Read Makassar Version – KITTA' MATANGKASA PAOLE 25 Bible Online

PAOLE 25 - Makassar Version – KITTA' MATANGKASA bible

PAOLE 25

¹Ebara' angkana nia' rua tu Israel a'lampa mange ri pangadelang untu' angngerang parkara, nampa nia' kalase'renna nikana tena nasala, siagang se'reanga sala.

²Punna anjo salaya nisarei hukkungang paccambo', hakinga musti nasuroi anjo taua akkulantu'. Siapa jaina paccambo' nagappa, situruki battu ri antekamma kaja'dallang le'baka nagaukang,

³ mingka takkulleai la'bi ri pimpatampuloa paccambo'. Punna la'bi, battuanna nihinami anjo taua ri dallekanna tau jaia.

⁴ Teako jempangi bawana sapi nupakea allessoro' gandung.”

⁵ “Punna sipammantangngang tau assari'battanga, nampa nia' kalase'renna ammoterang, nampa tena ana'na bura'ne, anjo jandana takkulleai a'bunting siagang tau maraeng pantaranganna bijanna sari'battanna tumate bura'nenna. Sari'battanna anjo tau matea parallui a'bunting siagang anjo jandaya.

⁶Ana' bura'ne toana ke'nanga musti nikanai ana'na anjo tau matea, sollanna nia' jari-jarina ri tangnga-tangngana bansa Israel.

⁷ Punna taeroka taua a'bunting siagang jandana anjo lapung tau matea sari'battanna, anjo bainea musti a'lampai mange andallekang ri sikamma tau toa-toana kotaya nampa nakana, ‘Taerokai sari'battanna tumate bura'nengku anggaukangi kawajibanna untu' ansarei turungang sari'battanna ri tangnga-tangngana bansa Israel.’

⁸Nampa sikamma tau toa-toana kotaya musti nakioki anjo taua nampa naagang a'bicara. Punna tuli tenana naero',

⁹anjo jandana tumate sari'battanna musti nareppesi anjo taua ri dallekanna sikamma tau toa-toana kotaya, naallei sandala'na anjo taua, napi'rui rupanna na nakana, ‘Kammaminne batena musti nigaukang mae ri tau tenaya naero' assare turungang mae ri sari'battanna.’

¹⁰Kaluargana anjo taua laniassengi ri Israel salaku ‘Kaluarga tunialleanga sandala'na.’ ”

¹¹“Punna nia' rua tu bura'ne assiba'ji, nampa battu bainenna kalase'renna anjo taua ambantui bura'nenna na napacco' katauanna balinna anjo bura'nenna,

¹²polongi limanna anjo bainea, siagang teako kamaseangngi.

¹³ Teako ammakei timbangang siagang ukkurang untu' annipu.

¹⁵Pakemi timbangang siagang ukkurang annabaya sollanna la'bu umuru'nu ri pa'rasangang Napassareanga Karaeng Allata'alanu mae ri kau.

¹⁶Birisiki Karaeng Allata'alanu mae ri tau nangaia annipu.”

¹⁷ “U'rangi antekamma panggaukanna tu Amalek mae ri kau ri wattunnu lalang pa'jappang battu ri Mesir.

¹⁸Tena namalla' ke'nanga mae ri Allata'ala, siagang nabundukiko battu ri boko, ri wattunnu sitabang mangngang siagang tenamo kagassingannu, nampa nabuno sikamma taunnu sannaka susana a'jappa ri boko.

¹⁹Lanri kammana anjo, punna Napassareammo Karaeng Allata'alanu anjo pa'rasanganga mae ri kau, siagang amang mako battu ri sikamma musunnu niaka ri tammulilinu, anjo sikontu tu Amalek musti nubuno ngasengi sa'genna nikaluppaimo ke'nanga. Teako kaluppai!”