Read Makassar Version – KITTA' MATANGKASA YOHANES 10 Bible Online

YOHANES 10 - Makassar Version – KITTA' MATANGKASA bible

YOHANES 10

¹“Annaba tojengi anne kanangKu: Inai-nai antama' ri baraya natena nanjoreng ri timunganna baraya antama', mingka anjorengi ri kalli' sa'rinna baraya, yareka angngambiki ri oloang maraenga, iaminjo taua pallukka' siagang paella'.

²Mingka inai-nai antama' battu ri timunganga iami pakalawakinna anjo gimbalaka.

³Lanisungkeangi timunganga ri pajagana anjo baraya; siagang punna nakioki massing arenna anjo gimbalaka, lanipinawangi sa'ranna, nampa naerang ke'nanga assulu'.

⁴Punna le'ba' ngaseng naerang assulu' anjo gimbalaka, a'jappami ri dallekang anjo pakalawakia; nampa amminawang ngaseng ri bokona anjo gimbalaka, lanri niassengi ri ke'nanga sa'ranna.

⁵Talaerokai ke'nanga amminawang ri tau maraenga; ba'lalo lanapilari anjo taua, lanri tanaassengai sa'ranna.”

⁶Nacaritai Isa ri ke'nanga anjo pangngebaranga, mingka tanaassengai ke'nanga angkana apa battuanna anjo pangngebaranga.

⁷Sikalipa pole Nakana Isa, “Annaba tojengi anne kanangKu: INakkemi timungang naoloa gimbalaka.

⁸Sikamma tau battua rioloangangKu sangnging palukka' siagang paella'; mingka tanapilangngeriai gimbalaka sa'ranna ke'nanga.

⁹INakkemi timungang. Inai-nai ammalo battu ri Nakke antama', iami lanipasalama'; assulu' antamai nanggappa kanre.

¹⁰Punna palukka' battu, ero'naji a'lukka', ammuno siagang ammanraki. Mingka iNakke naKubattu, sollanna anggappa katallassang rupataua iamintu katallassang kala'bianga.

¹¹INakkemi pakalawaki bajika. Ia pakalawaki bajika, napassareangi nyawana untu' katallassanna gimbala'na ngaseng.

¹²Pakanre gajia, teai pakalawaki, teai tongi patanna gimbala'; jari lanapilari anjo gimbalaka punna nia' kongkong romang nacini' battu. Lanikokko'mi siagang lanipasisa'la'-sa'la'mi anjo gimbalaka ri anjo kongkong romanga.

¹³Lari anjo tungnganre gajia, nasaba' untu' passawallanji bawang nakkalawaki. Tena najampangi anjo gimbalaka.

¹⁴ INakkemi pakalawaki bajika. Sangkamma NaassengKu Manggea na Kuasseng todong Manggea, sangkamma tomminjo Kuassenna gimbalakKu ngaseng, na naasseng tongA' ke'nanga. Kupassareangi nyawaKu sollanna attallasa' ke'nanga.

¹⁶Nia' ija gimbala' maraeng, iNakke todong pata, mingka tantamayapi ri pa'rappunganna anne gimbalaka. Musti Kuerang tongi ke'nanga battu na lanapilangngeri todong sa'rangKu. La'jari sipa'rappungang ngasengi ke'nanga na se're pakalawaki napa'jului.

¹⁷NakamaseangA' Manggea, lanri Kupassareangi nyawaKu, untu' laKugappa ammotere'.

¹⁸Mingka tena manna sitau akkulle angngallei nyawaKu battu ri Nakke. Battu ri erokKu tonji naKupassareang. Nia' koasaKu ampassareangi, na nia' todong koasaKu angngallei ammotere'. Iaminjo tugasa' Kutarimaya battu ri ManggeKu.”

¹⁹Lanri akkana kammana Isa, appakkaramulami a'gea'-gea' tu Yahudia.

²⁰Jai ke'nanga angkana, “Nasosoki setang anne taua. Pongoroki! Apa matu-matunna nupilangngeri ngaseng?”

²¹Mingka nia' todong angkana, “Tena nakamma anjo batena a'bicara tau nasosoka setang! Maka akkullei setanga amballei tau butaya sa'genna accini'?”

