Read Makassar Version – KITTA' MATANGKASA LUKAS 8 Bible Online

LUKAS 8 - Makassar Version – KITTA' MATANGKASA bible

LUKAS 8

¹Tena nasallo ribokoanganna, a'lampami Isa mange ri kota-kotaya, siagang ri kampong-kamponga, untu' ambirittakangi Kabara' Bajika, angkanaya lappakkaramulami ammarenta Allata'ala salaku Karaeng. Nia' tongi ana' gurunNa sampuloa anrua amminawang.

² Kammayatompa siapa are bai'-baine le'baka napantamakki roh ja'dala' siagang tau garring na Naballei Isa, nia' tongi amminawang. Iamintu Maria nigallaraka Magdalena (le'baka napantamakki tuju setang na Nabongka assulu' Isa);

³Yohana, bainenna Khuza, pagawe balla' lompona Herodes; Susana, siagang jai pole bai'-baine maraeng. Ongkoso' kalenna napake ke'nanga ambantui Isa siagang ana'-ana' gurunNa.

⁴Tuli jaina tau battu ri a'rupa-rupaya kota, mange ri Isa. Na ri wattunna jaimo tau a'rappungang, Nacaritami Isa mae ri ke'nanga anne pangngebarang kammaya:

⁵“Nia' sitau pamarri mange appakioro' bine. Ri wattunna appakioro', nia' bine takkioro' ri aganga. Jari nia'mo sitangnga nionjokang ri taua, na nia' sitangnga nikanre ri jangang-janganga.

⁶Nia' todong takkioro' ri butta jaia batu-batunna. Mingka ri wattunna accu'la', linta'mi kalumeng, lanri kalotoroki buttana.

⁷Nia' todong bine takkioro' ri tangnga-tangngana rompo'-rompo' akkatintinga. Attimbomi anjo rompo'-rompo' akkatintinga siagang anjo binea. Apaji niepe'mi anjo binea ri anjo rompo'-rompo' akkatintinga, sa'genna mate.

⁸Mingka nia' todong bine takkioro' ri butta copponga, nampa attimbo, na'lappi sibilangngang rapponna.” Le'baki Nacarita Isa anjo pangngebaranga, Nakanamo Isa, “Punna nia' tolinnu pilangngerimi!”

⁹Napakkuta'nangammi ana'-ana' gurunNa Isa battuanna anjo pangngebaranga.

¹⁰ Appialimi Isa Nakana, “Ikau ngaseng nisare mako pangngassengang untu' angngassengi rahasia battua ri Allata'ala siagang PamarentahanNa. Mingka tau maraenga parallui niajara' siagang pangngebarang, sollanna accini' ke'nanga, mingka tanaassengai apa kajarianga; sollanna appilangngeri ke'nanga mingka takkulleai napahang.”

¹¹Nakanamo pole Isa, “Iaminne battuanna anjo pangngebaranga: Anjo binea, iaminjo kana-kananNa Allata'ala.

¹²Anjo bine takkioroka ri aganga, iaminjo pangngebaranna tau allangngerekai anjo kananNa Allata'ala; mingka battui Billisika angngallei anjo kabaraka battu lalang ri atinna ke'nanga, sollanna tena natappa' siagang tena nanipasalama' ke'nanga.

¹³Anjo bine takkioroka ri tampa' a'batu-batua, iaminjo pangngebaranna tau sannanga nyawana ri wattu nalangngere'na anjo kabaraka; mingka tena najarre' anna'gala' aka'na anjo kabaraka lalang ri atinna ke'nanga. Sinampe'ji tappa' ke'nanga; punna battumo paccobaya, ammono'bokomi ke'nanga.

¹⁴Anjo bine takkioroka ri tangnga-tangngana rompo'-rompo' akkatintinga, iaminjo pangngebaranna tau allangngerekai anjo kabaraka, mingka ranggaselai ri passala' katallassanna ke'nanga, siagang cinnai a'jari sannang nakkalumanynyang ilalang ri anne linoa. Yangaseng minjo angngepeki ke'nanga, sa'genna takkulleai ke'nanga a'rappo baji'.

¹⁵Anjo bine takkioroka ri butta copponga, iaminjo pangngebaranna tau allangngerekai anjo kabaraka, nampa naboli' baji' siagang attojeng-tojeng lalang ri atinna ke'nanga. Attahangi ke'nanga, sa'genna sanrapangi ke'nanga poko' kayu a'rappoa.”

¹⁶ “Tenanniakka tau apparinra lampu, nampa natongko' katoang, yareka naboli' rawanganna katinroanga. Mingka lanaboliki irate ri pa'dongkokanna, sollanna punna nia' tau antama' akkullei nacini' singara'na.

¹⁷ Tenanniakka apa-apa taccokko talakacinikang; siagang tenanniakka apa-apa nirahasiakang talatassungke siagang talakaassengang.

