Read Makassar Version – KITTA' MATANGKASA PAOLE 18 Bible Online

PAOLE 18 - Makassar Version – KITTA' MATANGKASA bible

PAOLE 18

¹“Sikontu suku Lewi nisarei tugasa' a'jari imang; lanri kammana takkulleai ke'nanga annarima bageang butta ri Israel. Anjo ke'nanga musti attallasaki battu ri sikamma passare siagang koro'bang-koro'bang maraengannaya nipassareanga mae ri Batara.

² Takkulleai ke'nanga nia' buttana, sangkamma suku-suku maraenga; ia natarimaya ke'nanga salaku imang-imanNa Batara iamintu bageang battu ri passare napassareanga bansa Israel mae ri Batara, sangkamma Napa'janjianga Batara.

³Punna nia' tau assare koro'bang sapi yareka gimbala', anjo bongga ri dallekanna siagang nga'ngala'na, kammayatompa parru'na anjo olo'-oloka musti nipassareangi mae ri imang-imanga untu' bageanna ke'nanga.

⁴Wassele' bungasa'na gandunnu, je'ne' anggoro'nu, minynya' zaitunnu siagang bulu gimbala'nu, bageanna todong ke'nanga.

⁵Battu ri sikontu suku Israel, le'ba'mi Napilei Karaeng Allata'ala anjo suku Lewi untu' a'jari imang sa'genna satunggu-tungguna.

⁶Punna nia' tu Lewi battu ri kalase'renna kotaya ri Israel battu mange ri tampa' ibada le'baka Napattantu Batara nampa ero' ammantang ri anjo tampaka,

⁷akkullei nalayani Karaeng Allata'alana salaku imang, sangkamma tu Lewi maraenga, ia tugasaka ri anjo tampa' ibadaya.

⁸Musti anggappai kanre sangkammaya jaina siagang imang-imang maraenga; apa nagappaya battu ri kaluargana, untu' ia todong.”

⁹“Punna antama' mako ri pa'rasangang Napassareanga Karaeng Allata'alanu mae ri kau, teako palembai panggaukang-panggaukang ja'dala'na bansa-bansa niaka anjoreng.

¹⁰ Teako passareangngi ana'-ana'nu a'jari koro'bang nitunu. Teako manna sitau battu ri kau a'jari paboto, a'boyaya pammatei-pammatei, ammakea jampi-jampi yareka

¹¹ pangngasengang bale'-bale' mata, siagang tea tongko lappassangngi ke'nanga appare' passisambungang siagang roh-rohna tau matea.

¹²Nikabirisi ri Allata'alanu tau anggaukangai panggaukang-panggaukang ja'dala' kammaya anjo, siagang iaminjo saba'na nanapakabella anjo bansa-bansaya battu ri dallekannu.

¹³ Jari paralluko ampa'jari atai kalennu mae ri Karaeng Allata'alanu siagang sikontu pa'mai'nu.”

¹⁴Nampa nakana Musa, “Pandudu'na anjo pa'rasangang lanupammantangngia, napilangngeri kananna sikamma pabotoa, siagang a'boyai tanra-tanra. Mingka tena nanipa'biangi ri Karaeng Allata'alanu anggaukangi anjo passalaka.

¹⁵ Kabalekanna lakkiringi tau battu ri bansata tonji sitau na'bi kammaya anne inakke battu mae ri kau, siagang musti mannurukiko mae ri ia.

¹⁶Ri wattunnu asse're ri Moncong Sinai, nupalaki sollanna tenamo nanulangngereki Karaeng Allata'alanu a'bicara mae ri kau, siagang tenamo nanuciniki pole kahaderanNa lalang ri pepe' a'rinra-rinraya, lanri mallakko mate.

¹⁷Lanri kammana anjo Nakanamo Batara ri nakke, ‘Anjo pappala'na ke'nanga bajiki.

¹⁸Battu ri bansana tonji ke'nanga laKukiring sitau na'bi sangkammaya ikau mae ri ke'nanga. LaKupaui mae ri ia apa mustia napau, nampa napabattu mae ri anjo bansaya sikontu apa Kuparentakanga.

¹⁹ La'bicarai lalang arengKu, siagang laKuhukkungi inai-nai taeroka mannuruki ri ia.

²⁰Mingka punna nia' sitau na'bi barani appabattu pasang lalang arengKu, nampa teai iNakke ansuroi anggaukangi anjo kammaya, musti matei lanri anjo panggaukanna; kammayatompa sikamma na'bi a'bicaraya lalang arenna rewata-rewata maraenga musti matei.’

²¹Nakulle kapang erokko angngassengi angkanaya, ‘Apaka anjo pasanna se'rea na'bi pappasang battu ri Batara yareka tena.’

²²Punna nia' sitau na'bi a'bicara lalang arenNa Batara, mingka tena na'rupa anjo apa napaua, anjo napabattua teai battu ri Batara. Anjo na'bia bicara kalenna napabattu, siagang tena nuparallu malla' mae ri ia.”