Read Makassar Version – KITTA' MATANGKASA YOHANES 7 Bible Online

YOHANES 7 - Makassar Version – KITTA' MATANGKASA bible

YOHANES 7

¹Le'baki anjo a'lampami Isa ri kere-keremae ri pa'rasangang Galilea. Taerokai mange ri daera Yudea, lanri ero'na tukoasana tu Yahudia anjoreng ambunoi.

² Anjo wattua a'birimmi narapi' Allo Lompo Pa'ballakang Leko'-leko Kayua.

³Jari nakana ngasemmo sari'battanNa Isa ri Ia, “Bokoimi anne tampaka siagang a'lampa maKo mange ri daera Yudea, sollanna akkulle todong nacini' ana'-ana' gurunNu apa-apa Nugaukanga.

⁴Tenanniakka tau ancokkoi apa-apa nagaukanga punna eroki a'jari masahoro'. Punna Nugaukang apa-apa kammaya anjo, musti naasseng ngasengi sikontu rupataua ri lino!” (

⁵Nasaba' manna sari'battang KalenNa ngaseng tena natappa' ri Ia.)

⁶Nakanamo Isa ri ke'nanga, “Untu' iNakke, tenapa narapiki wattungKu; mingka untu' ikau ngaseng akkulle sambarang wattu.

⁷Tena olonu lanakabirisi anne linoa. Mingka iNakke nakabirisi memangA' anne linoa, lanri tuli Kupauanna anne linoa angkanaya ja'dalaki panggaukanna.

⁸Ikau ngasemmo kalennu a'lampa mange anjoreng ri passua'-suarranga. INakke tena Ku'lampa, nasaba' untu' iNakke tanarapikapi wattungKu.”

⁹Kammaminjo kananNa Isa mae ri sikamma sari'battanNa, nammantammo ri Galilea.

¹⁰A'lampana ngasemmo sari'battanNa ri anjo passua'-suarranga, a'lampa cokko-cokkomi Kale-kalenNa Isa. Tena tau angngassengi ri wattunNa a'lampa.

¹¹Lalang nigaukanna anjo passua'-suarranga, niboyami Isa ri tukoasana ngaseng tu Yahudia. Akkuta'nammi ke'nanga angkana, “Kemaei Isa?”

¹²Jaimi tau ampa'bici'-bicikangi Isa. Nia'mo angkana, “Tau baji' anjo taua.” Nia' tommo angkana, “Tena! Napasala oloangi tau jaia.”

¹³Mingka tenanniakka manna sitau ero' a'bicara silambusu'na ri passala'na Isa, lanri malla'na ke'nanga ri tukoasana ngaseng tu Yahudia.

¹⁴Attangnganamo passua'-suarranga, nia'mi antama' Isa ri Balla'Na Batara, nampa appakkaramula angngajara'.

¹⁵Lannasa' ngasemmi tukoasana tu Yahudia, siagang nakanamo ke'nanga, “Antekamma nakkulle jai kamma Naasseng anne taua, natale'baka assikola?”

¹⁶Appialimi Isa Nakana, “Apa Kupangngajaranga teai pangngajarangKu, mingka pangngajaranNa ia anjo assuroA ri Nakke.

¹⁷Inai-nai ero' anturuki ero'Na Allata'ala, lanaassengi angkanaya pangngajarang battu kemae anjo Kupangngajaranga. Apaka pangngajarang battu ri Allata'ala yareka pangngajarang battu ri KalengKu.

¹⁸Inai-nai assare pangngajarang battu ri kalenna, anjo tau kammaya kala'birang untu' kalenna naboya. Mingka inai a'boya kala'birang untu' Ia anjo assuroai, anjo tau kammaya tau lambusu', tena balle-balle lalang ri kalenna.

¹⁹Sai le'ba'mi napassareang Musa ri kau ngaseng sikamma Naparentakanga Allata'ala? Mingka tenanniakka ri kau ngaseng anggaukangi anjo Naparentakanga. Angngapa nanuero' ngaseng ambunoA'?”

²⁰Appialimi anjo tau jaia angkana, “PongorokKo antu! Inai ero' ambunoKo?”

²¹Appialimi Isa Nakana, “Sirupaji apa Kugaukang ri allo Pammari-marianga, na nulannasa' ngasemmo.

²² Nasareko parenta Na'bi Musa sollannu assunna' — manna nasikontutojenna anjo sunnaka teai atorang battu ri Na'bi Musa, passangalinna atorang battu ri boe-boenu ri tenanapa nabattu Na'bi Musa. Lanri kammana, manna ri allo Pammari-marianga ero' tonjako ansunnaki taua.

²³ Punna nugaukangi anjo kammaya sollanna tena nudakkai atorang napabattua Musa ri passala'na anjo sunnaka, angngapa nularro ri Nakke lanri Kuballeina taua sibatu kale ri allo Pammari-marianga?

²⁴Teako angngadeli ri taua passabakkang apa-apa kacinikanga, passangalinna lanri kaadelang bawang.”

²⁵Le'baki anjo, nia' siapa are tu Yerusalem angkana, “Sai iaminne tau niboyaya, eroka nibuno?

²⁶Cini'mi antekamma bateNa appaero'-ero' a'bicara ri dallekanna tau jaia, na tenanniakka tau ero' akkana-kana ri Ia! Maka naassemmi pamarentata angkanaya Iaminne Karaeng Mappasalamaka?

