Read Makassar Version – KITTA' MATANGKASA YOHANES 4 Bible Online

YOHANES 4 - Makassar Version – KITTA' MATANGKASA bible

YOHANES 4

¹Nalangngere'mi tu Farisia angkanaya anje'ne' tongi tau Isa, siagang jaiangangi ana'-ana' guru nagappa kala Yohanes. (

²Sikontutojenna teai KalenNa Isa anje'neki taua passangalinna ana'-ana' gurunNaji bawang.)

³Ri wattunna Naasseng Isa angkanaya nalangngere'mi tu Farisia anjo passalaka, a'lampami battu ri Yudea mange ri Galilea.

⁴Lalang a'lampaNa mange anjoreng, musti numaloi ri Samaria.

⁵ Jari anrapi'mi Isa mange ri se'reang kota ri Samaria, iamintu niarenga kota Sikhar. Anjo kotaya tena nabella battu ri tampa' le'baka napassareang Yakub mae ri ana'na iamintu Yusuf.

⁶Anjoreng nia' se're bungung, niarenga bungung Yakub. Sanna' mangnganna Isa napakamma pa'jappang. Jari assengkami ammempo ri birinna anjo bungunga. Anjo wattua kira-kira tette' sampulo anrua ri alloa.

⁷Na'lampamo ana'-ana' gurunNa Isa ammalli kanre ri kotaya. Tena nasallo, nia'mo sitau baine Samaria battu anynye'ro' je'ne'. Nakanamo Isa ri ia, “Ibu', maka akkullejA' kisare je'ne' inung?”

⁸

⁹ Appialimi anjo baine battua ri Samaria angkana, “IKatte tu YahudiKi' tuang, na inakke tu Samaria; angngapa naKippala' je'ne' ri nakke?” (Nakkana kamma nasaba' tena passisambunganna tu Yahudia siagang tu battua ri Samaria.)

¹⁰Appialimi Isa Nakana, “Ka'de' nanuasseng passareNa Allata'ala, siagang nanuasseng todong angkana inai appalaka je'ne' ri kau, mattantu ikau kalennu lappala' je'ne ri Ia, na Nasareko je'ne' katallassanga.”

¹¹Nakanamo anjo bainea, “Tena se'rotTa tuang, siagang anne bungunga teai sipato' lantanna. Battu kemaeKi' akkulle langgappa je'ne' katallassang?

¹²Boe-boena ikambe[1] iamintu Yakub ansareki' anne bungunga. Ia kalenna, battu anrinni tongi angngalle je'ne' lanainunga; kammayatompa ana'-ana'na siagang olo'-olo' naparakaia, anrinni ngasengi angngalle je'ne' inung. Maka Kikana lompoangangKi' na Yakub?”

¹³Nakanamo Isa, “Inai-nai angnginungi anne je'neka laturere poleangi.

¹⁴Mingka inai-nai angnginungi je'ne' Kupassareanga, tenamo nalaturere sa'genna satunggu-tungguna. Nasaba' anjo je'ne' laKupassareanga la'jarimi timbuseng je'ne' lalang ri kalenna, tassolonga assulu' na napassareang katallassang satunggu-tunggua.”

¹⁵Nakanamo anjo bainea, “Tuang, Kisarema' anjo je'neka, sollanna tenamo nakuturere poleang; siagang tenamo kuparallu pole battu angngalle je'ne' anrinni.”

¹⁶Nakanamo Isa, “A'lampamako, kioki bura'nennu, nampa ammoterekko mae anrinni.”

¹⁷Appialimi anjo bainea nakana, “Tena bura'nengku.” Nakanamo Isa, “Memang annabai kanannu.

¹⁸Nasaba' pillima mako le'ba' a'bunting, na bura'ne nuaganga kamma-kamma anne teai bura'nennu.”

¹⁹Nakanamo anjo bainea, “Kamma-kamma anne kuasseng maKi' angkanaya Na'biKi' padeng.

²⁰Anrinni ri bontoa boe-boena ikambe anynyomba ri Allata'ala, mingka nakana bansaTa anjorenji bawang ri Yerusalem tampa'na taua anynyomba ri Allata'ala.”

²¹Nakanamo Isa ri ia, “Tappa' mako angkanaya nia' se're wattu sallang natenamo nalanrinni ri bontoa, siagang tena tommo nalanjoreng ri Yerusalem, taua anynyomba ri Manggea.

²²Ikau ngaseng tu Samariaya, apa-apa tenaya nuassengi nualle nusomba. Mingka ikatte tu Yahudia, anynyombaki' mae ri Allata'ala niassenga, nasaba' battu lalangi ri tu Yahudia lammumba kasalamakkanga.

²³Mingka lanarapiki wattunna, ba'lalo narapi'mi wattunna, angkanaya lanri koasaNa RohNa Allata'ala nalanynyomba taua ri Manggea salaku Allata'ala matojenga situru' Nakaerokanga Manggea.

²⁴Nasaba' Roh anjo Allata'ala, jari lanri koasa RohNa Allata'ala bawang nakkulle anynyomba rupataua mae ri Manggea salaku Allata'ala matojenga.”

²⁵Nakanamo anjo bainea ri Isa, “Kuassengi angkanaya labattui Karaeng Mappasalamaka (nigallaraka Almasi). Punna niaki battu, Iami lampauang ngasengki' sikontu apa-apa tenaya nipahangi.”

²⁶Nakanamo Isa, “INakke minne. INakke minne battua, a'bicaraya siagang ikau.”

