua?”

²³Jari Nakanamo Isa ri ke'nanga, “Mattantu lanupakei anne pangngebaranga ri Nakke angkanaya, ‘O dottoro', balleimi rolong KalenNu, nampa Nuballei tu maraenga. Gaukammi ri kampong KalenNu anjo gau'-gau' appakalannasaka, nilangngereka kabara'na Nugaukang ri Kapernaum.’ ”

²⁴ Nasambungimi pole bicaranNa Isa Nakana, “U'rangi angkanaya tenanniakka na'bi nipakalompo ri kampong kalenna.

²⁵ Mingka pilangngerimi anne: ri jammang nia'na Na'bi Elia, ri wattu tenana naturung bosia tallun taung sitangnga, naallemi cipuru' sikontu bonena pa'rasanganga. Na anjo wattua jai janda ri Israel.

²⁶ Mingka manna nakamma, tena nanisuroi Elia ri Allata'ala mange antoaki manna kalase'rennaja anjo janda-jandaya. Passangalinna nisuro mangeji ri se'reang janda niaka ri Sarfat, ri daera Sidon.

²⁷ Kammayatompa ri jammang nia'na Na'bi Elisa, jai tau garring sala ri Israel. Mingka manna sitau battu ri ke'nanga tania' niballei ri Elisa. Passangalinna Naaman bawang, anjo tu niaka ri Siria.”

²⁸Larro sikali ngasemmi tau niaka ri balla' sambayanga nalangngere'na akkana kamma Isa.

²⁹Ammentemmi ke'nanga nampa nabongka Isa assulu' ri pantaranganna anjo kotaya. Naerammi ke'nanga Isa mange ri tubiri'na buluka ero' nasorongang naung.

³⁰Mingka ammose'mi Isa ri alla'na tau jaia nampa a'lampa ampilari anjo tampaka.

³¹Nampa a'lampa Isa mange ri kota Kapernaum ri Galilea. Naajara'mi taua anjoreng ri allo Pammari-marianga.

³² Lannasa'mi ke'nanga allangngereki bateNa angngajara', nasaba' lompoi pangaruNa punna a'bicarai.

³³Anjoreng ri balla' sambayanga nia' se're tau nisoso' ri setang. Accalli'-calli'mi anjo taua nakana,

³⁴“He Isa, tu Nazaret! Apa ero' Nugaukang mae ri kambe? BattuKo ero' angngancuruki ikambe? KuassenjaKo angkana inaiKo antu: iKaumi tu matangkasaka, nisuroa battu ri Allata'ala!”

³⁵Naga'gara'mi Isa anjo setanga Nakana, “A'merekko! Assulukko battu ri antu taua!” Nipatappasa'mi anjo taua ri anjo setanga ri dallekanna ngaseng ke'nanga. Nampa assulu' baji'-baji' anjo setanga battu ri anjo taua.

³⁶Lannasa' ngasemmi taua, siagang massing nakanamo ke'nanga para ia, “Teai sipato' kana-kananNa anne taua. Lanri koasa siagang pangaru kana-kananNa na Nasuro assulu' setanga, nassulu' tojeng setanga!”

³⁷A'la'bammi kabara'Na Isa ri sikontu anjo daeraya.

³⁸Nabokoimi Isa anjo balla' sambayanga, nampa a'lampa mange ri balla'na Petrus. Anjo wattua sitabangi rammusu' matoang bainena Petrus. Nipauammi Isa ri taua anjo passala' garrinna.

³⁹Mangemi Isa ri katinroanna anjo ibu', nampa Napela' assulu' anjo rammusu'na. Ammarimi anjo rammusuka; nambangung memammo silalonna matoang bainena Petrus, mange allayani ke'nanga.

⁴⁰Ri wattunna lalabumo alloa, battu ngasemmi taua angngerangi tau garrinna mae ri Isa. A'rupa-rupami garrinna ke'nanga. Naangka'mi na Napadongko' limanNa Isa irateanganna ke'nanga, sa'genna a'jari baji' ngaseng ke'nanga.

⁴¹Nabongka ngaseng tommi setanga battu ri kalenna taua, nasosoka setang. Na punna assulu' anjo setanga battu ri kalenna taua, ammarrang-marrammi angkana, “IKaumi Ana'Na Allata'ala!” Mingka Naga'gara'mi Isa anjo setang-setanga. Napisangkai appau ke'nanga, lanri naassengi ke'nanga angkana, Iami Karaeng Mappasalamaka.

⁴²Ri wattunna appakkaramulamo ammumba alloa, Nabokoimi Isa anjo kotaya, nampa a'lampa mange ri se'reang tampa' sino-sinoa. Appakkaramulami taua amboyai. Na ri wattunna nibuntulu'mo ri tau jaia, tenamo nikellai ri taua a'lampa.

⁴³Mingka Nakanamo Isa, “Musti Kubirittakang tongi passala'na Kabara' Bajika siagang PamarentahanNa Allata'ala ri kota-kota maraenga. Nasaba' untu' iaminjo naNasuroA' battu Allata'ala antama' ri linoa.”

⁴⁴Lanri kammana minjo Nakkato'ba Isa lalang ri sikamma balla' sambayanga, ri sikontu pa'rasangang Yudea.