Read Makassar Version – KITTA' MATANGKASA PAOLE 4 Bible Online

PAOLE 4 - Makassar Version – KITTA' MATANGKASA bible

PAOLE 4

¹Nampa nakana Musa mae ri anjo bansaya, “Turuki sikontu hukkung kupangngajarranga mae ri kau ngaseng, sollannu attallasa' sa'genna nupammantangngi anjo butta laNapassareanga Batara, Allata'alana boe-boenu, mae ri kau.

² Anjo apa kuparentakanga, teako tambai yareka teako kurangngi manna sike'de'. Turuki sikamma parentaNa Karaeng Allata'alanu kupassareanga mae ri kau.

³ Kalennu anciniki apa Nagaukanga Karaeng Allata'alanu ri Moncong Peor. Sikamma tau anynyombaya ri Baal anjoreng ri tampaka Naancuruki,

⁴nampa ikau tuli majarreka tappa'na mae ri Karaeng Allata'alanu attallasa' ijako sa'genna kamma-kamma anne.

⁵Sikontu anjo hukkunga kupangngajarrangi mae ri kau situru' Naparentakanga Karaeng Allata'alaku. Turuki ngasengi sikammaya anjo ri pa'rasangang lanupantamakkia siagang lanupammantangngia.

⁶Majarrekko anggaukangi anjo kammaya. Punna nugaukang anjo kammaya, a'nyatami kacara'dekannu mae ri bansa-bansa maraenga. Punna nalangngereki ke'nanga ri passala'na anjo sikamma hukkunga, lanakana ke'nanga, ‘Teai sipato' cara'de'na siagang taranna ota'na anjo bansa lompoa!’

⁷Bansa lompo kereanga nia' allata'alana a'reppese' kammaya punna niparalluangi sangkamma a'reppese'na Karaeng Allata'alata? Kere-kere wattu nikkio' mae ri Ia musti appiali.

⁸Bansa lompo kereanga nia' hukkung-hukkung adele' kammaya, sangkamma hukkung-hukkung kupangngajarranga mae ri kau ngaseng anne alloa?

⁹Parhatikangi siagang u'rangi baji'-baji', sollanna tena nanukaluppai apa le'baka nucini' kalennu lalang tallasa'nu. Caritai mae ri ana' cucunnu

¹⁰ri passala'na anjo alloa, ri wattu ammentennu ri dallekanNa Karaeng Allata'alanu ri Moncong Sinai. Anjo wattua Nakana Batara ri nakke, ‘Passe'rei anjo bansaya, sollanna appilajara' ke'nanga mannuruki mae ri Nakke lalang sikontu tallasa'na, kammayatompa sollanna naajara' ana'-ana'na ke'nanga mannuruki mae ri Nakke.’

¹¹ Caritai mae ri ana'-ana'nu antekamma batenu battu siagang ammenteng ri bangkenna anjo moncong nitongkoka ri umbu sassanga rapang rammang kapalaka siagang a'rinraya pepe'na sa'genna nai' ri langika.

¹²Nampa a'bicara Batara mae ri kau lalang ri pepeka; nulangngereki sa'ranNa mingka tena sikali nanuciniki.

¹³ Anjoreng Napaumi mae ri kau apa mustia nugaukang untu' anrupai parjanjiang Napareka siagang ikau ngaseng. Anjo Sampuloa Parenta le'baka Natulisi' ri ruaya batu tulisi' musti nugaukangi.

¹⁴ Nasuroa' Batara ampangngajarrangi mae ri kau sikontu hukkung mustia nuturuki ri pa'rasangang nupantamakkia siagang nupammantangngia sallang.”

¹⁵“U'rangi baji'-baji'! Ri wattunna a'bicara Batara mae ri kau lalang pepe' ri Moncong Sinai, tena apa-apa nucini'.

