Read Makassar Version – KITTA' MATANGKASA YOHANES 2 Bible Online

YOHANES 2 - Makassar Version – KITTA' MATANGKASA bible

YOHANES 2

¹Ruangallo ribokoanganna, nia' passua'-suarrang pa'buntingang ri kota Kana, ri pa'rasangang Galilea. Na nia' tongi amma'Na Isa anjoreng.

²Niundang tongi Isa siagang ana'-ana' gurunNa mange anjoreng ri pa'buntinganga.

³Ri wattunna la'busu'mo anggoro' lanipattoananga, nakanamo amma'Na Isa ri Isa, “Kala'busangi anggoro' ke'nanga.”

⁴Appialimi Isa Nakana, “Teaki' suroiA' amma'. Tenapa narapiki wattunna laKupakabateang KalengKu.”

⁵Mingka nakanamo amma'Na Isa ri pala'-palayanga, “Gaukang mami apa Napassuroanga ri kau ngaseng.”

⁶Anjoreng ri tampaka, nia' annang gumbang lompo, nipasadia untu' lanapake taua a'bissa bangkeng situru' ada'na tu Yahudia. Anjo gumbang lompoa akkullei massing nibonei kira-kira sibilangngang litere' jaina.

⁷Nakanamo Isa ri anjo pala'-palayanga, “Bonei ngasengi je'ne' anjo gumbanga.” Naboneimi ke'nanga anjo gumbanga, sa'genna rassi ngaseng.

⁸Nampa Nakana Isa ri ke'nanga, “Kamma-kamma anne allemi sike'de' anjo je'neka, nampa nuerang mange ri pamimpinna anne passua'-suarrang pa'buntinganga.” Naerammi ke'nanga anjo je'neka mae ri pamimpinna anjo passua'-suarranga.

⁹Naso'rimi pamimpinga anjo je'ne' le'baka tappinra a'jari anggoro'. (Tanaassengai angkana battu kemaei anjo anggoroka. Iaji anjo pala'-palayang appatirika je'ne' bawang angngassengi.) Nakio'mi pamimpinga bunting bura'nea,

¹⁰na nakana ri ia, “Biasaya, anggoro' kaminang bajika rolong napattoanang taua, nampa punna sukku'mo nasa'ring toanaya, nampami nipassareang anggoro' biasaya. Mingka ikau nuboliki rolong anggoro' kaminang bajika sa'genna ri kamma-kammaya anne!”

¹¹Iaminjo uru-uru gau' appakalannasaka Nagaukang Isa. Anjoreng ri kota Kana, ri pa'rasangang Galilea nigaukang anjo gauka. Lanri iaminjo pammateia naNapappicinikammo kalompoanNa. Tappa' ngasemmi ana'-ana' gurunNa ri Ia.

¹² Le'baki anjo, a'lampami Isa mange ri Kapernaum. Sipa'rurungang ngasengi a'lampa amma'Na, sikamma sari'battanNa, kammayatompa ana'-ana' gurunNa. Ammantammi ke'nanga anjoreng siapa are allonna.

¹³ Ri wattunna a'birimmo Allo Lompo Paskana tu Yahudia, a'lampami Isa mange ri kota Yerusalem.

¹⁴Nia'mo Narapikang siapa are pabalu' sapi, gimbala' siagang jangang-jangang bodobangkeng anjoreng ri Balla'Na Batara ri Yerusalem; nia' todong siapa are pasambe doe' ca'di ammempo anjoreng.

¹⁵Appare'mi cambo' otere' Isa, nampa Nabongka ngaseng anjo olo'-oloka, kammaya gimbalaka, sapia, na maraengannaya. Nabongka ngasengi assulu' anjo olo'-oloka battu ri Balla'Na Batara. Nampa Nabulintakkang ngaseng mejang-mejanna anjo pasambe doeka sa'genna tassia'-siara' ngaseng doe' ca'dina ke'nanga.

¹⁶Nampa Nakana ri anjo pabalu' jangang-jangang bodobangkenga, “Angka' ngasengi a'lampa anne. Teako pareki tampa' pa'danggangang Balla'Na BapakKu!”

¹⁷ Nau'rangimi ana'-ana' gurunNa apa niaka tattulisi' lalang ri Kittaka angkanaya, “O Allata'ala, ia pangngaiKu ri BallatTa, sanrapangi pepe' akkanrea ri atingKu.”

¹⁸Battumi tau anna'galaka koasa ri tu Yahudia andallekangi Isa. Nakanamo ke'nanga, “Coba sai gaukang gau' appakalannasaka, akkullea a'jari pammatei ri ma'nassaNu siratang anggaukang ngasengi anne sikammaya.”

¹⁹ Appialimi Isa Nakana, “Allemi runtung anne Ballaka, na nampa Kupabangung poleang lalanna tallungalloa.”

²⁰Nakanamo ke'nanga, “Patampuloi angngannang taung sallona nipake untu' ambangungi anne Ballaka. Nampa erokKo iKau ambangung poleangi lalanna tallungalloa?”

²¹Mingka Balla' natabaya kananNa Isa, iamintu batangkalenNa.

²²Jari ri boko sallang, ri wattunna attallasa' poleang Isa battu ri kamateanga, nau'rangimi ana'-ana' gurunNa Isa, angkanaya anjo passalaka le'ba' memammi Napau. Jari tappa'mi ke'nanga ri apa niaka tattulisi' lalang ri Kittaka, siagang ri apa le'baka Napau Isa.

²³Lalang ri nia'na Isa ri Yerusalem, ri wattunna allo Passua'-suarranna Paskaya, jaimi tau tappa' ri Ia lanri sikamma gau' appakalannasa' le'baka Nagaukang.

²⁴Mingka tena nipatappaki ri Isa ke'nanga, lanri Naassenna ngaseng ma'rupataua.

²⁵Tena naparallu nipauang ri passala'na massing rupataua, lanri Naassenna ngaseng apa niaka lalang ri atinna rupataua.