Read Makassar Version – KITTA' MATANGKASA PAOLE 13 Bible Online

PAOLE 13 - Makassar Version – KITTA' MATANGKASA bible

PAOLE 13

¹Punna nia' sitau na'bi yareka tau asso'na anjanjiko angkana lappa'niaki gau' appakalannasa' yareka gau' malompo

²lanri nakellainnu anynyomba siagang ampare' atai kalennu mae ri rewata-rewata tenaya nale'ba' nuasseng, manna pole nakajariang tojeng anjo apa napa'janjianga,

³tea' laloko erokki amparhatikangi. Napakei Karaeng Allata'alanu anjo taua untu' anso'riko, lanri ero'Na Nacini' angkanaya apaka ma'nassa mangngamaseang tojengko mae ri Batara yareka tena.

⁴Tau kammaya anjo musti nihukkung matei, lanri eroki ampasala oloangko battu ri oloang Naparentakanga Karaeng Allata'alanu mae ri kau. Anjo tau kammaya tau ja'dala', lanri nasuroko ambaliangi Karaeng Allata'alanu, Ia le'baka allappassangko battu ri Mesir, tampa' le'baka nupammantangngi nipare' ata. Jari musti nibunoi anjo tau kammaya, sollanna nipaccappu' anjo kaja'dallanga. Mingka ikau paralluko amminawang turu' ri Karaeng Allata'alanu siagang mappakala'biri' mae ri Ia; mannurukiko ri Ia siagang gaukangi sikontu parentaNa. Tuli majarre' pa'maikko ri Ia siagang nupare' ata kalennu mae ri Ia.

⁶Punna nia' sari'battannu, yareka ana' bura'nenu yareka ana' bainenu yareka bainennu nukamaseanga, yareka agang baji'nu anynyonyo' cokko-cokkoko untu' anynyomba mae ri rewata-rewata maraeng tenaya nuassengi siagang tenaya naassengi boe-boenu, rewata-rewata battua ri bansa-bansa ambania siagang bellaya ammantang,

⁸teako pilangngeri siagang teako erokki ninyonyo' ri ia. Tea tongko kamaseangngi yareka la'langngi anjo taua.

⁹Anjo taua musti nisambilai batu sa'genna mate. Ikau musti ansambilai batu, nampa nipinawang ri sikontu ra'yaka. Anjo tau salaya musti nibunoi, lanri eroki ampakabellako battu ri Karaeng Allata'alanu le'baka allappassangki' battu ri nipare' atata ri Mesir.

¹¹Jari sikontu bansa Israel lanalangngere'mi anjo kabara' pammunoanga siagang a'jari malla'mi, sa'genna manna sitau tenamo barani lappanggaukang kammaya anjo ja'dala'na.

¹²Punna ammantangko sallang ri kota-kota Napassareanga Karaeng Allata'alanu mae ri kau, nakulle lania' kabara' tassiara'

¹³angkanaya nia' siapa are tau ja'dala' battu ri bansanu le'ba' ampasala oloangi pandudu'na kotaya untu' anynyomba ri rewata-rewata maraenga tenaya nanuassengi.

¹⁴Punna nia' nulangngere' kabara'-kabara' kammaya anjo, musti nusalidiki siagang baji'. Punna memang kajariang tojeng-tojengi anjo kaja'dallanga,

¹⁵musti nibunoi sikontu pandudu'na anjo kotaya siagang sikamma olo'-olo'na. Anjo kotaya musti niancuru' taba sikali.

¹⁶Sikontu barang-baranna pandudu'na anjo kotaya musti nipasse'rei siagang nitambungi ri paranga, nampa anjo kotaya siagang sikamma barang-baranna musti nitunui a'jari koro'bang mae ri Karaeng Allata'alanu. Le'baki anjo musti nibokoi a'jari ancuru' siagang takkulleai nibangung poleang.

¹⁷Anjo sikamma barang-barang nitunraia takkulleai nuboli' untu' kaparalluang kalennu, mingka musti niancuru' taba sikali. Jari lanaummi larroNa Batara siagang laNapappicinikammi pangngamaseanNa mae ri kau. Lamalammoro' pa'maiki mae ri kau siagang laNapa'jariko bansa malompo, sangkamma Napa'janjianga mae ri boe-boenu,

¹⁸assala' nuturuki sikamma parentaNa kupabattua mae ri kau anne alloa, siagang nugaukang sikontu apa Nakaerokia.”