Read Makassar Version – KITTA' MATANGKASA PAOLE 10 Bible Online

PAOLE 10 - Makassar Version – KITTA' MATANGKASA bible

PAOLE 10

¹“Nampa Nakana Batara mae ri nakke, ‘Musa, angngalleko ruang la'ba' batu nampa nupakamma riolo, siagang appare' tongko se're patti untu' pammantangnganna, nampa battuko mae ri Nakke irate ri coppo'na monconga.

²LaKutulisiki mae ri anjo batu-batua iamintu kana-kana sangkammaya le'baka Kutulisi' ri anjo batu le'baka nureppe'; nampa musti nupantama anjo batu-batua ri anjo pattia.’

³Jari appare'ma' patti battu ri kayu akasia siagang angngallema' ruang la'ba' batu nampa kupa' sangkamma riolo, nampa kuerang nai' ri monconga.

⁴Natulisi'mi Batara ri anjo batua Sampuloa ParentaNa sangkamma anjo rioloa, iamintu parenta-parenta Napassareanga mae ri kau, ri wattunna a'bicara battu lalang ri tangnga-tangngana pepeka ri wattunnu asse're ri bangkenna monconga. Le'baki anjo Napassareammi Batara anjo batu le'baka Natulisi' KalenNa, mae ri nakke.

⁵Nampa naumma' ammotere' battu ri monconga. Nampa situru' parentaNa Batara, kupantama'mi anjo ruaya batu ri patti le'baka kupare'. Nappakkaramula anjo wattua sa'genna kamma-kamma anne anjo ruaya batu niaka tulisanna tuli nia'na anjoreng.” (

⁶ Le'baki anjo a'lampami tu Israel battu ri bungung-bungunna tu Yaakan, siagang mangemi ri Mosera. Anjoremmi mate siagang nitarawang Harun. Ana'na, iamintu Eleazar, ansambeangi a'jari imang.

⁷Battu anjoreng a'lampami ke'nanga mange ri Gudgod, nampa tulusu' mange ri Yotbata, iamintu daera jaia je'ne'na.

⁸ Anjoreng ri monconga Naallemi Batara tu Lewi nampa Nasa'la' untu' angngurusuki Patti Parjanjianga siagang nalayani Batara, kammayatompa ampabattui kana barakkaka lalang arenNa Batara. Iaminjo tugasa'na ke'nanga sa'genna kamma-kamma anne.

⁹Lanri kammana minjo natena nanggappa butta suku Lewi sangkamma suku-suku maraenga. Nasaba' Batarami a'jari bageang warisi'na ke'nanga, sangkamma Napaua Karaeng Allata'alanu mae ri ke'nanga.)

¹⁰ “Patampulo allo patampulo bangngia' ammantang irate ri monconga sangkamma kugaukanga riolo. Sikalipi pole Napilangngeri Batara pappalakku, siagang situjumi angkanaya tena naNaancurukko.

¹¹Nampa Nasuroa' a'lampa untu' ampimpingko sollanna akkulle nupatang butta Napa'janjianga mae ri boe-boenu.”

¹²“Kamma-kamma anne sari'battangku ngaseng, parhatikang lalomi apa Natuntuka Karaeng Allata'alanu battu ri kau, angkanaya: Pakala'biriki Karaeng Allata'alanu siagang gaukang laloi sikontu Naparentakanga. Mangngamaseangko mae ri Ia, siagang gaukang laloi ibadanu mae ri Ia ilalang sikontu batangkalennu siagang nyawanu.

¹³Turuki sikontu parentaNa Batara kupabattua mae ri kau anne alloa, lanri untu' kabajikang kalennu tonji.

¹⁴Karaeng Allata'alanu ampatangi langi' kaminang tinggia; kammayatompa buttaya siagang sikontu apa-apa niaka ri tompo'na Ia ngaseng pata.

¹⁵Mingka teai sipato' lompona pangngamaseanNa Batara mae ri boe-boenu, sa'genna ikaumi Napile battu ri alla'na sikontua bansa, siagang sa'genna kamma-kamma anne ikauji umma'Na Napilea.

¹⁶Jari appakkaramula kamma-kamma anne musti mannurukiko mae ri Batara siagang tea' mako kapala batui pole.

¹⁷ Karaeng Allata'alanu ri tompo'na sikontu rewataya siagang irateanganna sikontu kakoasanga. Iami Allata'ala mala'biri' siagang makoasaya, mustia nituruki ero'Na. TaNangaiyai angngalle sialia siagang tena todong Naero' annarima passare nipacoco'.

¹⁸Naalleangangi ha'na ana'-ana' kukanga siagang jandaya, sollanna akkulle nakasia' ke'nanga kaadelanga; Nakamaseangi tubattu-battua niaka sipattallassang siagang bansata na Nasare ke'nanga kanre siagang pakeang.

¹⁹Jari ikau musti nupappicinikang tongi pangngamaseannu mae ri anjo bansa maraeng battu-battua, nasaba' ikau riolo a'jari tubattu-battu tonjako ri Mesir.

²⁰Pakala'biriki Karaeng Allata'alanu, siagang Iaji bawang musti nusomba. Paralluko tuli majarre' pa'mai'nu mae ri Ia siagang lalang arenNa bawang nussumpa.

²¹Mammujiko mae ri Ia, nasaba' Iami Allata'alanu. Mata kalennumi le'ba' anciniki sikamma gau' malompo siagang gau' heba' Nagaukanga untu' ikau ngaseng.

²² Ri wattunna a'lampa boe-boenu mange ri Mesir, anjo jaina ke'nanga tuju puloji tau. Mingka Napa'jari jaimi Karaeng Allata'alanu anjo ke'nanga a'jari sanrapang bintoenga ri langika jaina.”