Read Makassar Version – KITTA' MATANGKASA LUKAS 7 Bible Online

LUKAS 7 - Makassar Version – KITTA' MATANGKASA bible

LUKAS 7

¹Le'baki Napau Isa sikamma anjo passalaka mae ri tau jaia, a'lampami mange ri Kapernaum.

²Anjoreng nia' se're perwira surudadu Roma. Anne perwiraya, nia' palayanna, sannaka nakarimangnginna. Na anjo palayanna natabai garring sanna', siagang lamate dudumi.

³Ri wattunna nalangngere' anjo perwiraya kabara'Na Isa, nasuromi siapa are pamimping tu Yahudi mae ri Isa. Nasuroi ke'nanga mange appala' tulung, sollanna battu Isa amballei anjo palayanna.

⁴Ri wattunna battu ke'nanga mae ri Isa, appala' tulung dudumi ke'nanga ri Isa sollanna akkulle Natulung anjo perwiraya. Nakana ke'nanga ri Isa, “Siratangi Kitulung anjo perwiraya Bapa'

⁵nasaba' sanna' nakarimangnginna bansata siagang le'ba' maki' napambangungang balla' sambayang.”

⁶A'lampami Isa siagang ke'nanga. Ri wattunna la'birimmo battu Isa mange anjoreng ri balla'na anjo perwiraya, nia'mo siapa are aganna anjo perwiraya battu nasuro anruppai Isa. Nasuroi ke'nanga ampabattui pasanna ri Isa angkana, “Tea' maki' susa-susai KalenTa mae ri ballakku, nasaba' tena nakusiratang antarimaKi' ri ballakku.

⁷Iaminjo saba'na natena kubarani battu andallekang ri Katte. Jari Kiparentakang mami sollanna a'jari baji' anjo palayangku.

⁸Nasaba' manna inakke amminawang turu' tonja' mae ri parentana komandangku. Na irawangangku nia' todong siapa are jaina surudadu, na musti amminawang turu' tongi ri parentaku. Punna nia' tau sitau kusuro angkana, ‘A'lampako!’ ma'nassa tena ta'lampana; na punna kukana ri maraenganga, ‘Maeko anrinni!’ ma'nassa tena tabattuna mae. Siagang punna kusuro palayangku angkana, ‘Gaukangi anne!’ ma'nassa tena tanagaukanna.”

⁹Sanna' lannasa'Na Isa allangngereki anjo pappasanna perwiraya. Assailemi nampa Nakana mae ri tau jai niaka amminawang ri Ia angkana, “Teai sipato' anne taua. Manna ri alla'na bansa Israelka tena tompa naKule'ba' ammuntulu' tau lompo kammaya anne tappa'na!”

¹⁰Ri wattunna ammotere' ngaseng anjo tunisuroa mange ri balla'na anjo perwiraya, a'jari baji'mi anjo palayanga.

¹¹Tena nasallo ribokoanganna, a'lampai Isa mange ri kota Nain. Amminawang tongi ana'-ana' gurunNa siagang tau jaia.

¹²Ri wattunna anrapi' Isa ri pakke'bu' lompona kotaya sibuntulu'mi paerang tu mate assulukang kota. Anjo tu matea ana' bura'ne, ana' sitau-tau, na jandamo amma'na. Jai tunjoreng ri kotaya anrurungangi anjo jandaya.

¹³Tu'guru'mi pangngamaseanNa Isa anciniki anjo jandaya. Nakanamo ri ia, “Teaki' angngarruki bu'!”

¹⁴Nampa a'reppese' Isa ri pa'bulekanna anjo tu matea nampa Nata'gala'! Ammantammi anjo pabule' tu matea. Nakanamo Isa, “E, turungka, Kusuroko ambangung!”

¹⁵Ambangummi ammempo anjo turungka le'bakamo mate, nappakkaramulamo a'bicara. Nampa Napassareang Isa anjo ana' bura'nea mae ri amma'na.

