Read Makassar Version – KITTA' MATANGKASA YOHANES 12 Bible Online

YOHANES 12 - Makassar Version – KITTA' MATANGKASA bible

YOHANES 12

¹Ri annangallonapi nanarapiki Allo Lompona Paskaya, a'lampami Isa mange ri Betania. Anjorengi ammantang Lazarus, anjo le'baka Napattallasa' poleang Isa battu ri kamateanna.

²Anjoreng, nitoanami Isa ri ke'nanga, na Marta allayani. Ammempomi angnganre Lazarus siagang Isa, kammayatompa siapa are toananna.

³ Battumi Maria angngerang minynya'-minynya' sannaka bau'na, kira-kira nia' sitangnga litere' jaina, sannaka ka'jala'na ballinna. Napatiri'mi anjo minynya'-minynyaka ri bangkenNa Isa, nampa nalu'lu' siagang uu'na. A'jari bau' ngasemmi niara' lalang sibatu balla' napakamma anjo minynya'-minynyaka.

⁴Mingka nakanamo kalase'renna ana' gurunNa Isa, iamintu Yudas Iskariot — ambalukangai Isa sallang — ,

⁵“Angngapa natanibalukanga tallum bilangngang doe' pera' anjo minynya'-minynya' bauka, nampa nipassareang ballinna mae ri tu kasi-asia?”

⁶Nakkana kamma anjo Yudas, teai lanri nakamaseanna tu kasi-asia, passangalinna nasaba' palukkaki. Biasai naalle doe' nibolika, nipappirannuanga ri ia niboli'.

⁷Mingka Nakanamo Isa, “Boli'mi kamma nappakamma anjo bainea! Nagaukang minne untu' allo lanitarawangKu.

⁸ Tau kasi-asia tuli lania'ji ri tangnga-tangnganu ngaseng, mingka iNakke tena.”

⁹Jai tu Yahudi allangngereki angkanaya niaki Isa ri Betania. Jari a'lampami ke'nanga mange anjoreng. Namange ke'nanga anjoreng tena nalanri Isa bawang, mingka lanri ero'na todong ke'nanga anciniki Lazarus le'baka nipattallasa' poleang battu ri kamateanga.

¹⁰Lanri kammana minjo naero' tommo imang-imang kapalaya ambunoi Lazarus.

¹¹Nasaba' passabakkang iaminjo Lazarus najaimo tu Yahudi ambokoi ke'nanga nampa tappa' mae ri Isa.

¹²Ammukona bari'basa' nalangngere'mi tau jaia battu ero' ansua'-suarri allo Paskaya, angkanaya nia'mi Isa ri aganga ero' mange ri Yerusalem.

¹³ Angngallemi leko'-leko' kayu ke'nanga nampa mange anruppai Isa. A'rannu-rannumi ke'nanga angkana, “Pujimi Allata'ala! Nibarakkakimi Ia niaka battu lalang arenNa Batara. Nibarakkakimi KaraenNa Israelka!”

¹⁴Anggappami Isa sikayu keledai nampa Nadongkoki. Jari a'rupami apa niaka tattulisi' lalang ri Kittaka angkanaya:

¹⁵ “Teako mallakki, tulolonna Sion! Ciniki Karaennu battu, a'dongko' ri sikayu keledai!”

¹⁶Anjo wattua tanaassengapi ana'-ana' gurunNa Isa angkanaya apa ngaseng battuanna anjo kammaya. (Mingka ri wattunna nipakala'biri'mo Isa battu ri kamateanNa, nampami nau'rangi ke'nanga angkanaya anjo apa le'baka nagaukang taua ri Isa le'ba' memammi tattulisi' lalang ri Kittaka anjo apa kajarianga ri Ia.)

¹⁷Sikamma tau niaka hadere' wattunna Nakio' Isa assulu' Lazarus battu ri jeraka, na Napattallasa' poleang battu ri kamateanga, tuli a'jari sa'bimi ri passala' anjo le'baka nacini' ke'nanga.

¹⁸Lanri kammana minjo na'lampamo anjo tau jaia mae ri Isa; nasaba' nalangngere'mi ke'nanga angkanaya Isa anggaukangi anjo gau' appakalannasaka.

¹⁹Jari nakanamo tu Farisia massing para ia, “Tena apa-apa akkulle nigaukang! Cini'mi lari ngasemmi bonena linoa amminawang ri Ia!”

²⁰Ri alla'na anjo tau jaia a'lampa mange ri Yerusalem ero' assambayang ri wattunna passua'-suarrang, nia' todong siapa are tu Yunani.

²¹Battui ke'nanga mae ri Filipus akkuta'nang, angkana, “Punna akkulleja sari'battang, ero' ngasengki' anne assibuntulu' siagang Isa.” (Filipus, tu battu ri Betsaida, ri Galilea.)

²²A'lampami Filipus ampauangi Andreas. Nampa a'lampa ke'nanga sipa'rua ampabattui anjo kabaraka mae ri Isa.

²³Nakanamo Isa ri ke'nanga, “Narapi'mi wattunna lanipakala'biri' Ana' Ma'rupataua.

²⁴Annaba tojeng-tojengi anne kanangKu: Punna tanilamunga silisereka gandung antama' ri buttaya nampa mate, tuli lammantanna a'jari silisere' anjo gandunga. Mingka punna mate anjo lisere' gandunga, nampami akkulle assare wassele' a'jari jaiangang gandung.

²⁵ Inai-nai angkarimangngi katallassanna, iami latappela' katallassanna. Mingka inai-nai angkabirisi katallassanna ri anne linoa, iami angkarimangngi katallassanna, la'jari katallassang satunggu-tunggua sallang.