¹⁶ Jari katutui sollanna tena nanudoraka lanri nupapparekanna kalennu patung untu' nusomba, baji' bura'ne yareka baine,

¹⁷ jangang-jangang yareka juku'-jukukang, olo'-olo' akkaloloka yareka olo'-olo' maraengannaya.

¹⁸

¹⁹Teako dorakai lanri anynyombanu yareka nupa'matu-matuna kalennu mae ri apa niaka nucini' ri langika, kammaya: mataallo, bulang siagang bintoenga. Bansa maraenga Nabalang parekangi Karaeng Allata'alanu ansombai anjo barang-barang kammaya.

²⁰ Mingka ikaumi bansa Napasalamaka battu ri butta Mesir, tampa'nu sessa dudu riolo. Naerangko assulu' battu ri anjo pa'rasanganga, sollannu a'jari bansa KalenNa sangkamma kaadaannu kamma-kamma anne.

²¹ Mingka a'jari larromi Karaeng Allata'alanu mae ri nakke passabakkang ikau ngaseng, siagang assumpami angkanaya tena nalakulimbang Binanga Yordan untu' antama' ri butta coppong le'baka Napassareang mae ri kau.

²²Tasalloami nula'limbang siagang nupammantangngi anjo butta copponga; mingka inakke tena kumminawang, nasaba' lamatea' anrinni.

²³U'rangi baji'-baji'! Teako takkaluppai ri parjanjiang Napareka Karaeng Allata'alanu siagang ikau ngaseng! Turuki parentaNa; tea' laloko appareki patung manna pole antekammaya tanja'na untu' nusomba,

²⁴ nasaba' Karaeng Allata'alanu rapangi pepe' appakamutunga. Taerokai nipasangkamma siagang apa-apa maraenganga.

²⁵Kammayatompa punna sallo mako ammantang ri anjo pa'rasanganga siagang ammana'-mana' mako anjoreng, teako dorakai lanri appare'nu patung untu' kalennu, manna pole antekammaya tanja'na.

²⁶Tapporo langika siagang linoa a'jari sa'bi anne alloa angkanaya punna tena numannuruki mae ri nakke, tasalloami nu'lanynya' battu ri butta nupammantangngia ri ba'leanna anjo Binanga Yordan. Tasalloako lammantang anjoreng, lanri laniancuru' taba sikaliko.

²⁷ LaNapasisa'la'-sa'lakko Batara ri alla'na bansa-bansa maraenga siagang sike'de' mami ri kau lammantanga attallasa'.

²⁸Anjorengko lanynyomba mae ri rewata-rewata bate pare' limanna rupa taua, iamintu rewata-rewata nipareka battu ri kayu siagang batu, tenaya nakkulle accini' siagang tenaya nakkulle allangngere', tenaya nakkulle angnganre yareka angngara'.

²⁹ Nampa lanuboya Karaeng Allata'alanu; siagang punna attojeng-tojengko ri pa'mai'nu amboyai, lanugappai.

³⁰Punna nitujuko ri yangasenna anjo balaya siagang punna niakko lalang ri kasukkaranga, lammoterekko mae ri Karaeng Allata'alanu siagang mannuruki ri Ia.

³¹Anjo Karaeng Allata'alanu, Iami Allata'ala sannaka lompona pangngamaseanNa. Tena nalaNabokoiko yareka tena nalaNapanrakiko, yareka tena nalaNakaluppai parjanjiang Napareka KalenNa siagang boe-boenu.

³²Salidikimi rewasa' le'ba' allaloa, bella ri tenanapa nanulassu', appakkaramula ri allo Napa'jarina Allata'ala rupataua ri linoa anne. Boyami ri sikontu linoa. Le'bakika kajariang apa kammaya anjo heba'na rioloangannaya? Le'bakika nia' tau allangngereki kajariang kammaya anjo?

³³Le'bakika nia' bansa akkulle iji attallasa' baku' le'ba'na nalangngere' angkanaya nia' allata'ala a'bicara mae ri ke'nanga battu lalang ri pepeka, sangkamma le'baka nukasia'?

