Read Makassar Version – KITTA' MATANGKASA LUKAS 6 Bible Online

LUKAS 6 - Makassar Version – KITTA' MATANGKASA bible

LUKAS 6

¹ Ri se'reang allo Pammari-mariang, a'jappai Isa na numalo ri se'reang koko gandung. Angngattili'mi ana'-ana' gurunNa gandung, nampa nagisiri' siagang limanna ke'nanga nampa nakanre.

²Nia'mo siapa are tu Farisi angkana, “Angngapa naNudakkai atoranna agamata, iamintu Nugaukangi apa nipappisangkanga nigaukang ri allo Pammari-marianga?”

³ Appialimi Isa Nakana, “Tenapa nale'ba' nubaca apa le'baka nagaukang Karaeng Daud, ri wattunna cipuru' siagang ana'-ana'na?

⁴ Antamaki ri Balla'Na Batara angngallei roti le'bakamo nipassareang mae ri Allata'ala, nampa nakanre. Nampa napassareang todong anjo rotia mae ri ana'-ana'na. Na sikontutojenna, situru' atorang agamata, imang-imangaji bawang akkulle angkanrei anjo rotia.”

⁵Nampa Nakana pole Isa, “Makoasai Ana' Ma'rupataua irateanganna allo Pammari-marianga!”

⁶Ri se'reang allo Pammari-mariang maraenga, a'lampai Isa angngajara' ri balla' sambayanga. Anjoreng ri balla' sambayanga, nia' sitau mate siali limanna.

⁷Nia' siapa are guru-guru agama siagang tu Farisi ero' amboyangi kasalang Isa, sollanna akkulle nituntu' Isa. Jari nacinikimi ke'nanga, maka laNaballei Isa anjo taua ri allo Pammari-marianga.

⁸Mingka Naassengi Isa pikkirang salana ke'nanga. Jari Nakanamo ri anjo tau mate sialia limanna, “Maeko anrinni ammenteng ri dallekang!” Ammentemmi anjo taua, nampa mange ri dallekang.

⁹Nampa akkuta'nang Isa ri tau niaka anjoreng Nakana, “Manuru' agamaya apa akkulle nigaukang ri allo Pammari-marianga? A'gau' baji' yareka a'gau' ja'dala'? Appasalama' tau yareka ancilakai taua?”

¹⁰Naciniki ngasemmi Isa sikamma tau niaka hadere'. Nampa Nakana ri anjo tau mate sialia limanna, “Pajonjoi limannu.” Napajonjomi limanna anjo taua, na'jari baji'mo limanna.

¹¹Mingka sanna'mi larrona guru-guru agamaya siagang tu Farisia. Sipa'bicarami ke'nanga a'boya cara angkanaya apa akkulle nagaukang ke'nanga mae ri Isa.

¹²Anjo wattua naiki Isa ri se'reang bonto, untu' appala' doang. Appala' doangi anjoreng sipattang bujuru'.

¹³Ri wattunna singara'mo, Nakio'mi ana'-ana' gurunNa. Nampa Napilei sampulo anrua battu ri ke'nanga. Nagallara'mi tunisuro anjo tau sampuloa anrua. Iaminne areng-arenna ke'nanga:

¹⁴Simon (nigallaraka Petrus,) siagang sari'battanna niarenga Andreas; na Yakobus siagang Yohanes, Filipus siagang Bartolomeus,

¹⁵Matius siagang Tomas, Yakobus ana'na Alfeus, na Simon (nigallaraki Patriot),

¹⁶Yudas ana'na Yakobus siagang Yudas Iskariot ambalukangai Isa sallang.

¹⁷Le'baki anjo naummi Isa siagang tunisuroNa battu ri anjo bontoa, nampa ammantang ri se'reang parang lapparaka. Jai anjoreng ana'-ana' gurunNa maraenga, kammayatompa jai tommi tau battu a'rappungang, battu ri kere-keremae: tu battu ri sikontu pa'rasangang Yudea, Yerusalem, kota-kota Tirus, siagang Sidon kota anjorenga ri biring tamparanga.

