Read Makassar Version – KITTA' MATANGKASA LUKAS 5 Bible Online

LUKAS 5 - Makassar Version – KITTA' MATANGKASA bible

LUKAS 5

¹ Nia' se're wattu nammenteng Isa ri biring Tamparang Genesaret. Jai tau assiassa'-assa', battu ero' allangngereki biritta battua ri Allata'ala.

²Nia' Nacini' Isa rua biseang ri birinna anjo tamparanga. Sitabangi naung pajalaya antangkasi jalana ke'nanga.

³Nai'mi Isa ri kalase'renna anjo biseanga, iamintu biseanna Simon. Nampa nasorong Simon anjo biseanga, assulukang sike'de' ri tamparanga. Ammempomi Isa ilalang ri anjo biseanga, nampa Naajara' anjo tau jaia.

⁴Le'baki Naajara' ke'nanga, Nakanamo ri Simon, “Bisei biseannu antama' ri tampa' lantanga, nampa nubuang jalanu anjakkala' juku'.”

⁵ Appialimi Simon nakana, “O Bapa' Guru, sipattangmaki' bujuru' anjama terasa', mingka manna sikayu tania' juku' nigappa. Mingka lanri Kipassuroangi, baji'mi nakumange pole a'jala.”

⁶ Le'ba'na nagaukang anjo apa Napassuroanga Isa, teaimi sipato' jaina juku' nagappa ke'nanga. Sa'genna appakkaramulami sinre' jalana ke'nanga napakamma juku'.

⁷Jari appala' tulummi ri agang-aganna ke'nanga niaka ri biseang maraenga. Battumi agang-aganna ke'nanga nampa nabonei juku' biseanna ke'nanga. Rassi rua-ruai anjo biseanna ke'nanga, sa'genna a'birimmo tallang anjo biseanga napakamma jaina juku'.

⁸Ri wattunna nacini' Simon anjo kajarianga, su'ju'mi ri dallekanNa Isa. Nampa nakana, “Bokoima' Batara! Nasaba' inakke anne tau doraka'!”

⁹Lannasa'mi Simon siagang sikamma tau naaganga anciniki anjo juku' kammaya jaina, nagappaya ke'nanga.

¹⁰Kammayatompa agang-aganna Simon, iamintu Yakobus siagang Yohanes, ana'na Zebedeus. Nakanamo Isa ri Simon, “Teako mallakki! Pakkaramula ri kamma-kammaya anne la'jariko sanrapang pajala tau.”

¹¹Nabeso'mi Simon siagang agang-aganna anjo biseanga mange ri biring tamparanga. Nampa nabokoi ngaseng anjo biseanga, namminawang ke'nanga ri Isa.

¹²Ri se'reang allo, niaki Isa ri se'reang kota. Anjoreng nia' se're tau bura'ne nataba garring sala. Nacini'na Isa, su'ju'mi anjo taua ri dallekanNa Isa. Nampa nakana ri Isa, “Pa', punna erokKi', akkullea' Kiballei naku'jari baji'!”

¹³Naangka'mi limanNa Isa, nampa Nasero anjo taua, siagang Nakana, “ErokKa', a'jari baji' mako.” Anjo wattua lanynya' silalonnami garrinna anjo taua.

¹⁴ Napisangkaimi Isa anjo taua ancaritai anjo passalaka, manna pole ri nai. Nakanamo ri anjo taua, “A'lampamako mae ri imanga nampa nusuro amparessai kalennu. Nampa a'lampako mange assare koro'bang situru' napassuroanga Musa. Iaminjo a'jari butti ri taua angkanaya ma'nassa baji' mako ri garrinnu.”

¹⁵Mingka pila' tassiara'mi kabara'Na Isa ri kere-keremae. Jaimi tau battu ero' ampilangngeri apa Napabattua, siagang ero' assuro ballei garrinna ke'nanga.

¹⁶Le'baki anjo, a'lampami Isa mange appala' doang ri tampa' sino-sinoa.

¹⁷Nia' se're allo, ri wattunna angngajara' Isa, na nia' siapa are tu Farisi siagang guru-guru agama ammempo ampilangngeri. Tu battui ke'nanga ri Yerusalem siagang kota-kota niaka ri Galilea siagang Yudea. Niaki ri KalenNa Isa koasaNa Allata'ala untu' amballei na'jari baji' sikamma tau garringa.

¹⁸Anjo wattua, nia'mo siapa are tau battu angngerang tau peso' irate ri katinroanga. Eroki ke'nanga angngerangi anjo tau pesoka antama' ri anjo ballaka, mange ri dallekanNa Isa.

