Read Makassar Version – KITTA' MATANGKASA YOHANES 8 Bible Online

YOHANES 8 - Makassar Version – KITTA' MATANGKASA bible

YOHANES 8

¹Mingka Isa a'lampami mange ri Bonto Zaitun.

²Ammukona bari'basa', a'lampami mange ri Balla'Na Batara, siagang jaimi tau battu mae ri Ia. Ammempomi Isa, nampa Naajara' ke'nanga.

³Anjo wattua battumi siapa are guru-guru agama siagang siapa are tu Farisi angngerang mae ri Ia sitau baine nirapikanga a'gau' salimara'. Nasuromi anjo bainea ammenteng ri tangnga,

⁴nampa nakana ke'nanga ri Isa, “Pa' Guru, karapikangi anne bainea a'gau' salimara'.

⁵ Nia' atorang lalang ri hukkung napassareanga Musa angkanaya, anne baine kammaya musti nisambilai batu sa'genna mate. Kamma-kamma anne, antekamma panggappaTa?”

⁶Nakkuta'nang kamma ke'nanga, lanri eroki ke'nanga ampa'boyangi kasalang Isa sollanna akkulle ke'nanga assalakangi Isa. Mingka a'dunduji Isa, annulisi' siagang karemenNa naung ri buttaya.

⁷Ri wattunna pila' akkuta'nang ke'nanga, Naangka'mi ulunNa Isa nampa Nakana ri ke'nanga, “Inai-nai ri kau tena dosana, iamo rolong ansambilai batu anjo bainea.”

⁸Le'baki akkana kamma, a'dundumi ammotere' Isa nampa annulisi' pole ri buttaya.

⁹Nalangngere'na ke'nanga akkana kamma Isa, a'lampa tasse're-se'remi ke'nanga ambokoi anjo tampaka, appakkaramula kaminang toaya. Kala'busanna Isa mami ammantang siagang anjo bainea ammenteng ri pammentenganna.

¹⁰Naangka'mi ulunNa Isa nampa Nakana ri anjo bainea, “Kemae ngasengi ke'nanga? Tena manna sitau ansalakangko?”

¹¹Appialimi anjo bainea nakana, “Tena, Pa'.” Nakanamo Isa, “Baji'mi; iNakke tena todong Kusalakangko. Kamma-kamma anne a'lampamako, mingka teako a'gau' dosai pole.”]

¹² A'bicarami pole Isa mae ri tau jaia, Nakana, “INakke minne sanrapang singara'na linoa. Inai-nai amminawang ri Nakke, tena nala'jappa lalang ri sassanga, mingka nagappami singara'na katallassanga.”

¹³ Nakanamo tu Farisia ri Ia, “Anne iKau tonji ansa'bi KalenNu. Tena natojeng anne kasa'bianNu.”

¹⁴Appialimi Isa Nakana, “Manna naiNakke tonji ansa'bi KalengKu, mingka annabai anjo kasa'biangKu; nasaba' Kuassengi angkana battu kemae kabattuangKu, siagang kemae laKulampai. Ikau tena nuassengi angkana battu kemae kabattuangKu siagang kemae laKulampai.

¹⁵Ikau ngaseng, cara-carana rupataua nupake anghukkungi taua; mingka iNakke, manna sitau tania' tau Kuhukkung.

¹⁶Mingka ebara'na Kuhukkungi taua, adeleki bateKu antappuki hukkunganna nasaba' tena naKale-kalengKuja angngadeli. Niaki Mangge assuroA ri Nakke angngagangA'.

¹⁷Nia' tattulisi' lalang ri Hukkung napassareanga Musa angkana: Kasa'biang tojenga, iamintu kasa'biang battu ri ruaya tau.

¹⁸A'jari sa'bia ri kalengKu nia' rua — iamintu iNakke siagang Manggea, assuroA ri KalengKu.”

¹⁹Nakanamo ke'nanga, “Kemae ManggeNu?” Appialimi Isa Nakana, “Tena nanuassengA' siagang tena nanuassengi ManggeKu. Ka'de' nanuassengA', mattantu nuasseng tommi ManggeKu.”

²⁰Niaki lalang ri Balla'Na Batara angngajara' wattunna Napau ngaseng anne bicaraya. Anjorengi ri ampi'na patti-patti doe' pakkoro'bangnganga anjo wattua. Mingka tenanniakka manna sitau anjakkalaki Isa, lanri tenapa nanarapiki wattunna.