¹⁸ Lanri kammana, pilangngerimi baji'-baji' apa-apa nulangngereka. Nasaba' tau niakamo apa-apanna lanitambaiangi pole jaiangang; mingka tenaya apa-apanna, manna apa sike'deka ri ia lanialleangi pole ammotere'.”

¹⁹Ero'mi battu amma'Na siagang sari'battanNa Isa mae ri Isa, mingka takkulleai ke'nanga ta'rapi' mange, lanri sanna' jaina tau.

²⁰Nia'mo sitau angkana mae ri Isa, nakana, “Pa', niaki ammatTa siagang sari'battanTa pantarang. Eroki ke'nanga angngagangKi' sicini'.”

²¹Mingka Nakanamo Isa ri ke'nanga, “Inai-nai ampilangngeri siagang anggaukangi kananNa Allata'ala, iami a'jari ammakKu siagang a'jari sari'battangKu.”

²²Ri se'reang allo nai'mi Isa siagang ana'-ana' gurunNa ri se'reang biseang. Nakana Isa ri ana'-ana' gurunNa, “Umba ki'lampa a'limbang anta'leang ri ba'leanna anne tamparanga.” Jari a'lampami ke'nanga.

²³Ri wattunna attangnga dolangang ke'nanga, attinromi Isa. Ti'ring battumi anging lompoa antujui anjo tamparanga. Appakkaramulami antama' je'neka ri biseanna ke'nanga, sa'genna a'reppese'mi balaya ri ke'nanga.

²⁴A'lampami linta' ana'-ana' gurunNa Isa anronrongi Isa. Nakanamo ke'nanga, “Pa' Guru, Pa' Guru, natujuki' bala!” Ambangummi Isa nampa Naga'gara' anjo anginga siagang bombang lompoa. Ammarimi anjo anginga siagang bombanga, nampa a'jari sannang sikali tamparanga.

²⁵Nampa Nakanamo Isa mae ri ana'-ana' gurunNa, “Angngapa natena ngaseng nutappa' ri Nakke?” Lannasa'mi siagang malla'mi ana'-ana' gurunNa Isa. Na massing angkanamo para ia ke'nanga, “Inai sitojenna anne taua sa'genna manna anginga siagang bombanga Naparenta ngaseng, nanituruki parentaNa?”

²⁶Assombala'mi pole Isa siagang ana'-ana' gurunNa tulusu' mange ri daera Gerasa ri ba'leanna Tamparang Galilea.

²⁷Ri wattunna naummo Isa ri bontoa, nia'mo sitau bura'ne napantamakki setang, battu anruppai. Anjo taua tau battu ri kotaya. Sallomi taccare-carea siagang tammantanga ri balla'. Anjoreng mami ri kali'bong pa'jerakkang batua ero' ammantang.

²⁸Nacini'na anjo taua angkana niaki battu Isa, ammarrang lompomi nampa su'ju' ri dallekanNa Isa. Ammarrammi nakana, “O Isa, Ana'Na Allata'ala Kaminang Tinggia! Apa ero' Kigaukang mae ri nakke? Kupalaki natena Kisessa'!”

²⁹Nakkana kamma anjo taua, lanri Nabongkai Isa assulu' anjo setanga battu ri kalenna anjo taua. A'mole-molemi nipantamakki ri anjo setanga, sa'genna manna nisikko' ngaseng rante limanna siagang bangkenna, siagang sanna' nijagaina, mingka tuli natappu'-tappu'ji anjo rantea, nampa nierang ri setanga mange ri parang lompoa.

³⁰Akkuta'nammi Isa ri anjo taua Nakana, “Inai arennu?” Appialimi anjo taua angkana, “Legiun,” nasaba' jaimi setang antama' ri kalenna anjo taua.

³¹Napala' dudumi anjo setang-setanga sollanna tena nibongkai ri Isa naung ri Kalo'banna Kamateanga.

³²Tena nabella ri anjo tampaka, nia' jai sikali bawi sitabang a'boya kanre ri tompo'na bonto-bontoa. Napala' dudumi anjo setang-setanga sollanna nikellai antama' anjoreng ri bawi-bawia. Naniturukiammo pappala'na ke'nanga ri Isa.

³³Jari assulu'mi anjo setang-setanga battu lalang ri kalenna anjo taua, nampa antama' anjoreng ri bawi-bawia. Nampa lari ngaseng anjo bawia, na'lumpa' naung ri tamparanga, sa'genna tallang ngaseng.

³⁴Nacini'mi pakalawakinna anjo bawia anjo apa kajarianga. Jari larimi pakalawakinna anjo bawia na napa'la'bang anjo kabaraka ri kotaya siagang ri desa a'reppeseka anjoreng ri kotaya.

³⁵Assulu'mi taua battu ri kotaya ero' mange anciniki anjo apa kajarianga. Mangemi ke'nanga ri Isa, na nia'mo nacini' ke'nanga anjo tau le'baka nilappassang ri setanga, ammempo ri dallekanNa Isa. Ammakemi care-care, siagang baji'mi jappana pikkiranna. Malla' ngasemmi ke'nanga.

