Read Makassar Version – KITTA' MATANGKASA PAOLE 11 Bible Online

PAOLE 11 - Makassar Version – KITTA' MATANGKASA bible

PAOLE 11

¹“Kamaseangi Karaeng Allata'alanu, siagang tuli mannurukiko ri sikontu parentaNa.

²U'rangi kamma-kamma anne apa nuassenga ri passala'na Batara battu ri pangalamannu. Ana'-ana'nu tenapa naassengi anjo pangalamang kammaya. Ikaumi le'ba' anciniki kalompoanNa Karaeng Allata'alanu, kagassinganNa, kakoasanNa,

³ siagang sikamma gau' appakalannasa' le'baka Nagaukang. Kalennu anciniki apa Nagaukanga mae ri karaeng Mesir siagang sikontu pa'rasanganna.

⁴ Nuciniki antekamma bateNa Batara angngancuruki tantarana tu Mesir siagang sikontu jaranna siagang kareta bundu'na ke'nanga. Nitallangngang ngasengi ke'nanga ri Tamparang Alara' ri wattunna naondangko ke'nanga.

⁵Nuassengi apa Nagaukanga Batara untu' ikau ri parang lompoa ri wattu tenanapa nubattu mae anrinni.

⁶ Nuu'rangi tongi apa Nagaukanga Batara mae ri Datan siagang Abiram, ana'-ana'na Eliab battu ri suku Ruben. Ri dallekannu ngaseng, nuciniki ta'bage rua buttaya nampa nia'lu' ke'nanga siagang kaluargana, kemana, sikontu atanna kammayatompa sikontu olo'-olo'na ke'nanga.

⁷Jari, nucini' ngasemmi siagang mata kalennu sikontu gau' appakalannasa' le'baka Nagaukang Batara.”

⁸“Turuki sikontu hukkung kupabattua mae ri kau anne alloa, sollanna nukkulle allimbangi binangaya siagang antama' ri pa'rasangang tenayamo nasallo nanupammantangngi.

⁹Siagang lattallasa' mako sisalloang ri pa'rasangang kalumanynyanga siagang copponga buttana, iamintu Napa'janjianga Batara mae ri boe-boenu siagang mae ri jari-jarina ke'nanga.

¹⁰Anjo pa'rasangang nupammantangngia sallang tena nasangkamma butta Mesir, iamintu tampa' nupammantangngia riolo. Anjoreng ri Mesir musti anjama battalakko untu' ansarei je'ne' panai' kokonnu punna erokko appakioro' bine.

¹¹Mingka anjo pa'rasangang lanupantamakkia iamintu daera moncong siagang ka'bung; tuli nibasai ri bosi buttana.

¹²Naparakai Karaeng Allata'alanu anjo pa'rasanganga siagang najagai a'bujuru' taung.

¹³ Jari turuki lalomi parenta-parenta kupabattua mae ri kau anne alloa; kamaseangi Karaeng Allata'alanu siagang gaukangi ibadanu mae ri Ia lalang sikontu batangkalennu siagang nyawanu.

¹⁴Punna nugaukang anjo kammaya, lappaturungi bosi Batara mae ri buttanu punna narapi' wattunna, ri le'ba'nu akkatto, siagang ri wattunnu appakkaramula annanang. Jari langgannaki gandunnu, anggoro'nu siagang minynya' zaitunnu,

¹⁵kammayatompa rukuka untu' olo'-olo' piaranu. Sikontu kanre-kanreang nuparalluia lasadia ngasengi untu' ikau.

¹⁶Teako erokki nipakabella battu ri Batara untu' anynyomba siagang ampare' atai kalennu mae ri rewata-rewata maraenga.

¹⁷Punna nudakkai anjo parentaNa, lalarroi Batara mae ri kau. Tena Nalappaturung bosi; la'jari kalotoro' taba sikali buttanu sa'genna tenamo wassele'na lamung-lamunnu. Jari tasalloami numate ri butta coppong Napassareanga Batara mae ri kau.

¹⁸ U'rangi siagang parhatikangi anjo parenta-parentaya. Sikkokangi ri limannu siagang patabai ri abannu sollanna tuli nuu'rangi.

¹⁹Pangngajarrangi mae ri ana'-ana'nu. Bicarakangi lalang ri balla'nu siagang ri pantaranganna balla'nu, wattunnu ammari-mari siagang ri wattunnu anjama.

²⁰Tulisiki ri benteng pakke'bu' balla'nu siagang ri pakke'bu' lomponu.

²¹Na ikau siagang ana'-ana'nu lanipakala'bui umuru'nu ri pa'rasangang Napa'janjianga Karaeng Allata'alanu mae ri boe-boenu. Lalang nia'na langika irateanna buttaya, kamma tomminjo sallonu lammantang ri anjo buttaya.

²²Turuki siagang pa'mai' tamamminra sikontu hukkung kupabattua mae ri kau, iamintu: Kamaseangi Karaeng Allata'alanu, gaukangi sikontu apa Naparentakanga mae ri kau, siagang paralluko tuli tamamminra pa'mai' mae ri Ia.

²³Na Batara lambongkai anjo sikontu bansaya battu ri dallekannu, siagang kau lampammantangngi buttana bansa-bansa lompoangnganga siagang kassakangnganga naikau.

²⁴ Sikontu daera naonjoka bangkennu la'jari nupatangi. Ia daeranu iamintu battu ri parang lompo bageang timboro' sa'genna mange ri Moncong Libanon bageang wara', kammayatompa battu ri Binanga Efrat ri bageang iraya sa'genna mange ri Tamparang Tangngaya ri bageang ilau'.

²⁵Ri sikontu anjo pa'rasanganga laNapa'jari malla' ngasengi Karaeng Allata'alanu sikontu taua mae ri kau sangkamma le'baka Napa'janjiang, sa'genna manna sitau tania' akkulle anrompaiko.

²⁶Anne alloa akkullei nupilei kalase'renna iamintu barakkaka yareka pattunraya.

²⁷Lanibarakkakiko punna mannurukiko ri parenta-parentaNa Karaeng Allata'alanu, ia kupabattua mae ri kau anne alloa.

²⁸Mingka lanitunraiko punna tena numannuruki mae ri parenta-parentaNa Karaeng Allata'alanu, passangalinna ta'gilingko untu' anynyomba ri rewata-rewata maraenga ia tenaya nale'ba' nusomba.

²⁹ Punna le'ba' mako Naerang Karaeng Allata'alanu antama' ri pa'rasangang nupammantangngia sallang, anjo barakkaka musti nupaui battu ri Moncong Gerizim siagang anjo pattunraya nupaui battu ri Moncong Ebal (

³⁰Anjo ruaya moncong niaki ri laukanna Binanga Yordan ri daerana tu Kanaan ammantanga ri Ka'bung Yordan, a'dalle' kalau' tena nabella battu ri poko'-poko' tampa' ibadaya ri More ri ampi'na kota Gilgal.)

³¹Tassalloami nanu'limbang ri Binanga Yordan siagang nupammantangngi butta Napassareanga Karaeng Allata'alanu mae ri kau. Punna le'baki nualle anjo buttaya siagang punna ammantang mako anjoreng,

³²musti nuturuki sikontu hukkung kupabattua mae ri kau anne alloa.”