¹⁸Battumi ke'nanga ero' ampilangngeri kana-kananNa Isa, siagang ero' assuro ballei kalenna. Kammayatompa tau nasosoka setang nia' tommi battu, naniballei tommo, sa'genna baji' poleang.

¹⁹Ero' ngasemmi taua anseroi Isa, nasaba' nia'na koasa assulu' battu ri KalenNa, akkullea amballei garrinna ke'nanga.

²⁰Naciniki ngasemmi ana'-ana' gurunNa Isa, nampa Nakana, “Mate'ne ngasengko tau kasi-asia, nasaba' ikaumi umma'Na Allata'ala!

²¹Mate'ne ngasengko tau cipuruka ri kamma-kammaya anne; nasaba' lanibassoriko sallang! Mate'ne ngasengko tau angngarruka ri kamma-kammaya anne; nasaba' lammakkalakko sallang!

²² Mate'ne ngasengko punna nikabirisiko, punna nisorongbokoko, punna nihinako, siagang nipitinako passabakkang Ana' Ma'rupataua!

²³ Kamanna na'bi-na'bia ri jammang riolo nigau' kamma ngaseng tongi. Punna kajariang anjo ri kalennu, pakasannangi atinnu siagang a'rannu-rannuko; nasaba' sanna' lompona pahala lanugappaya ri suruga.

²⁴Mingka cilaka ngaseng mako tau kalumanynyanga ri kamma-kammaya anne; nasaba' nukasia'mi apa-apa nungaia!

²⁵Cilaka ngaseng mako tau bassoroka ri kamma-kammaya anne; nasaba' lanaalleko cipuru'! Cilaka ngaseng mako ikau tau ammakka'-makkalaka ri kamma-kammaya anne; nasaba' lasi'nai atinnu siagang langngarru'-arrukko!

²⁶Cilaka ngaseng mako, punna nipalece mako ri tau jaia; nasaba' kammatommi anjo batena boe-boena ke'nanga ampalecei na'bi-na'bi patipua ri jammang riolo.”

²⁷“Mingka ikau ngaseng niaka ampilangngeriA' ri kamma-kammaya anne, iaminne pappasangKu mae ri kau: kamaseangi musu-musunnu, siagang a'gau' bajikko mae ri tau angkabirisiako.

²⁸Pappalakkangi barakka' tau antunrayako, siagang pappala' doangangi tau ja'dalaka ri kau.

²⁹Punna natempa ka'rang taua pilisi'nu siali, sareangi pole natempa ka'rangi sialia. Punna nialle passai jubanu, sareangi pole bajunnu.

³⁰Punna nia' tau appala' apa-apa ri kau, sare laloi. Na punna naalle passa apa-apannu, teako palaki ammotere'.

³¹ Gaukammi ri parannu tau apa nukaerokia nagaukang ke'nanga ri kalennu.

³²Nasaba' apa pahalanu punna tau mangngamaseanga bawang ri kalennu nukamaseang? Manna tau dorakaya nakamaseang tonji tau mangngamaseanga ri kalenna!

³³Apa pahalanu punna tau a'gau' bajikaji bawang ri kalennu nupa'gau' bajiki? Manna tau dorakaya a'gau' kamma tonji.

³⁴Kammayatompa, apa pahalanu punna tau akkulleaji ambayarakko nusare angnginrang? Manna tau dorakaya nasare tonji angnginrang paranna tau doraka, nampa napala' ammotere'!