²⁷Mingka punna battu anjo Karaeng Mappasalamaka, tenanniakka manna sitau angngassengi assala' kabattuanNa! Naanne taua niassengi angkanaya battu kemaei assala'na.”

²⁸Le'baki anjo, lalang angngajara'Na Isa ri Balla'Na Batara, a'gora lompomi Nakana, “Jari nuasseng ngasenjA' angkana inaiA' anne, siagang battu kemae assalakKu? Teai ero' KalengKu naKunia' battu. INakke nisuroA' ri Ia niaka koasana assuro ri Nakke, nakkullei nipatappa'. Mingka tena nanuassengi.

²⁹INakke Kuassengi lanri battu ri Iami assala' kabattuangKu, siagang Iami assuroA' battu.”

³⁰Anjo wattua, ero'mi ke'nanga anjakkalaki Isa. Mingka tena tau barani anta'galaki, lanri tenapa narapiki wattunna.

³¹Jaimi ri alla'na anjo taua a'jari tappa' ri Isa; nakanamo anne ke'nanga, “jari punna niaki battu anjo Karaeng Mappasalamaka, maka lajaiangangi gau' appakalannasa' Nagaukang naanne taua?”

³²Nalangngere'mi tu Farisia antekamma batena a'bici'-bici' anjo tau jaia ri passala'na Isa. Lanri kammana assama turu'mi ke'nanga siagang imang-imang kapalaya. Assama turu'mi ke'nanga assuroi pangawala'na Balla'Na Batara anjakkalaki Isa.

³³Nakanamo Isa ri anjo tau jaia lalang ri Balla'Na Batara, “Poro sinampe' maMa' nia' anrurungangko. Punna le'ba'mo sallang, lammotere'Ma' mae ri Ia assuroA ri Nakke.

³⁴LanuboyA' sallang mingka tenamo nukkulle ambuntulukKa'; nasaba' takkulleako battu mange anjoreng ri tampa' Kupammantangia.”

³⁵Nakana ngasemmo tukoasana tu Yahudia, massing para ia, “La'lampa kemaei anne taua nitakkullea ambuntuluKi? Apa eroKi a'lampa mange ri tu Yahudi pantarang pa'rasanganga, ri pa'rasanganna tu Yunania, naero' Naajara' tu Yunania?

³⁶Apa ero'Na naNakana laniboyai mingka takkulleaki' ambuntuluKi, siagang takkulleaki' battu mange ri tampa' Napammantangia?”

³⁷ Ri allo kala'busanna anjo passua'-suarranga, iamintu allo kaminang parallua, ammentemmi Isa lalang ri Balla'Na Batara. Nampa a'gora Nakana, “Inai-nai turere, musti battui ri Nakke angnginung.

³⁸ Ri passala'na tau tappaka mae ri Nakke, niaki tattulisi' lalang ri Kittaka angkana, ‘Battu lalang ri atinna assolong je'ne' assarea katallassang.’ ” (

³⁹RohNa Allata'ala anjo Nabicaraya Isa, lanatarimaya tau tappaka ri Ia. Nasaba' anjo wattua tenapa nipassareangi RohNa Allata'ala; lanri tenapa nanipakala'biriki Isa lanri kamateanNa.)

⁴⁰Jai tau allangngereki anjo apa Napaua Isa. Na nia'mo ri ke'nanga angkana, “Mattantuna Na'bi anne Taua!”

⁴¹Na maraenganga angkanai, “Iaminne Karaeng Mappasalamaka!” Mingka nia' tommo angkana, “Ha, maka labattu anjorengi ri Galilea Karaeng Mappasalamaka?

⁴² Kania' tattulisi' lalang ri Kittaka angkanaya anjo Karaeng Mappasalamaka sossoranna Daud siagang labattu anjorengi mae ri Betlehem, iamintu kamponna Daud.”

⁴³Kale'bakkanna a'gea-gea'mi ke'nanga passala' Isa.

⁴⁴Nia'mo ero' anjakkalaki Isa, mingka tenanniakka ero' anta'galaKi.

⁴⁵Ri wattunna ammotere'mo sikamma pangawala'na Balla'Na Batara, iamintu le'baka nisuro mange anjakkalaki Isa, akkuta'nammi imang-imang kapalaya, siagang tu Farisia ri ke'nanga, angkana, “Angngapa natena nuerangi mae?”

⁴⁶Appialimi anjo pangawalaka ngaseng nakana, “Edede, tenanniakkapa tau kamma Ia a'bicara!”

⁴⁷Nakanamo tu Farisia, “Maka napasala oloang ngaseng tommako anjo Taua?

⁴⁸Niakka pamarentata yareka tu Farisi tappa' ri Ia?

⁴⁹Mingka anne tau jaia tanaassengai hukkung napassareanga Musa, siagang manna antekamma nitunrai tommi ke'nanga.”

⁵⁰ Kalase'renna anjo tu Farisia iamintu Nikodemus, le'baka battu mange ri Isa. Nakanamo Nikodemus ri tu Farisi maraenganga,

⁵¹“Manuru' undang-undanga, takkulleai nihukkung se'rea tau punna tenapa nilangngereki kara-karana siagang punna tenapa nale'ba' niparessa panggaukanna.”

⁵²Appialimi ke'nanga angkana, “Barang tu battu tongko ri Galilea? Paressami Kittaka! Lanuassemmi angkanaya tena na'bi labattu ri Galilea.” [

⁵³Le'baki anjo, ammotere' ngasemmi taua ri balla'na.