²¹Nakanamo pole Isa ri ke'nanga, “ErokKa' a'lampa sallang, siagang lanuboyA'; mingka lamate ngasengko lanri dosa-dosanu. Ri tampa' laKumangeia, takkulleako mange anjoreng.”

²²Nakanamo siapa are tu ammarentaya ri tu Yahudia, “Gassingka eroki Nabuno KalenNa kaNakana, ‘Ri tampa' laKumangeia, takkulleako mange anjoreng.’ ”

²³Nakanamo Isa ri ke'nanga, “Ikau ngaseng battu rawako; mingka iNakke battu rateA'. Ikau ngaseng tau battuko ri linoa; iNakke teaiA' tau battu ri linoa.

²⁴Lanri kammana minjo naKukana ri kau ngaseng, angkanaya lamate ngasengko lanri dosa-dosanu. Na memang lamateko lanri dosa-dosanu punna tena nutappa' angkanaya, ‘INakkeminne nikanaya INAKKE NIA'.’ ”[3]

²⁵Akkuta'nammi ke'nanga angkana, “InaiKo antu sitojenna?” Appialimi Isa Nakana, “Apa pole matu-matunna a'bicaraya siagang ikau ngaseng?

²⁶Jai iji passala' laKupau ri kau ngaseng siagang laKuadeliangko. Mingka Ia assuroA ri Nakke akkullei nipatappa'. Na Kupabattumi ri lino apa le'baka Kulangngere' battu ri Ia.”

²⁷Tanapahangai ke'nanga angkanaya passala' Manggea anjo Nabicara Isa mae ri ke'nanga.

²⁸Jari Nakanamo Isa ri ke'nanga, “Punna nipakatinggimi sallang Ana' Ma'rupataua, lanuasseng ngasemmi angkanaya, ‘INakkeminne nikanaya INAKKE NIA'.’ Siagang lanuassemmi angkanaya tena manna sirupa apa Kugaukang lanri ero' KalengKu. Mingka poro apa battuaji bawang ri Manggea Kupangngajarrang.

²⁹Na Ia assuroa ri Nakke, niaki angngagangA'. Tenale'baKa' nabalang parekang Kale-kalengKu, nasaba' tuli Kugaukangi apa Nakate'neanga atinNa.”

³⁰Le'baki Napau Isa yangasenna anjo, jaimi tau a'jari tappa' ri Ia.

³¹Nampa Nakana Isa ri tu Yahudi tappakamo ri Ia, “Punna attallasakko situru' ajarangKu, nampa mako amminawang tojeng-tojeng ri Nakke;

³²lanuassemmi Allata'ala tojenga, siagang lanri kammana minjo nula'jari maradeka.”

³³ Nakanamo ke'nanga, “Ikambe anne sossorannaki' Abraham. Tenale'bakapaki' ikatte nipare' ata ri tu maraenga! Apa nataba kananNu naNuangkana, ‘Nula'jari maradeka?’ ”

³⁴Nakanamo Isa ri ke'nanga, “Tojeng-tojengi anne kanangKu. Inai-nai a'gau' dosa, nipare' atami ri dosaya.

³⁵Na tena pammantangang tulina se'rea ata lalang ri ballaka; mingka Ia Anaka lammantangi lalang ri balla' sa'genna satunggu-tungguna.

³⁶Lanri kammana minjo, punna tena nilappassangko ri Anaka, tena nulalappasa' tojeng-tojeng.

³⁷Memang, Kuassenji angkanaya sossoranna ngasengko Abraham. Mingka ero' ngasengko ambunoA', lanri taerokako antarimai ajarangKu.

³⁸Apa Kucinika ri ManggeKu, iaminjo Kupau. Na ikau ngaseng, nugaukang tonji apa napangngajarang manggenu ri kau.”

³⁹Appialimi ke'nanga angkana, “Manggena ikambe iamintu Abraham.” Nakanamo Isa, “Ebara' ana'na tojengko Abraham, tantu nugaukang tommi apa nagaukanga Abraham.

⁴⁰Kupabattuang mako katojengang Kulangngereka battu ri Allata'ala, mingka ero' ngasengko ambunoA'. Na Abraham tena nakamma anjo panggaukanna!

