Read Makassar Version – KITTA' MATANGKASA YOHANES 11 Bible Online

YOHANES 11 - Makassar Version – KITTA' MATANGKASA bible

YOHANES 11

¹ Nia' sitau niareng Lazarus ammantang ri Betania siagang sari'battanna niarenga Maria siagang Marta.

² Iaminne Maria antirikiai minynya'-minynya' bau' bangkenNa Isa, nampa nalu'lu' siagang uu'na. Nia' se're wattu na nataba garring Lazarus.

³Assaremi kabara' anjo ruaya sari'battanna mae ri Isa, angkana, “O Batara, garringi sari'battanna ikambe Kikamaseanga.”

⁴Nalangngere'na Isa anjo kabaraka, Nakanamo, “Anjo garringa tena nala'jari saba' nalamate. Anne nakajariang sollanna nipakala'biri' Allata'ala, na sollanna nipakala'biri' todong Ana'Na Allata'ala saba' anne kajarianga.”

⁵Anjo Marta, Maria siagang Lazarus, nikamaseangi ri Isa.

⁶Mingka ri wattunna Nagappa kabaraka Isa angkanaya garringi Lazarus, Nakunjungimi ammantang pole ruangallo ri tampa'Na.

⁷Le'ba'pi anjo nampami Nakana ri ana'-ana' gurunNa, “Umba nakiammotere' mange ri Yudea.”

⁸Appialimi ke'nanga angkana, “O Bapa' Guru, tenapa nasallo le'batTa ero' nasambila batu tu Yahudia. Angngapa naKiero'moseng ammotere' mange anjoreng kamma-kamma anne?”

⁹Nakanamo Isa, “Sai punna siallo nia' sampulo anrua jang sallona? Inai-nai a'jappa ri wattu singara'na alloa, tena nalatatto'ro, nasaba' naciniki cayana anne linoa.

¹⁰Mingka inai-nai a'jappa ri wattunna bangngi latatto'roi, nasaba' tena cayana singaraka ri ia.”

¹¹Kammaminjo Nakanaya Isa. Nampa Nakana pole, “Attinromi passari'battanganta Lazarus; mingka lamangeA' ampabangungi.”

¹²Nakanamo ana'-ana' gurunNa Isa, “Batara, punna attinromi Lazarus, la'jari baji'mi antu ri garrinna.”

¹³Ia natabaya kananNa iamintu matemi Lazarus. Mingka nakanai ke'nanga anjo Napakkanaya Isa, attinro biasaji Lazarus.

¹⁴Jari a'bicarami silambusu'na Isa mae ri ke'nanga, Nakana, “Matemi Lazarus.

¹⁵Mingka sannangi Kusa'ring pa'maikKu lanri tenaKu anjoreng namate. Nasaba' la'bi bajikangangi untu' ikau ngaseng punna Kutena anjoreng, sollannu akkulle ngaseng tappa'. Umbamo nakia'lampa mae ri Lazarus kamma-kamma anne.”

¹⁶Nakanamo Tomas, nigallaraka “I Kambara'” mae ri agang-aganna ana' gurunNa Isa, “Umba kimminawang, boli'mi kamma nakisikamateang siagang Ia!”

¹⁷Ri wattunna battu Isa mange anjoreng ri tampaka, patangallomi le'ba'na nitarawang Lazarus.

¹⁸Anjo Betania ambani ri Yerusalem, kira-kira tallu kilometere' bellana.

¹⁹Jaimi tu Yahudi battu angkunjungi Marta siagang Maria untu' ansaleori ke'nanga lanri matena sari'battanna.

²⁰Nalangngere'na Marta angkana niaki Isa battu, assulu'mi mange anruppai Isa; Maria ammantangi lalang ri balla'.

²¹Nakanamo Marta mae ri Isa, “O Batara, ka'de' naKinia' anrinni anjo wattua, mattantu tenapa nalamate sari'battangku.

²²Mingka manna nakamma, kuassengi angkanaya manna ri kamma-kammaya anne manna pole apa Kipala' ri Allata'ala tena taNasareTa.”

²³Nakanamo Isa ri Marta, “Lattallasa' poleangi ammotere' sari'battannu.”

²⁴Appialimi Marta nakana, “Kuassenji angkanaya lattallasa' poleangi Lazarus punna nipattallasa' poleangi tau matea sallang ri Allo Kiamaka.”

²⁵Nakanamo Isa ri Marta, “INakkemi assarea katallassang siagang ampattallasa' poleangi tau matea. Inai-nai tappa' ri Nakke iami lattallasa', manna pole namatemo.

²⁶Na inai-nai attallasa' natappa' ri Nakke, tena nalamate sa'genna satunggu-tungguna. Tappakko ri anjo passalaka?”

²⁷Appialimi Marta nakana, “Batara, tappaka' ri Katte angkanaya iKattemi Ana'Na Allata'ala, Karaeng Mappasalama' labattua ri anne linoa.”

²⁸Le'baki akkana kamma Marta, a'lampami angkioki sari'battanna Maria. A'biciki ri Maria nakana, “Niaki battu anrinni Pa' Guru; Napakkuta'nangangko.”

²⁹Nalangngere'na Maria anjo, akkaro-karomi ammenteng, nampa a'lampa anruppai Isa.

³⁰Anjo wattua tenapa Nabattu Isa antama' ri desaya. Nia' iji anjoreng ri tampa' napassibuntulia Marta.

³¹Niciniki Maria ammenteng siagang a'lampa karo-karo assulu' ri sikamma tu Yahudi niaka battu ri balla'na ansaleori. Jari a'lampami ke'nanga ampinawangi, nasaba' nakapangi ke'nanga angkana la'lampai Maria ri jeraka angngarru'.