¹⁶Malla' ngasemmi taua, na mammuji-muji ri Allata'ala. Nakanamo ke'nanga, “Ammumbami na'bi lompoa ri tangnga-tangngata! Nia'mi battu Allata'ala ampasalamaki umma'Na!”

¹⁷Tassiara'mi anne kabara'Na Isa ri sikontu Yudea siagang daera-daera niaka ri tammulilina.

¹⁸Nipauammi Yohanes ri ana'-ana' gurunna sikamma anjo apa le'baka kajariang. Nakio'mi Yohanes rua ana' gurunna,

¹⁹nampa nasuro ke'nanga mange akkuta'nang ri Isa angkana, “Maka iKatte mintu tu labattua situru' Napa'janjianga Allata'ala? Yareka musti lattayangki' maraengannaya?”

²⁰A'lampami anjo ruaya ana' gurunna Yohanes mange ri Isa angkana, “Nisuroa' sipa'rua ri Yohanes Paje'ne' battu akkuta'nang ri Katte angkanaya, maka iKatte mintu tu labattua situru' Napa'janjianga Allata'ala? Yareka musti lattayangijaki' maraengannaya?”

²¹Anjo wattua, sitabangi jai tau Naballei Isa, siagang jai roh ja'dala' Nabongka; kammayatompa jaimi tau buta Napa'jari accini'.

²² Jari appialimi Isa Nakana, “Ammotere' mako mae ri Yohanes na nupauang apa le'baka nulangngere' siagang nucini': accini'mi tau butaya, a'jappami tau pesoka, a'jari baji'mi tau garring salaya, allangngere'mi tau tongoloka, attallasa' poleammi tau matea, siagang nibirittakammi Kabara' Baji' battua ri Allata'ala, mae ri tu kasi-asia.

²³Mate'nemi tau tenaya naero' ansorongbokoA'.”

²⁴A'lampanamo anjo tu nasuroa Yohanes, Nabicarami Isa ri tau jaia anjo passala'na Yohanes. Nakana, “Apa ero' mange nucini' ri parang lompoa? Silawara' ruku' natuika anging?

²⁵Apa ero' mange nucini'? Se're tau ammakeang ga'ga? Niaki ri balla' lompona karaenga tau ammakeang ga'gaya siagang tau kala'bianga ri katallassanna!

²⁶Jari, apa ero' assulu' mange nucini'? Erokko mange accini' sitau na'bi? Kammatojengi, angkanaya na'bi anjo Yohanes; ba'lalo lompoangangi pole na na'bia.

²⁷ Nasaba' iaminjo Yohanes natabaya anjo kana tattulisika lalang ri Kitta' angkanaya, Nakana Allata'ala, ‘Iaminne tunisuroKu,’ ‘Kusuroa a'lampa rioloanganNu, sollanNu nasungkeang oloang!’ ”

²⁸Nakana pole Isa, “U'rangi angkanaya tenale'bakapi nia' tau lompoangang na Yohanes Paje'ne' ri anne linoa. Mingka inai-nai kaminang ca'di ri umma'Na Allata'ala, iami lompoangang na Yohanes Paje'ne'.”

²⁹ Sikontu taua — kammayatompa pasingara' simaya — allangngereki Isa akkana kamma anjo; yangaseng minjo ke'nanga angkatutui apa-apa Natuntuka Allata'ala, naero' nasuro je'ne' kalenna ri Yohanes.

³⁰Mingka taerokai tu Farisia siagang guru-guru agamaya antarimai rancanaNa Allata'ala eroka ampasalamaki ke'nanga. Taerokai ke'nanga nije'ne' ri Yohanes.

³¹A'bicarami pole Isa Nakana, “Apami ero' Kupasanrapangangi taua ri anne jammanga? Apami sanrapanna ke'nanga?

³²Sanrapangi ke'nanga ana'-ana' ammempoa ri pasaraka; nia' sipa'rappungang akkio' ri maraengannaya angkana, ‘Nikelongang mako kelong a'rannu-rannu, mingka taerokako a'dansa! Nikelongang mako kelong ri kamateanga, mingka taerokako angngarru'!’

