Read Makassar Version – KITTA' MATANGKASA PAOLE 7 Bible Online

PAOLE 7 - Makassar Version – KITTA' MATANGKASA bible

PAOLE 7

¹ “LaNaerangko Karaeng Allata'alanu mange ri pa'rasangang lanupammantangngia, siagang jai bansa laNabongka battu anjoreng. LaNabongkai tujua bansa la'bi lompo siagang la'bi kassakkangngang na ikau ri dallekang matannu, iamintu: Tu Het, Girgasi, Amori, Kanaan, Feris, Hewi siagang Yebus.

²Punna Napassareang Karaeng Allata'alanu anjo bansa-bansaya antama ri kakoasannu siagang nubeta ke'nanga, buno ngasengi anjo ke'nanga. Teako kamaseangi ke'nanga siagang teako appareki parjanjiang siagang ke'nanga.

³Takkulleako a'bunting siagang ke'nanga, siagang teako pa'biangngi ana'-ana'nu a'bunting siagang ke'nanga,

⁴sollanna tena nanipakabella ana'-ana'nu ri ke'nanga battu ri Batara, untu' anynyomba ri rewata-rewata maraenga. Punna anynyombako mae ri rewata-rewata maraenga, larroi Batara siagang laNaancuru' memangko silalonna.

⁵ Lanri kammana anjo, rumbangi tampa'-tampa' pakkoro'bangnganna anjo bansa-bansaya, ancuru' ngasengi benteng-benteng batu nakanaya ke'nanga karamaki, ra'bai gamba'-gambara'na barhala Asyera, siagang tunui sikamma patung-patung barhala nasombaya ke'nanga.

⁶ Gaukangi anjo kammaya lanri ikau Karaeng Allata'alanu ampatangko. Battu ri sikontu bansaya ri anne linoa, ikaumi Napile Karaeng Allata'alanu untu' a'jari umma'Na kaminang Nangaia.

⁷Nakamaseangko siagang Napileko Batara, teai lanri la'bi lompoangangko na bansa-bansa maraenga; sikontu tojenna ikau bansa kaminang ca'di ri sikontu linoa.

⁸Mingka Napileko Batara lanri Nakamaseangko siagang eroki Narupai janji Napareka siagang boe-boenu. Iaminjo saba'na nale'ba' mako Napasalama' siagang kakoasang lompoNa siagang Nalappassangko battu ri nipare' atanu battu ri karaeng Mesir.

⁹ U'rangi angkanaya Karaeng Allata'alanu bawang Allata'ala, tena pantaranganna, siagang Iami Allata'ala tamamminraya nyawaNa. Narupai Batara janjinNa siagang Napappicinikangi pangngamaseanNa tenaya tappu'na sa'genna sisa'bu turungang mae ri tau mangngamaseanga ri Ia siagang mannurukia ri parenta-parentaNa.

¹⁰Mingka tena todong Nabata-bata anghukkungi tau birisika ri Ia.

¹¹Jari, turuki sikontu hukkunNa kupabattua mae ri kau anne alloa.”

¹² “Punna nuparhatikang anjo parenta-parentaya, siagang nugaukang tamattappu', tena todong namamminra pa'mai'Na Karaeng Allata'alanu mae ri parjanjiang Napareka siagang ikau ngaseng. LaNapappicinikangi pangngamaseang tamattappu'Na mae ri kau, sangkamma Napa'janjianga mae ri boe-boenu.

¹³LaNakamaseangko siagang laNabarakkakiko, sa'genna a'jari jai ana'nu na pila' katambang jainu. LaNabarakkaki sikamma kokonnu, sa'genna angngerang wassele' gandung, anggoro' siagang minynya' zaitun. LaNabarakkakiko sa'genna a'jari jai sapinu, bembenu siagang gimbala'nu. Sikontu anjo barakkaka lanutarimai ri pa'rasangang Napassareanga Batara mae ri kau, situru' janjinNa mae ri boe-boenu.

¹⁴Battu ri sikontu bansaya ri lino, tena manna se're anggappa barakka' alla'bi-la'bi kammaya ikau ngaseng. Ikau ngaseng siagang sikontu olo'-olo'nu tena sikali latamanang.

¹⁵LaNala'langiko Batara battu ri sikontu garringa siagang Napakabellako battu ri sikontu bala sangkamma le'baka nucini' ri Mesir, ba'lalo anjo balaya musu-musunnu Napitujui.

¹⁶Sikamma bansa Napassareanga Karaeng Allata'alanu ri kakoasannu musti nuancuruki; teako kamaseangngi ke'nanga. Teako anynyombai ri rewata-rewatana ke'nanga, lanri anjo panggaukang kammaya napangngerangangko bala.

¹⁷Gassing nupikkiriki angkanaya la'bi jaiangngangi anjo bansa-bansaya sa'genna tanukulleai ambongkai ke'nanga.

¹⁸Mingka teako mallakki mae ri ke'nanga; u'rangi apa le'baka Nagaukang Karaeng Allata'alanu mae ri karaeng Mesir siagang sikontu ra'ya'na.

¹⁹U'rangi sikamma bala lompo nucinika kalennu, gau'-gau' appakalannasa', siagang kakoasang lompo Napakea Karaeng Allata'alanu untu' allappassangko. Kamma tomminjo laNagaukanga Karaeng Allata'alanu mae ri sikontu bansa nukamallakkanga.

²⁰Ba'lalo lappa'niaki Karaeng Allata'alanu karicuang ri tangnga-tangngana ke'nanga, sa'genna manna tau laria siagang accokkoa lapanra' ngaseng tonji.

²¹Jari teako mallakki mae ri anjo bansa-bansaya. Karaeng Allata'alanu lanjagaiko. Iami Allata'ala malompo siagang sannaka heba'na.

²²Anjo bansa-bansaya laNabongka tassike'de'-ke'deki battu ri dallekannu. Takkulleai linta' dudu nuancuru' ke'nanga, sollanna tena napila' katambang olo'-olo' sekkeka akkullea ambahayakangko.

²³Kammaminjo bateNa Karaeng Allata'alanu lampassareangi musu-musunnu mae ri kau. LaNapasimbung-simbungi ke'nanga sa'genna ancuru' ke'nanga.

²⁴LaNapassareangi sikamma karaenna ke'nanga mae ri kau. Lanubunoi ke'nanga, nampa nikaluppaimo arenna ke'nanga. Tena manna sitau akkulle attahang andallekangko; anjo ke'nanga lanuancuru' ngasengi.

²⁵Tunui sikamma patung-patung barhala nasombaya ke'nanga. Teako cinnai ri pera' yareka bulaeng niaka ri kalenna siagang teako allei untu' kalennu. Punna nudakkai anjo parentaya tena tamatenu, nasaba' Nakabirisi Karaeng Allata'alanu anynyombaya ri patung barhalaya.

²⁶Teako ammoliki patung barhala lalang balla'nu, sollanna anjo pattunra antujuai tena natuju tongko. Anjo apa kammaya musti numusui siagang musti nupakatunai, lanri nitunrai ri Batara.”