Read Makassar Version – KITTA' MATANGKASA PAOLE 19 Bible Online

PAOLE 19 - Makassar Version – KITTA' MATANGKASA bible

PAOLE 19

¹ “Punna le'ba'mo niancuru' anjo bansa-bansaya ri Karaeng Allata'alanu, siagang nipassareammi pa'rasanganna mae ri kau, kammayatompa punna nuallemo kota-kotana siagang sikamma balla'na nampa ammantangko anjoreng,

²anjo daeraya musti nubagei a'jari tallu bageang, massing tasse'rei kota palariang ia gampanga narapi' nabattui tau le'baka ammuno. Punna nia' tau tena nakunjungi ambunoi paranna tau nateai musunna, akkullei lari mange ri kalase'renna anjo kota palarianga untu' anggappa pa'la'langngang.

⁵Ebara'na nia' rua tau siagang antama' ri romanga untu' anna'bang kayu. Ri wattunna anna'bang kayu anjo tau se'reanga, ta'lappasaki anjo pangkulu'na battu ri pangngulunna nampa nataba anjo aganna sa'genna mate. Anjo tau ammunoa na tena nakunjungi tena nasala siagang akkullei lari mange ri kalase'renna anjo tallua kota palariang sollanna nasalama'. Ebara' angkana se'reji bawang kota palariang, gassingka bella dudui mange anjoreng sa'genna akkulle kaluargana anjo tau matea angngondangi anjo tau tenaya nasala nanibunomo lanri larrona anjo kaluargana.

⁷Lanri kammana minjo nakuparentakangko ampasadiai anjo tallua kota.

⁸Punna le'ba'mi Napakaluara' Karaeng Allata'alanu daeranu, sangkamma Napa'janjianga mae ri boe-boenu, siagang le'ba'mi nipassareang anjo sikontu pa'rasanganga mae ri kau,

⁹musti ammileko pole tallu kota palariang. (Anjo pa'rasanganga nipassareangi mae ri kau punna nugaukangi sikontu apa-apa kuparentakanga mae ri kau anne alloa, siagang punna mangngamaseangko mae ri Karaeng Allata'alanu kammayatompa mannurukiko ri pangngajara'na lalang tallasa'nu.)

¹⁰Gaukangi anjo kammaya sollanna tena nanudoraka lanri nulappassanna tau tenaya nasala nibuno ri pa'rasangang Napassareanga Karaeng Allata'alanu mae ri kau.”

¹¹“Mingka maraengi passala'na punna nia' tau angngadangi musunna siagang lanri birisi'na na nakunjungi ambunoi anjo taua, nampa lari mange ri kalase'renna anjo kota palarianga untu' a'boya pa'la'langngang.

¹²Punna kamma anjo, sikamma pamimping kotana musti nakioki anjo taua nampa napassareang mae ri kaluargana anjo tau nibunoa sollanna napa'balassang anjo tau nibunoa na nabuno anjo taua.

¹³Teako kamaseangngi anjo taua. Pakabebasaki tu Israel battu ri tau pabuno kammaya anjo, sollannu salewangang lalang tallasa'nu.”

¹⁴ “Punna battu mako mange ri pa'rasangang Napassareanga Karaeng Allata'alanu mae ri kau, teako paletteki garisi'-garisi' pa'baeng-baenna buttana siampi' balla'nu le'baka nipattantu riolo.”

¹⁵ “Punna sitauji bawang sa'bi tanggannakkapi untu' ampattantui kasalanna se'rea tau nitudu; kaminang kuranna ruapi tau niparalluang untu' a'jari sa'bi ri anjo passalaka.

¹⁶Punna nia' tau ero' ampanraki paranna tau nappare' tuduhang takontutojeng ri pangadelanga,

¹⁷anjo tau ruaya musti a'lampai mange ri tampa' ibada Napattantua Batara sollanna niadeli ke'nanga ri sikamma imanga siagang haking tugasaka anjo wattua.

¹⁸Sikamma hakinga musti nasalidiki anjo parkaraya siagang baji'; na punna a'nassai angkanaya anjo taua napitinai paranna tu Israel,

¹⁹anjo taua musti ia anjappai hukkungang lanipatabaya mae ri anjo balinna. Kammaminjo carana na nupaccappu' anjo kaja'dallang kammaya.

²⁰Sikamma taua lanalangngereki anjo passalaka siagang a'jari malla'mi, sa'genna tenamo manna sitau barani appanggaukang ja'dala' kamma anjo.

²¹ Teako mangngamaseangngi lalang ri parkara-parkara kammaya anjo. Ia hukkunganna iamintu: Nyawa nisambei nyawa, mata nisambei mata, gigi nisambei gigi, lima nisambei lima, siagang bangkeng nisambei bangkeng.”