³⁴Le'bakika nia' rewata barani angngalle se'reang bansa battu ri bansa-bansaya nampa napa'jari ke'nanga umma' kalenna, sangkamma Nagaukanga Karaeng Allata'alanu untu' ikau ri Mesir? Kalennu anciniki antekamma bateNa Allata'ala appabattu kagassingang lompo, angngeranga bala siagang pa'bundukang, anggaukangai gau'-gau' appakalannasaka siagang apa-apa hebaka.

³⁵ Yangasenna anjo sikammaya Napappicinikangi Batara mae ri kau ngaseng untu' ampa'butti angkanaya Iaji bawang Batara Allata'ala, tena pantaranganna maraengang.

³⁶Battu rate ri langika Napappilangngerang sa'ranNa mae ri kau untu' angngajarakko; ri anne linoa Napappicinikammi mae ri kau pepe' malompoNa, siagang battu lalangi ri anjo pepeka a'bicara mae ri kau.

³⁷Lanri Nakamaseangi boe-boenu, na Napile mako; lanri koasa malompoNa na Naerang mako assulu' battu ri Mesir.

³⁸Bansa-bansa la'bi lompoanganga siagang la'bi kassakanganga Nabongkai battu ri dallekannu, sollanna Naantarakko mange ri pa'rasanganna ke'nanga Napassareanga mae ri kau, pa'rasangang nupatanga kamma-kamma anne.

³⁹Lanri kammana anjo angngu'rangi mako anne alloa siagang teako takkaluppai: Bataraji bawang Allata'ala ri langika siagang ri linoa, tena ruanna siagang tena maraenganna.

⁴⁰Turuki sikontu hukkung kupassareanga mae ri kau anne alloa, nampa ikau siagang jari-jarinu lasalewangangko siagang latuli attallasa' mako ri pa'rasangang Napassareanga Karaeng Allata'alanu a'jari pisakanu sa'genna satunggu-tungguna.”

⁴¹ Nampa najo'jo' Musa tallu kota irayanganna Binanga Yordan

⁴²a'jari kota palariang, iamintu tampa'na taua ampasalamaki kalenna punna tena nakunjungi nanabuno paranna tau siagang teai musunna. Akkullei lari mange ri kalase'renna anjo kotaya sollanna tena nanibuno tongi.

⁴³Untu' suku Ruben napasadiai kota Bezer ri lappara' tinggina parang lompoa; untu' suku Gad napasadiai kota Ramot ri daera Gilead, siagang untu' suku Manasye napasadiai kota Golan ri daera Basan.

⁴⁴Nampa napassareang Musa hukkung-hukkunNa siagang paratorang-paratoranNa Allata'ala mae ri bansa Israel.

⁴⁵Anjo kammaya nagaukangi ri assulu'namo ke'nanga battu ri butta Mesir siagang ri nia'na ke'nanga ri ka'bung rayanganna Binanga Yordan, assidallekang siagang kota Bet-Peor. Anjo daeraya le'ba' daerana Sihon, karaenna tu Amori, le'baka ammarenta riolo ri kota Hesybon. Nibetai ri Musa siagang bansa Israel ri wattunna assulu' ke'nanga battu ri butta Mesir.

⁴⁶

⁴⁷Naempoimi ke'nanga anjo buttana Karaeng Sihon, kammayatompa buttana Karaeng Og battu ri Basan, karaeng maraenna tu Amori, ammantanga ri rayanganna Binanga Yordan.

⁴⁸Anjo buttaya tampa'na iamintu battu ri kota Aroër ri birinna Binanga Arnon, tulusu' wara' sa'genna Moncong Hermon,

⁴⁹siagang sikontu daera irayanganna Binanga Yordan timboro' sa'genna Tamparang Matea ri bangkenna Moncong Pisga.