Read Makassar Version – KITTA' MATANGKASA PAOLE 24 Bible Online

PAOLE 24 - Makassar Version – KITTA' MATANGKASA bible

PAOLE 24

¹ “Ebara' angkana nia' baine anggaukangi panggaukang appakasirika, sa'genna tenamo naningai ri bura'nenna. Nampa anjo bura'nea nasarei sura' talla' anjo bainea, siagang nabongkai anjo bainea battu ri balla'na.

²Nampa a'bunting poleang anjo bainea siagang bura'ne maraeng;

³mingka tena nasiapa sallona tenamoseng naningai ri anjo bura'ne ri bokona, siagang nisaremiseng sura' talla' nampa nibongka anjo bainea. Yareka akkulle tongi angkana matei anjo bura'ne ri bokona.

⁴Lalang ri anjo ruaya passala', anjo bura'ne rioloa takkulleai a'bunting poleang siagang anjo bainea; musti nacini' kammai baine ra'masa'. Punna kamma nabuntinginna tonja pole, anjo panggaukang kammaya a'jari panghinaangi mae ri Karaeng Allata'alanu. Ikau takkulleako anggaukangi dosa ja'dala' kammaya anjo ri pa'rasangang Napassareanga Batara mae ri kau.”

⁵“Punna nia' bura'ne beru bunting, takkulleai nisuro antama tantara siagang nisuro a'lampa mange a'bundu' yareka nisare tugasa' maraengannaya. Musti nipakabebasaki battu ri tugasa'na lalang sitaung untu' angngurusuki ruma tanggana siagang ampakasannangi nyawana bainenna.

⁶Punna assareko angnginrang apa-apa mae ri parannu tau, teako allei batu panggilingang gandunna anjo taua a'jari boro'. Punna nuallei batu panggilinganna anjo taua, nurampasa'mi pakkakasa' naparalluanga kaluargana anjo taua ansambungi katallassanna.

⁷ Inai-nai anculiki julu bansana, nampa nagau' sangkamma ata yareka naallei nabalukang, musti nihukkung matei anjo taua. Kammaminjo caranu ampaccappuki kaja'dallang kammaya anjo.

⁸ Punna nia' tau garring sala ri tangnga-tangnganu, gaukangi siagang baji' apa naparentakanga imang-imang Lewi mae ri kau; turuki sikamma apa napijo'jokiangko.

⁹ U'rangi apa le'baka Nagaukang Karaeng Allata'alanu mae ri Miryam lalang pa'jappannu battu ri Mesir.

¹⁰ Punna assareko angnginrang mae ri parannu tau, teako antamakki ri balla'na untu' angngallei bajunna untu' a'jari boro'.

¹¹Tayangi pantarang siagang lappassangi kalenna tompa angngerangi mae ri kau.

¹²Punna kasi-asi anjo taua, takkulleai nutahang anjo bajua sila'busu' bangngi,

¹³mingka musti nupoterangi mae ri ia tunggala' bangngi sollanna akkulle napake untu' attinro. Jari lappala' tarima kasi anjo taua mae ri kau, siagang lamangngellai Karaeng Allata'alanu mae ri kau.

¹⁴ Teako paccoki tungnganre gaji kasi-asia siagang kakuranganga, baji' julu bansanu, kammayatompa bansa maraeng niaka ammantang ri kalase'renna kotanu.

¹⁵Tunggala' allo ri wattu tenanapa nalabu alloa, musti nubayaraki gajina untu' anjo alloa; narannuangi anjo doeka lanri naparallukangi. Punna tena nubayaraki gajina, lakkioki mae ri Batara untu' appala' tulung passabakkang ikau, siagang ikau lanisalakang.

¹⁶ Teako hukkung matei tau toaya passabakkang kaja'dallang nagaukanga ana'-ana'na; siagang teako hukkung matei ana'-anaka passabakkang kaja'dallang nagaukanga tau toana ke'nanga. Tunggala' taua iapa nakkulle nihukkung mate punna passabakkang panggaukang kaja'dallang kalenna.

¹⁷ Teako rampasaki ha'na bansa maraenga siagang ana'-ana' kukanga, siagang teako allei pakeanna jandaya untu' a'jari boro' lanri pangnginrangnganna.

¹⁸U'rangi angkanaya ikau le'bakko a'jari ata ri Mesir nampa nilappassangko ri Karaeng Allata'alanu; iaminjo saba'na nakusareko anne paratoranga.

¹⁹ Punna nupasse're wassele' kattoannu, teako ammotereki untu' angngallei kawarrang gandunnu ammantanga. Anjo gandunga niboli'mi untu' tubattu-battua, ana'-ana' kukanga siagang sikamma jandaya, sollannu nibarakkaki ri Karaeng Allata'alanu lalang sikontu usahanu.

²⁰Punna le'ba'mo sikali nualle rappo zaitunnu siagang rappo anggoro'nu, tea' mako mangei pole untu' ampasse'rei rappo-rappo niaka ammantang. Anjo ammantanga musti nuboli'mi untu' tubattu-battua, ana'-ana' kukanga siagang sikamma jandaya.

²²U'rangi angkanaya le'bakko a'jari ata ri Mesir; iaminjo saba'na nakusareko anne paratoranga.