Read Makassar Version – KITTA' MATANGKASA PAOLE 32 Bible Online

PAOLE 32 - Makassar Version – KITTA' MATANGKASA bible

PAOLE 32

¹“Mappilangngeriko, e, langika, erokka' anne a'bicara, e, buttaya, tannangi tolinnu!

²Dasi-dasi narapang bosi manurung pangngajarangku, na rapang je'ne' allung mammatti' kana-kanangku, rapang bosi sarro ri tompo'na ruku'-rukuka, bosi a'ricci'-ricci' ri tompo'na lamung-lamunga.

³Kumammuji ri arenNa Batara. Kabarrangi kalompoanNa Allata'alata!

⁴Batara Mappasalama'nu maporea, adeleki na sukku' baji' sikontu oloanNa. Allata'alanu tamamminra pa'mai'Na na matulusu' ri nyawa, manggaukangi ri bajika na ri siratanga.

⁵Mingka ikaumi bansa tenaya namajarre' pa'mai'nu, bansa jaia jekkonna siagang dosana, tenayamo nanibilangngi umma'Na.

⁶Kammaminjo batenu ambalasaki baji'Na Batara, e, sikamma tau dongoka siagang tenaya nacara'de'? Sai Iami Manggenu, Mappa'jarinu, siagang ampa'jariako se're bansa?

⁷U'rangi le'ba' laloa, ri jammang riolo, carita nibolika lalang pangngu'rangi. Kuta'nangi anjo passalaka mae ri tutoanu, na napau ke'nanga mae ri kau.

⁸ Ri wattu Nabagena Kaminang Tinggia butta pisakaya, tunggala' bansaya Napattantui daerana siagang se'reang rewata a'jari makoasa.

⁹Mingka anne jari-jarina Yakub Napilei Batara untu' KalenNa.

¹⁰Narapikangi ke'nanga sitabang alla'bang, ri tampa' sinoa ri parang lompoa. Iami ke'nanga rapang pa'mai'Na, Nala'langia siagang Naparakaia.

¹¹Rapang balangkoa' angngajaraki ana'na anri'ba', anjakkalaki ri ka'nyi' ta'rangka'na,

¹²kammaminjo KalenNa Batara ampimpingi bansaNa, tanibantua ri rewata-rewataya.

¹³BansaNa akkullei nakoasai moncong-monconga, ri butta a'batu-batua attimboi poko'-poko' zaitunga. Nakanrei ke'nanga wassele' koko-kokonna, nainung je'ne' bani taniparakaia ri alla' batu karanga.

¹⁴Olo'-olo'na appabattui wassele' jai dageng siagang dadi'; gandunna siagang je'ne' anggoro'na kaminang baji'.

¹⁵Umma'Na Batara a'jari kalumanynyang, mingka nangai mangngewa, nasorongbokoi Mappasalama' porea. Co'mo' ngaseng kalenna, lanri bassoro' ri kanre, mingka nabokoi ke'nanga Allata'ala Mappa'jarina.

¹⁶Manynyombai ri patung ke'nanga, nakkimburumo Batara, nai' larroNa lanri anjo kaja'dallanga.

¹⁷ Assarei ke'nanga koro'bang mae ri roh-roh ja'dalaka teai mae ri Allata'ala, mae ri rewata-rewata takontutojeng, taniassenga siagang tanipakala'biri'ka ri boe-boena riolo.

¹⁸Nabokoi ke'nanga Allata'ala Mappasalama'na ke'nanga; nakaluppai Allata'ala assarea katallassang.

¹⁹Nacini'na gau'-gau'na ana'-ana'Na larromi Batara nampa Natolla' ke'nanga.

²⁰Nakana, ‘Tena naKujampangi; ciniki mami apa lakajarianga. Nasaba' anjo bansaya kapala batui, tena sikali namajarre' pa'mai'na ke'nanga.

²¹ Patung nasombaya ke'nanga a'jari saba' naKularro siagang akkimburuA' mae ri apa naarenga ke'nanga rewata. Kupanaiki larrona ummakKu ri bansa maraenga, sollanna akkimburu mae ri tau dongo'-dongoka.

²²A'rinrai larroKu rapang pepe' ampakamutungi sikamma apa niaka mattompo' butta; a'le'lereki pepeka sa'genna sirinna langika, antunui monconga sa'genna aka'-aka'na.

²³Kupabattu bala tamammari-maria, Kupakei pana-panana balinna ke'nanga.

²⁴Lamatei ke'nanga lanri rammusu' na kacipurang, nialle ri kamateang lanri garring appakamalla'. Battui a'bakka olo'-olo' sekkeka, ulara' a'racunga ampakkunrarengi ke'nanga.

²⁵Bundu' angngeranga kamateang niaki ri sikamma oloanga, manna ammantanga ri balla' nabattui todong malla'. Turungkana bansaya lamatei, ana' lolo na tau toa dudu tena passangalinna.

