Read Makassar Version – KITTA' MATANGKASA YOHANES 18 Bible Online

YOHANES 18 - Makassar Version – KITTA' MATANGKASA bible

YOHANES 18

¹Le'baki appala' doang kamma anjo, a'lampami Isa siagang ana'-ana' gurunNa anta'leang ri ba'leanna Binanga Kidron. Anjoreng nia' se're koko. Antama'mi Isa siagang ana'-ana' gurunNa ri anjo kokoa.

²Naassengi Yudas (ampasikongkolangai Isa) anjo tampaka; nasaba' biasami a'rappungang Isa siagang ana'-ana' gurunNa anjoreng.

³Jari battumi Yudas mange anjoreng, angngerang se're pasukang tantara Roma siagang siapa are pangawala'na Balla'Na Batara. Iaminne ke'nanga nisuroa ri imang-imang kapalaya siagang tu Farisia. Angngerangi ke'nanga sanjata, lampu, siagang sulo.

⁴Naassemmi Isa sikontu apa lakajarianga ri KalenNa. Jari Nareppesimi anjo taua ngaseng, nampa akkuta'nang Nakana, “Inai ngaseng nuboya?”

⁵Appialimi ke'nanga angkana, “Isa, battua ri Nazaret.” Nakanamo Isa, “INakkemi anne.” Niaki Yudas anjoreng ammenteng siagang ke'nanga.

⁶Ri wattunna Nakana Isa ri ke'nanga, angkana, “INakkemi anne,” ammono'boko ngasemmi ke'nanga, nampa tu'guru' naung ri buttaya.

⁷Sikalipi pole akkuta'nang Isa ri ke'nanga Nakana, “Inai ngaseng nuboya?” Appialimi ke'nanga angkana, “Isa, battua ri Nazaret.”

⁸Nakanamo Isa, “Le'ba' mako Kupauang angkana iNakke minne. Na punna iNakke memantong nuboya, suromi anne ke'nanga maraenganga a'lampa.” (

⁹Lanri akkana kammana anjo Isa, a'rupami apa le'baka Napau pirangalloang angkana: “Bapa', sikamma tau Kipassareanga ri Nakke, manna sitau talaniakka tappela'.”)

¹⁰Anjo wattua angngerangi pa'dang Simon Petrus. Nabi'bu'mi pa'danna nampa nate'ba' anjo tu nasuroa imang lompoa, sa'genna kaccili' tolinna ri kananga. Anjo tunisuroa Malkus arenna.

¹¹ Nakanamo Isa ri Petrus, “Poterangi antama' ri banoanna antu pa'dannu! Apa nakana pikkirannu talaKutarimayai passessa Napassareanga Manggea mae ri Nakke?”

¹²Nijakkala'mi siagang nisikko'mi Isa. Ia battua anjakkalaki Isa iamintu surudadu Roma nipimpinga ri komandanna, siagang pangawala'-pangawala'na tu Yahudia.

¹³Uru-uruna nierangi Isa ri ke'nanga mange andallekang ri Hanas, iamintu matoang bura'nena Kayafas. Na anjo Kayafas, iami a'jari imang lompo anjo taunga.

¹⁴ Siagang iami le'ba' ampakaingaki pamarentana ngaseng tu Yahudia angkanaya bajikangangi se'rea tau mate untu' sikontu bansaya.

¹⁵A'lampami Simon Petrus siagang sitau ana' guru maraengang amminawang boko ri Isa. Anjo ana' guru maraenganga niassengi ri imang lompoa; jari amminawammi antama' siagang Isa ri paranglakkenna balla' lompona imang lompoa.

¹⁶Mingka Petrus, ammantanji attayang pantarang ri pakke'buka. A'lampami anjo ana' guru maraenganga mange a'bicara siagang palayang baine a'jagaya anjoreng ri pakke'buka, nampa naerang todong Petrus antama'.

¹⁷Nakanamo anjo baine pajaga timunganga ri Petrus, “He, sai ikau kalase'renna tongko ana' gurunna anjo taua?” Appialimi Petrus nakana, “Teai Nakke.”

¹⁸Anjo wattua sanna' dinginna pakkasiaka. Jari apparinrami pepe' palayanga siagang pangawalaka ngaseng, nampa a'binrung ke'nanga. A'lampa tommi Petrus mange anjoreng ero' a'binrung siagang ke'nanga.

¹⁹Nikuta'nammi Isa ri imang lompoa ri passala'na ana'-ana' gurunNa siagang pangngajaranNa.

²⁰Appialimi Isa Nakana, “Tuli silambusu'na bateKu a'bicara ri dallekanna tau jaia. Tuli angngajarakKa' ri sikamma balla' sambayanga siagang Balla'Na Allata'ala, tampa' biasaya napa'rappungi tu Yahudia. Tena le'bakai nia' apa-apa Kupau cokko-cokko.

