Read Makassar Version – KITTA' MATANGKASA PAOLE 6 Bible Online

PAOLE 6 - Makassar Version – KITTA' MATANGKASA bible

PAOLE 6

¹“Nasuroa' Karaeng Allata'alanu ampangngajarrangi sikontu anne hukkunga mae ri kau ngaseng, sollanna nugaukangi sallang ri pa'rasangang tenayamo nasallo nanupammantangngi.

²Paralluko ikau siagang jari-jarinu ampakala'biriki karaeng Allata'alanu lalang sikontu tallasa'nu siagang nuturuki sikontu hukkung kupabattua mae ri kau, sollanna la'bu umuru'nu ri anjo pa'rasanganga. Lanri kammana anjo, pilangngeri

³sikamma sari'battangku ngaseng; gaukangi anjo kammaya siagang pa'mai' tamamminranu, sollannu salewangang siagang a'jari bansa lompo ri pa'rasangang kalumanynyanga siagang copponga buttana, sangkamma Napa'janjianga Karaeng Allata'alana boe-boeta.

⁴ U'rangi sikamma sari'battangku! Bataraji bawang, siagang Bataraji bawang Allata'alata!

⁵ Kamaseangi Karaeng Allata'alanu siagang sikontu pa'mai'nu: Pappicinikangi kammaya anjo lalang ampe-ampe tallasa'nu siagang lalang ri panggaukannu.

⁶ Tea' laloko kaluppai parenta-parenta kupassareanga mae ri kau anne alloa.

⁷Pangngajarrangi mae ri ana'-ana'nu. Parallui nucaritakang ilalang ri balla'nu siagang ri pantarang balla'nu, wattunnu ammari-mari siagang ri wattunnu anjama.

⁸Pasikkoki anjo mae ri limannu siagang patabai mae ri abannu sollanna tuli nuu'rangi.

⁹Tulisiki ri pakke'bu' balla'nu siagang ri pakke'bu' lomponu.”

¹⁰ “A'janji Karaeng Allata'alanu mae ri boe-boenu iamintu Abraham, Ishak siagang Yakub angkanaya laNapassareangi anjo pa'rasanganga mae ri kau. Kota-kotana lompoi siagang coppongi, nampa teai ikau ambangungi.

¹¹Rassi ngasengi balla'na siagang barang-barang baji', nampa teai ikau ambonei anjo ballaka. Nia' lanugappa siapa jaina bungung, nampa teai ikau angkekei. Langgappako koko-koko anggoro' siagang koko zaitun, nampa teai ikau allamungi. Punna Naerangko Batara mange ri anjo pa'rasanganga, nampa nia' ngaseng kanre-kanreang nukaerokia untu' nukanre,

¹²katutui baji'-baji' sollanna tena nutakkaluppa mae ri Batara, le'baka allappassangko battu ri Mesir, tampa' le'baka nupammantangngi nipare' ata.

¹³ Pakala'biriki Batara, Allata'alanu, siagang Ia bawang nusomba; siagang punna assumpako, gaukammi anjo lanri arenNa bawang.

¹⁴Teako anynyombai ri rewata-rewata maraenga, ia nasombaya bansa-bansa niaka ammantang ri tammulilinu.

¹⁵Punna anynyombako mae ri rewata-rewata maraenga, lanitujuko ri pangngalarroiNa Karaeng Allata'alanu siagang lanipanrakiko taba sikali, lanri anjo Karaeng Allata'alanu niaka ri tangnga-tangnganu taerokai nipasangkamma siagang apa-apa maraenganga.

¹⁶ Teako paccoba-cobai Karaeng Allata'alanu sangkamma nugaukanga ri Masa.

¹⁷Turuki sikontu hukkung Napassareanga Karaeng Allata'alanu mae ri kau.

¹⁸Gaukangi apa Nakanaya baji' siagang adele' Batara, na nusalewangang. Butta coppong Napa'janjianga Batara mae ri boe-boenu, lanupatangi,

¹⁹siagang lanubongkai musu-musunnu sangkamma Napa'janjianga Batara.

²⁰Ri allo ri boko lakkuta'nangi ana'-ana'nu mae ri kau angkana, ‘Angngapai Karaeng Allata'alata naNasuroki' anturuki sikontu anjo parentaya?’

²¹Musti appialiko angkana, ‘Riolo nipa'jari ataki' ri karaeng Mesir, mingka Nalappassangki' Batara siagang kakoasang lompoNa.

²²Kalenna ikambe anciniki sikamma gau' appakalannasa' Nagaukanga Batara siagang sikamma apa-apa appakamalla' Nagaukanga mae ri tu Mesir siagang ri karaenna ke'nanga, kammayatompa sikontu pagawena.

²³Ia allappassangki' battu ri Mesir sollanna Naerangki' mae anrinni, nampa Napassareang anne buttaya mae ri katte sangkamma Napa'janjianga mae ri boe-boeta.

²⁴Nasuroki' Karaeng Allata'alata anturuki siagang anggaukangi sikontu anjo parentaya kammayatompa mappakala'biri' mae ri Ia. Punna nigaukangi kammaya anjo, latuli Naparakai bansata sollanta tuli salewangang lalang tallasatta.

²⁵Punna tamamminraya nyawata anturuki sikontu apa Naparentakanga Karaeng Allata'alata mae ri katte, lamangngellai mae ri katte.’ ”