Read Makassar Version – KITTA' MATANGKASA YOHANES 20 Bible Online

YOHANES 20 - Makassar Version – KITTA' MATANGKASA bible

YOHANES 20

¹Ri bari'basa'na allo Minggua, ri wattu sassanna ija, a'lampami Maria Magdalena mange ri jeraka. Mingka ta'lesammi nacini' batu pattongko'na anjo jeraka.

²Jari larimi mange amboyai Simon Petrus siagang anjo ana' guru Nakamaseanga Isa, nampa nakana ri ke'nanga, “Nia' le'ba' angngallei maya'Na Batara, natakuassengai angkana kemaei naboli'.”

³A'lampami Petrus siagang anjo ana' guru Nakamaseanga Isa mange ri jeraka.

⁴Larimi ke'nanga sipa'rua, mingka lintakangangi lari anjo ana' guru Nakamaseanga Isa. Sa'genna rioloangangi battu mae ri jeraka.

⁵Attoa'mi antama' ri jeraka nanacini' kaeng pa'rokoka ta'dongko' lalang ri jeraka; mingka tantamayai.

⁶Amminawang bokomi Simon Petrus; na ri wattunna battu, tulusu'mi antama' ri jeraka. Nacini'mi anjo kaeng pa'rokoka ta'dongko'.

⁷Mingka kaeng nipasikkoka ri ulunNa Isa tambaniai anjoreng passangalinna tassa'laki pammantanganna, ta'lappa' baji'-baji'.

⁸Antama' tommi anjo ana' guru se'reanga. Nacini'mi anjo apa kajarianga, na'jari tappa'mo. (

⁹Sa'genna anjo wattua tenapa napahangi ke'nanga apa niaka tattulisi' lalang ri Kittaka angkanaya lattallasa' poleangi Isa battu ri kamateanga.)

¹⁰Le'baki anjo ammotere'mi anjo ana'-ana' gurunNa Isa.

¹¹Ammentemmi Maria Magdalena ri dallekanna anjo jeraka angngarru'. Lalang angngarru'na, attoaki antama' ri jeraka.

¹²Apaji nania'mo nacini' rua malaeka' ammakeang kebo'. Ammempoi anjo ruaya malaeka' ri bate pammantanganna maya'Na Isa, se're ri tuju ulunNa, nase're ri tuju bangkenNa.

¹³Akkuta'nammi anjo malaekaka nakana, “Angngapa nakiangngarru' ibu'?” Appialimi Maria nakana, “Nia' le'ba' angngallei maya'Na Batara, natakuassengai angkana kemae naboli'.”

¹⁴Le'baki akkana kamma, assailemi mae ri boko. Apaji nania'mo nacini' Isa ammenteng ri bokona. Mingka tanaassengai angkana Isa anjo nacinika.

¹⁵Akkuta'nammi Isa ri ia Nakana, “Ibu', angngapa nakiangngarru'? Inai kiboya?” Nakapangi Maria angkana pajama koko anjo taua. Jari nakanamo, “Bapa', punna ikatte ampaletteki anjo mayaka, kitulunga' nakipauanga' angkana kemae kiboli', sollanna akkulle mae kualle.”

¹⁶Nakanamo Isa ri ia, “Maria!” Assailemi Maria mae ri Isa, nampa nakana lalang bicara Ibrani, “Rabbuni!” (Battuanna “Guru”.)

¹⁷Nakanamo Isa ri ia, “Teako ta'galakiA', nasaba' tenapa naKunai' ri Manggea. Mingka a'lampamako mae ri sikamma sari'battangKu, siagang pauangi ke'nanga angkanaya kamma-kamma anne nai'Ma' ri ManggeKu siagang Manggenu todong, ri Allata'alaku siagang Allata'alanu todong.”

¹⁸Jari a'lampami Maria mange ampauangi ana'-ana' gurunNa Isa, angkanaya le'ba'mi nacini' Batara, siagang Batara le'ba' ampauang ngasengi anjo passalaka.

¹⁹Ri ia memang anjo allo Minggua, ri wattunna bangngimo, a'rappungammi ana'-ana' gurunNa Isa ri se'reang balla'. Nijoli ngasengi pakke'buka, lanri mallaki ke'nanga ri pamarentana tu Yahudia. Ti'ring nia'mi Isa ammumba, siagang ammenteng ri tangnga-tangngana ke'nanga, na Nakana, “Salamakko siagang salewangang ngasengko.”

²⁰Le'baki akkana kamma, Napappicinikammi limanNa siagang sa'rinNa mae ri ke'nanga. Sanna' ngasemmi rannuna ke'nanga ri wattunna nacini' Batara.

²¹Sikalipa pole Nakana Isa ri ke'nanga, “Salamakko siagang salewangang ngasengko. Sangkamma iNakke NasuroA' Manggea, sangkamma tomminjo naKusuro ngaseng tongko.”

²²Nampa Natui' ke'nanga na Nakana, “Tarimami RohNa Allata'ala.

²³ Punna nupammopporang dosana se'rea tau, nipammopporang tommi ri Allata'ala. Punna tanupammopporanga dosana se'rea tau tena todong nanipammopporangi ri Allata'ala.”

²⁴Nia' kalase'renna ri anjo ana' guru sampuloa anrua, iamintu Tomas, (nigallaraka i “Kambara'”), tenai ri wattunna Napappicinikang KalenNa Isa.

²⁵Nakanamo ana'-ana' gurunNa Isa maraenganga ri Tomas, “Ikambe le'ba'mi nicini' Batara!” Mingka appialimi Tomas nakana, “Punna takucinikapa bate pakua ri limanNa, natenapa nakujamai anjo bokka'Na le'baka nipaku, siagang tenapa kujappuki bokka'Na ri sa'rinNa, tena sikali kutappa'.”

²⁶Sidaminggu ribokoanganna, nia'mi pole a'rappungang anjo ana'-ana' gurunNa Isa ri anjo tampaka. Anjo wattua nia' tommi Tomas. Ta'joli ngasengi pakke'buka. Mingka nia'mi battu ammumba Isa siagang ammenteng ri tangnga-tangngana ke'nanga, na Nakana, “Salamakko siagang salewangang ngasengko.”

²⁷Nampa Nakana Isa ri Tomas, “Cini'mi anne limangKu siagang jamami. Pamaemi limannu nanujama sa'ringKu. Tea' mako bata-batai, mingka tappa' mako!”

²⁸Nakanamo Tomas ri Isa, “O Bataraku, siagang Allata'alaku!”

²⁹Nakanamo Isa ri ia, “Sai tappa' mako nasaba' nucini'Ma'? Mate'nei tau tappaka, mangKu tanaciniKa!”

³⁰Jai iji gau'-gau' appakalannasa' maraeng, le'baka Nagaukang Isa ri dallekanna ana'-ana' gurunNa. Mingka tena nanitulisiki lalang anrinni ri kittaka.

³¹Mingka nitulisi'mi sikammaya anne niaka nitulisi', sollannu tappa' ngaseng angkanaya Isa Iami Karaeng Mappasalama', Ana'Na Allata'ala; na lanri tappa'nu ri Ia, nanugappamo katallassanga.