Read Makassar Version – KITTA' MATANGKASA PAOLE 31 Bible Online

PAOLE 31 - Makassar Version – KITTA' MATANGKASA bible

PAOLE 31

¹A'bicarami pole Musa mae ri bansa Israel,

² angkana, “Kamma-kamma anne sibilangngammi anruampulo taung umurukku siagang tenamo nakukkulle a'jari pamimping mae ri kau ngaseng. Pantaranganna anjo, le'ba'mi pole Nakana Batara mae ri nakke angkanaya takkullea' allimbangi Binanga Yordan.

³KalenNa Karaeng Allata'alanu la'jappa ri dallekannu siagang ampanraki bansa-bansa ammantangnga anjoreng, sa'genna akkulle nupammantangngi buttana ke'nanga. Yosua la'jari pamimpinnu, sangkamma le'baka Napau Batara.

⁴ LaNapanraki Batara anjo bansa-bansaya, sangkamma Nabetana Sihon siagang Og, karaeng Amori siagang naancuru' pa'rasanganna ke'nanga.

⁵LaNasareko pammetang Batara mae ri ke'nanga, nampa musti nupareki ke'nanga sangkamma apa kupaua mae ri kau.

⁶Paralluko majarre' pa'mai' siagang barani! Teako mallakki mae ri ke'nanga! Karaeng Allata'alanu KalenNa lantulungko. Tena nalaNapassalasako siagang tena nalaNabokoiko.”

⁷Nampa nakio' Musa anjo Yosua, siagang ri dallekanna sikontu bansa Israel nakanamo ri Yosua, “Paralluko majarre' pa'mai' siagang barani, Yosua! Ikau lampimpingi anne bansaya untu' ampammantangngi pa'rasangang Napa'janjianga Batara mae ri boe-boena ke'nanga.

⁸ KalenNa Batara angnguluko siagang antulungko. Tena nalaNapassalasako siagang tena nalaNabokoiko. Lanri kammana anjo, teako mallakki siagang teako lussakki.”

⁹Nampa natulisi' Musa hukkunNa Karaeng Allata'ala nampa napassareang mae ri imang-imang Lewi nisarea tugasa' untu' angngurusuki Patti Parjanjianga, siagang mae ri sikamma pamimpinna Israel.

¹⁰ Naparentakangi mae ri ke'nanga angkana, “Ri kala'busanna tunggala' taung makatujua, lalang taung nipa'jari lappasa'na sikamma inranga ri allo Lompo Pa'ballakkang Leko'-leko' Kayua,

¹¹musti nubacakangi anne hukkung-hukkunga siagang sa'ra lompo mae ri tu Israel battua anynyomba ri Karaeng Allata'alanu ri tampa' ibada le'baka nipattantu.

¹²Suroi sikontu tu bura'nea, bai'-bainea siagang ana'-anaka, siagang bansa maraeng niaka ammantang ri kota-kotanu asse're untu' ampilangngeri anjo pambacanga, sollanna appilajara' ke'nanga ampakala'biriki Karaeng Allata'alanu, kammayatompa majarrekko mannuruki ri parenta-parentaNa.

¹³Kammaminjo carana na anjo ana'-ana'nu tenayapa nale'ba' allangngereki hukkunNa Karaeng Allata'alanu akkullemi nalangngere' siagang appilajara' ampakalompoi Batara lalang attalasa'na ke'nanga ri pa'rasangang tenayamo nasallo nanupammantangngi ri ba'leanna Binanga Yordan.”

¹⁴Nampa Nakana Batara mae ri Musa, “Tenamo nusallo attallasa'. Jari, kioki Yosua, siagang erangi mae ri KemaKu, sollanna akkulle Kusare siapa are pangngunju'.” Jari a'lampami Musa siagang Yosua mange ri anjo Kemaya,

¹⁵siagang Napappicinikammi KalenNa Batara mae ri ke'nanga lalang rupa benteng rammang ri ampi'na pakke'bu'na anjo Kemaya.