²¹Jari angngapa nanikuta'nangA'? Iamonjo ke'nanga kuta'nang, nasaba' nalangngere'mi ke'nanga apa Kupangngajarranga. Tantu naassemmi ke'nanga apa le'baka Kupau.”

²²Ri wattunna akkana kamma anjo Isa, nia'mo sitau pangawala' antempaka'rangi siagang nakana, “Nubarani kamma akkana kammanjo mae ri imang lompoa!”

²³Appialimi Isa Nakana, “Punna nia' apa-apa sala Kupau, paumi anrinni angkana apa salana! Mingka punna annaba memang todong anjo Kupaua, apa saba'na nanutempaka'rangA'?”

²⁴Le'baki anjo nasuromi Hanas taua angngerangi Isa siagang tassikko' limanNa mae ri Imang Lompoa iamintu Kayafas.

²⁵Anjo wattua nia' iji Simon Petrus ammenteng a'binrung anjoreng ri tampa' napa'binrungia sumpaeng. Nakanamo taua ri ia, “Sai ana' gurunna tongko anjo Taua?” Assassala'mi Petrus nakana, “Teai nakke!”

²⁶Nia' sitau suro-surona imang lompoa, iamintu bijanna anjo tau le'baka nikaccili' pa'dang tolinna ri Petrus, angkana ri Petrus, “Kucinikko lalang ri kokoa siagang anjo Taua!”

²⁷Assassala'mi pole Petrus, nakana, “Tena,” — na sitabang anjo wattua attingkokomi janganga — .

²⁸Ri bari'basa' dudua naerammi ke'nanga Isa battu ri balla'na Kayafas mange ri balla' lompona guburnurka. Sikamma tu Yahudia tena nantama' ri balla' lompoa, sollanna tena na'jari ra'masa' situru' ajarang agamana ke'nanga. Nasaba' eroki ke'nanga amminawang angnganre Paska.

²⁹Jari a'lampami assulu' Pilatus mange ri ke'nanga nampa akkuta'nang nakana, “Apa nutuntukangi anne Taua?”

³⁰Appialimi ke'nanga angkana, “Ebara' angkana tena salanna antu Taua, tena olona lanierang mae ri katte.”

³¹Nakanamo Pilatus ri ke'nanga, “Allemi anne Taua nampa nuadeli situru' undang-undanna agamanu!” Mingka appialimi anjo tu Yahudia, angkana, “Tena nanikellaiki' ikambe anghukkung matei taua.” (

³² Kajariammi anne kammaya, sollanna a'rupamo apa le'baka Napau Isa, ri passala' antekamma bateNa lamate.)

³³Ammotere'mi antama' Pilatus ri balla' lompoa nanakio' Isa, nampa nakuta'nang angkana, “Apaka iKaumi Karaeng tu Yahudia?”

³⁴Appialimi Isa Nakana, “Maka battu ri katte tonji anne pakkuta'nanga, yareka nia' tau maraeng le'ba' ampauangki' passala'na KalengKu?”

³⁵Appialimi Pilatus nakana, “Bara' nukana tu Yahudia'? BansaNu tonji ampassareangKo mae ri nakke siagang imang-imang kapalaya. Apa kutadeng le'ba' Nugaukang?”

³⁶Nakanamo Isa, “INakke kakaraengangKu tena nabattu anrinni ri linoa. Ebara' angkana battu anrinni ri linoa kakaraengangKu, ma'nassa langngewai taungKu sollanna tena nanipassareangA' mae ri sikamma pamarentana tu Yahudia. Mingka tena memang nabattu anrinni ri linoa kakaraengangKu!”

³⁷Akkuta'nammi Pilatus nakana, “Jari punna kamma, KaraengKo padeng?” Appialimi Isa Nakana, “Nupaumi angkanaya iNakke anne karaengA'. Se'reji pattujunna naKunilassukang siagang naKubattu ri anne linoa, iamintu ampabattui katojenganga. Inai-nai battu ri anjo katojenganga iami lampilangngeriA'.”

³⁸Akkuta'nammi Pilatus nakana, “Apa battuanna anjo katojenganga?” Assulukammi pole Pilatus nampa nakana ri tu Yahudia, “Tena kugappa kasalanna anne Taua, manna sirupa.

³⁹Mingka situru' kabiasannu ngaseng, tuli nia' se're tunitahang kulappassang ri Allo Lompo Paskaya. Maka ero' ngasenjako punna kulappassangi anne karaenna tu Yahudia untu' ikau ngaseng?”

⁴⁰Appialimi siagang ammarrang-marrammi ke'nanga, angkana, “Tena, teaki' Ia kilappassang, mingka Barabas!” (Anjo Barabas, iami paella'.)