Read Makassar Version – KITTA' MATANGKASA YOHANES 3 Bible Online

YOHANES 3 - Makassar Version – KITTA' MATANGKASA bible

YOHANES 3

¹Nia' sitau pamimping agama battu ri golonganna tu Farisia, niarenga Nikodemus.

²Nia' se're wattu nabattu bangngi mange ri Isa. Nakana ri Isa, “Bapa' Guru, niassemmi angkanaya Allata'ala assuroKi' battu. Nasaba' tenanniakka manna sitau akkulle anggaukangi gau' appakalannasa' sangkamma le'baka Kigaukang, punna tena nanirurungangi ri Allata'ala.”

³Appialimi Isa Nakana, “Patappaki angkanaya, tenanniakka tau akkulle a'jari umma'Na Allata'ala, punna tena nanilassukang poleangi.”

⁴Nakanamo Nikodemus, “Antekamma batena lakkulle tau toaya lalassu' poleang? Maka lakkulle iji ammotere' antama' ri battanna amma'na nampa nilassukang poleang?”

⁵Appialimi Isa Nakana, “Kontu tojeng sikali anne kanangKu: punna tena nilassukang poleangi battu ri je'neka siagang RohNa Allata'ala, takkulleai taua a'jari umma'Na Allata'ala.

⁶Battu ri lahere'na rupataua, tau toana allassukangi, mingka battu ri rohna rupataua, RohNa Allata'ala allassukangi.

⁷Teako lannasaki punna Kukana: musti nilassukang poleang ngasengko.

⁸Mammiriki anginga mange ri nakaerokia; nilangngereki sa'ranna, mingka taniassengai nakabattuia siagang lanatujua. Kamma tomminjo tau nilassukang poleanga ri RohNa Allata'ala.”

⁹Akkuta'nammi Nikodemus nakana, “Antekamma lakkulle kajariang anjo kammaya?”

¹⁰Appialimi Isa Nakana, “Ikau guruko ri Israel; masa' tena nanuassengi?

¹¹Patappa'mi angkanaya: nipauang mako apa naassenga ikambe; siagang apa nacinikamo ikambe iatomminjo bawang nasa'bi ikambe; mingka tena ngaseng nuero' ampatappaki kasa'bianna ikambe.

¹²Tena nutappa' punna Kucarita ri kau ngaseng passala' apa-apa lalanga ri anne linoa; jari antekammako latappa' punna Kucarita ri kau passala'na surugaya?

¹³Tenanniakka tau le'ba' nai' ri suruga, pantaranganna Ia manurunga antama' ri linoa, iamintu Ana' Ma'rupataua.

¹⁴ Antekamma batena napanai' Na'bi Musa ulara' tambagaya ri sipolong kayu, wattunna nia' ri parang lompoa, sangkamma tomminjo batena lanipanai' Ana' Ma'rupataua;

¹⁵sollanna sikamma tau tappaka ri Ia lanagappai katallassang sitojennaya siagang mannannunganga.”

¹⁶Nasaba' lanri Nakamaseang duduna Allata'ala rupataua ri lino, sa'genna Napassareammo Ana' sitau-tauNa, sollanna inai-nai tappa' ri Ia tena nalapanra', passangalinna lanagappai katallassang sitojennaya siagang mannannunganga.

¹⁷Nasaba' tena naNasuroi battu Ana'Na Allata'ala untu' anghukkungi anne linoa, passangalinna untu' ampasalamaki.

¹⁸Inai-nai tappa' ri Ia, tena nalanihukkungi. Mingka inai-nai tena natappa', iami nihukkung ri Allata'ala, lanri tenana natappa' mae ri Ana' Sitau-tauNa Allata'ala.

¹⁹Iaminne passala'na nanituntuki: Battumi anjo singaraka antama' ri anne linoa, mingka nangaiangangi rupataua sassanga kala singaraka, lanri ja'dala'na ngaseng panggaukanna ke'nanga.

²⁰Inai-nai a'gau' ja'dala', iami angkabirisi Singaraka; taerokai battu mae ri singaraka, sollanna tena nakacinikang panggaukang ja'dala'na.

²¹Mingka inai-nai anggaukangi ero'Na Allata'ala, battumi mae ri singaraka sollanna a'nassa angkanaya anjo apa nagaukanga situruki ero'Na Allata'ala.

²²Le'baki anjo, a'lampami Isa siagang ana'-ana' gurunNa mange ri Yudea. Ammantammi siagang ke'nanga siapa are sallona, siagang anje'ne'mi tau.

²³ Anjo wattua tenapa nitarungkui Yohanes. Anje'neki tau ri Ainon, pammantangang tenaya nabella battu ri Salim, nasaba' anjoreng jai je'ne'. Battumi taua mae ri ia, na naje'ne'mo ke'nanga.

²⁵Nia'mo siapa are ana' gurunna Yohanes a'gea'-gea' siagang tu Yahudia, passabakkang atoranna pannangkasia batangkale.

²⁶A'lampami ke'nanga mae ri Yohanes, na nakana ke'nanga, “Pa' Guru, maka kiu'rangi iji tau le'baka kiagang ri ba'leanna anjo Binanga Yordan, le'baka kipappicinikang ri kambe? Kamma-kamma anne anje'ne' tongi tau, na'lampa ngasemmo taua mange ri Ia!”

²⁷Appialimi Yohanes nakana, “Takkulleai nia' apa-apanna rupataua, punna tanisareanga ri Allata'ala.

²⁸ Nulangngere'mi apa le'baka kupau angkanaya, ‘Teai inakke Karaeng Mappasalamaka. Inakke tau nisuroja' ri dallekanNa.’

²⁹Ia bunting bainea, bunting bura'nea pata. Anjo passari'battanganna bunting bura'nea poro ammentennaji anrurungangi siagang ampilangngeri kananna; na sanna' nangaina ampilangngeri sa'ranna anjo bunting bura'nea. Inakke kamma tomma' anjo. Sannang sikalimi atingku kamma-kamma anne.

³⁰Iami musti a'jari pila' niparalluangang, na inakke a'jari pila' kurang niparalluamma'.”

³¹Ia niaka battu rate ri suruga, iami la'biangang na sikamma apa-apa maraenganga. Apa battua ri lino, antamai ri golonganna tu linoa, siagang passala' apa-apa ri lino nabicara. Ia niaka battu rate la'biangangi na sikamma apa-apa maraenganga.

³²Ia nabicara apa-apa le'baka Nacini' siagang Nalangngere', mingka tenanniakka manna sitau ampatappaki kasa'bianNa.

³³Inai-nai ampatappaki kasa'bianNa, iami ammangakui angkanaya ma'nassa tojengi Allata'ala.

³⁴Nasaba' tunisuroa ri Allata'ala, Napabattui kana-kananNa Allata'ala, lanri nipassareang ngasemmi RohNa Allata'ala ri Ia.

³⁵ Nakamaseangi Manggea Ana'Na, na Napassareang ngasemmo koasaya ri Ana'Na.

³⁶Inai-nai ampatappaki anjo Anaka, iami langgappai katallassang satunggu-tunggua. Mingka inai-nai tamannurukia ri anjo Anaka, talanagappayai katallassanga. Iami lanihukkung ri Allata'ala sa'genna satunggu-tungguna.