³³Niaki battu Yohanes Paje'ne' — nappuasa siagang tangnginungai anggoro' — na nupakkanai, ‘Napantamakki setang!’

³⁴Niaki battu Ana' Ma'rupataua — nangnganre siagang angnginung — na nupakkanai, ‘Cini' sai anjo taua, balalana siagang painunna, aganna pasingara' simaya siagang tu dorakaya.’

³⁵Mingka manna nakamma mamo, la'butti ero' kabajikanNa Allata'ala battu ri sikontu tau antarimayai.”

³⁶Nia' sitau tu Farisi, niarenga Simon, angkioki Isa mange ri balla'na. A'lampami Isa mange ri balla'na anjo taua, nampa ammempo angnganre.

³⁷ Anjoreng ri kotaya nia' pole sitau baine sannaka jaina dosana. Ri wattunna nalangngere' anjo bainea angkanaya niaki Isa sitabang angnganre ri balla'na anjo tu Farisia, battumi angngerang sibotolo' minynya'-minynya' bau'.

³⁸Mangemi ammenteng ri bokoNa Isa, iamintu ri ampi' bangkenNa Isa. Angngarru'mi anjoreng, nampa nabasai bangkenNa Isa siagang je'ne' matanna. Nampa nalu'lu' nakalotori bangkenNa Isa siagang uu'na, nampa natumpai minynya'-minynya' bau'.

³⁹Nacini'na anjo tu Farisi patannaya balla' appakamma anjo bainea, nakanamo lalang ri nyawana, “Punna na'bi anne Taua, tantu Naassengi angkanaya baine apa anjo baine anjamayai; tantu Naassengi angkanaya anjo bainea, baine sanna' jaina dosana!”

⁴⁰Jari Nakanamo Isa ri Simon, anjo tu Farisi patannaya balla', “Simon, Simon, nia' ero' Kupau ri kau.” Appialimi Simon nakana, “Iye' Pa' Guru, Kipaumi.”

⁴¹Nakanamo Isa, “Nia' rua tau kainrangang doe' ri taua. Anjo se'rea kainrangangi limambilangngang doe' pera' na se'reanga kainrangang limampulo doe' pera'.

⁴²Mingka takkulleai ke'nanga ambayaraki anjo inranna. Jari tenamo nanipabayaraki ke'nanga. Jari kereanga anjo tau ruaya lala'bi angkamaseangi anjo patannaya doe'?”

⁴³Appialimi Simon nakana, “Kukira ia anjo kaminang jaia inranna na tanipabayarra!” Appialimi Isa Nakana, “Annaba sikali panggappanu.”

⁴⁴Nacinikimi Isa anjo bainea, nampa Nakana ri Simon, “Nuciniki anne bainea? BattuA' anrinni ri balla'nu, natena nupasadiangA' je'ne' pa'bissa bangkeng; mingka anne bainea natangkasi bangkengKu siagang je'ne' matanna, nampa nalu'lu' siagang uu'na.

⁴⁵Tena nubattu ambauA' ri wattungKu nuruppai; mingka anne bainea tenammariai ambaui bangkengKu baku' battuKu mae anrinni.

⁴⁶Tena nanutumpai minynya' ulungKu, mingka anne bainea natumpaimi minynya'-minynya' bau' bangkengKu.

⁴⁷Sitojeng-tojenna, lanri lompo kammana pangngamaseanna ri Nakke, na ma'nassamo angkanaya nipammopporammi dosa-dosana sannaka jaina. Punna sike'de'ji nipammopporangangi dosana taua, sike'de' tonji pangngamaseanna.”

⁴⁸Nampa Nakana Isa ri anjo bainea, “Nipammopporammi dosa-dosanu.”

⁴⁹Nakanamo para ia tau niaka ammempo angnganre siagang Isa, “Inai anne taua, nakkulle kamma ampammopporangi dosaya?”

⁵⁰Mingka Nakanamo pole Isa ri anjo bainea, “Nipasalama' mako lanri tappa'nu mae ri Nakke. A'lampamako siagang pakasannammi pa'mai'nu!”