Read Makassar Version – KITTA' MATANGKASA PAOLE 9 Bible Online

PAOLE 9 - Makassar Version – KITTA' MATANGKASA bible

PAOLE 9

¹“Pilangngeri sikamma sari'battangku ngaseng! Anne alloa a'limbangko untu' ampantamakki daerana bansa-bansa la'bi lompoanganga siagang la'bi kassakkangnganga naikau. Kota-kotana ke'nanga lompo-lompo ngasengi, siagang tinggi tembo' pattahanganna sanrapang tinggina langika.

²Taunna lompo ngasengi pakkaleanna; anjo ke'nanga rapangi rassasa, nampa nulangngere'mi angkanaya tena tau akkulle angngewai ke'nanga.

³Mingka kamma-kamma anne ikau kalennu lanciniki antekamma bateNa Karaeng Allata'alanu a'jappa ri dallekannu rapang pepe' appakamutunga. LaNabetai ke'nanga ri dallekang matannu, sa'gennu akkulle ambongkai ke'nanga siagang angngancuruki silalonna ke'nanga sangkamma Napa'janjianga Batara.

⁴Punna le'baki Karaeng Allata'alanu ambongkai ke'nanga untu' ikau, teako sala pahangngi angkanaya Naerangko mange anjoreng untu' ampatangi anjo buttaya lanri baji'nu siagang nugaukanna ero'Na Karaeng Allata'alanu, sa'gennu siratang antarimai anjo buttaya. Tena sikali nakamma anjo! Nabongkai Batara anjo bansa-bansaya untu' ikau lanri ja'dala'na ke'nanga. Nalappassangko Batara angngallei buttana ke'nanga, lanri ero'Na anrupai janjinNa mae ri boe-boenu iamintu Abraham, Ishak siagang Yakub.

⁶Tappa' mako angkanaya teai passabakkang siratannu antarimai anjo butta copponga na Napassareang mae ri kau. Tena! Nasaba' ikau anne bansa kapala batuko.

⁷U'rangi antekamma batenu ampakalarroi Karaeng Allata'alanu ri parang lompoa. Baku' nubokoina Mesir sa'gennu battu mae anrinni, tena numannuruki mae ri Batara.

⁸Ba'lalo le'baki nupakalarro sikali Batara ri Moncong Sinai, sa'genna eroki angngancurukko.

⁹ Angngambikka' nai' ri anjo buluka untu' annarima batu parjanjiang Napareka Batara siagang ikau. Patampulo allo siagang patampulo bangngia' ammantang irate ri anjo monconga tangnganre tangnginung.

¹⁰Nampa Nasarea' Batara rua batu le'baka Natulisi' Allata'ala KalenNa. Natulisiki ri anjo batua kana-kana Napabattua mae ri kau battu lalang ri tangnga-tangngana pepeka mae ri kau, ri wattunnu asse're ri bangkenna monconga.

¹¹Ri allalonamo patampulo allo siagang patampulo bangngi, Napassareammi Batara anjo ruaya batu parjanjiang mae ri nakke.

¹²Nampa Nakana Batara mae ri nakke, ‘Naungko linta', nasaba' anjo bansanu nueranga assulu' battu ri butta Mesir a'gau' ja'dala'mi. Ammengkami ke'nanga battu ri parenta-parentaKu, siagang appare'mi patung untu' nasomba.’

¹³Nakana pole Batara ri nakke, ‘Kuassengi angkana teai sipato' kapala batuna anjo bansaya.

¹⁴Teako coba-cobai anrompaiA'. ErokKa' angngancuruki ke'nanga sa'genna nikaluppaimo ke'nanga. Mingka ikau laKupa'jariko mangge ri se'reang bansa lompoangnganga siagang kassakangnganga naanjo ke'nanga.’

¹⁵Nampa kugilimmo kalengku, nampa naumma' battu ri anjo moncong sitabanga a'rinra-rinra, siagang kuerang tommi anjo ruaya batu parjanjiang, kuta'gala' siagang rua limangku.

¹⁶Kurapikang mako sitabang andakkai parentaNa Karaeng Allata'alanu. Doraka mako mae ri Batara lanri nupapparekanna kalennu se're patung sapi.

¹⁷Jari kupatappasa'mi anjo ruaya batu parjanjiang sa'genna ancuru' ri dallekanna ngaseng matannu.

¹⁸Nampa su'ju'ma' pole sikalipi ri dallekanNa Batara irate ri coppo'na monconga patampulo allo siagang patampulo bangngi, tamangnganre tangnginung. Nakugaukang anjo kammaya lanri doraka mako mae ri Batara nasaba' nugaukannamo apa ja'dalaka ri dallekanNa, sa'genna a'jari larro.

¹⁹ Inakke mallakka' ri larroNa Batara a'rinra-rinraya mae ri kau ngaseng sa'genna ero'mi angngancuru' ngasengko; mingka anjo wattua Napilangngeri ija' Batara.

²⁰Larro dudu tongi Batara mae ri Harun sa'genna eroki Nabuno; mingka kupappala' doangngang tongi.

²¹Anjo patung sapi nupareka, kupasambilai antama' ri pepeka. Nampa kuancuru' siagang kudengka sa'genna alusu' sangkamma limbu'bu, nampa kupasambila anjo limbu'buka antama' ri kaloro' a'lo'loroka battu ri anjo monconga.

²² Kammayatompa ri Tabera, ri Masa siagang ri Kibrot-Taawa, nupakanassui Batara.

²³ Nampa ri wattunnu nisuro ri Batara ambokoi Kades-Barnea untu' maju siagang mange ampammantangngi butta laNapassareanga mae ri kau, nutumpaki parentaNa Karaeng Allata'alanu; taerokako tappa' yareka mannuruki mae ri Ia.

²⁴Baku'nu kuasseng, tuli tenana numappilangngeri mae ri Batara.

²⁵Kuassengi angkanaya ero' tojeng-tojengi Batara angngancurukko. Jari su'ju'ma' ri dallekanNa Batara patampulo allo patampulo bangngi,

²⁶siagang appala' doamma' angkana, O, Batara Kaminang Tinggia, tea' laloKi' ancuruki anne umma' KalenTa, bansa le'baka Kilappassang siagang Kiantaraka assulu' battu ri butta Mesir lalang kagassingang siagang kakoasang malompoTa.

²⁷Kiu'rangi ata-atanTa Abraham, Ishak siagang Yakub, siagang teaKi' jampangi anjo sipa' kapala batuna, yareka kaja'dallanna siagang dosana anne bansaya.

²⁸Punna tena taKiancuru'na ummatTa, nakanamo sallang tu Mesirka angkanaya tena Kimampu angngerangi bansaTa mange ri pa'rasangang Kipa'janjianga mae ri ke'nanga. Ba'lalo nakana sallang ke'nanga Kierangi anjo ke'nanga mange ri parang lompoa untu' Kibuno lanri Kikabirissinna ke'nanga anjo bansaTa.

²⁹Mingka Kiu'rangi laloi, o Batara, angkanaya anne ke'nanga bansa Kipile a'jari ummatTa, siagang Kierangi battu ri Mesir lalang kagassingang siagang kakoasang malompoTa.”