Read Makassar Version – KITTA' MATANGKASA PAOLE 29 Bible Online

PAOLE 29 - Makassar Version – KITTA' MATANGKASA bible

PAOLE 29

¹Iaminne kana-kana parjanjiang napareka Musa siagang bansa Israel situru' parentaNa Batara, ri wattunna nia' ke'nanga ri butta Moab. Anjo parjanjianga iamintu pannambai battu ri parjanjiang Napareka Batara siagang ke'nanga ri Moncong Sinai.

²Nasuroi Musa asse're sikontu tu Israel, nampa nakana mae ri ke'nanga, “Le'ba'mi nucini' kalennu apa Nagaukanga Batara mae ri karaeng Mesir, sikontu pagawena siagang sikontu pa'rasanganna.

³Le'ba' tommi nucini' sikamma bala lompoa, gau'-gau' malompoa siagang gau'-gau' appakalannasa' Nagaukanga Batara.

⁴Mingka sa'genna kamma-kamma anne tenapa Nasareko kasampatang untu' ampahang kabusuki angkana apa battuanna anjo apa le'baka nucini'.

⁵Patampulo taungi sallona Batara ampimpingko a'jappa ri parang lompoa, mingka tena na'jari toa pakeannu siagang sandala'nu.

⁶Tena roti lanukanre siagang tena je'ne' anggoro' yareka inungang terasa' lanuinung, mingka Nasareko Batara sikontu apa nuparalluanga sollanna nuasseng angkanaya Iami Karaeng Allata'alanu.

⁷ Siagang ri wattunta battu mae anrinni, battui Karaeng Sihon battu ri Hesybon siagang Karaeng Og battu ri Basan untu' ambundukiki'. Mingka nibetai anjo ke'nanga.

⁸ Niallei buttana ke'nanga nampa nibage mae ri suku Ruben siagang Gad, kammayatompa sipa'gang suku Manasye.

⁹Jari paralluko tamamminraya pa'mai'nu mannuruki ri sikontu anne parjanjianga, sollannu anggappa wassele' lalang sikontu usahanu.

¹⁰Anne alloa ammenteng ngasengko ri dallekanNa Karaeng Allata'alanu, iamintu sikontu pamimpinga siagang patugasaka, sikontu tu bura'nea,

¹¹tu bainea, ana'-anaka, siagang sikontu bansa maraeng niaka ammantang ri tangnga-tangnganu siagang ambantuako ammolong kayu siagang ammisang je'ne'.

¹²Appareki Karaeng Allata'alanu parjanjiang siagang ikau, siagang asse're ngasengko anrinni untu' ansikkoki anjo parjanjianga kammayatompa antarimai sikamma kawajibannu.

¹³Iaminjo parjanjianga Napake Batara anne alloa ampakajarrekko a'jari bansaNa, siagang Ia a'jari Allata'alanu sangkamma Napa'janjianga mae ri kau siagang mae ri boe-boenu iamintu Abraham, Ishak siagang Yakub.

¹⁴Anjo parjanjianga siagang sikamma kawajibang niaka lalanganna, Napareki Batara teai siagang ikau bawang,

¹⁵mingka siagang tunggala' taua, iamintu sikamma niaka anne alloa ammenteng anrinni, ri dallekanNa Karaeng Allata'ala, kammayatompa siagang jari-jarita sallang ri boko.”

¹⁶“Nuu'rangi iji antekamma sarenta ri Mesir siagang antekamma kasia'na a'jappaya alla'bang ri pa'rasanganna bansa-bansa maraenga.

¹⁷Le'ba'mi nucini' patung-patung appakaringi'-ringika nasombaya ke'nanga; patung-patung nipareka battu ri kayu, batu, pera', siagang bulaeng.

¹⁸ Jari, katutui sollanna tena lalo battu ri kau, bura'ne yareka baine, kaluarga yareka suku, ia niaka ammenteng anrinni, ta'giling battu ri Karaeng Allata'alata untu' anynyomba mae ri rewata-rewatana bansa maraenga. Anjo panggaukang kammaya rapangi aka' attimboa battu ri lamung-lamung paika siagang niaka racunna.

¹⁹Ri sikamma kau niaka anrinni ampilangngeri anjo tuntutang terasaka tea' laloko niakki appikkiri' angkanaya tuli labaji'na sarennu, manna pole nattojeng-tojeng ero' amboyai oloang kalenna. Anjo kammaya lanapanraki ngaseng jako, baji' natau ja'dalaka kammayatompa natau bajika.

²⁰Tena nalanipammopporang ri Batara tau kammaya anjo. Kabalekanna, lanitabai ri pangngalarroi lompoNa Batara, siagang sikontu anjo bala niaka tattulisi' lalang ri anne kittaka labattui antujui, sa'genna nipanraki ri Batara.

²¹Anjo taua laNapa'jari contoi Batara mae ri sikontu suku Israel, siagang Nahukkungi anjo taua siagang pattunra niaka nipau lalang ri parjanjiang tattulisika lalang ri anne kittaka, iamintu kitta' HukkunNa Batara.

²²Ri bokoang allo, lanaciniki jari-jarinu siagang sikamma bansa maraeng battua ri pa'rasangang-pa'rasangang bellaya sikamma balaya siagang kasessang Napabattua Batara mae ri pa'rasangannu.

²³ La'jari parang kalotoro' karringi sikamma kokonnu nitongko' ri batu a'rinra siagang ce'la. Takkulleai nulamungi buttana, siagang tea tommi attimbo ruku'-rukuka anjoreng. Lasangkammai kota-kota Sodom siagang Gomora kammayatompa Adma siagang Zeboim anjo pa'rasangannu, iamintu niancuruki ri wattu a'rinra-rinrana larroNa Batara.

²⁴Nalakkuta'nammo sikontu linoa angkana, ‘Angngapa Nappanggaukang kamma anjo Batara mae ri pa'rasanganna ke'nanga? Apa saba'na Nalarro dudu kamma anjo?’

²⁵Na pialinna iamintu, ‘Lanri takkaluppana ke'nanga ri parjanjianNa Batara, Allata'alana boe-boena ke'nanga; parjanjiang Napareka siagang ke'nanga ri wattunna nierang ke'nanga assulu' battu ri Mesir.

²⁶Napare' atai kalenna ke'nanga mae ri rewata-rewata maraeng, tenaya naassengi ke'nanga, nampa sitojenna nipisangkai ke'nanga anynyomba ri anjo rewata-rewataya.

²⁷Iaminjo saba'na Nalarro Batara mae ri umma'Na, siagang Napabattu mae ri ke'nanga sikontu bala niaka tattulisi' lalang ri kittaka anne.

²⁸A'lappo' hebaki larroNa Batara, siagang lalang larro lompoNa anjo Nabi'bu'mi bansa Israel battu ri buttana ke'nanga nampa Napasambila ke'nanga mange ri pa'rasanganna bansa maraenga. Iaminjo saba'na nania' ke'nanga anjoreng.’

²⁹Nia' siapa are passala' Narahasiakang Karaeng Allata'ala mae ri katte; mingka le'ba'mi Napa'nyata hukkunNa mae ri katte, na ikatte siagang sikontu jari-jarita musti mannuruki mae ri anjo hukkunga sa'genna satunggu-tungguna.”