³⁶Sikamma tau ancinikai anjo apa kajarianga, nacaritami mae ri tau maraenga, antekamma batena niballei anjo taua.

³⁷Napala' dudu ngasemmi tau ammantanga ri daera Gerasa, sollanna a'lampa Isa ambokoi anjo tampaka, lanri malla' duduna ngaseng ke'nanga. Jari nai'mi Isa ri biseanga, ero' ammotere'.

³⁸Napala' dudumi ri Isa anjo tau le'baka nilappassang ri setanga sollanna nikellai amminawang ri Isa. Mingka nisuromi a'lampa ri Isa.

³⁹Nakana Isa, “Ammotere' mako, na nukabarrang anjo apa le'baka Nagaukang Allata'ala ri kalennu.” Jari a'lampami anjo taua ampa'la'bangi anjo apa le'baka Nagaukang Isa ri kalenna sa'genna sepe'-sepe'na kotaya.

⁴⁰Ri wattunna battu Isa anta'leang ri ba'leanna tamparanga, battumi taua anruppai. Sanna' ngaseng rannuna ke'nanga anruppai Isa, nasaba' sitabang memangi nitayang ri ke'nanga.

⁴¹Nia'mo sitau kapala balla' sambayang battu mae ri Isa, iamintu niarenga Yairus. Su'ju'mi ri dallekanNa Isa, na napala' dudu sollanna ero' Isa a'lampa mange ri balla'na;

⁴²nasaba' garringi ana' bainena sitau-taua sampulo anrua taung umuru'na, siagang a'biring dudumi mate. Lalang a'jappaNa Isa mange ri balla'na Yairus, battumi taua attammulili siagang siassa'-assa', mae ri Isa.

⁴³Nia' tommo ri alla'na ke'nanga sitau baine; anjo bainea sampulomi anrua taung garring nalari cera'. La'busu'mi barang-baranna napangngongkosang mae ri dottoroka, mingka tena manna sitau akkulle amballei.

⁴⁴A'reppese'mi anjo bainea battu ri bokoNa Isa, nampa nasero cappa' jubaNa. Ammari memammi silalonna nalari cera' anjo bainea.

⁴⁵Akkuta'nammi Isa Nakana, “Inai anseroi jubaKu?” Assassala' ngasemmi taua. Nakanamo Petrus, “Jai sikali tau angkulilingiKi', siagang ansorong-sorongKi' Bapa'!”

⁴⁶Nakanamo Isa, “Mingka nia' tau anseroA'. Kuassengi, nasaba' nia' Kusa'ring kagassingang assulu' battu lalang ri KalengKu.”

⁴⁷Naassemmi kalenna anjo bainea angkanaya niassemmi apa le'baka nagaukang. Jari battumi su'ju' siagang annekkere' ri dallekanNa Isa. Nacaritami ri dallekanna ngaseng tau jaia, apa saba'na nanasero jubaNa Isa. Na nacarita tommo angkanaya ammarimi silalonna garrinna.

⁴⁸Nakanamo Isa ri ia, “AnakKu, lanri tappa'nu ri Nakke, a'jari baji' mako. A'lampamako siagang salama'.”

⁴⁹Sitabang a'bicaraNa Isa, nia'mo sitau tunisuro battu mae ri Yairus, iamintu tau battu ri balla'na Yairus. Nakanamo anjo taua ri Yairus, “Matemi anjo ana' baineta. Tea' maki' susa-susai pole anjo Bapa' Guru.”

⁵⁰Nalangngere'Na Isa anjo kabaraka, Nakanamo ri Yairus, “Teako mallakki. Tappa' mako, na'jari baji' ana'nu.”

⁵¹Ri wattunna battumo mange ri balla'na Yairus, tenamo Nakellai Isa tau maraenga antama' ri kamara'na anjo anaka, pantaranganna Petrus, Yohanes, Yakobus, siagang anrong-manggena anjo anaka.

⁵²Angngarru'mi siagang appiraung ngasemmi taua angkarruki anjo ana' matea. Mingka Nakanamo Isa, “Teako niakki angngarru'. Anjo anaka tena namate, mingka attinronaja!”

⁵³Nikakkalimi Isa ri ke'nanga, nasaba' naassenna ke'nanga angkana matemi anjo ana' bainea.

⁵⁴Mingka Nata'gala'mi Isa limanna anjo anaka nampa Nakana, “Ambangungko na'!”

⁵⁵Ammotere'mi nyawana anjo anaka, nambangung memammo silalonna. Le'baki anjo Nasuromi Isa ke'nanga ansarei kanre anjo anaka.

⁵⁶Lannasa' sikalimi tau toana anjo anaka. Mingka Napisangkaimi Isa ke'nanga ampaui anjo apa kajarianga manna pole ri nai.