Read Makassar Version – KITTA' MATANGKASA YOHANES 19 Bible Online

YOHANES 19 - Makassar Version – KITTA' MATANGKASA bible

YOHANES 19

¹Le'baki anjo antama'mi Pilatus nampa nasuro taua ancamboki Isa.

²Appare'mi surudadua se're songko' battu ri tangke-tangke kayu akkatintinga, nampa napataba irate ri ulunNa Isa. Le'baki anjo napipakeimi Isa juba cura' lame butung.

³Nampa a'mole-mole ke'nanga battu ri dallekanNa Isa angkana, “La'bu lalo umurutTa, karaenna tu Yahudia!” Nampa natempaka'rang ke'nanga Isa.

⁴Le'baki anjo assulukammi pole Pilatus nampa nakana ri anjo tau jaia, “Ciniki! Kuerangi anne Taua mae ri dallekannu ngaseng, sollanna nuasseng angkanaya tena kugappa kasalanNa manna sirupa.”

⁵Assulu'mi Isa, ammake songko' akkatinting siagang juba cura' lame butung. Nakanamo Pilatus ri ke'nanga, “Cini'mi anjo Taua.”

⁶Ri wattunna nacini' imang-imang kapalaya siagang pangawalaka ngaseng anjo Isa, ammarrang-marrammi ke'nanga, angkana, “Allei salli'! Allei salli'!” Nakanamo Pilatus ri ke'nanga, “Allemi anne Taua nampa ikau tommo ansalliki. Nasaba' inakke tena kugappa kasalanNa manna sirupa.”

⁷Appialimi tu Yahudia angkana, “Situru' undang-undang niaka ri kambe, musti nihukkung matei antu Taua, nasaba' Nakanai KalenNa Ana'Na Allata'ala.”

⁸Nalangngere'na Pilatus akkana kamma ke'nanga, pila' a'jari malla'mi pole.

⁹Jari ammotere'mi pole antama' ri balla' lompoa. Na ri wattunna nierammo Isa antama', akkuta'nammi Pilatus ri Ia, nakana, “Battu kemae assala'Nu?” Mingka tappialiai Isa.

¹⁰Jari nakanamo Pilatus, “TeaKo a'bicara siagang inakke? Parallui Nuasseng angkanaya makoasa' allappassangKo, siagang makoasa tonga' ansallikKo!”

¹¹Appialimi Isa Nakana, “Punna taNasareako' Allata'ala anjo koasanu, tena sikali koasanu mae ri Nakke. Lanri kammana, lompoangangi dosana tau ampassareangai KalengKu mae ri kau, kala ikau.”

¹²Nalangngere'na Pilatus akkana kamma Isa, a'boyami cara antekamma nakkulle nalappassang Isa. Mingka ammarrang-marrammi tu Yahudia, angkana, “Punna kilappassangi antu Taua, teaiki' aganna Karaenga! Inai-nai nakana kalenna karaeng, iami musunna Karaenga!”

¹³Nalangngere'na Pilatus kana-kana kammaya anjo, naerammi Isa assulu' nampa ammempo ri kadera pangadelanga, ri tampa' niarenga Dapara' Batu. (Lalang bicara Ibrani niarengi Gabata.)

¹⁴Anjo wattua a'birimmi tette' sampulo anrua ri tangngana alloa, iamintu allo rioloanganna Allo Lompo Paskaya. Nakanamo Pilatus ri yangaseng anjo taua, “Anne karaennu.”

¹⁵Ammarrang-marrammi ke'nanga, angkana, “Bunoi! Bunoi! Allei Salli'!” Akkuta'nammi Pilatus nakana, “Maka musti inakke ansalliki karaennu?” Appialimi imang-imang kapalaya angkana, “Tena ruanna karaeng pantaranganna Karaenna ikambe!”

¹⁶Jari napassareammi Pilatus mae ri ke'nanga Isa sollanna nisalli' ri ke'nanga. Niallemi Isa ri ke'nanga, nampa nierang a'lampa.

¹⁷Assulu'mi Isa ampisangi kayu salli'Na, Naerang mange ri tampa' niarenga “Tampa' Tangkora'”. (Lalang bicara Ibrani nikana Golgota.)

¹⁸Anjoremmi nisalli' Isa. Nia' todong rua tau maraeng Naagang nisalli'; sitau nisalli' ri sa'ri kairinNa, na sitau ri sa'ri kananNa, na Isa ammantang ri tangnga nisalli'.

¹⁹Ri kayu salli'Na Isa nia' nasuro tannang Pilatus tulisang angkanaya: “Isa battu ri Nazaret, Karaenna Tu Yahudia”.

²⁰Jai tu Yahudi ambacai anjo tulisanga, nasaba' anjo tampaka tena nabella battu ri kotaya. Anjo tulisanga nitulisiki lalang bicara Ibrani, bicara Lating, siagang bicara Yunani.

²¹Nakanamo imang-imang kapalaya ri Pilatus, “Teaki' tulisiki angkana, ‘Karaenna tu Yahudia’, mingka tulisiki angkana, ‘Anne Taua Nakana KalenNa, iNakke Karaenna tu Yahudia.’ ”

²²Mingka appialimi Pilatus nakana, “Apa le'baka kutulisi', boli'mi kamma anjo tattulisi'.”

