Read Makassar Version – KITTA' MATANGKASA PAOLE 33 Bible Online

PAOLE 33 - Makassar Version – KITTA' MATANGKASA bible

PAOLE 33

¹Lalang tenanapa namate, Musa, tunisuroNa Allata'ala, nabarakkaki bansa Israel siagang kana-kana kamma anne:

²“Niaki Batara battu ri Moncong Sinai; ammumba ri tompo'na Edom rapang allo. Battu ri Moncong Parangi ammumba untu' ansingari bansaNa. Nirurungang ri sampulo sa'bu malaeka'; a'rinra pepeka ri sa'ri kananNa kamma kila'.

³Nakarimangngi Batara bansaNa, Nala'langngi taunNa. Umba kisu'ju' ri dallekang bangkenNa siagang mannuruki ri parenta-parentaNa.

⁴Nituruki hukkung napassareanga Musa, barang kaminang tinggia anggaranna ri bansaya anne.

⁵Ri wattu asse'rena Israel siagang pamimpinna, Batara a'jari Karaeng mae ri umma'Na.”

⁶Ri sesena suku Ruben, nakana Musa, “Dasi-dasi tenanniakka napanra' suku Ruben, manna nasike'de'ja taunna.”

⁷Ri sesena suku Yehuda nakana: “O, Batara, Kipilangngeri ke'nanga punna makkio', sollanna asse're ke'nanga siagang suku maraenga. Kibantui ke'nanga barjuang angngewai musunna ri parang pa'bundukanga.”

⁸ Ri sesena suku Lewi nakana: “Lanri Urim siagang Tumim na'nyata erotTa, tete ri tu Lewi, ata tamamminraTa. Kiso'ri ke'nanga ri Masa, a'gea' siagang ke'nanga ri bungung Meriba.

⁹Tamamminrayai ri Katte la'biangngang namaraengannaya, la'biangngang na tau toa siagang bija pammanakanna. Naturuki ke'nanga parenta-parentaTa, narupai ke'nanga parjanjianTa.

¹⁰Naajaraki ummatTa anturuki hukkunTa, siagang assare koro'bang irate ri tampa' pakkoro'bangnganTa.

¹¹O Batara, Kitulungi anne sukua sollanna kassa', sollanTa sannang mae ri apa nagaukanga ke'nanga. Ancuruki sikontu musunna ke'nanga; panraki sa'genna satunggu-tungguna.”

¹²Ri sesena suku Benyamin nakana: “Iaminne suku Nakarimangngia Batara. Nala'langngi allo bangngi; ammantangi Batara ri tangnga-tangngana ke'nanga.”

¹³Ri sesena suku Yusuf nakana: “Dasi-dasi nanibarakkaki buttana ke'nanga ri Batara ri je'ne' battu rawa ri butta siagang bosi.

¹⁴Dasi-dasi nakala'biang ri rappo-rappoang punna narapi' wattunna, rappo kaminang bajika, ti'noka ri poko'-poko'na.

¹⁵Dasi-dasi naanjo bulu'-bulu'na battu ri jammang riolo rassi rappo-rappoang kaminang bajika.

¹⁶Dasi-dasi na'bicara Batara battu ri rompo' a'rinraya, Nabarakkaki buttana sa'genna kala'biang. Anne barakkaka untu' Yusuf siagang jari-jarina, Yusuf ammimping ri sikamma sari'battanna.

¹⁷Rapangi sapi romanga kassa'na Yusuf, assa'bu tu Manasye siagang Efraim a'jari tanru'na. Naulaki bansa-bansaya naondang ke'nanga sa'genna cappa'na linoa.”

¹⁸Ri sesena suku Zebulon siagang Isakhar nakana: “Dasi-dasi nakkalumanynyang Zebulon lanri a'danggang ri tamparang, nakatambang kalumanynyanna Isakhar ri bori' paranglakkenna.

¹⁹Nabirittai bansa maraenga nai' ri monconna ke'nanga; koro'bang sitojennaya napassareang ke'nanga anjoreng. Battu ri tamparangi anggappa pa'barang-barangngang ke'nanga, battu ri tambunna kassika nagappa ke'nanga.”

²⁰Ri sesena suku Gad nakana: “Nipujimi Allata'ala le'baka assarei Gad butta luaraka untu' napammantangngi. Attayangi Gad rapang sikayu singa eroka angkakkaraki salanggaya siagang ulua.

²¹Naallei butta kaminang bajika untu' nakammai, bageanna pimpinanga nipassareang mae ri ke'nanga. Naturuki hukkunNa Batara, kammayatompa sikontu parentaNa, ri wattunna sirapakkang sikontu pamimpinna Israel.”

²²Ri sesena suku Dan nakana: “Rapang sikayu singa rungka, iaminjo suku Dan. a'lumpa' assulu' battu ri Basan.”

²³Ri sesena suku Naftali nakana: “Naftali nipilumpai barakka' pangngamaseang ri Batara; daerana battu ri Tamparang Galilea sa'genna timboro'.”

²⁴Ri sesena suku Asyer nakana: “Battu ri sikontu suku Israel suku Asyer kaminang nibarakkaki. Iami nisayang ri sikamma sari'battanna attimboi poko' zaitunga ri buttana.

²⁵Nila'langngi pakke'bu' lompo tambaga siagang bassi kota-kotana sollanna tuli salewangang tojeng-tojeng lalang tallasa'na.”

²⁶“E, Israel, parallui nuasseng angkanaya, la'biangngangi Allata'ala kala sikontu rewataya. Nalaloi langika lalang kala'biranNa natarrusuki rammanga untu' antulung ngasengko.

²⁷Allata'ala latuli angngalleiko; limanNa mannannunganga a'jari pattumpa'nu. Nabongkai musua battu ri dallekannu, Nasuroko angngancuruki sikontu balia.

²⁸Jari-jarina Yakub laamangi tallasa'na, salewangang ri pa'rasangang ga'gaya alla'bi gandunga siagang je'ne' anggoroka allung battu ri langi' ambasai buttaya.

²⁹E, Israel, tamaka lompona upa'nu, tena bansa maraeng nipasalama' sangkamma ikau. Batara rapang sele'nu siagang pa'dannu, Naalleangangko siagang Nasareko pammetang. Labattui musunnu appala' a'mase-mase, nalanuonjo'-onjokang ke'nanga.”