Read Makassar Version – KITTA' MATANGKASA PAOLE 8 Bible Online

PAOLE 8 - Makassar Version – KITTA' MATANGKASA bible

PAOLE 8

¹“Sikontu hukkung kupassareanga mae ri kau anne alloa musti nugaukangi tamattappu', sollannu tuli attallasa', nupila' jai siagang nupammantangngi butta Napa'janjianga Batara mae ri boe-boenu.

²U'rangi! Patampulo taungko Napimping Karaeng Allata'alanu lalang pa'jappang bella ammalo ri parang lompoa. Erokko Naso'ri Batara ilalang ri anjo pa'jappanga, sollanna akkulle Nacini' apa niaka lalang ri atinnu, siagang apaka lanuturukiji parenta-parentaNa yareka tena.

³ Nalappassangko cipuru', nampa Nasareko manna untu' nukanre. Ikau siagang boe-boenu tale'bakako angnganre kanre kammaya anjo rioloangnganna. NaNagaukang Batara anjo kammaya lanri erokko Naajara' angkanaya anjo rupataua tena naporo kanreji bawang nakkulle attallasa', passangalinna battu ri sikontu apa Nakananga Batara.

⁴Lalanna anne patampulo taunga tena na'jari toa pakeannu siagang tena nakkambang bangkennu.

⁵U'rangi, angkanaya Karaeng Allata'alanu angngajarakko rapang se're mangge angngajaraki ana'-ana'na.

⁶Jari, gaukangi sikontu apa Naparentakanga Karaeng Allata'alanu. Attallasa' mako situru' hukkung-hukkunNa siagang mappakala'biri' mako mae ri Ia.

⁷Karaeng Allata'alanu angngerangko mange ri pa'rasangang copponga buttana; pa'rasangang jaia binangana siagang timbuseng je'ne'na, niaka je'ne' a'lo'loro' rawanganna buttana, assolonga mae ri sikamma ka'bunga siagang buluka.

⁸Anjo pa'rasanganga angngerangi wassele' sangka' rupanna, kammayami gandung, anggoro', rappo ara, rappo delima, poko' zaitun siagang bani.

⁹Tena nulanaalle cipuru' siagang tena nulakakurangang anjoreng. Batu karanna akkimbolongi bassi, siagang akkulleko angngeke tambaga battu ri bulu'-bulu'na.

¹⁰Langnganreko sa'genna sukku' pa'mai'nu siagang sukkuru' mae ri Karaeng Allata'alanu lanri anjo butta coppong Napassareanga mae ri kau.”

¹¹ “Katutui baji'-baji', sollanna tena nutakkaluppa mae ri Karaeng Allata'alanu; teako bawang-bawangngangi manna pole se'reja battu ri sikontu hukkunNa kupassareanga mae ri kau anne alloa.

¹²Punna angnganre mako sa'genna sukku' pa'mai'nu siagang punna le'ba' mako ambangung balla' baji' untu' pammantangngannu,

¹³siagang punna pila' katambammo jaina sapinnu, bembenu siagang gimbala'nu, pera'nu siagang bulaennu kammayatompa sikontu pa'barang-barangngannu maraenganga,

¹⁴katutui baji'-baji' sollanna tena nu'jari tampo siagang takkaluppa ri Karaeng Allata'alanu, le'baka allappassangko battu ri Mesir, le'baka nupammantangngi nipare' ata.

¹⁵Napimpingko Batara ammalo ri parang lompoa siagang hebaka, jaia ulara' a'racung siagang olo'-olo' akkullea ammuno. Ri butta kalotoroka tenaya je'ne'na Napassolongi je'neka battu lalang ri batua, sollannu akkulle angnginung sa'gennu bassoro'.

¹⁶Ri parang lompoa Nasareko manna untu' a'jari kanrenu, iamintu kanre tenaya naassengi boe-boenu. Nagaukangai Batara kammaya anjo lanri ero'nu naso'ri siagang nakellaina tuna pa'mai'nu, sollanna akkulle a'gau' baji' mae ri kau ri kale'bakkanna.

¹⁷Jari tea sikaliko appikkiriki angkanaya lanri usaha kalennu siagang kagassingang kalennu nukkulle a'jari kalumanynyang.

¹⁸U'rangi angkanaya sikontu tojenna Karaeng Allata'alanu ansareko kakalumanynyangngang. Nagaukangi anjo kammaya lanri sa'genna anne alloa tuli tamamminrana mae ri parjanjiang Napareka siagang boe-boenu.

¹⁹Teako takkaluppai ri Karaeng Allata'alanu siagang teako ta'gilingi mae ri rewata-rewata maraenga untu' anynyomba siagang ampakalompoi ke'nanga. Anne alloa kupakaingakko angkanaya punna tena tanugaukanna tonja kammaya, ma'nassa tena todong tanipanrakkinnu ri Batara.

²⁰Punna tena numannuruki mae ri Karaeng Allata'alanu, tena taniancuru'nu todong sangkamma bansa-bansa maraenga, ia Naancuruka ri dallekanna matannu.”