¹⁶Nakana Batara mae ri Musa, “A'reppese'mi a'jala'nu. Punna a'boko mako, lamamminrami nyawana bansa Israel mae ri Nakke siagang takkaluppami ri parjanjiang Kupareka siagang ke'nanga. LanabokoiA' ke'nanga untu' a'lampa mange anynyomba ri rewata-rewata nisombaya ri pa'rasangang tenayamo nasallo nanupantamakki.

¹⁷Punna kajariang anjo kammaya, la'bettese'mi larroKu mae ri ke'nanga. LaKubokoi ke'nanga siagang laKupanraki. Jai bala lompo lantujui ke'nanga; nampami sadara' ke'nanga angkanaya nakajariang ngaseng anjo kammaya lanri iNakke, Allata'alana ke'nanga, tenamo naKururungangi ke'nanga.

¹⁸Ri anjo wattua taerokaMa' antulungi ke'nanga, lanri anynyombami ke'nanga mae ri rewata-rewata maraenga siagang a'gau' ja'dala'mi ke'nanga.

¹⁹Kamma-kamma anne, tulisi'mi anne kelong-kelonga. Pangngajarrangi anjo mae ri bansa Israel salaku sa'bi mae ri ke'nanga.

²⁰LaKuerangi ke'nanga mange ri anjo pa'rasangang kalumanynyanga siagang copponga buttana, sangkamma Kupa'janjianga mae ri boe-boena ke'nanga. Anjorengi ke'nanga lattallasa' siagang sannang siagang anggappai sikamma kanre-kanreang naparalluanga ke'nanga. Mingka kale'bakkanna lata'gilingi ke'nanga nampa anynyomba mae ri rewata-rewata maraenga. LanasorongbokoA' ke'nanga siagang takkaluppai ri parjanjiangKu,

²¹siagang jai bala lompo lantujui ke'nanga. Mingka anne kelonga tuli lanikelongangi siagang tuli lanipakei salaku sa'bi mae ri ke'nanga. Ba'lalo manna ri kamma-kammaya anne, lalang tenanapa naKuerangi ke'nanga mange ri anjo pa'rasangang Kupa'janjianga, Kuassemmi nawa-nawanna ke'nanga.”

²²Anjo alloa natulisi' memammi Musa anjo kelonga, nampa napangngajarrang mae ri bansa Israel.

²³ Nampa Nakana Batara mae ri Yosua, ana'na Nun, “Paralluko majarre' pa'mai' siagang barani Yosua! Ikau lampimpingi bansa Israel ampatamakki pa'rasangang Kupa'janjianga mae ri ke'nanga, siagang iNakke lantulungko.”

²⁴Nampa natulisi' Musa hukkunNa Allata'ala lalang ri se'reang kitta'. Nabajiki tulisi'na battu ri pakaramulanna sa'genna kala'busang.

²⁵Ri wattunna le'ba'mo, nakanamo mae ri sikamma imang Lewi nisarea tugasa' untu' angngurusuki Patti Parjanjianga,

²⁶“Allei anne kitta' HukkunNa Allata'ala, siagang boliki ri sa'rinna Patti ParjanjianNa Karaeng Allata'alanu, sollanna tuli nia'na anjoreng salaku sa'bi mae ri anjo bansaya.

²⁷Kuassengi angkanaya teai sipato' kapala batuna ke'nanga siagang nangai angngewaya. Manna lalang attallasakku nangai ke'nanga angngewa ri Batara; sarroangampa sallang, punna matema'!

²⁸Kamma-kamma anne, suroi sikontu pamimpinna bansaya siagang komandanna tantaraya asse're ri dallekangku, sollanna akkulle kupabattu anne sikamma passalaka mae ri ke'nanga. Kukioki langika siagang buttaya salaku sa'bi mae ri ke'nanga.

²⁹Kuassengi angkanaya punna matema', anjo taua la'jari ja'dalaki siagang lanatollaki apa le'baka kupangngajarrang mae ri ke'nanga. Nampa lanituju sallang ke'nanga ri bala, lanri napakanassuna Batara lanri nagaukanna ke'nanga apa Napappisangkanga Batara.”

³⁰Nampa napabattumo Musa anne kelong-kelonga sa'genna puppusu', nampa mappilangngeri sikontu bansa Israel.