²⁶ErokKa' ampa'lanynya' taba sikali ke'nanga, sollanna taniu'rangiamo ke'nanga.

²⁷Mingka takkulleai tinggi pa'mai' musunna Israel, rapang nibetai bansaKu lanri ke'nanga,’ nasaba' iNakke bawang, iNakke bawang, anggaukangi anjo sikammaya.

²⁸Israel bansa tena pikkiranna; tena kacara'dekanna ke'nanga.

²⁹Apa saba' nanibeta ke'nanga, tena napahangi; tanapahangngai apa anjo kajarianga.

³⁰Kemae lakkulle sitau langngondang tau sisa'bu, siagang rua tau langngondang sampulo sa'bu tau? Batara, Allata'alana ke'nanga, le'ba' ambalukangi ke'nanga, nibokoimi ke'nanga ri Allata'ala malompoa.

³¹Naassengi musunna Israel angkanaya lammai pajagana ke'nanga, tena nasangkamma Allata'alana Israel hebaka.

³²Kamma Sodom siagang Gomora ja'dala'na musunna Israel, rapang poko' anggoro' pai' na'racunga rapponna.

³³Je'ne' anggoro'na ke'nanga iami racunna ularaka.

³⁴Nau'rangi Batara panggaukanna musunna ke'nanga, laNahukkungi ke'nanga punna narapi' wattunna.

³⁵ LaNabalasaki siagang laNahukkungi ke'nanga, latu'guruki ke'nanga; a'reppese'mi kapanrakanna ke'nanga.

³⁶ LaNapasalamaki Batara bansaNa na Nakamaseang sikamma atanNa, punna tenamo pakkullena nacini' ke'nanga, nala'busu'mo kitta' magassinna.

³⁷Lakkuta'nangi Batara mae ri umma'Na, ‘Kemae rewata-rewata assarea pa'la'langngang?’

³⁸Nusarea angnganre koro'bang jaia jannana, angnginunga jai je'ne' anggoro'. Lappassammi natulungko ke'nanga; suromi ke'nanga battu untu' ampasalamakko ri kamma-kammaya anne.

³⁹Ciniki, iNakke Allata'ala Tenaya Ruanna, pantaranganna iNakke tena maraeng. INakke ammuno siagang iNakke appakatallasa', allokoki siagang appamolle. PungKu angngalle tindakang, tena manna sitau akkulle angngewa.

⁴⁰INakke tojeng-tojemmi Mattallasaka, iNakke Allata'ala, Kuangkaki limangKu naKuassumpa:

⁴¹Punna le'ba' Kukantisi' pa'dangKu sa'genna accilla', laKupajappai kaadelanga. La'balasakKa' mae ri sikontu musua; Kuhukkungi tau birisika ri Nakke.

⁴²PanaKu rassi cera'na ke'nanga, cera' tunitahang siagang tau loko'. Nabunoi pa'dangKu sikamma tau angngewaya, musu la'bua uu'na tena nalaKulappassang.

⁴³ Makkio' rannuko lanri umma'Na Batara, e, sikamma bansaya, nasaba' Nahukkungi sikontu tau ambunoai ke'nanga. A'balasaki mae ri musunNa mingka Napammopporangi dosana bansaNa.”

⁴⁴Napabattui Musa siagang Yosua ana'na Nun anjo kelonga, sa'genna akkulle sikontu bansa allangngereki.

⁴⁵Le'ba'na napabattu ajarang-ajaranNa Batara mae ri bansa Israel,

⁴⁶nakanamo Musa, “Katutui sollannu mannuruki ri sikontu parenta kupassareanga mae ri kau anne alloa. Pangngajarrangi mae ri ana'-ana'nu, sollanna akkulle mannuruki ke'nanga ri sikontu hukkunNa Batara siagang pa'mai' tamamminra.

⁴⁷Anne pangngajaranga teai bicara kosong, passangalinna untu' katallassannu. Turuki anjo sikontua parenta, sollanna la'bu umuru'nu ri pa'rasangang tenayamo nasallo nanupantamakki ri ba'leanna Binanga Yordan.”

⁴⁸ Anjo memang alloa Nakana Batara mae ri Musa,

⁴⁹“A'lampako mange ri Moncong Abarim ri pa'rasangang Moab ri ba'leanna kota Yerikho. Nampa naikko ri Moncong Nebo siagang cinikimi butta Kanaan tenayamo nasallo naKupassareang mae ri bansa Israel.

⁵⁰Lamateko irate anjoreng ri monconga, sangkamma sari'battannu matei ri Moncong Hor.

⁵¹Ikau sipa'rua tena namajarre' pa'mai'nu mae ri Nakke siagang tena nupakala'birikKa' ri dallekanna bansa Israel ri wattunnu nia' ri timbuseng je'ne' Meriba, ri ampi'na kota Kades, ri parang lompo Zin.

⁵²Lanri kammana anjo takkulleako antama' ri pa'rasangang Kupassareanga mae ri bansa Israel; akkullejako bawang ancini' battu bellai.”