Read Makassar Version – KITTA' MATANGKASA PAOLE 23 Bible Online

PAOLE 23 - Makassar Version – KITTA' MATANGKASA bible

PAOLE 23

¹“Tau le'baka nipasulu' lisere' katauanna, yareka le'baka nipolong katauanna takkuleai a'jari umma'Na Batara.

²Tau nilassukanga natenapa na'nikka tau toana, kammayatompa sikontu jari-jarina sa'genna makasampuloa lapisi'na, takkulleai a'jari anggota umma'Na Batara.

³ Tu Amon siagang tu Moab kammayatompa jari-jarina ke'nanga sa'genna makasampuloa lapisi', takkulleai a'jari anggota umma'Na Batara,

⁴ lanri tena naero' ke'nanga assareko kanre siagang je'ne' inung lalang pa'jappannu assulu' battu ri Mesir. Ba'lalo nagaji ke'nanga Bileam, ana'na Beor battu ri kota Petor ri Mesopotamia, untu' antunraiko.

⁵ Mingka taerokai Karaeng Allata'alanu ampilangngeri Bileam. Kabalekanna Napinrai anjo tunraya a'jari barakka', lanri mangngamaseangi ri kau.

⁶Lalang sikontu tallasa'na, tena sikali naNatulungi anjo bansa-bansaya yareka tena sikali naNapa'jari salewangang ke'nanga.

⁷Teako cini' tunai tu Edom, lanri anjo ke'nanga sari'battannu. Tea tongko cini' tunai tu Mesir, lanri le'bakko ammantang ri pa'rasanganna ke'nanga.

⁸Appakkaramula ri lapisi' makatallua siagang jari-jarina ke'nanga akkullei a'jari anggota umma'Na Batara.”

⁹“Ri wattunnu sitabang a'bundu', musti nuliliangi sikamma apa akkullea ampa'jari ra'masakko.

¹⁰Punna nia' tau a'jari ra'masa' lanri assulu'na je'ne' kebo' katauanna ri wattunna tinro, musti nabokoi kemaya nampa pantara' ammantang.

¹¹Punna lakaruemmo, musti a'je'neki siagang punna labumo alloa akkullemi ammotere' mange ri kemaya.

¹²Musti appasadiako tampa' ri pantaranganna pakkemaanga tampa' pa'jambangang.

¹³Punna mange anjoreng, angngerangko pakkakasa' siagang se're pakkeke untu' angngeke kali'bong tampa' pa'jambangang, siagang untu' antambungi ammotere'.

¹⁴Karaeng Allata'alanu anrurungangko lalang ri pakkemaanga untu' alla'langngiko siagang untu' assareko pammetang mae ri musu-musunnu. Jari, jagai sollanna tuli matangkasa' pakkemaannu. Teako nia' apa-apa tenaya nasiratang ri alla'nu, sollanna tena Nabokoiko Batara.”

¹⁵“Punna nia' ata lari battu ri karaenna nampa battu mae ri kau appala' pa'la'langngang, teako suroi ammotere'.

¹⁶Akkullei ammantang ri kalase'renna kotanu napilea, siagang tena nukkulle anggaukang panggaukang sekke' mae ri ia.

¹⁷ Se'rea tu Israel, baji' bura'ne kammayatompa baine, takkulleai a'jari pagau' bawang ri balla'-balla' panynyombanga.

¹⁸Kammayatompa anjo doe' nagappaya battu ri panggaukang bawanna, takkulleai nierang mae ri Balla'Na Karaeng Allata'alanu untu' pa'bayara' tinja', nasaba' tanangaiyai Karaeng Allata'alanu pagau' bawanga ri balla'-balla' panynyombanga mae ri rewataya siagang tena todong nangai wassele' gau' bawanga.

¹⁹ Punna assareko angnginrang mae ri bansa maraenga, akkulleko appala' je'ne' doe'. Mingka punna assareko angnginrang doe' yareka kanre-kanreang yareka barang-barang maraengannaya mae ri julu bansanu, takkulleako angngalle je'ne' doe' battu ri ia. Turuki anjo parentaya, na Nabarakkakiko Karaeng Allata'alanu lalang sikontu apa nugaukanga ri pa'rasangang nupammantangngia.

²¹ Punna nia' apa-apa nupa'janjiang mae ri Karaeng Allata'alanu, teako pamono'-monoki untu' anrupai anjo janjinnu, lanri tuli Natuntu'na Karaeng Allata'alanu ri kau, siagang dorakako punna tena nanurupai.

²²Tena nanudoraka punna tena nu'janji mae ri Batara.

²³Mingka punna ero' kalennu tonji nanu'janji, musti nurupai anjo janjinnu.

²⁴Punna sitabangko a'jappa ri koko anggoro'na taua, akkullei nukanre rappo anggoro'na siapa-siapa jaina nukaeroki, mingka takkulleai nupasse're lalang ri karanjeng.

²⁵Punna sitabangko a'jappa ri koko gandunna taua, akkullei nukanre gandung nukattilika siagang limannu, mingka takkulleai nualle siagang pakkatto.”