²³Le'baki nisalli' Isa ri surudadua, nialleammi ri ke'nanga care-careNa. Anjo care-carea nabage appaki ke'nanga: se're-se're tau anggappai sibageang. Nampa naalle todong jubaNa. Anjo jubaya tena nanijaiki — nitannunji battu irate sa'genna naung.

²⁴ Nakanamo anjo surudadua para ia, “Tea' mako polong-polongi anne jubaya. Umbamo naniloterei nanipattantu angkana inai anggappai.” Kajariammi anjo passalaka sollanna a'rupamo apa tattulisika lalang ri Kittaka angkanaya: “Nabage-bagei ke'nanga care-careKu nanaloterei jubaKu.” Na kamma tojemmi anjo nagaukanga surudadua.

²⁵Tabellayai ri salli'Na Isa, niaki ammenteng amma'Na Isa, sari'battang bainena amma'Na, Maria bainenna Kleopas, siagang Maria Magdalena.

²⁶Nacini'Na Isa amma'Na siagang anjo ana' gurunNa Nakamaseanga ammenteng anjoreng, Nakanamo ri amma'Na, “Amma', anjo mae anatta.”

²⁷Nampa Nakana Isa ri anjo ana' guru Nakamaseanga, “Anjo mae amma'nu.” Pakkaramula anjo wattua natarimami amma'Na Isa ammantang ri balla'na anjo ana' guru Nakamaseanga Isa.

²⁸ Naassemmi Isa angkanaya kamma-kamma anne le'ba' ngasemmi, na sollanna a'rupamo apa tattulisika lalang ri Kittaka, Nakanamo, “TurereA'.”

²⁹Anjoreng ri tampaka nia' se're mangko' rassia anggoro' kacci. Angngallemi taua se're bunga batu karang nampa napantama' ri je'ne' anggoroka. Nampa nipataba anjo bunga batu karanga ri se'rea passukki', nanipajonjo mae ri bawaNa Isa.

³⁰Nalepa'mi Isa anjo anggoroka nampa Nakana, “Le'ba'mi!” Nampa a'dundu Isa, natappu'mo nyawaNa.

³¹Taerokai pamarentana tu Yahudia amboliki ammantang ta'gentung maya'na anjo tau le'baka nisalli' ri allo Pammari-marianga. La'biangampa pole nasaba' anjo allo Pammari-marianga sitabang tongi Allo Lompona Allo Pammari-marianga. Lanri anjo nisalli'Na Isa tenapa narapiki allo Pammari-marianga, appala' paramisimi tu Yahudia mae ri Pilatus sollanna akkulle natepo' ke'nanga bangkenna anjo tau le'baka nisalli', siagang nipanaung maya'na battu rate ri anjo kayu sallika.

³²Jari a'lampami anjo surudadua mange antepoki rolong bangkenna anjo tau ruaya, Naaganga Isa nisalli'.

³³Ri wattunna battu ke'nanga ri Isa, nacini'mi ke'nanga angkana matemi Isa. Jari tanatepokami ke'nanga bangkenNa Isa.

³⁴Mingka nia'mo kalase'renna anjo surudadua anto'doki poke sa'rinNa Isa, sa'genna assulu'mi ceraka accampuru' je'ne'.

³⁵Tau kalennaya anciniki anjo apa kajarianga, iami angkabarrangi anjo passalaka, sollannu tappa' ngaseng todong. Na kontutojeng anjo apa nakasa'bianga, siagang naassengi angkanaya kontutojengi anjo passalaka.

³⁶ Kajariammi anjo passalaka, sollanna a'rupamo apa niaka tattulisi' lalang ri Kittaka, angkanaya, “Tena manna se're lanitepo' bukunNa”.

³⁷ Nia' pole tattulisi' lalang ri Kittaka, angkanaya, “Lanaciniki ke'nanga anjo Tau le'baka natobo'”.

³⁸Le'baki anjo appala' paramisimi Yusuf battua ri Arimatea mae ri Pilatus, sollanna akkulle naalle maya'Na Isa. (Anne Yusuf, ana' gurunNa todong Isa mingka nacokkoi, lanri mallaki ri pamarentana tu Yahudia.) Nisaremi paramisi ri Pilatus. Jari a'lampami Yusuf angngallei maya'Na Isa.

³⁹ A'lampa tommi Nikodemus le'baka battu ri wattunna bangngi mae ri Isa. Angngerammi Nikodemus rampa-rampa, kammaya campurang minynya'-minynya' bau', siagang minynya'-minynya' bau' cendana — kira-kira nia' tallumpulo kilogarang jaina battala'na.

⁴⁰Sipa'rua-ruami anjo taua angngallei maya'Na Isa, nampa naroko' kaeng anjo mayaka, napasiroko' siagang anjo campurang minynya'-minynya' bauka, situru' ada' panguburanna tu Yahudia.

⁴¹Anjoreng ri tampa'Na Isa nisalli' nia' se're koko. Lalang anjo ri kokoa nia' se're jera' beru nipare' tenayapa nale'ba' nipake antarawangi taua.

⁴²Nasaba' ambaniji anjo jeraka, siagang la'birimmi antama' allo Pammari-marianga, anjoremmi natarawang ke'nanga Isa.