³²Ri wattunna battumo Maria mange ri tampa'na Isa siagang nacini'mi Isa, akkulantu'mi Maria ri dallekanNa Isa na nakana, “O Batara, ka'de' naKinia' anrinni anjo wattua, mattantu tenapa namate sari'battangku.”

³³Nacini'na Isa angngarru' Maria, siagang sikamma tu Yahudi niaka battu angngagangi Maria angngarru' ngaseng tommi, a'jari si'nami atinNa siagang sanna'mi dinging-dinginna pa'mai'Na.

³⁴Jari akkuta'nammi ri ke'nanga Nakana, “Kemaei nutarawang Lazarus?” Appialimi ke'nanga angkana, “MaemaKi' Batara naKicini'.”

³⁵Angngarru'mi Isa.

³⁶Nakanamo tu Yahudia, “Ciniki, teai sipato' Nakamaseanna Lazarus!”

³⁷Mingka nia'mo ri ke'nanga angkana, “Akkullei Napa'jari accini' tau butaya, mingka angngapai natakkullea Natahang sollanna tamatea Lazarus?”

³⁸Sanna'mi pole dinging-dinginna pa'mai'Na Isa, nampa a'lampami mange ri jeraka. Anjo jeraka, se're jera' batu nitongkoka batu lompo.

³⁹Nakanamo Isa, “Palesangi anjo batua.” Appialimi Marta, iamintu sari'battanna anjo tau matea, nakana, “Mingka patangallomi le'ba'na nitarawang, Batara. Tantu a'rasa botto'mi!”

⁴⁰Nakanamo Isa ri Marta, “Sai le'ba' mako Kupauang angkanaya: Punna tappakko, lanuciniki antekamma lompona koasaNa Allata'ala!”

⁴¹Jari napalesammi ke'nanga anjo batua. Nampa acconga Isa nai' ri langika na nakana, “Tarima kasi', Bapa', lanri Kipilangngerinna pappalakKu.

⁴²Kuassengi angkanaya tuli Kipilangngeri pappalakKu; mingka naKupau anne, untu' ia ngaseng anne tau niaka anrinni, sollanna nakkulle tappa' ke'nanga angkanaya ma'nassa iKatte assuroA' battu.”

⁴³Le'baki akkana kamma Isa, akkio' lompomi Nakana, “Lazarus, assulukko mae!”

⁴⁴Apaji, nassulu' tojemmo anjo tau matea. Ta'roko' iji kaeng kebo' limanna siagang bangkenna, siagang natongko' iji kaeng rupanna. Nakanamo Isa ri tau niaka anjoreng, “La'gasi anjo kaeng pa'roko'na, sollanna akkulle laloasa a'jappa.”

⁴⁵Jaimi anjo tu Yahudi battua angkunjungi Maria, a'jari tappa' ri Isa wattunna nacini' ke'nanga anjo apa kajarianga.

⁴⁶Mingka nia' tommo siapa are ri ke'nanga mange ampabattui anjo apa le'baka Nagaukang Isa mae ri tu Farisia.

⁴⁷Jari a'rappungammi tu Farisia, imang-imang kapalaya, kammayatompa haking-hakinga ri Pangadelang Agamaya. Nakanamo ke'nanga, “Apa musti nigaukang? Anjo taua jai sikali gau'-gau' appakalannasa' Nagaukang!

⁴⁸Punna nipa'laloangi tuli appakamma anjo, kale'bakkanna latappa' ngasengi taua ri Ia. Na kale'bakkanna labattumi pamarenta Roma angngancu'-ancuruki Balla'Na Batara siagang sikontu bansata!”

⁴⁹Kalase'renna ke'nanga, iamintu niarenga Kayafas, imang lompoa anjo taunga, angkana, “Tena ngaseng apa-apa nuasseng.

⁵⁰Maka tanuassengai angkanaya lanri untu' kabajikanna ra'yaka, bajikangangi mate sitaua, naia laancuru' ngaseng sikontu bansaya?”

⁵¹Sikontutojenna, teai battu ri pikkirang kalenna nakkana kamma anjo Kayafas. Mingka salaku imang lompo anjo taunga napabattu la'bi riolomi angkanaya lamatei Isa untu' bansa Yahudia.

⁵²Siagang teai untu' bansa Yahudi bawang, passangalinna sollanna napa'rappungang siagang napasse're ana'-ana'Na Allata'ala tassia'-siaraka.

⁵³Anjo alloa appakkaramulami pamarentana tu Yahudia assikongkolo' ero' ambunoi Isa.

⁵⁴Lanri kammana, tenamo Napappicinikangi KalenNa Isa ri dallekanna tau jaia ri tangnga-tangngana tu Yahudia. Nabokoimi Yudea, nampa a'lampa mange ri kota niarenga Efraim, a'reppeseka ri parang lompoa. Ammantammi anjoreng siagang ana'-ana' gurunNa.

⁵⁵Anjo wattua a'birimmi narapi' allo passua'-suarranna Allo Lompo Paskana tu Yahudia. Jaimi tau battu ri desa-desaya a'lampa mange ri Yerusalem ero' anggaukang pannangkasi kalea, ri tenanapa narapiki anjo allo passua'-suarranga.

⁵⁶Naboyami ke'nanga Isa. Na wattunna a'rappungammo ke'nanga lalang ri Balla'Na Batara, nakanamo ke'nanga massing para ia, “Antekamma panggappanu? Tena kapang Nalabattu ri anne passua'-suarranga.”

⁵⁷Nakkana kamma anjo ke'nanga, lanri le'ba'mi appasulu' parenta imang-imang kapalaya siagang tu Farisia, angkanaya, inai-nai anciniki pammantanganNa Isa musti napaui sollanna akkulle nijakkala' Isa.