¹⁹Mingka lanri teai sipato' jaina tau, takkulleami ke'nanga antama'. Jari naerammi ke'nanga anjo tau pesoka nai' ri pattongko'na anjo ballaka. Nampa nasungke ke'nanga pattongko'na anjo ballaka. Nampa napanaung anjo tau pesoka ri dallekanNa Isa, ri tangnga-tangngana anjo tau jaia.

²⁰Ri wattunna Nacini' Isa antekamma tappa'na ke'nanga, Nakanamo ri anjo tau pesoka, “Sari'battang, nipammopporammi dosanu.”

²¹Sipa'bicarami guru-guru agamaya siagang tu Farisia nakana, “Inai anne taua nabarani kamma anghinai Allata'ala? Inai akkulle ampammopporangi dosaya, pantaranganna Allata'ala?”

²²Naassengi Isa anjo apa napakkuta'nanganga ke'nanga. Jari Nakanamo, “Angngapa nukkuta'nang kamma ngaseng lalang ri nyawanu?

²³Kereanga la'bi gampang, angkanaya, ‘Nipammopporammi dosanu,’ yareka angkanaya, ‘Ambangungko nai' nu'jappa?’

²⁴Mingka kamma-kamma anne Kupa'butti ri kau ngaseng, angkanaya koasai Ana' Ma'rupataua ampammopporangi dosaya ri anne linoa.” Nampa Nakana Isa ri anjo tau pesoka, “Ambangungko nai', angkaki katinroannu, siagang ammotere' mako!”

²⁵Ambangummi linta' anjo taua ri dallekanna ngaseng ke'nanga. Nampa naangka' katinroanna, ammotere' siagang ammuji-muji ri Allata'ala.

²⁶Sanna' ngasemmi lannasa'na ke'nanga, nammuji-mujimo ri Allata'ala. Na lalang malla'na, nakanamo ke'nanga, “Teai sipato' appakalannasa'na kajariang nicinika anne alloa!”

²⁷Le'baki anjo assulu'mi Isa. Nia'mo Nacini' sitau pasingara' sima, niarenga Lewi, sitabang ammempo lalang ri kantoro'na. Nakanamo Isa ri ia, “Amminawangko ri Nakke.”

²⁸Ammentemmi Lewi siagang nabokoimi yangasenna niaka, nampa amminawang ri Isa.

²⁹Le'baki anjo appare'mi Lewi passua'-suarrang ri balla'na untu' antoanai Isa. Jaimi pasingara' sima siagang tau maraenganga battu angngagangi ke'nanga angnganre.

³⁰ Nia'mo siapa are tu Farisi siagang guru-guru agama tena nasannang nyawana anciniki ke'nanga. Nakanamo ke'nanga ri ana'-ana' gurunNa Isa, “Angngapa nusipangnganreang siagang sipangnginungang ngaseng siagang pasingara' simaya kammayatompa tau kodi sipaka?”

³¹Appialimi Isa Nakana, “Tau tenaya nagarring, tena naparallu ri dottoro'; mingka tau garringaji parallu.

³²Teai tau nakanaya kalenna annaba battu ero' Kukio', passangalinna tau dorakaya, sollanna toba' ke'nanga battu ri dosa-dosana.”

³³Nakanamo taua ri Isa, “Ana'-ana' gurunna Yohanes siagang ana'-ana' gurunna tu Farisia sarroi appuasa siagang appala' doang. Mingka ana'-ana' gurunNu nagaukangi angnganre-angnginunga.”

³⁴Appialimi Isa Nakana, “Maka nusuroi toanannu appuasa ri pa'buntinganga punna nia'ija bunting bura'nea angngagangi ke'nanga? Tantu tena!

³⁵Mingka lanarapiki wattunna nalanialle anjo bunting bura'nea battu ri ke'nanga. Iaminjo wattua nalappuasa ke'nanga.”

³⁶Nampa Nacaritamo pole Isa ri ke'nanga anne pangngebaranga, “Tena tau antampengi baju toana, nakaeng battu ri baju berua napake antampengi. Nasaba' tantu nakekkeki anjo baju berua. Siagang pole, tantu tena nasicoco' anjo kaeng pannampeng berua siagang anjo baju toaya.

³⁷Kammayatompa, tena tau ammoli' anggoro' beru lalang ri pammoneang toaya. Nasaba' lareppeki anjo pammoneang toaya napakamma anjo anggoro' berua. Jari latappelaki anjo anggoro' berua, napanra' todong anjo pammoneanga.

³⁸Anggoro' berua musti anjoreng tongi ri pammoneang berua niboli'.

³⁹Kammayatompa, tena tau ero' angnginung anggoro' beru, punna le'ba'mo angnginung anggoro' sallo. Nasaba' nakana ke'nanga, ‘Bajikangangi anjo anggoro' salloa.’ ”