Read Makassar Version – KITTA' MATANGKASA LUKAS 9 Bible Online

LUKAS 9 - Makassar Version – KITTA' MATANGKASA bible

LUKAS 9

¹Nakio'mi Isa sampuloa anrua ana' gurunNa. Nampa Nasare ke'nanga koasa untu' ambongkai setanga, siagang amballei tau garringa.

²Le'baki anjo Nasuromi ke'nanga a'lampa amballei tau garringa siagang ambirittakangi ri passala' antekamma bateNa ammarenta Allata'ala salaku Karaeng.

³ Nakanamo Isa ri ke'nanga, “Teako angngerangngi apa-apa lalang ri pa'lampannu. Teako angngerangngi takkang, yareka purukang pammoneang passidakka, yareka kanre, yareka doe', yareka ruanglawara' pakeang.

⁴Kere-kerekomae nitarima, ammantang mako anjoreng sa'genna nubokoi anjo kotaya.

⁵ Siagang kere-kerekomae tanitarimaya, pabe'bese'mi limbu'bu' niaka ri pala' bangkennu punna nubokoi anjo kotaya, a'jari pappakainga' mae ri ke'nanga.”

⁶A'lampami ana'-ana' gurunNa Isa mange ri desa-desaya untu' ambirittakangi Kabara' Bajika, siagang amballei tau garringa ri kere-keremae.

⁷ Ri wattunna nalangngere' Herodes, ammarentaya ri Galilea, sikamma anjo apa le'baka kajariang, a'jari lingumi. Nasaba' nia' tau angkana attallasa' poleammi ammotere' Yohanes Paje'ne'.

⁸Nia' todong tau angkana nia'mi pole battu Elia. Maraenganga angkana sitau na'bi riolo dudua attallasa' poleang ammotere'.

⁹Nakanamo Herodes, “Le'ba'mi kusuro taua ansamballei kallonna Yohanes. Mingka inai anjo Taua sikontutojenna? Jai sikalimi kabara'na kulangngere' anjo Taua.” Jari ero'mi Herodes anciniki Isa.

¹⁰Ammotere'mi ana'-ana' gurunNa Isa. Nacarita ngasemmi ke'nanga mae ri Isa sikamma apa le'baka nagaukang ke'nanga. Nikio'mi ri Isa ke'nanga a'lampa anynya'la' ri kota Betsaida.

¹¹Mingka naassenna taua angkanaya la'lampai Isa, amminawang tommi ke'nanga. Nitarimami ke'nanga ri Isa, nampa Nacarita ri ke'nanga ri passala' antekamma bateNa ammarenta Allata'ala salaku Karaeng. Kammayatompa Naballei tommi tau garringa na'jari baji'.

¹²Ri wattunna appakkaramulamo lalabu alloa, battumi mae ri Isa ana'-ana' gurunNa sampuloa anrua. Nakanamo ke'nanga, “Pa', bella sikali anne tampa' nipammantangia. Bajikangang Kisuro ngasemmi anne taua a'lampa sollanna akkulle ke'nanga mange a'boya kanre, siagang a'boya tampa' pa'bangngiang ri kampong-kamponga yareka ri desa-desa niaka a'reppese' anrinni.”

¹³Mingka appialimi Isa Nakana, “Ikau ngasemmo assarei ke'nanga kanre.” Appialimi ana'-ana' gurunNa Isa angkana, “Limambatuji roti siagang ruang kayuji juku' nia' ri katte. Jari la'lampaki' ammalli kanre untu' tau sikammaya anne jaina?”

¹⁴(Nia' kira-kira limassa'bu tau bura'ne anjoreng.) Nakanamo Isa ri ana'-ana' gurunNa, “Suromi anjo taua ammempo, a'gompo-gompo, kira-kira limampulo sipa'rappungang.”

¹⁵Nagaukammi ana'-ana' gurunNa Isa anjo apa Napassuroanga.

¹⁶Nampa Naalle Isa anjo roti limambatua siagang juku' ruang kayua. Accongami nai' ri langika, appala' sukkuru' ri Allata'ala. Le'baki anjo Nabage-bagemi anjo rotia siagang jukuka; nampa Napassareang mae ri ana'-ana' gurunNa, sollanna natawa-tawai anjo taua.

¹⁷Angnganre ngasemmi ke'nanga sa'genna bassoro'. Nampa napasse're ana'-ana' gurunNa Isa kanre alla'bia, nia' sampulo anrua baku' jaina.

¹⁸Ri se'reang allo, ri wattunna appala' doang Isa Kale-kalenNa, battumi ana'-ana' gurunNa mae ri Ia. Akkuta'nammi Isa mae ri ke'nanga Nakana, “Turu' kananna taua, inaiA' anne?”

¹⁹ Appialimi ke'nanga angkana, “Nia' tau angkana Yohanes Paje'ne'. Nia' todong tau angkana Elia. Na maraenganga nakana kalase'renna na'bi jammang rioloa, attallasa' poleanga ammotere'.”