²⁶Inai-nai ero' a'jari palayang mae ri Nakke, musti amminawangi ri Nakke; sollanna kemae-kemae pammantangangKu akkulle tongi nia' palayangKu anrurungangA'. Inai-nai a'jari palayang ri Nakke, iami lanipakala'biri' ri ManggeKu.”

²⁷“Lussa'minne atingKu: apa musti laKupau kamma-kamma anne? Mustika laKukana, ‘Bapa', paliliA' ri kamma-kammaya anne’? Mingka untu' iaminne passessaya naKunia' battu.

²⁸Bapa', Kipakala'biri'mi arenTa!” Nia'mo sa'ra kalangngerang battu rate ri langika angkana, “Kupakala'biri'mi, siagang latuli Kupakala'biriki pole.”

²⁹Nalangngere'mi tau jai niaka anjoreng anjo sa'raya. Nakanamo ke'nanga, “Gunturu' anjo!” Mingka nia' tommo angkana, “Teai! Malaeka' anjo a'bicara mae ri Ia!”

³⁰Nakanamo Isa ri ke'nanga, “Teai untu' kaparalluangKu nakalangngerang anjo sa'raya, mingka untu' kaparalluannu ngaseng.

³¹Kamma-kamma anne wattunnami niadeli linoa; lanitu'gurammi kakoasanna pamarentana anne linoa.

³²Mingka iNakke anne, punna le'ba'Ma' nipakatinggi ri linoa, laKubeso' ngasengi sikontu taua mae ri Nakke.”

³³Nakkana kamma anjo Isa, lanri eroki Napappiassengang antekamma bateNa lamate sallang.

³⁴ Nakanamo anjo tau jaia ri Ia, “Manuru' Kitta' Hukkung niaka ri kambe, anjo Karaeng Mappasalamaka lattallasaki sa'genna satunggu-tungguna. Antekamma Nukkulle angkana musti nipakatinggi anjo Ana' Ma'rupataua ri lino? Inaika anjo Ana' Ma'rupataua?”

³⁵Appialimi Isa Nakana, “Poro untu' sinampe'ji lania' anjo singaraka ri tangnga-tangnganu ngaseng. Jari a'jappa mako ilalang nia'na ija anjo singaraka, sollanna tena nanatujuko sassang. Inai-nai a'jappa lalang ri sassanga, tanaassengai angkana kemae lanaolo.

³⁶Tappa' mako ri anjo singaraka, ilalang nia'na ija anjo singaraka ri tangnga-tangnganu, sollannu a'jari ana'-ana' singaraka.” Le'baki akkana kamma anjo Isa, a'lampami ambokoi anjo tampaka, siagang taerokami ampappicinikangi KalenNa ri ke'nanga.

³⁷Manna pole najaimo gau'-gau' appakalannasa' le'ba' Nagaukang Isa ri dallekanna ngaseng ke'nanga, mingka tena naero' tappa' ke'nanga ri Ia.

³⁸ Jari a'rupami apa le'baka napau Na'bi Yesaya angkanaya, “O Batara, inaika tappa' ri kabara' napabattua ikambe? Inaimi lanipicinikiang kakoasanTa Batara?”

³⁹Iaminjo saba'na nataeroka tappa' ke'nanga, lanri le'ba'na tommo Na'bi Yesaya angkana: “Nakana Allata'ala,

⁴⁰ ‘Kupa'jari butai matanna ke'nanga, Kupa'jari ka'doroki atinna; sollanna taccinika matanna, natammahanga pikkiranna. Sollanna taeroka ammotere' mae ri Nakke, nampa Kuballei ngaseng sa'genna baji'.’ ”

⁴¹Na'bicara kamma Na'bi Yesaya, lanri nacini'mi kala'biranNa Isa. Iaminjo nanasero kana anjo passalaka.

⁴²Mingka manna nakamma, jai tonji tau tappa' mae ri Isa; ba'lalo nia' todong pamarentana tu Yahudia tappa'. Mingka taerokai ke'nanga mangaku silambusu'na angkana tappaki ke'nanga; lanri mallaki ke'nanga ri tu Farisia, gassingka tanipa'biangai ke'nanga antama' ri balla' sambayanga.

⁴³La'bi nangaiangangi ke'nanga nipalece ri rupataua, naia nipakalompoa ri Allata'ala.

⁴⁴A'gorami Isa Nakana, “Inai-nai tappa' ri Nakke, teai Nakke napatappa', mingka Ia assuroa ri Nakke napatappa'.

⁴⁵Na inai-nai anciniki KalengKu, nacini' tommi Ia assuroa ri Nakke.

⁴⁶BattuA' antama' ri linoa a'jari sanrapang singaraka, sollanna sikontu tau tappaka ri Nakke tena nammantang lalang ri sassanga.

⁴⁷Inai-nai ampilangngeri pangngajarangKu, mingka tena nanaturuki, — teai Nakke anghukkungi. Nasaba' tena naKubattu untu' angngadeli anne linoa, passangalinna untu' lampasalamaki.

⁴⁸Inai-nai ansorongbokoA' siagang tanapilangngeriai kanangKu, nia'mo angngadeli anjo taua. Iaminjo kana-kanangKu Kupabattua langngadeli sallang ri Allo Kiamaka.

⁴⁹Nasaba' teai battu ri ero' KalengKu naKupabattu anjo bicaraya; Manggea assuroA', Iami ampassuroangi ri Nakke apa musti Kupau siagang Kupabattu.

⁵⁰NaKuasseng angkanaya Ia anjo Napassuroanga angngerangi katallassang mannannungang. Jari Kupabattumi situru' apa Napangngajarranga Manggea ri Nakke.”