Read Makassar Version – KITTA' MATANGKASA PAOLE 15 Bible Online

PAOLE 15 - Makassar Version – KITTA' MATANGKASA bible

PAOLE 15

¹“Ri kala'busanna tunggala' taung makatujua musti nugaukangi nikanaya kalappassang pappinrang.

²Kammaminne carana. Sikamma tu Israel niaka doe' pappinranna mae ri tau julu bansana, musti nabilang lappasa'mi anjo pappinranna, lanri situru' katantuang KalenNa Batara anjo inranga nibilang lappasa'mi, jari takkulleami nisingara'.

³Akkullei nusingara' doe' nupappinrangnganga mae ri tu bansa maraenga, mingka takkulleami nusingara' doe' nupappinrangnganga mae ri julu bansanu.

⁴LaNabarakkakiko Karaeng Allata'alanu ri pa'rasangang Napassareanga mae ri kau. Jari latena tu kasi-asi ri tangnga-tangngana bansanu,

⁵assala' mannurukiko mae ri Karaeng Allata'alanu, siagang nugaukang baji' sikontu apa kuparentakanga mae ri kau anne alloa.

⁶Karaeng Allata'alanu lambarakkakiko sangkamma le'baka Napa'janjiang. Lajai bansa nusare angnginrang doe', mingka ikau kalennu tena nulangnginrang; lajai bansa nukoasai, mingka tena nalanakoasaiko ke'nanga.

⁷ Punna ammantang mako sallang ri pa'rasangang Napassareanga Karaeng Allata'alanu mae ri kau, nampa ri kalase'renna kotanu nia' julu bansanu kakurangang, teako kabajikang kalennu bawang nuparhatikang siagang taerokako ambantui.

⁸Mingka, musti lammoro' pa'maikko mae ri anjo taua siagang sarei angnginrang siapa-siapa jaina naparalluang.

⁹Teako appareki alasang angkanaya a'reppese'mi taung kalappassanna inranga, sa'genna tena nuero' ansarei angnginrang. Teako lappassangngi anjo pikkirang ja'dala' kammaya antama' ri pikkirannu. Punna tanusarea angnginrang, anjo taua lakkioki mae ri Batara ampabattui anjo passalaka, nampa ikau lanisalakang.

¹⁰Pakasannangi pa'mai'nu na nurella assarei anjo taua, na Nabarakkaki Karaeng Allata'alanu sikontu usahanu.

¹¹ Ri alla'na bansa Israel tuli lania'na siapa are tu kasi-asi siagang kakurangang. Lanri kammana anjo nakuparentakangko sollannu lammoro' pa'mai' mae ri ke'nanga.”

¹² “Punna nia' tu bura'ne yareka baine battu ri bansanu ambalukangi kalenna untu' a'jari atannu, musti anjamai ri kau lalang annang taung sallona. Ri taung makatujua, musti nupakabebasaki anjo taua.

¹³Anjo ata bebasakamo, takkulleai a'lampa nampa tanusarea apa-apa.

¹⁴Sarei siagang lammoro' pa'mai'nu apa Napassareanga Karaeng Allata'alanu mae ri kau, iamintu: gimbala', gandung siagang anggoro'.

¹⁵U'rangi angkanaya ikau ata tonjako riolo ri Mesir nampa nipakabebasakko ri Karaeng Allata'alanu; iaminjo saba'na nakupassareang anne parentaya mae ri kau.

¹⁶Mingka punna taeroka anjo ataya a'lampa lanri mangngaina mae ri kau siagang mae ri kaluarganu, siagang sannangi ero' ammantang siagang ikau,

¹⁷erangi anjo taua mae ri pakke'bu' balla'nu siagang tintingi tolinna, nampa la'jari atami ri kau lalang sikontu umuru'na. Kamma tomminjo musti nugaukang mae ri ata bainea.

¹⁸Punna nia' ata ero' nupakabebasa', teako lussakki pa'mai'nu, nasaba' annang taummi le'ba' anjama ri kau siagang gaji bageruanna gajina se'rea palayang. Gaukangi anjo parentaya, na Nabarakkaki Karaeng Allata'ala sikontu usahanu.

¹⁹ Ana' sapi laki siagang ana' gimbala' laki bungasa' lassuka musti nipassareangi mae ri Karaeng Allata'ala. Anjo sapia takkulleai nipake untu' appa'jeko, siagang anjo gimbalaka takkulleai nicukkuru'.

²⁰Tunggala' taung ikau siagang sikontu kaluarganu musti nukanrei dagenna ri dallekanNa Karaeng Allata'ala, ri tampa' ibada Napattantua.

²¹Mingka punna nia' caca'na anjo olo'-oloka, ebara'na akkeppangi yareka butai yareka caca' battala' maraengannaya, takkulleai nupassareang mae ri Karaeng Allata'alanu.

²²Tunggala' taua, baji' natangkasa' yareka ra'masaki, akkullei nakanre ri balla'na, sangkamma angnganre dageng jonga yareka dageng kijang.

²³ Cera'na takkulleai nukanre, mingka musti nutumpai naung ri buttaya sangkamma je'ne'.”