²²Assua'-suaraki taua ri Yerusalem ansua'-suarri Allo Lompo Appakkaramula nipakena Balla'Na Batara. Anjo wattua dingingi.

²³A'jappai Isa ri baruga Salomo lalang ri Balla'Na Batara;

²⁴na anjo wattua battui tu Yahudia a'rappungang ri tammuliliNa Isa. Nakana ke'nanga ri Isa, “Sa'gennapi siapa sallona laNubalang parekangki' anne ranggasela? Paumi silambusu'na, punna ma'nassa iKau mintu Karaeng Mappasalamaka.”

²⁵Appialimi Isa Nakana, “Le'ba' mako Kupauang, mingka tena ngaseng nutappa'. Sikamma jama-jamang Kugaukanga lalang arenNa ManggeKu, a'jari ngasemmi butti mae ri KalengKu.

²⁶Tena ngaseng nutappa', lanri tena nuntama' ri pa'rappunganna gimbalakKu.

²⁷GimbalakKu napilangngeri sa'rangKu. Kuassengi ke'nanga, namminawangi ke'nanga ri Nakke.

²⁸Kusarei ke'nanga katallassang satunggu-tunggua, natena nalapanra' ke'nanga sa'genna satunggu-tungguna. Tena manna sitau akkulle angngalle passai ke'nanga battu ri limangKu.

²⁹ManggeKu, ampassareangai ri Nakke, Iami la'bi koasa battu ri sikontu apa niaka. Na tena sitau akkulle angngalle passai ke'nanga battu ri limanNa ManggeKu.

³⁰INakke siagang Manggea se'rejA'.”

³¹Angngallemi pole batu ke'nanga ero' ansambilai Isa.

³²Mingka Nakanamo Isa ri ke'nanga, “Nucini' ngasemmi panggaukang baji' le'baka Kugaukang, situru' tugasa' Napassareanga Manggea ri Nakke. Battu ri yangasenna anjo panggaukanga, kereanga a'jari saba' nanusiratang ansambilA' batu?”

³³ Appialimi anjo tu Yahudia nakana, “Teai lanri yangasenna anjo panggaukang baji'Nu naniero' ansambilaKo batu, passangalinna lanri Nuhinana Allata'ala. Ikau a'rupatau biasaya, erokKo ampa'jari KalenNu Allata'ala?”

³⁴ Appialimi Isa Nakana, “Tenaka natattulisi' lalang ri Kitta' Hukkunnu angkanaya: Nakana Allata'ala, ‘allata'ala ngasengko’?

³⁵Niassengi angkanaya apa tattulisika lalang ri Kittaka tappakei sa'genna satunggu-tungguna. Jari, punna Allata'ala anggallaraki ‘allata'ala’ sikamma tau ampilangngeriai kananNa,

³⁶apa saba'na nanukana Kuhinai Allata'ala lanri Kukananaja KalengKu iNakke Ana'Na Allata'ala? Padahala' iNakkemi Napile Manggea na NasuroA' battu antama' ri linoa.

³⁷Punna taKugaukanga jamang Napassuroanga Manggea, teako tappaki ri Nakke.

³⁸Mingka lanri Kugaukammi, tappa' mako mae ri sikamma anjo apa le'baka Kugaukang, manna pole taerokako tappa' ri Nakke. Lalang kammana minjo nanuasseng siagang nupahang angkanaya tuli se'rena Manggea siagang iNakke, siagang tuli se'reKu siagang Manggea.”

³⁹Usahami pole ke'nanga ero' anjakkalaki Isa, mingka ta'lappasaki Isa battu ri ke'nanga.

⁴⁰ Ammotere'mi Isa anta'leang ri ba'leanna Binanga Yordan, ri tampa'na Yohanes anje'neki taua pirangalloang. Ammantammi anjoreng.

⁴¹Jaimi tau battu mae ri Ia. Nakanamo ke'nanga, “Tena gau' appakalannasa' nagaukang Yohanes, mingka sikontu apa napaua ri passala'na anne Taua annaba ngasengi.”

⁴²Jaimi tau anjoreng tappa' ri Isa.