²⁷Anjo wattua ammotere'mi ana'-ana' gurunNa Isa. Lannasa'mi ke'nanga nacini'na Isa a'bicara siagang anjo bainea. Mingka tenanniakka manna sitau ri ke'nanga akkuta'nang ri anjo bainea angkana, “Apa paralluta ibu'?” yareka akkuta'nang ri Isa angkana, “Angngapa naKi'bicara siagang anjo bainea Bapa'?”

²⁸Nabokoimi pammoneang je'ne'na anjo bainea anjoreng nampa lari mange ri kotaya. Nakanamo ri tau niaka anjoreng ri kotaya,

²⁹“Umba mange anciniki tau akkullea ampauanga' sikontu apa le'baka kugaukang. Maka Iami kutadeng anjo taua Karaeng Mappasalamaka?”

³⁰Nabokoimi taua anjo kotaya nampa a'lampa mae ri Isa.

³¹Anjo wattua nikio'mi Isa ri ana'-ana' gurunNa mange angnganre. Nakana ke'nanga, “O Bapa' Guru, mae maKi' angnganre.”

³²Mingka appialimi Isa Nakana, “Nia' kanre ri Nakke, tenaya ngaseng nanuassengi.”

³³Massing sikuta'nammi ana'-ana' gurunNa Isa angkana, “Apa nia' tau le'ba' ampangngerangangi kanre?”

³⁴Nakanamo Isa, “Ia kanreKu iNakke, iamintu anturuki ero'Na Ia assuroA' battu, siagang ampa'le'baki jamang-jamang Napassareanga ri Nakke.

³⁵Nukana ngaseng, ‘Patambulang mami nawattu pakkattoanga.’ Mingka Kukana ri kau: Cinikimi tana-tana didiamo asenna, sadiami lanikatto!

³⁶Appakkaramulami natarima gajina tau akkattoa siagang appasse're wassele' untu' katallassang satunggu-tunggua. Jari tau appakioroka siagang tau akkattoa akkullei sipa'rannu-rannuang.

³⁷Annabami anne bicara angkanaya, ‘Se'reanga a'lamung, namaraenganga akkatto.’

³⁸Kusuroko mange akkatto ri tana tenaya nukaresoi. Tau maraeng anjama anjoreng, na ikau ngaseng antarimai wassele' jama-jamanna ke'nanga.”

³⁹Jai tu Samaria niaka anjoreng ri kotaya a'jari tappa' ri Isa. Nasaba' nakana anjo bainea, “Napauang ngasenga' sikontu apa-apa le'baka kugaukang.”

⁴⁰Jari wattunna assibuntulu' anjo tu Samariaya siagang Isa, napala' dudumi ke'nanga sollanna ammantang Isa siagang ke'nanga. Jari ammantammi Isa ruangallo.

⁴¹Ribokoanganna, pila' jaimi tau tappa' ri Isa, lanri apa-apa Napangngajarranga kalenna ri ke'nanga.

⁴²Nakanamo ke'nanga ri anjo bainea, “Tappa' ngaseng maki' anne, mingka teai lanri apa nupaua bawang ri kambe; mingka lanri kalennami ikambe allangngereki, naniassemmo angkanaya Ia memang tommi Karaeng Mappasalama'na anne linoa.”

⁴³Ri wattunna ruangallomo ammantang Isa ri Sikhar, a'lampami mange ri Galilea.

⁴⁴ Le'ba'mi Napau Isa angkanaya, “Tena nalanipakalompo se'rea na'bi ri pa'rasangang kalenna.”

⁴⁵ Mingka ri wattunna battu mange ri Galilea, sanna'mi rannuna ngaseng atinna taua anjoreng. Nasaba' nia' tongi ke'nanga ri Yerusalem ri wattunna Allo Lompona Paskaya. Nanacini' ngasemmo ke'nanga sikamma apa le'baka Nagaukang Isa ri Yerusalem.

⁴⁶ Le'baki anjo, ammotere'mi Isa mange ri Kana, ri Galilea. Anrinni minne le'ba' Isa ampinrai je'neka a'jari anggoro'. Anjoreng ri kotaya, nia' sitau pagawena karaenga, sitabang garring ana'na ri Kapernaum.

⁴⁷Nalangngere'na angkana niaki Isa battu ri Yudea mange ri Galilea, a'lampami mae ri Isa. Napala'mi sollanna mange Isa ri Kapernaum na Naballei ana'na la'biring duduamo mate napakamma garring.

⁴⁸Nakanamo Isa ri anjo pagawena karaenga, “Ka'de' tanucinika anjo gau'-gau' appakalannasa' le'baka Kugaukang, tena ngaseng nulatappa'.”

⁴⁹Appialimi anjo pagawena karaenga, “O, Tuang, akkaro-karoKi' battu, ri tenanapa namate anakku.”

⁵⁰Nakanamo Isa ri ia, “A'lampamako, a'jari baji' mintu ana'na.” Tappa'mi anjo taua ri kananNa Isa, nampa a'lampa.

⁵¹Ri tangngana aganga battumi palayang-palayanna anruppai nangngerang kabara' angkana, “A'jari baji'mi anatta tuang.”

⁵²Akkuta'nammi ri ke'nanga angkana, tette' siapa nappakkaramula ammari rammusu'na. Appialimi ke'nanga angkana, “Subangngi, kira-kira tette' se're ri tangngana alloa nammari rammusu'na.”

⁵³Nau'rangimi manggena anjo anaka angkanaya iaminjo wattua na Nakana Isa ri ia, “A'jari baji' mintu ana'nu.” Jari a'jari tappa'mi anjo taua siagang sikontu bone balla'na, mae ri Isa.

⁵⁴Iaminjo gau' appakalannasa' makaruaya Nagaukanga Isa ri wattunna nia' battu ri Yudea mange ri Galilea.