²⁰ Akkuta'nammi pole Isa Nakana, “Mingka turu' panggappanu ikau ngaseng, inaiA' anne?” Appialimi Petrus nakana, “Ikattemi Karaeng Mappasalamaka, le'baka Napa'janjiang Allata'ala.”

²¹Nampa Nakana Isa ri ana'-ana' gurunNa, “Tea sikaliko pau-paui anne manna pole ri nai.”

²²Nakana pole Isa, “Lajai memang tongi passessa laNakasia' Ana' Ma'rupataua, siagang lanimusui ri pamimping-pamimpinga siagang imang-imang kapalaya, kammayatompa guru-guru agamaya. Lanibunoi, mingka ri makatalluna alloa lanipabangung poleangi ammotere'.”

²³ Le'baki anjo Nakanamo mae ri yangaseng tau niaka anjoreng, “Inai-nai ero' amminawang ri Nakke, musti nakaluppai rolong kaparalluang kalenna, musti napisangi salli'na allo-allo, nampa tuli amminawang ri Nakke.

²⁴ Nasaba' inai-nai ero' angkatutui nyawana, iami latappela' nyawana. Mingka inai-nai angkoro'bangkangi katallassanna untu' kaparalluangKu, iami lanipasalama' katallassanna.

²⁵Nasaba' apa matu-matunna nakammai taua bonena anne linoa punna lapanraki siagang latappela'ji nyawana?

²⁶Inai-nai siri'-siri' angngakuiA' siagang antarimai pangngajarangKu, lasiri'-siri' tongi Ana' Ma'rupataua angngakui sallang punna battu siagang koasaNa, kammayatompa koasaNa ManggeNa siagang koasana malaeka'-malaeka' matangkasaka!

²⁷Assengi angkanaya: nia' tau anrinni ri alla'nu tenapa nalamate punna tenapa naciniki Allata'ala ammarenta.”

²⁸ Kira-kira sidaminggu le'ba'na Napangngajarrang Isa sikamma anjo passalaka, Naerammi Petrus, Yohanes, siagang Yakobus nai' ri se'reang bulu' untu' appala' doang.

²⁹Ri wattunna appala' doang Isa anjoreng, tappinrami rupanNa siagang pakeanNa a'jari accilla' sanna' kebo'na.

³⁰Ti'ring nia'mo rua tau, iamintu Musa siagang Elia battu ampappicinikangi kalenna lalang caya battua ri suruga. A'bicarami ke'nanga siagang Isa, ri passala' kamateang laNaoloa Isa sallang ri Yerusalem.

³¹

³²Anjo wattua attinroi Petrus siagang agang-aganna. Mingka ti'ring ambangummi ke'nanga, na nacini'mo ke'nanga accaya Isa, ammenteng siagang anjo tau ruaya.

³³Ri wattunna la'lampamo anjo tau ruaya ambokoi Isa, angkanami Petrus ri Isa, “Pa' Guru, baji' sikali nisa'ring pakkasiaka anrinni. Bajiki punna apparekki' kema: se're untu' iKatte, se're untu' Musa, na se're untu' Elia.” (Kammaminjo kananna Petrus, mingka tanapahangai anjo apa napaua.)

³⁴Lalang a'bicarana ija Petrus, nia'mo battu rammang antongkoki ke'nanga, sa'genna malla'mo ke'nanga.

³⁵ Nampa nia'mo sa'ra kalangngerang battu lalang ri rammanga angkana, “Iaminne AnakKu Kupilea. Pilangngeri kananNa!”

³⁶Ammarinamo kalangngerang anjo sa'raya, nacini'mi ke'nanga Kale-kalenNa mami Isa anjoreng. Tenamo nakkana-kana ana'-ana' gurunNa Isa siagang tanapauami manna pole ri nai anjo passalaka siagang kajariang le'baka nacini' ke'nanga.

³⁷Ammukona, naummi Isa siagang anjo tallua ana' gurunNa battu rate ri anjo buluka. Najaimo tau battu mae ri Isa.

³⁸Nia'mo sitau bura'ne akkio' battu ri tangnga-tangngana anjo tau jaia nakana, “Pa' Guru, Kitulunga', naKimange anciniki ana' sitau-tauku!

³⁹Kapunna nipantamakki ri roh ja'dalaka, ti'ring ammarrang-marrammi, siagang ka'doro'mi kalenna nampa a'busa bawana. Sanna' nisessana ri anjo roh ja'dalaka, siagang taerokai anjo roh ja'dalaka assulu' battu ri kalenna!

⁴⁰Le'ba'mi kupala' ri ana'-ana' gurunTa sollanna nabongkai assulu' anjo roh ja'dalaka, mingka tanakulleai ke'nanga.”

