Read Makassar Version – KITTA' MATANGKASA PAOLE 27 Bible Online

PAOLE 27 - Makassar Version – KITTA' MATANGKASA bible

PAOLE 27

¹Nampa Musa siagang sikamma pamimpinna Israel, napabattumi anne pasang kammaya mae ri bansa Israel, “Turuki sikontu parenta kupassareanga mae ri kau anne alloa.

² Ri allo a'limbannu ri Binanga Yordan untu' antama' ri pa'rasangang Napassareanga Karaeng Allata'alanu mae ri kau, musti appaentengko siapa are batu lompo nampa nupa'leoki.

³Tulisiki mae ri anjo batu-batua sikamma kana-kananna anne hukkunga. Punna antama' mako ri pa'rasangang akkalumanynyanga siagang copponga buttana, iamintu Napa'janjianga Batara, Allata'ala napakalompoa boe-boenu,

⁴siagang a'limbang mako ri Binanga Yordan, musti a'lampako mange ri Moncong Ebal. Ri coppo'na anjo monconga musti appaentengko batu-batu siagang nupa'leoki anjo batu-batua, sangkamma kuparentakanga mae ri kau anne alloa.

⁵ Anjoreng ri tampaka musti appaentengko se're tampa' pakkoro'bangngang battu ri batu-batu tenayapa nale'ba' nijama siagang pakkakasa'-pakkakasa' bassi,

⁶nasaba' anjo tunggala' tampa' pakkoro'bangngang nipaentenga untu' Karaeng Allata'alanu, musti batu attammu nipare'. Irate ri anjo tampa' pakkoro'bangnganga musti assareko koro'bang-koro'bang nitunu.

⁷Passareang tongi koro'bang passiamakkannu siagang kanremi anjoreng kammayatompa a'rannu-rannu mako ri dallekanNa Karaeng Allata'alanu.

⁸Irate ri anjo batu-batu nipa'leokia musti nutulisi' bajiki sikontu kana-kana battua ri hukkunNa Allata'ala.”

⁹Nampa Musa siagang sikamma imang Lewi, musti angkanai mae ri sikontu bansa Israel, “Parhatikangi, e, sikamma sari'battangku, siagang pilangngeri! Anne alloa a'jari mako umma'Na Karaeng Allata'alanu.

¹⁰Lanri kammana anjo turukimi Batara siagang gaukangi sikontu hukkunNa kupassareanga mae ri kau anne alloa.”

¹¹Nampa nakana Musa mae ri bansa Israel,

¹² “Punna le'ba'mo nulimbang Binanga Yordan, suku Simeon, Lewi, Yehuda, Isakhar, Yusuf siagang Benyamin, musti ammentengi irate ri Moncong Gerizim ri wattu nipauna kana barakkaka mae ri anne bansaya.

¹³Ri wattunna nipau kana pattunraya, suku Ruben, Gad, Asyer, Zebulon, Dan siagang Naftali, musti ammentengi irate ri Moncong Ebal.

¹⁴Sikamma tu Lewia musti napaui kana-kana kammaya anne siagang sa'ra lompo nampa musti appiali bansa Israel angkana, ‘Aming’.

¹⁵ Tu Lewi: ‘Nitunrai tau appareka patung battu ri batu, kayu yareka bassi-bassiang, nampa nasomba accokko-cokko; Nakabirisi Batara panynyombanga ri barhala!’ Sikontu ra'yaka: ‘Aming’!

¹⁶ ‘Nitunrai tau tenaya napakala'biriki tau toana siagang nabalang parekangi ke'nanga ta'ronang-ronang tallasa'na.’ ‘Aming!’

¹⁷ ‘Nitunrai tau ampalessokai garisi' pa'baeng-baenna buttana siampi' balla'na.’ ‘Aming!’

¹⁸ ‘Nitunrai tau ampakalinguai tau butaya.’ ‘Aming!’

¹⁹ ‘Nitunrai tau anrampasakai ha'na tubattu-battua, ana' kukanga, siagang jandaya.’ ‘Aming!’

²⁰ ‘Nitunrai tau anghinayai manggena lanri assikatinroanna siagang kalase'renna bainenna manggena.’ ‘Aming!’

²¹ ‘Nitunrai tau a'gau' bawanga siagang olo'-oloka.’ ‘Aming!’

²² ‘Nitunrai tau assikatinroanga siagang sari'battang bainena battua ri amma'na, yareka sari'battang se're mangge se're amma'.’ ‘Aming!’

²³ ‘Nitunrai tau assikatinroanga siagang matoang bainena.’ ‘Aming!’

²⁴‘Nitunrai tau ammuno cokko-cokkoa.’ ‘Aming!’

²⁵‘Nitunrai tau annarimaya pacoco' untu' ambunoi tau tenaya salana.’ ‘Aming!’

²⁶ ‘Nitunrai tau tenaya namannuruki ri sikontu hukkunNa siagang paratoranNa Allata'ala.’ ‘Aming!’ ”