Read Makassar Version – KITTA' MATANGKASA YOHANES 16 Bible Online

YOHANES 16 - Makassar Version – KITTA' MATANGKASA bible

YOHANES 16

¹Kupau ngasemmi anjo sikammaya mae ri kau, sollanna tena nummono' boko sallang.

²Lanipasulukko sallang battu ri balla' sambayanga. Nalanarapiki sallang wattunna nania' tau nakana kalenna a'gau' amala' ri Allata'ala punna nabunoko.

³La'gau' kammai anjo ke'nanga mae ri kau, lanri tenanapa naassengi Manggea, siagang tenanapa naassengA'.

⁴Mingka kamma-kamma anne Kupaumi anjo passalaka mae ri kau, sollanna punna kajariammo sallang, akkullei nuu'rangi angkanaya le'ba' memang mako Kupauang.” “Tena naKupauang memangko anne passalaka battu ri uru-uruna, nasaba' nia' ijA' anrurungangko.

⁵Mingka kamma-kamma anne la'lampaMa' mange ri Ia assuroa ri Nakke; na tena manna sitau battu ri kau ngaseng akkuta'nang angkanaya kemae laKulampai.

⁶Ba'lalo kamma-kamma anne a'jari si'nami atinnu, lanri Kupauna anne passalaka mae ri kau.

⁷Mingka apa kammatojeng anne Kupaua mae ri kau: Angkanaya bajikangangi mae ri kau punna a'lampA'; nasaba' punna tena Ku'lampa, talabattuai anjo Pannulunga mae ri kau. Mingka punna a'lampA' laKusuroi battu anjo Pannulunga mae ri kau.

⁸Na punna battui, laNapakasingara'mi mae ri linoa battuang sitojeng-tojenna dosaya, battuang sitojeng-tojenna apa annabaya, kammayatompa battuang sitojeng-tojenna hukkungang battua ri Allata'ala.

⁹LaNapakasingaraki angkananaya dorakai tau tenaya natappa' ri Nakke;

¹⁰angkanaya iNakkemi tojeng, nasaba' a'lampA' mae ri Manggea, natenamo nalanucinikKa';

¹¹kammayatompa appakkaramulami Allata'ala angngadeli, nasaba' Nahukkummi tau anna'galaka koasa ri anne linoa.

¹²Jai iji ero' Kupau ri kau ngaseng, mingka kamma-kamma anne tanukulleapi antarimai.

¹³Mingka punna battumo RohNa Allata'ala, iamintu ampa'nyatai katojenganNa Allata'ala, laniajara' mako angngassengi sikontu katojenganga. Tena nabattu ri KalenNa bawang nala'bicara, mingka apa-apa le'ba' Nalangngere' iaminjo Nabicara. Kammayatompa laNapauang tongko apa lakajarianga sallang ri allo ri boko.

¹⁴LaNapakala'biriki KalengKu, nasaba' anjo apa Napabattua ri kau, battu ri Nakkei le'ba' Natarima.

¹⁵Sikontu apa niaka ri Manggea iNakke ngaseng pata. Iaminjo saba'na naKukana ri kau angkanaya anjo apa Napabattua RohNa Allata'ala mae ri kau, apa le'ba' Natarima battu ri Nakke.”

¹⁶“Sinampe' dudu mami natakkulleaMa' nucini'; sinampe' dudu maMa' lakkulle nucini'.”

¹⁷Appakkaramulami massing sikuta'nang siapa area ana'-ana' gurunNa Isa, nakana, “Apa battuanna naNakana mae ri katte angkanaya: ‘Sinampe' dudu mami natakkulleaMa' nucini'; sinampe' dudu maMa' lakkulle nucini'’? Apa todong battuanna nangkana, ‘La'lampA' mae ri Manggea’?”

¹⁸Akkuta'nang mole-molemi ke'nanga angkana, “Apa battuanna anjo, ‘sinampe' dudu mami’? Tanipahangai angkanaya passala' apa anjo Nabicaraya!”

¹⁹Naassengi Isa angkanaya eroki ke'nanga akkuta'nang ri KalenNa. Jari Nakanamo, “Sumpaeng Kukana, ‘Sinampe' dudu mami natakkulleaMa' lanucini'; sinampe' dudu maMa' lakkulle nucini'.’ Iaka anjo passalaka massing nubicara?

²⁰Tappa' mako angkanaya, langngarrukko siagang lappiraungko, mingka larannui linoa. Lasusai pa'mai'nu, mingka lanipinrai kasusannu a'jari karannuang.

²¹Punna nia' sitau baine la'biring ammana', lasusai, nasaba' narapi'mi wattunna lasessa. Mingka kamma lassu'na ana'na, nakaluppaimi pa'risi'na anjo bainea napakamma rannu, lanri lassu'namo anjo ana'na antama' ri lino.

²²Kamma tomminjo ri kau ngaseng: kamma-kamma anne susai nyawanu, mingka lasibuntulu' poleang jaki' sallang, jari la'jari rannumi nyawanu. Na tenanniakka tau lakkulle angngallei anjo karannuanga battu ri nyawanu.

²³Ri anjo alloa sallang, tenamo nulakkuta'nang apa-apa mae ri Nakke. Tappa' mako angkanaya: apa-apa mamo nupala' mae ri Manggea lalang arengKu, laNapassareangi Manggea mae ri kau.

²⁴Sa'genna kamma-kamma anne tenapa nule'ba' appala' apa-apa lalang arengKu. Appalakko, nalanugappa, sollanna a'jari sukku' karannuannu.”

²⁵“Yangasenna anne Kubicarai mae ri kau lalang pangngebarang. Mingka lanarapiki sallang wattunna, natenamo Kummake pangngebarang, punna Kubicara Manggea mae ri kau, mingka laKubicarami silambusu'na.

²⁶Anjo wattua lappala' mako mae ri Manggea lalang arengKu. Parallui nuasseng angkanaya tena nalaKupappalakkangko mae ri Manggea,

²⁷nasaba' KalenNa Manggea angkamaseangko. Nakamaseangko Manggea, lanri nukamaseangA', siagang tappakko ri Nakke angkanaya battuA' ri Allata'ala.

²⁸Memang iNakke assalakKu iamintu battu ri Manggea, siagang nia'Ma' battu antama' ri linoa. Mingka kamma-kamma anne laKubokoimi anne linoa, naKuammotere' mae ri Manggea.”

²⁹Nakanamo ana'-ana' gurunNa Isa, “Kamma-kamma anne a'bicara maKi' silambusu'na Batara; tenamo Kimmake pangngebarang,

³⁰nanaasseng ikambe angkanaya sikontu apa-apaya Kiasseng ngasengi, Batara. Tena naparallu taua ampakkuta'nangangi ri Katte. Iaminjo saba'na natappa'mo ikambe angkanaya iKatte battuKi' ri Allata'ala.”

³¹Appialimi Isa ri ke'nanga, angkana, “Jari tappa' mako kamma-kamma anne?

³²U'rangi! Angkanaya lanarapiki sallang wattunna, ba'lalo narapi'mi wattunna, nulanipasisa'la'-sa'la'. Massing lammoterekko mange ri balla'nu, nanubokoiA' Kale-kalengKu. Mingka tena nalaKale-kalengKu mamo, nasaba' niaki Manggea anrurungangA'.

³³Kupau ngasengi anne mae ri kau, sollannu anggappa salewangang lanri asse're ngasengko siagang iNakke. Lasessako lalang ri linoa. Mingka jarreki pa'mai'nu! Le'ba'mi Kubeta anne linoa!”