⁴¹Appialimi Isa Nakana, “Teai ngasengko sipato' anne! Ma'nassa tau sala oloang ngasengko siagang tau tena ngaseng nutappa'! Siapapi salloKu lammantang angngagangko siagang lasa'bara' ri kau ngaseng? Erangi mae antu anaka!”

⁴²Lalang a'jappana anjo anaka mae ri Isa, nipatappasa'mi anjo anaka ri anjo setanga, siagang a'jari ka'doro'mi kalenna. Mingka niga'gara'mi ri Isa anjo roh ja'dalaka, sollanna assulu', na'jari baji'mo anjo anaka. Nampa nipassareang anjo anaka ammotere' mange ri manggena.

⁴³Lannasa' ngasemmi taua anciniki antekamma lompona koasaNa Allata'ala. Ri wattunna lannasa' ngaseng ija taua anciniki anjo apa-apa Nagaukang ngasenga, Nakanamo Isa ri ana'-ana' gurunNa,

⁴⁴“Pilangngeri baji'-baji', siagang teako kaluppai anne kana-kanangKu: Lanipassareangi Ana' Ma'rupataua mae ri koasana rupataua.”

⁴⁵Mingka tanapahangai ana'-ana' gurunNa anjo Nabicaraya Isa. Nirahasiakangi anjo passalaka mae ri ke'nanga sollanna tena napahangi ke'nanga. Mingka mallaki ke'nanga ampakkuta'nangangi anjo passalaka mae ri Isa.

⁴⁶ A'gea'-gea'mi ana'-ana' gurunNa Isa ri passala' inai ri ke'nanga kaminang la'biri'.

⁴⁷Naassengi Isa pikkiranna ke'nanga. Jari angngallemi sitau ana'-ana' ca'di, nampa Nasuro anjo ana'-anaka ammenteng ri sa'rinNa.

⁴⁸ Nampa Nakana ri ana'-ana' gurunNa, “Inai-nai antarimai anne anaka passabakkang iNakke, battuanna iNakkemi natarima. Na inai-nai antarimA', battuanna natarima tommi Allata'ala assuroA' battu. Nasaba' inai-nai kaminang tuna ri kau, iami kaminang la'biri'!”

⁴⁹Nakanamo Yohanes, “Tuang, nia' nacini' ikambe tau ambongkai setanga, na arenTa napake. Jari kupisangkaimi, nasaba' teai tu battu ri kumpulanta.”

⁵⁰Nakanamo Isa ri Yohanes siagang ana'-ana' gurunNa maraenga, “Teako pisangkai, nasaba' inai-nai ta'jari musua ri kau, battuanna a'jari agangi ri kau ngaseng.”

⁵¹Ri wattunna tasalloamo naniangka' Isa nai' ri suruga apparurumi untu' la'lampa mange ri Yerusalem.

⁵²Nasuromi taua a'lampa riolo. A'lampami anjo tau Nasuroa a'lampa, nampa antama' ri se'reang kampong ri Samaria. Napasadiami anjoreng sikamma apa naparalluanga Isa.

⁵³Mingka taerokami taua anjoreng ri kamponga antarimai Isa, nasaba' a'nassa sikalimi angkanaya a'lampa mangemi ri Yerusalem.

⁵⁴ Anjo passalaka naassemmi ana'-ana' gurunNa Isa, iamintu Yakobus siagang Yohanes. Jari nakanamo ke'nanga ri Isa, “O Batara, maka erokKi' nanipala' pepeka naung battu ri langika anghukkung ngasengi anne taua?”

⁵⁵Assailemi Isa, na Nakalarroi ke'nanga.

⁵⁶Le'baki anjo a'lampami ke'nanga mange ri pa'rasangang maraenga.

⁵⁷Lalang Napatulusu'na jappaNa Isa siagang ana'-ana' gurunNa, nia'mo tau angkana ri Isa, nakana, “Pa', erokka' amminawang ri Katte manna pole kemae lampaTa!”

⁵⁸Appialimi Isa Nakana, “Kongkong romanga nia' kali'bonna, siagang jangang-janganga nia' ru'munna, mingka Ana' Ma'rupataua manna tampa' laNapanra'baia tena todong.”

⁵⁹Nampa Nakana Isa ri se'reang tau maraengannaya, “Amminawang mako ri Nakke.” Mingka nakanamo anjo taua, “Pa', boli'ma' kamma ammotere' rolong antarawangi manggeku matea.”

⁶⁰Appialimi Isa Nakana, “Lappassammi tau matea antarawangi tau matena. Mingka ikau, a'lampamako siagang pa'la'bammi birittaya, angkanaya appakkaramulami Allata'ala ammarenta.”

⁶¹ Nia' todong sitau maraenganga angkana, “Pa', erokka' amminawang ri Katte, mingka boli'ma' kamma ammotere' rolong appala' kana.”

⁶²Nakanamo Isa ri anjo taua, “Punna appakkaramulamo taua appa'jeko, nampa assaile pole mae ri boko, tena nasiratang a'jari umma'Na Allata'ala.”