⁴¹Panggaukanna ngaseng manggenu antu nugaukanga ngaseng todong.” Appialimi ke'nanga angkana, “Ikambe anne teaiki' ana'-ana' harang. Se'reji manggena ikambe, iamintu KalenNa Allata'ala.”

⁴²Nakanamo Isa ri ke'nanga, “Ebara' manggenu anjo Allata'ala, tantu lanukamaseangA', lanri iNakke battuA' ri Allata'ala. Teai ero' KalengKu naKubattu, passangalinna Allata'ala assuroA'.

⁴³Apa saba'na natanupahanga apa Kupaua? Lanri tenana nuttahang allangngereki apa Kupangngajaranga.

⁴⁴Ia manggenu iamintu Billisika, naia eroka nuturuki iamintu ero'na manggenu. Battu ri uru-urunaji napabuno memang anjo Billisika. Tena le'bakai mae ri katojenganga, lanri tena katojengang ri kalenna. Punna a'balle-balle, anjo biasa memanji ri ia, nasaba' kamma memanjinjo sipa'na. Iami paballe-balle, siagang iami nakabattui sikontu balle-ballea.

⁴⁵Mingka iNakke katojengang Kupau, na lanri kammana minjo natena nutappa' ri Nakke.

⁴⁶Inai ri kau akkulle ampa'butti angkanaya nia' dosa ri KalengKu? Punna katojengang Kupau, apa saba'na nutatappaka ri Nakke?

⁴⁷Inai-nai battu ri Allata'ala, tantu napilangngeri kananNa Allata'ala. Mingka ikau ngaseng, teaiko tau battu ri Allata'ala. Iaminjo saba'na nanutea appilangngeri.”

⁴⁸Appialimi anjo tu Yahudia ri Isa angkana, “Sai kammatojengi kananna ikambe angkanaya ikau mintu tu Samaria nasosoka setang?”

⁴⁹Appialimi Isa Nakana, “Tena nanasosoKa' setang. INakke Kupakala'biriki ManggeKu, mingka ikau ngaseng nuhina-hinaiA'.

⁵⁰Teai kala'birang untu' KalengKu Kuboya. Nia' se're ampa'boyangA' kala'birangKu, na Iami langngadeli taua.

⁵¹Annaba tojengi anne Kukanaya: inai-nai anturuki kanangKu tena nalamate sa'genna satunggu-tungguna.”

⁵²Nakanamo anjo tu Yahudia ri Isa, “Kamma-kamma anne niassemmi angkanaya ma'nassa nasosokKo setang! Kalenna Abraham matemi, kammayatompa na'bi-na'bia mate ngaseng tommi. Mingka iKau Nukana, ‘Inai-nai anturuki kanangKu, tena nalamate sa'genna satunggu-tungguna.’

⁵³Punna kalenna Abraham matemi, kammayatompa na'bi-na'bia mate ngaseng tommi, inaiKo antu? Maka lompongangKo na Abraham boena ikambe?”

⁵⁴Appialimi Isa Nakana, “Ka'de' nauntu' kala'birang KalengKu Kuboya, tena matu-matunna anjo kala'biranga. Ampakala'birikai KalengKu iamintu ManggeKu, nukanaya Allata'alanu ngaseng,

⁵⁵mingka tena nanuassengi. Mingka iNakke Kuassengi. Ebara'na Kukana tena naKuassengi, a'jari tu paballe-balleMa', sangkamma ikau ngaseng. Mingka iNakke Kuassengi siagang Kuturuki kananNa.

⁵⁶Sannang sikali nyawana manggenu Abraham lanri lanaciniki allongKu. Ba'lalo nacini'mi siagang sannammi nyawana!”

⁵⁷Nakanamo tu Yahudia ri Isa, “Tenapa limampulo taung umuru'Nu, na Nukana Nucini'mi Abraham?”

⁵⁸Appialimi Isa Nakana, “Sitojeng-tojenna Kukana ri kau ngaseng: tenapa nanilassukangi Abraham, naKunia' memammo iNakke.”

⁵⁹Massing angngallemi batu anjo tu Yahudia ero' nasambilai Isa; mingka a'lengu'mi Isa, nampa a'lampa ambokoi anjo Balla'Na Batara.