³⁵Sikontutojenna takammayai anjo! Mingka musti nukamaseangi musunnu, siagang a'gau' bajikko ri ke'nanga. Musti nusarei taua angnginrang, siagang teako attayangi lanipoterangngang. Punna kamma anjo batenu, lompoi pahala lanugappaya, siagang la'jari mako ana'-ana'Na Allata'ala Kaminang Tinggia. Nasaba' baji' pa'maiki Allata'ala mae ri tau tenaya nangngasseng appala' sukkuru', kammayatompa baji' pa'maiki mae ri tau ja'dalaka.

³⁶Paralluko lompo pangngamaseang sangkamma Manggenu lompo pangngamaseangi.”

³⁷“Teako angngadeli ri tau maraenga, sollanna tena todong Naadeliko Allata'ala. Teako anghukkungi ri tau maraenga, sollanna tena todong Nahukkungko Allata'ala. Pammopporangi parannu tau, sollanna Napammopporang tongko Allata'ala.

³⁸Assareko ri parannu tau, sollanna Nasare tongko Allata'ala; lanisareko sanna' jaina la'bina, ri pa'baku' le'baka nibaku' sannaka rassina. Nasaba' pa'baku' apa nupake ambakuki parannu tau, ia todong minjo pa'bakuka laNapake Allata'ala ambakukko.”

³⁹ Le'baki anjo Nacaritami Isa anne pangngebaranga, Nakana, “Punna tau buta anrenrengi paranna tau buta, tena tatu'guru'na sipa'rua naung ri solonganga.

⁴⁰ Tena ana' guru la'jari lompoangang na gurunna. Mingka punna le'ba'mo appilajara' ana' gurua, lasangkammami gurunna.

⁴¹Angngapa nakkulle nucini' baru'bu' kayua lalang ri matanna sari'battannu, natena nujampangi kayu baloka lalang ri matannu?

⁴²Antekamma lakkulle nukana ri sari'battannu, ‘Maeko sari'battang, nakupasulu' anjo baru'bu' kayua lalang ri matannu,’ na nia' kayu balo' lalang ri matannu tanucinika? He, munape'! Pasuluki rolong anjo balo' niaka lalang ri matannu. Punna assulu'mo, nampami labaji' paccini'nu, siagang nampami akkulle nupasulu' anjo baru'bu' kayu lalanga ri matanna sari'battannu.”

⁴³“Punna coppong poko'-pokoka, tena olona lakodi rapponna. Kammayatompa, punna tacopponga poko'-pokoka, tena olona labaji' rapponna.

⁴⁴ Sikamma poko'-pokoka, akkullei nibatei battu ri rapponna. Takkulleai poko' akkatintinga la'rappo ara. Siagang takkulleai rompo'-rompo' akkatintinga la'rappo anggoro'.

⁴⁵ Punna baji' taua, mattantu labaji' tongi kana-kananna, lanri sangnging kabajikang lalang ri atinna. Na punna ja'dala' taua, mattantu laja'dala' tongi kana-kananna, lanri sangnging kaja'dallang lalang ri atinna. Nasaba' apa-apa mamo assulu' ri bawaya ia tomminjo niaka lalang ri atia.”

⁴⁶“Angngapa nukkio', ‘Batara, Batara’ ri Nakke, mingka taerokako anggaukangi apa Kupaua ri kau?

⁴⁷Inaimi lanipasanrapangangi tau battua mae ri Nakke, na napilangngeri siagang nagaukang kanangKu? — Bajiki punna Kupauangko — .

⁴⁸Iami sanrapang tau ambangunga balla', nakekei lantang-lantang buttaya, nampa batu napare' pondasi. Ri wattunna battu a'baya siagang battu je'ne' binangaya antujui anjo ballaka, takkulleai ta'ge'goso', nasaba' bajiki pondasina.

⁴⁹Mingka inai-nai allangngereki kanangKu mingka tena nagaukangi, iami sanrapang tau ambangunga balla', natena nammake pondasi. Punna battu a'baya antujui, anra'ba memammi silalonna; na teai sipato' lompona panra'na anjo ballaka!”