Read Makassar Version – KITTA' MATANGKASA PAOLE 14 Bible Online

PAOLE 14 - Makassar Version – KITTA' MATANGKASA bible

PAOLE 14

¹ “Ikaumi umma'Na Karaeng Allata'alanu. Jari punna susako lanri kamateangko, teako loko'-lokoki batangkalennu yareka teako cukkuruki bageang dallekanna ulunnu sangkamma nagaukanga bansa-bansa maraenga.

² Ikaumi Napatanga Karaeng Allata'alanu; battu ri sikontu bansaya ri lino, ikaumi Napile Allata'ala untu' a'jari umma'Na.”

³“Teako angnganrei olo'-olo' nipattantua angkana harangi ri Batara.

⁴Akkullei nukanre olo'-olo' sikammaya anne: sapi, gimbala', bembe,

⁵jonga, gimbala' romang, bembe romang, kijang

⁶siagang sikamma olo'-olo' appangkaya kanukunna siagang a'mamaya.

⁷Takkulleai nukanre olo'-olo' tenaya nappangka kanukunna siagang tenaya na'mama. Teako angnganrei unta, kalinci yareka marmot. Anjo olo'-olo' kammaya harangi lanri manna pole a'mamai, mingka tena nata'bage rua kanukunna.

⁸Teako angnganrei bawi. Anjo olo'-olo' kammaya harangi lanri manna nappangka kanukunna mingka tena na'mama. Takkulleai nikanre dagenna siagang takkulleai nisero bakkena.

⁹Akkullei nukanre sikamma juku' akka'nyika siagang assissika.

¹⁰Olo'-olo' attallasaka lalang je'ne' mingka tena nakka'nyi' siagang tena nassissi' harangi, jari takkulleai nikanre.

¹¹Akkullei nukanre sikamma jangang-jangang tenaya naharang.

¹²Mingka nia' siapa are rupanna jangang-jangang tenaya nakkulle nikanre, iamintu: jangang-jangang rajawali, kokoci', sikamma balangkoaka, nasara', kalaa', jangang-jangang unta, camara' siagang sikontu kondoa, kiti' balang, jangang-jangang kasa siagang pa'nyiki.

¹⁹Sikamma a'rupa kaluara akka'nyika harangi, jari takkulleai nikanre.

²⁰Olo'-olo' kammaya punna akka'nyiki takkulleai nikanre.

²¹ Olo'-olo' mate kale-kalea takkulleai nukanre, mingka akkullei nakanre bansa maraeng niaka ammantang ri alla'nu, yareka akkullei nibalukang mae ri bansa maraenga. Ikau umma'Nako Karaeng Allata'alanu, le'baka nisa'la' untu' KalenNa. Dagenna ana' gimbalaka yareka ana' bembea takkulleai nipasipallu siagang je'ne' susunna anronna.”

²² “Tunggala' taung musti nusa'laki bage sampulona sikontu wassele' buttanu.

²³Ri dallekanNa Karaeng Allata'alanu, ri tampa' le'baka Napile, untu' tampa' panynyombang musti nukanrei passare bage sampulona gandunnu, je'ne' anggoro'nu, minynya' zaitunnu, kammayatompa ana' sapi, ana' gimbala' siagang ana' bembenu bungasa' lassuka. Gaukangi anjo kammaya sollannu tuli akkulle appilajara' ampakala'biriki Karaeng Allata'alanu satunggu-tungguna.

²⁴Punna anjo tampa' Napilea Karaeng Allata'alanu bella dudui battu ri balla'nu, sa'genna takkullea nuerang mange anjoreng bage sampulona wassele' buttanu Napassareanga Karaeng Allata'alanu mae ri kau,

²⁵balukangi anjo bageang battua ri wassele' buttanu, nampa nuerang ballinna mange ri tampa' Napilea Karaeng Allata'alanu.

²⁶Balanjai anjo doeka untu' apa-apa nukaerokia, kammaya sapi, bembe yareka gimbala', je'ne' anggoro', yareka inungang terasa', nampa ri anjo tampaka, iamintu ri dallekanNa Karaeng Allata'alanu, ikau siagang kaluarganu musti angnganreko siagang ma'rannu-rannu ngasengko.

²⁷Teako balang parekangi tasilolongang tallasa'na tu Lewi niaka ammantang ri kota-kotanu; u'rangi angkanaya anjo ke'nanga tena butta kalenna.

²⁸Ri kala'busang tunggala' taung makatallua, musti nuerangi bage sampulona wassele' buttanu nampa nupasse're ri kota-kotanu.

²⁹Anjo kanre-kanreanga untu' tu Lewi, lanri tenana buttana ke'nanga, kammayatompa untu' tubattu-battua, untu' ana'-ana' kukanga, siagang untu' sikamma janda niaka ammantang ri kota-kotanu. Akkullei ke'nanga battu angngallei sikamma apa naparalluanga ke'nanga. Punna nugaukang anjo kammaya, laNabarakkaki Karaeng Allata'alanu sikontu usahanu.”