Read Makassar Version – KITTA' MATANGKASA YOHANES 21 Bible Online

YOHANES 21 - Makassar Version – KITTA' MATANGKASA bible

YOHANES 21

¹Le'baki anjo Napappicinikammi pole KalenNa Isa ri ana'-ana' gurunNa, ri wattunna nia' ana'-ana' gurunNa ri Tamparang Tiberias. Kammaminne kajarianna:

²Nia' se're allo na'rappungang Simon Petrus, Tomas nigallaraka i Kambara', Natanael battua ri Kana ri Galilea, ana'-ana'na Zebedeus, siagang rua ana' gurunNa Isa maraenganga.

³ Nakanamo Simon Petrus ri aganna maraenga, “Erokka' a'lampa mange a'boya juku'.” Nakanamo aganna maraenga, “Lamminawang tongki'.” A'lampami ke'nanga mange ri biseanga. Mingka sa'genna sipattang bujuru' tanggappayai ke'nanga manna sikayu juku'.

⁴Ri wattunna appakkaramulamo ammumba alloa, nia'mi Isa ammenteng ri biring tamparanga. Mingka tanaassengai ke'nanga angkanaya Isa anjo niaka ammenteng.

⁵Nakanamo Isa ri ke'nanga, “Ana'-ana', nia' juku'nu?” Appialimi ke'nanga angkana, “Tena.”

⁶ Nakanamo Isa ri ke'nanga, “Buangi jalanu mae ri sa'ri kananna biseanga, nanuanggappa juku'.” Nabuammi jalana ke'nanga mange anjoreng. Mingka tanakulleami ke'nanga ambesoki ammotere' anjo jalaya, nasaba' sanna' jaina juku' lalang.

⁷Nakanamo anjo ana' guru Nakamaseanga Isa ri Petrus, “Batara anjo!” Nalangngere'na Simon Petrus angkanaya Batara anjo, napakemi bajunna (nasaba' tena na'baju anjo wattua) nampa a'lumpa' naung ri je'neka.

⁸Amminawang ngaseng tommi a'biseang ana'-ana' guru maraenga mae ri biring tamparanga, nanabeso' todong anjo jala rassia juku'. Tena nasiapa bellana ke'nanga battu ri bontoa. Kira-kira sibilangnganji metere' bellana.

⁹Ri wattunna naung ke'nanga battu ri biseanga, nia'mo nacini' ke'nanga bara pepe'. Irate ri anjo bara pepeka nia' ta'dongko' juku' siagang roti.

¹⁰Nakanamo Isa ri ke'nanga, “Angngerang sako pirang kayuang juku' beru nijakkalaka.”

¹¹Nai'mi Petrus ri biseanga, nampa nare'resang jalana mae ri bontoa. Rassi juku' anjo jalaya, nasanna' ngaseng lompona. Nia' sibilangngang limampulo antallu kayunna anjo jukuka. Mingka manna nakamma jaina anjo jukuka, tena tonja nasinre' anjo jalaya.

¹²Nakanamo Isa ri ke'nanga, “Maeko nakiangnganre.” Tenanniakka manna sitau ri anjo ana'-ana' gurua barani akkuta'nang angkana, “InaiKi' antu Bapa'?” Nasaba' naassemmi ke'nanga angkanaya Batara anjo.

¹³A'reppese'mi Isa mae ri ke'nanga. Naallemi anjo rotia naNapassareang mae ri ke'nanga. Kamma tomminjo, Napassareang tommi anjo jukuka mae ri ke'nanga.

¹⁴Iaminjo maka pintallunna Napappicinikang KalenNa Isa mae ri ana'-ana' gurunNa baku' attallasa'namo poleang battu ri kamateanga.

¹⁵Le'baki ke'nanga angnganre, Nakanamo Isa ri Simon Petrus, “Simon, ana'na Yona, maka lompoangangi pangngamaseannu mae ri Nakke na pangngamaseanna anne ke'nanga mae ri Nakke?” Appialimi Petrus nakana, “Kammatojengi Batara, Kiassengi angkanaya kukamaseangKi' Batara.” Nakanamo Isa ri ia, “Parakaimi ana'-ana' gimbalakKu.”

¹⁶Akkuta'nammi pole Isa maka pinruanna ri ia, Nakana, “Simon, ana'na Yona, maka nukamaseangA'?” Appialimi Petrus nakana, “Kammatojengi Batara, Kiassengi angkanaya kukamaseangKi' Batara.” Nakanamo Isa ri ia, “Parakaimi gimbalakKu ngaseng.”

¹⁷Akkuta'nammi pole Isa makapintallunna ri ia, Nakana, “Simon, ana'na Yona, maka nukamaseangA'?” A'jari si'nami atinna Petrus, lanri pintallummi akkuta'nang Isa ri ia. Jari appialimi pole Petrus nakana, “O Batara, sikamma apa-apaya Kiasseng ngasengi Batara. Kiassengi angkanaya kukamaseangKi' Batara!” Nakanamo pole Isa ri ia, “Parakaimi gimbalakKu ngaseng.

¹⁸Annaba sikali anne kanangKu: Angkanaya ri wattunnu rungka ija, kalennu ansikkoki aya'nu, siagang a'lampako ri kere-keremae situru' ero'nu. Mingka punna toa mako sallang, lanupajonjomi limannu, na tau maraeng ansikkokko, nampa naerangko a'lampa mae ri tampa' tanukaerokia.”

¹⁹(Lalang akkana kammana anjo Isa, Napaumi angkanaya antekamma sallang batena lamate Petrus lanri ero'na ampakala'biriki Allata'ala.) Le'baki anjo, Nakanamo Isa ri Petrus, “Amminawang mako ri Nakke!”

²⁰ Ri wattunna assaile Petrus, nacini'mi anjo ana' guru Nakamaseanga Isa nia' ri bokona. (Iaminne anjo ana' guru a'reppeseka ri Isa ri wattunna angnganre bangngi ke'nanga siagang akkuta'nanga ri Isa angkana, “O Batara inai ero' lampasikongkolangKi' Batara?”)

²¹Nacini'na anjo ana' guru Nakamaseanga Isa, akkuta'nammi Petrus ri Isa, nakana, “Antekamma anne taua?”

²²Appialimi Isa Nakana, “Ebara' angkana erokKa' natuli attallasa'na sa'gengKu battu poleang sallang, anjo teai urusannu. Mingka ikau, amminawang mako ri Nakke!”

²³Jari tassiara'mi anjo kabaraka ri ana'-ana' gurunNa ngaseng Isa, angkanaya talamateai anjo ana' gurua. Na sikontutojenna tena na Nakana Isa angkanaya talamateai anjo ana' gurua passangalinna Nakananaja: “Ebara' angkana erokKa' natuli attallasa' sa'gengKu battu, anjo teai urusannu.”

²⁴Iaminjo ana' gurua assarea kasa'biang ri passala'na ngaseng anne apa-apa kajarianga. Iatommi antulisiki anjo kasa'bianga. Na niasseng angkanaya kontutojengi anjo apa napaua.

²⁵Jai iji apa-apa maraeng Nagaukanga Isa. Mingka ebara' angkana lanitulisi' ngasengi anjo tasse're-se're, kupikkiriki angkanaya manna sibatu anne linoa tena tompa nalaganna' lanipammonei sikontu anjo kittaka punna lanitulisi' ngasengi anjo passalaka.